Is 14:25 - Chuj San Sebastian Bible

²⁵ 'Oj in satl eb' asirio 'a sat in lu'um, ax wa'n lajwc 'el eb' 'a lum jolmctac witz, lum 'ay 'a yol in macb'en, ax wi'n 'el yailal 'aych yuj eb' 'a yib'n̈ eb' in chon̈ab'. Man̈x 'a pax b'a'n̈ 'oj 'ixtxoc eb' in chon̈b' chi jun 'ejm xo yuj eb'.

Chuj San Mateo Bible

²⁵ Ol in satel eb' aj Asiria d'a in chon̈ab'. Ol in satel eb' d'a lum jolomtac vitz d'a yol in macb'en. Ol vic'anel yaelal ayoch yuj eb' d'a eb' in chon̈ab', man̈xa b'aq'uin̈ ol ixtaj eb' yuj eb' junelxo.

Is 14:25 ပူးပေါင်းရင်းမြစ်များ

2 Cr 32:21

Yuj cha, 'ix schecn cot Jehová jun ángel yic tzwul satnc 'el smasnil eb' soldado caw tec'an, yet' eb' 'aych yajlil yet'oc, yet' eb' scapitan̈il scamplamento sreyl Asiria. Yuj cha, caw q'uixwc'ojlal xoj x'aj smeltzj jun rey chi 'a schon̈ab'. A yic x'och 'a yol yatut sdiosal, axta xmilx cham yet' espada yuj chawn̈ eb' yunnal.

Is 10:12

A yic tox xlajw 'el'ch 'icha tas nab'il yuj Dios 'a yib'n̈ tzaln Sión yet' Jerusalén, 'ixta to b'i'an, ax ya'n 'och syailal win sreyl Asiria cha. Yujto cob' xyij chan̈ sb'a, sb'an̈n sb'a yuj tas xlaj sb'o cha.

Is 14:5

'Ix smac'wecchjoc Jehová sc'occh win tu cha, atn sc'occh win yic yopiso,

Is 33:1

'Oltacch wal ach satm 'el 'anma', a ticnec mant 'a mach tzach satn 'eli, ach macm sat 'anma', mant 'a mach tzmacn a sat 'a junc tas. At 'a yic 'oj 'och wan a satn 'el eb' 'anma', atta 'oj a satx 'eli, at 'a yic 'oj 'och wan a macn sat eb' 'anma', atta 'oj macxoc a sat.

Is 52:2

Q'uen̈ec pax wan ex 'aj Jerusalén, ma'c 'el pocc 'ayex, to 'oj eyemx wocn 'a e despacho eya'n yajlil. Ex 'aj Sión 'icha to 'ayx 'och can presoal, 'ijec 'el e b'a 'a yaln̈ jun 'icha yugo 'ay q'ue 'a yib' e jaj cha.

Is 9:4

Yujto ach 'ix a satl jun chon̈b' 'ix 'i'n 'at eb' a chon̈b' tic 'a 'icha presoal, eb' x'a'n 'och yailal 'a eb' a chon̈ab'. Ach 'ix a satl eb' 'icha 'ajnc satl eb' 'aj Madián 'a yic pecti'.

Ez 32:22

Ata 'ayc' win sreyl Asiria yet' smasnil eb' soldado, oyn 'och eb' 'a stz'ey winac, atn eb' chamnc yuj owal.

Ez 39:4

'Oj lajwc cha, ax ach wa'n 'a yol sc'ab' chaml yet' eb' a soldado yet' pax smasnil eb' yic jun tzo'n̈ xo nacion̈ ajun et'oc. 'Oj a chamcn yet' eb' 'a lum jolmctac witz cha, ax no 'usej yet' smasnil e no calte'al noc' 'oj a chin yet' eb'.

Miqueas 5:5

A 'oj 'i'nc cot junc'ojlal. A yic 'oj jawc eb' asirio 'a yol qui nacion̈ tic, ax yoch eb' yac' owl 'a yol qui cuartel, a yic cha, til wal eb' qui yajlil to niwn yel'ch 'oj qui checb'ti yic tz'at ya'nc eb' owl yet' eb'.

Miqueas 5:6

A eb' chi 'oj 'at 'a'nc ganar yejm eb' 'aj Asiria yet' espada, atn snacion̈ win Nimrod. Caw 'oj qui colchjec 'el yuj jun qui yajlilec chi 'a yol sc'ab' eb' asirio cha, atn eb' xc'axw 'e't 'a qui mon̈jonec yuj yi'n 'ec' eb' qui lumec yalni.

Nahúm 1:13

'Oj ex in col 'elt 'a yol sc'ab' eb' asirio, ax in n̈i'chtan q'uen cadena 'aych 'ayx yuj eb', xchi Dios.

Zacarías 10:11

A yic 'oj 'ec' eb' 'a scal yailal, 'icha to yojl a mar tz'ec' eb', an 'oj wi'l yip a mar cha, ax a Nilo 'oj tup 'ejm a'. 'Oj wac' lajwc 'ejm sb'an̈quinal eb' 'aj Asiria, ax wa'n lajwc pax yopiso eb' yajl yaj 'a Egipto.