Is 31:4 - Chuj San Sebastian Bible

⁴ A Jehová a 'ix aln 'ayn 'ixtic: 'Icha wal yel yaw junc no 'ichm león tztan̈wj schib'ej, wach'xam niwn eb' 'ilm calnelu tzyoy sb'a 'a no', wach'xam jantc yel yaw eb' xib'tn cob' no', toc tzxiw no yuj eb'. 'Ixta wal 'oj wutc in tan̈wni eb' in chon̈ab', yic 'oj wul wa'nc owl 'a lum tzaln Sión.

Chuj San Mateo Bible

⁴ A Jehová Yajal d'a Smasanil ix alan d'ayin icha tic: Ayic tz'el yav noc' nivac choj, ayic van schianb'at junoc calnel noc' toxo ix yic'a', maxtzac xivlaj noc' ayic tz'el yav eb' tan̈vum calnel xib'tani, vach'chom tzijtum eb' tzoymaj d'a spatictac noc'. Icha chi' ol vutej in b'a, malaj mach syal in scachanoch vaan yic tzin emul in col tzalan Sion.

Is 31:4 ပူးပေါင်းရင်းမြစ်များ

2 Cr 20:15

'Ix yaln Jahaziel chi 'ixtic: Sictac tzex 'aj eyab'n e masnil ex 'aj Judá, yet' e masnil ex cajn 'a Jerusalén, yet' ach rey Josafat. 'Ixtc 'ix yutj Jehová yalni: Man̈ ex xiwoc, man̈ eyec xiw e b'a 'a yojltac jun tzo'n̈ soldado caw niwn sb'isl cha, yujto a jun owl cha, man̈ eyico'oc, wic an Dios in tic.

Ex 14:14

Man̈ ex 'och 'il, a Jehová a 'oj yac' owl eyu'uj, xchi Moisés 'a eb' 'anma cha.

Ex 14:25

'Ix laj 'el setetal scaruaje eb', man̈xtzac stac' sb'ey eb', 'ix laj yal-lanc eb' 'a 'ixtic: —'El coyc 'a eb' israel tic. Yuj eb' tzya'n Jehová owl quet'ec, xchi ewinac.

Is 10:16

Yuj cha, a Jehová tztac' yuj smasnil, a 'oj 'i'nc 'el yip eb' soldado caw jelan, atn eb' 'aych yipc sc'ojl win sreyl Asiria, 'icha to 'oj tz'a 'ejm sjelnal eb' chi yuj c'ac'.

Is 12:6

Ex 'aj Sión, 'el cab' eyaw yuj tzaljc'ojlal yujto a qui Diosal an̈ israel on̈c tic, atn jun Dios To Cojxni, caw 'ay smay, 'ayc' 'a qui calec, 'oj e chioc.

Is 30:30

A Jehová 'oj yac' 'ab'xoc sjaj to caw 'ay smay, chan̈ sq'ue yaw, ax sch'oxn 'el spoder. 'Oj ya' cot yowl sc'ojol, lajn wal 'icha sn̈ilchj te c'ac' tzsatn 'el smasnil tas, 'oj ya' cot chacxuxm'ic', niwc yaxn̈ab' yet' sacb'at.

Is 30:32

A yic 'oj ya'nc 'och Jehová syailal eb' 'aj Asiria 'a junjn 'ejem, ax eb' israel, 'oj b'itnoc eb' yet' arpa yet' tinab'. Caw 'ay xo smay yilx jun owl 'oj 'och cha.

Is 42:13

'Oj 'eltc Jehová yet' yowl sc'ojol, 'icha junc 'a'm owl tzq'ue yaw ya'n owal, ax yejm eb' 'ajc'ojl chi yu'uj.

