Ez 28:23 - Chuj San Sebastian Bible

²³ 'Oj wa' cot yab'il 'a yib'n̈ eb' 'anma', ax sb'ey chic' 'a yol caye. Til wal 'aj 'oj cot eb' 'a'm owl cha, ax scham eb' 'anma chi smasnil. 'Ixta to b'i'an, ax yojcan 'el eb' to an ton Jehová in.

Chuj San Mateo Bible

²³ Ol vac'cot ilya d'a yib'an̈, ol b'ey chic' d'a yoltac scalleal. Masanil eb' cajan d'ay ol chamoc. Yalxon̈ej b'aj ol cot q'uen espada ol xicancham eb'. Icha val chi' ol aj yojtacanel eb' aj Sidón chi' to a in ton Jehová in svutej icha chi'.

Ez 28:23 ပူးပေါင်းရင်းမြစ်များ

Jeremías 15:2

Toto tzc'anb'j eb' 'ayach 'ajtil tz'at eb' cha, tzaln 'a eb' to an tzwal 'ixtic: A eb' to 'aych 'a yib'n̈ to a yab'il tzmilni, 'at cab' eb' chamnc 'a scal yab'il cha. Ax eb' to a owl tzmilni, 'at cab' eb' chamnc 'a owal. A eb' to a wejl tzmilni, 'at cab' eb' chamnc 'a 'aj 'ay wejl cha. Ax pax eb' to 'aych 'a yib'n̈ to 'oj yamchjoc 'at 'icha presoal, 'at cab' eb' 'icha presoal chi 'a chuc chon̈b'al, xchi Dios, xa chi 'a eb'.

Jeremías 51:52

Palta an Jehová in, an tzwala: 'Oj jawc wal jun c'ual yic 'oj wa'nc 'och yailal 'a yib'n̈ sdiosal eb' 'aj Babilonia, yet' 'a smasnil yol smacb'en, a eb' 'anma 'oj lajwc cha, caw 'oj 'el yaw eb'.

Ez 21:14

Ach 'anma', al yab' eb' et chon̈b' cha, to 'ay tas 'oj jawc 'a yib'n̈ eb'. Poc' a c'ab' yil eb', yujto caw wal 'ay smay jun espada cha, yel xo wal 'oj cot yowl jun chi smilwj yet' q'ue'en, tzanxn̈ej 'ajtil 'oj 'och chaml yuj q'ue'en.

Ez 21:16

'Oj milwjoc q'uen 'a swach' yet' 'a surito, 'oj milwjoc 'a schapaq'uil.

Ez 25:11

An̈jtona', 'oj wa'ch yailal 'a yib'n̈ eb' 'aj Moab, sec 'oj yojcoc 'el eb', to an Jehová in, an 'ixta tzwutj eb'.

Ez 25:17

Caw niwquil 'oj wutc in pacn in b'a 'a eb' yuj yowl in c'ojol, sec 'oj yojcoc 'el eb', to an Jehová in, to cojn in ton Dios in, xchi Dios.

Ez 25:7

Yuj cha, 'oj wi' chan̈ in c'ab', ax wa'n 'och eyailal. 'Oj ex wac' 'a yol sc'ab' jun tzo'n̈ xo nacion̈, sec 'oj 'ijxoc 'ec' smasnil tas 'ay 'ayx yuj eb'. Ax ex in satn 'el 'a scal jun tzo'n̈ xo chon̈ab', 'oj e lajw 'el 'a jun 'ejmn̈ej, sec 'oj eyojcoc 'eli, to an Jehová in, an 'ixta tzex wutej.

Ez 26:6

Ax eb' 'anma cajn 'a jun tzo'n̈ aldea 'ay 'a sti a mar cha, 'oj satl eb' smasnil yuj owal, sec 'oj yojcoc 'el eb', to an Jehová in.

Ez 30:4

'Oj 'och owl 'a Egipto, til wal 'anma 'oj cham yuj owl cha, ax yijx 'ec' smasnil sricoal. 'Oj ma'xoc can 'ejm smuroal, masnto 'aj 'ay yipnub'al yich. A yuj cha, ax xiw chan̈ eb' 'aj Etiopía.

Ez 32:30

A pax ta 'ayc' eb' xlaj yac' yajlil 'a stojlal norte yet' pax eb' yic Sidón. Caw jeln xlaj cob' yutc sb'a eb', xlaj xib'tn eb' 'anma', palta ax ticnec, junn̈j yaj eb' yet' eb' chamnc yuj owl cha, yujto man̈ wico'oc eb'. Caw wal tzyac' eb' sq'uixwloc 'a scal eb' chamnc cha, man̈x 'a yel'ch yaj eb' 'a scal eb'.

Ez 5:12

A junc'aj 'anma 'ayx tic, 'oj cham eb' yuj yab'il yet' yuj wejl 'a yol chon̈ab'. Ax junc'aj xo eb', 'oj tzu'xoc cham eb' yuj eb' 'ajc'ojl yajch 'ayx 'a sti 'el chon̈ab'. Ax eb' yoxc'ajil, 'oj in pechcn 'at eb' 'a scal jun tzo'n̈ xo nacion̈. Ax wi'n q'uet wespada 'a yol yet'ul, ax woch tza'n yuj eb'.

Ez 5:17

'Oj wa' cot wejl 'a e cal, yab'il tzcham 'anma yu'uj, no chiwjum noc' 'oj satnc 'el eyunnal, ax wa'n cot niwc owl 'a e cal, til wal mach 'oj cham yuj owl cha. An Jehová in, an tzwal jun tzo'n̈ tic, xchi Dios.