Ez 42:13 - Chuj San Sebastian Bible

¹³ 'Ix yaln jun winc chi 'ayn 'ixtic: A jun tzo'n̈ cuarto 'ay 'a sti 'amc' 'a stojlal sur, yet' jun tzo'n̈ xo 'ay 'a stojlal norte, yicn̈ej eb' ya'mal 'och sti eb' 'anma 'a Dios yaji. Atn eb' tz'a'n servil Jehová, ata tzc'ux eb' jun tzo'n̈ xajmb'al tz'ajx 'a Dios. A pax ta tzmol eb' jun tzo'n̈ xajmb'al mto jun tzo'n̈ ofrenda tz'ajx yuj yajx lajwc mul, mto yuj stojloc mul cha. A jun tzo'n̈ cuarto cha, to yic Dios yaji.

Chuj San Mateo Bible

¹³ Ix yalan jun vin̈ chi' d'ayin icha tic: A jun pat d'a stojolal norte yed' jun ay d'a stojolal sur, aton juntzan̈ ay d'a stitac amac' d'a spatictac templo, an̈ej eb' vin̈ sacerdote ay yico'. Ata' schi noc' silab' eb' vin̈ to an̈ej Jehová ay yico', yujto a eb' vin̈ tz'ac'an servil Jehová. Ata' syac'paxoch eb' vin̈ juntzan̈ tas to yic Jehová yaji, aton ixim trigo tz'ac'ji ofrendail, ixim tz'ac'ji yed' noc' silab' tz'ac'ji yuj yac'ji tup mul yed' noc' silab' tz'ac'ji yuj stojoloc mul. A juntzan̈ cuarto b'aj tz'ac'ji juntzan̈ ofrenda chi' yic Jehová yaji.

Ez 42:13 ပူးပေါင်းရင်းမြစ်များ

Nehemías 13:5

yuj cha, 'ix ya'n jun niwquil cuarto 'a 'a, atn jun 'aj tzlaj molx q'uen ofrenda 'a yaln̈taxi, 'aj tzmolx incienso, jun tzo'n̈ yamc'ab', sdiesmoal 'ixm trigo, yal uva yet' aceite. A jun tzo'n̈ chi 'ix alxi to tz'ajx 'a eb' levita, 'a eb' tzb'itni, 'a eb' tan̈m puerta, yet' 'a eb' ya'mal 'och sti eb' 'anma 'a Dios.

Ex 29:31

Tzlajw cha, tze'n cot no mam calnelu cha, no tzc'anx yuj si'nb'ilc 'och junc mach 'a yopiso, ax schib'jal no', ata tza tz'an̈ 'a junc lugar sic'b'il 'el wico'oc.

Ez 40:38

A 'a yojl 'och sti junjn puerta cha, ata 'ay junjn cuarto 'a sti corredor, ata tzb'icx 'el no noc' tz'ajx xajmb'alil.

Ez 40:46

Ax jun cuarto q'ueln 'at 'a stojlal norte, yic eb' ya'mal 'och sti eb' 'anma', eb' tzn̈usn no xajmb'al, atn eb' yin̈tl can Sadoc, yet' eb' yin̈tl can pax Leví, cojn eb' tztac' ya'n servil Jehová, xchi 'ayin.

Ez 41:12

A 'a stojlal 'aj tz'em c'u, ata 'ay junx n̈a 'a sti 'el jun 'amc' cha. A jun n̈a cha, 35 metro schiquin, 45 metro spac'b'il, nan̈lyoxl metro spiml smuroal.

Ez 42:1

Xlajw cha, in yi'n 'el jun winc chi 'a sti 'el jun 'amc' 'ay 'a stojlal norte, in yi'n 'och 'a yojl jun tzo'n̈ cuarto 'ay 'a sti 'amc' 'a yojltac jun n̈a tzcan 'a stojlal norte cha, atn jun quiln 'och 'a spatc 'el yatut Dios cha. A jun tzo'n̈ cuarto chi 'a smasnil, 50 metro spac'b'il, ax 25 metro schiquin.

Ez 42:10

'a 'aj tz'el'ch jun muro 'a sti 'amc' 'a sti 'el cha. Ax 'a sti 'el jun 'amc' 'ay 'a stojlal sur, jun q'uelc'mb'a yaj yet' jun n̈a 'ay 'a stojlal 'aj tz'em c'u, jun quiln 'och 'a spatquil 'el smuroal yatut Dios, ata 'ay pax jun tzo'n̈ xo cuarto.

Lv 10:17

¿Tas yuj ma'ix e chi no xajmb'al 'a yamq'uil Mantiado? A jun xajmb'al cha, yicn̈ej Jehová yaji. Yuj cha, xya'n no 'ayex, yujto a yic tze chin no', tze cuchn can smul eb' chon̈ab', sec 'ixta wal tzyutj Jehová ya'n lajwc can smul eb' cha.