Jeremías 50:44

'Oj in jaw 'icha wal junc no león tz'elt 'a swaymtacl sti a Jordán, wal 'a yajn̈ej tzq'ue'ch no 'a junc lum pan̈n 'a'lic 'aj wach' swa no calnelu, tzsactzic can 'at e no yuj no'. 'Ixta wal 'oj 'aj s'at eb' 'aj Babilonia chi 'elc wuj ta', ax jun mach sic'b'il 'el wu'uj, a 'oj wa'cn 'och yajlilc ta'. ¿Mach junc 'oj stac' slajb'tzan sb'a yip wet'oc? ¿Mach wal 'oj stac' sten sb'a wet'oc? ¿Mach wal junc yajl 'oj stac' ste'wtzan sb'a 'a wojltac?

Os 11:10

'Oj 'ochx tza'n eb' in chon̈b' wu'uj, ax yel waw 'icha no león. Yuj tz'el waw cha, ax scot eb' wunnal 'a 'aj tz'em c'u, caw wal tz'ib'x eb' yuj xiwlal ax sjaw eb' 'ayin.

Am 3:8

Smasnil 'anma tzxiwi, toto tz'el yaw no león. An xo, ¿tom ma'oj wal-l spaxti Jehová Cajlil, toto a tzaln 'ayin?

Zacarías 12:8

An Jehová in, 'oj in tan̈wc eb' cajn 'a Jerusalén cha. A eb' may wal sjelnal ya'n owl 'a scal eb' cha, caw wal 'oj jelnb'oc eb' 'icha rey David. Ax eb' yin̈tl David cha, a eb' 'oj jucb'tzan eb' 'a jelnal, 'icha to a jun wángel b'ab'l s'at 'a yojltac eb' mto 'icha to a 'in.

Zacarías 14:3

Palta yajn̈ej ax yelt Jehová yac' owl yet' jun tzo'n̈ nacion̈ cha, 'icha yutjnac ya'n owl 'a pecti'.

Zacarías 2:5

Palta an Jehová in, an 'oj in tan̈wj chon̈b Jerusalén, 'icha to 'oj woch oyn 'a spatquil 'icha junc c'ac' yic tzin satn 'el eb' 'ajc'ojol, ax 'a snan̈l chon̈b' chi 'oj in ch'ox in tzictznial, xchi Dios, xchi jun ángel cha.

Zacarías 9:15

A Jehová tztac' yuj smasnil, a 'oj colwjoc 'a eb' schon̈ab'. A yet' smejech eb', ax ste'x 'ejm eb' chuc chon̈b'al yuj eb', 'oj 'ajxoc ganar eb' 'ajc'ojl yuj eb'. Caw 'oj ya'l eb' schon̈b' chi yaw 'a scal owal, 'icha eb' 'u'm 'an̈. 'Oj 'elcn schic'l eb' 'ajc'ojl chi yuj eb', 'icha wal tzyac' schic'l no xajmb'al 'ay 'a yol niwc waso yic tztob'x 'ejm 'a yib'n̈ sch'ac junc yet'l xajmb'al.

Zacarías 9:8

An xo tic, 'oj in coln̈j eb' in chon̈b' cha, ax in tan̈wni eb' 'a eb' soldado tz'ec' 'a tic. A eb' 'ixtm 'anma', man̈x 'oj 'ixtxoc in chon̈b' yuj eb'. An wal caw 'oj in tan̈wc in chon̈b' cha, xchi Dios.

Apoc 10:3

Xlajw cha, 'ix 'awji. Caw 'ip x'awj 'icha yel yaw no león. Ax yic xlajw yawji, 'ay pax uque tzc'an̈ c'u 'ix paxtini.

Apoc 5:5

Palta 'ay jun 'a eb' 'ichm winc chi 'ix aln 'ayn 'ixtic: Man̈ ach 'oc'oc. A jun tzcuch León 'a scal eb' yin̈tl Judá, atn jun yin̈tl can win rey David, a 'a'jnac ganar. A 'oj stac' sn̈i'chtan uque seyo tic, ax sjacn ch'an̈ un̈ cha, xchi 'ayin.