Ez 47:10 - Chuj San Sebastian Bible

¹⁰ Til wal eb' yamn chay 'oj jawc 'a sti a mar 'a En-gadi masnto 'oj c'och eb' 'a En-eglaim, ax laj ya'nc eb' tacjoc schim 'a sti a cha. Til wal 'oj 'aj no chay 'a yojl a', 'icha e no 'ay 'a yojl a Mar Mediterráneo.

Chuj San Mateo Bible

¹⁰ Tzijtum eb' yamum chay ol aj d'a sti' a'. A d'a En-gadi masanto d'a En-eglaim ol yac' tacjoc schimpa eb' yamum chay chi'. Man̈xo jantacoc macan̈il noc' chay ol q'uib' d'a a', icha smacan̈il schayil a' mar Mediterráneo.

Ez 47:10 ပူးပေါင်းရင်းမြစ်များ

Gn 14:7

Ax yic xmeltzj win rey Quedorlaomer yet' smasnil eb' ajun yet'oc, 'ix 'emch eb' 'a En-mispat, a jun lugar chi tzcuch pax Cades. Ata 'ix ya'cn lajwc 'el eb' smasnil tastc 'ix chachj yuj 'a yol b'e, 'a yol yic eb' amalecita. 'Ixta 'ix yutj can pax eb' ewin amorreo 'ay 'a yol yic Hazezon-tamar.

2 Cr 20:2

Xlajw cha, 'ix jaw jaywn̈ eb' wul yal 'a Josafat sreyl Judá 'ixtic: A 'a Edom yet' 'a junx sc'axpil 'ec' a Mar Muerto, ata tzcot nan̈l soldado yic tzwul ya'n owl et'oc. Yajx 'ec' eb' 'a Hazezón-tamar, xchi eb'. (A jun chon̈b' cha, atn pax tzcuch En-gadi.)

Salmos 104:25

A a mar, caw lewn sat a', may yalnb'il 'aj tzlajw c'och sti a'. Man̈x yalnb'ilc sb'isl no noc' 'ay 'a yojl a', 'ay no niwac, 'ay pax no cotac.

Is 19:8

Smasnil eb' yamn chay 'ayc' 'a sti a Nilo cha, yet' eb' tzlaj yac' 'ejm schim 'a yojl a', 'oj 'el yaw eb' yoc' yuj cusc'ojlal, ton̈j 'oj c'un cuschan̈ eb'.

Is 49:12

'Iltec, 'ay jun tzo'n̈ 'anma tzcot 'a caw najat, 'ay eb' tzcot 'a stojlal norte, 'ay eb' 'a stojlal 'aj tz'em c'u, 'ay pax jun tzo'n̈ xo eb' tzcot 'a yol yic Sinim.

Is 49:20

Ach Jerusalén, lajn ach 'icha junc 'ix 'ix tz'alj yune' yic 'actb'il can 'ix yuj yichmil. Ax tz'aji tzmeltzj eb' yune 'ix chi 'a schon̈ab', tzsayn eb' 'aj tz'aj cajan, palta caw witzn xo jun chon̈b' chi yuj 'anma'.

Ez 26:14

T'anmtac 'oj 'ajcn jun chon̈b' cha, lajn wal 'oj wutc can 'icha q'uen sam q'uen n̈el-li sat, man̈xtzac q'uib' sc'ultcal, ata 'oj yac' tacjoc eb' yamn chay schim, man̈x 'a b'a'n̈ 'oj b'o jun 'ejm xo.

Ez 26:5

'Oj can sjech'l jun chon̈b' chi 'a snan̈l a mar. Ata 'oj tacjoc schim eb' yamn chay. An tzwala to 'oj 'ijxoc 'ec' smasnil tas 'ay 'aych yuj jun tzo'n̈ xo nacion̈.

Ez 47:15

A smon̈jonal 'a stojlal norte, atn tic: Tzcot lum 'a sti a Mar Mediterráneo, tz'ec' lum 'a chon̈b' Hetlón, 'a chon̈b' Zedad,

Ez 47:19

Ax 'a stojlal sur, tz'atx smon̈jonal chi 'a chon̈b' Tamar, tz'ec' 'a 'aj 'ay a spac'b'a Meriba-cades, tz'e'x 'a 'aj 'ay jun ch'oln yic Egipto masnto 'a a Mar Mediterráneo.

Ez 48:28

A lum yic Gad cha, ata 'oj 'atn̈j smon̈jonal 'a stojlal sur, atn 'a smon̈jon Tamar, ax yec' 'a 'aj 'ay 'a spac'b'a Meriba-cades, ax yec' 'a lum ch'oln yic Egipto, masnto tzc'och lum 'a sti a Mar Mediterráneo.

Nm 34:6

A smon̈jonal 'a stojlal 'aj tz'em c'u, atnn̈ej sti a Mar Mediterráneo.

Mt 4:19

'Ix yaln Jesús 'a eb' 'ixtic: —'Ochn̈ec in cuywumoc, 'icha tzeyutj eyamn no chay tic, 'ixta 'oj eyutc eyi'n cot eb' 'anma 'ayin, xchi 'a eb'.

Mr 1:17

'Ix yaln Jesús 'a eb' 'ixtic: —'Ochn̈ec in cuywumoc, 'oj wa'ch eyopiso. 'Icha tzeyutj eyamn no chay tic, 'ixta 'oj eyutc eyi'n cot eb' 'anma 'ayin, xchi 'a eb'.

Josué 23:4

An xin pojcn 'ec' smasnil lum lum tic 'a scal junjn 'in̈tal. Man̈ cojnoc lum tox xquijec 'ec' tic xin pojcn 'ec' 'ayex, palta yet' jun tzo'n̈ xo lum tot 'oj eyi'q'ui, tz'atn̈j lum 'a a Jordán, masnto tzc'och lum 'a a Mar Mediterráneo 'a stojlal 'aj tz'em c'u.

A Ch'an̈ B'ab'el Libro Samuel 23:29

Xlajw cha, 'ix 'at David 'a jun tzo'n̈ q'uen n̈aq'uen 'a jun tzo'n̈ lugar caw 'ay smay 'a yol yic En-gadi, ata xcan cajan.

A Ch'an̈ B'ab'el Libro Samuel 24:1

A yic 'ix lajw ya'n Saúl owl yet' eb' filisteo, 'ix alx 'a 'a chajtlto a David, ata 'ayc' 'a lum cusltac lum 'a En-gadi.