Lv 10:3

Xlajw cha, xyaln Moisés 'a Aarón 'ixtic: —Yuj jun tic, x'el'ch tas yaljnac Jehová 'ayin yic yaln 'ixtic: A eb' tzin 'a'n servil, yowlal 'ay cab' wel'ch 'a sat eb'. 'Oj in ch'oxli to niwn wel'ch 'a smasnil eb' israel, xchi Dios, xchi Moisés. Ax Aarón man̈x 'a tas 'ix yala.

Lv 14:13

A 'aj tzcham xon no tz'ajx xajmb'al-l yuj yajx lajwc mul, yet' no xajmb'al tz'a smasnil, ata tzmilx pax no quelm calnelu cha. A jay macn̈ no xajmb'al tic, yic win ya'mal 'och sti eb' 'anma chi tz'ajcn no'. Caw niwn yel'ch junc'aj no xajmb'al cha.

Lv 2:10

Ax jacx jun ofrenda tzcan cha, yic Aarón tz'ajcn yet' eb' yunnal. Caw niwn yel'ch jab'x cha, yujto yitb'eymn̈ej sb'a yet' jun tzo'n̈ ofrenda tz'ajx tz'a 'a wojltac cha.

Lv 2:3

Ax jacx ofrenda tzcan cha, yic Aarón tz'ajcn yet' eb' yunnal. Caw niwn yel'ch jab'x cha, yujto yitb'eymn̈ej sb'a yet' jun ofrenda tz'ajx tz'a 'a wojltac.

Lv 21:22

Tztac' sc'uxn eb' jun tzo'n̈ ofrenda cha, yet' smasnil jun tzo'n̈ xo tas to wic yaji,

Lv 24:9

Ax jun tzo'n̈ 'ixm pan tz'elcn cha, yic Aarón tz'ajcn yet' eb' yin̈tl 'a smasnil tiempo. Yowlal ata tzwaj eb' 'ixm pan chi 'a junc lugar to sic'b'il 'eli, yujto niwn yel'ch 'ixm pan chi 'icha jun tzo'n̈ xo xajmb'al tz'ajx tz'a 'a wojltac, xchi Dios.

Lv 6:19

'Ix yaln pax Jehová 'a Moisés 'ixtic:

Lv 6:29

A jun xajmb'al tic wicn̈ej yaji. Tzann̈j ewin yin̈tl eb' ya'mal 'och sti eb' 'anma', tzta'n̈j schin eb' no xajmb'al cha.

Lv 7:1

Wic yaj no xajmb'al tz'ajx yuj stojl mul. Atn wal jun checnb'il tic yuj tas tz'aj yajxi:

Lv 7:6

Smasnil ewin yin̈tl eb' ya'mal 'och sti eb' 'anma', tztac' schin eb' no xajmb'al cha, palta cojn 'a yamq'uil Mantiado, yujto a jun xajmb'al cha, niwn yel'chi.

Nm 16:40

A jun tic, cuynb'il x'ajcn 'a eb' israel, chajtlto cojn eb' yin̈tl Aarón tztac' yochch sn̈us incienso 'a yib'n̈ yet'l xajmb'al 'a yojltac Jehová. Yuj cha, toto 'ay mach tzb'on 'icha eb' x'och tza'n yuj Coré cha, 'ixta pax tz'aj eb' jun xo. 'Icha wal xyutj Jehová yaln 'a Moisés, 'ixta wal xyutj Eleazar jun tzo'n̈ cha.

Nm 16:5

'Ix yaln 'ixtc 'a Coré yet' 'a smasnil eb' ajun yet' cha: —Q'ui'nto 'a yic sq'uin̈b'ial, 'oj sch'ox Jehová mach wal eb' yic cha, mach eb' to yel sic'b'il 'el yu'uj, eb' 'ay yaln yic yoch 'a yojltac yet' jun tzo'n̈ xajmb'al. A mach 'oj sch'ox 'a qui calec, atn jun chi 'oj 'a'noc 'och jun tzo'n̈ xajmb'al chi 'a yojltac.

Nm 18:7

Palta ach tic yet' eb' onnal, cojn ex tztac' eya'n 'och sti eb' 'anma 'ayin, yic tze b'on junc munljel 'a 'aj 'ay yet'l xajmb'al, mto 'a yojltac 'och te cortina. A jun munljel cha, eyic yaji, yujto an 'ix wac' jun 'opiso tic 'ayex. Toto 'ay junc comn 'anma tzcob' ya'ch sb'a 'a jun munljel tic, tojln̈ej schami, xchi Dios.

Dt 21:5

Tzlajw cha, ax eb' ya'mal 'och sti eb' 'anma 'a Dios, atn eb' yin̈tl can Leví, tzc'och eb' 'a stz'ey no'. Yujto a eb' sic'b'il 'el yuj Jehová qui Diosalec yic tz'ajx servil yuj eb', ax eb' tzc'ann swach'c'ojlal Jehová chi 'a eyib'an̈. Yuj tas tzyalcn eb' cha, tz'ajx can lajwc junc owal, mto junc chacjb'al 'a yol e chon̈ab'.