Is 52:6 - Chuj San Sebastian Bible

⁶ Yuj cha, 'oj c'och sc'ual, ax in yojcan pax 'el eb' in chon̈b' tic, 'oj nachjoc 'el yuj eb' to an paxtinnacn 'a eb', 'aynn̈ej pax 'ec' yet' eb', xchi Dios.

Chuj San Mateo Bible

⁶ Yuj chi', ol c'och sc'ual, ol yojtaquejel in chon̈ab' tic to Dios in, ol nachajel yuj eb' to a in ix in lolon d'a eb', xchi Jehová.

Is 52:6 ပူးပေါင်းရင်းမြစ်များ

Salmos 48:10

Alx cab' wach' paxti 'aych 'a smasnil yolyib'n̈q'uinl tic, yujto a moj wal yijx chan̈ a b'i. Yet' wal a jelnal tza b'on yaj smasnil tas 'a stojlal.

Ex 3:13

Xlajw cha, 'ix yaln pax Moisés 'ixtc 'a Dios: —Caw wal 'ajltac jun tic, q'uinloc an tzin 'at paxtinc 'a eb' wit israelal cha, tzwaln 'ixtc 'a eb': A qui Diosalec yet' eb' qui mam quicham, a tzin checn cot 'ayex, toto xin chi 'a eb', ax sc'anb'n am eb' 'anma chi 'ayin: ¿Tas sb'i jun tzal cha? xchi am eb' 'ayin. ¿Tas pax tzwutj ta'wc in b'a 'a eb'? xchi Moisés.

Ex 33:19

'Ix ta'w Dios 'a 'a: —Smasnil in wach'c'ojlal 'oj in ch'ox 'ayach, ax wal 'a ojltac ata 'oj walcn in b'i an Jehová in tic. 'Oj wac' in wach'c'ojlal 'a eb' 'aj tzyal in c'ojl tzwac'a, an̈jtona', 'oj 'o'ch pax in c'ojl 'a eb' 'aj tzyaln̈j in c'ojol.

Ex 6:3

An in ch'oxjnac in b'a 'a Abraham, 'a Isaac yet' 'a Jacob, Dios in, tztac' wuj smasnil. Cojn to ma'ix wac' yojcoc 'el eb' in b'i tic: TO AN JEHOVÁ IN.

Is 40:9

'Ex 'aj Sión, q'uen̈ec c'och 'a sjolm junc lum witz, tzex 'awj 'a caw 'ip ta', yic tzeyaln 'el wach' 'ab'ix. Ex 'aj Jerusalén, man̈ex xiw eya'n 'el eyaw, alc 'el 'ixtc 'a yoltc chon̈b' yic Judá: 'Iltec yaj qui Diosalec 'a tic, xe chi.

Is 42:9

'Iltec wal 'ix 'aj 'el'ch smasnil tas waljnac 'a yictax yaln̈taxi. Ax ticnec, 'ay jun tzo'n̈ xo tas mantzac wal 'ayex, a 'oj wala'. 'Aycto tzwaln cani, ya' sb'a mantzac uji, xchi Dios.

Is 49:23

A ewin rey, a ewin 'oj c'uytzanc eb' one cha, ax eb' 'ix reina a eb' 'ix 'oj cuchnb'eyc'oc eb'. A eb' rey cha, 'oj yic' 'ejm sb'a eb' 'ayach. Ata 'oj nachjoc 'el o'oj, chajtlto an ton Jehová in. A eb' tzin 'a'n 'och 'a sc'ojol, ma'oj can eb' 'a q'uixwc'ojlal, xchi Dios.

Is 60:16

Ax eb' nacion̈ cha, 'oj yac' eb' tas wach' 'oj e c'uxu'. 'Oj ex yac' servil eb' rey yet' tas wach' 'ay 'a 'a, 'icha tzyutj junc 'ix nunb'il ya'n chuw yune'. 'Ixta 'oj ex yutc eb' rey chi ex ya'n servil, ax eyojcan 'eli, to an Jehová in, e Diosal in to tztac' wuj smasnil, e Colmal pax waji.

Jeremías 31:34

Man̈x yowlalc 'ayt junc mach 'oj alnc 'a junc xo yit chon̈b' 'ixtic: 'Ojquej 'el Jehová, man̈ xchioc. Yujto an Jehová in, an tzwala, to smasnil eb' 'oj in yojcoc 'eli, wach'xam 'unin, wach'xam 'ichm 'anma'. 'Oj wac' lajwc smul eb', man̈x 'a b'a'n̈ 'oj in na cot smul eb' cha, xchi Dios.

Ez 20:44

Ex israel, a yic 'oj eyilnoc to matz wac' eyailal 'icha wal smoj tzex 'aj yuj e b'eyb'al mto yuj tas maysch'olnil tz'el e b'oni, palta to tz'o'ch in c'ojl 'ayex yuj yi'nb'ilc chan̈ in b'i, ata 'oj eyojcoc 'eli to an Jehová in, cojn in ton Dios in, xchi Dios.

Nm 23:19

A Dios man̈ lajnoc 'icha eb' 'anma'. Matz yac' 'es, matz jel snab'en. Toto 'ay junc tas tzyala, tz'el'chn̈ej yu'uj. May 'aj tz'ec' tas tzyala.