Ez 27:13 - Chuj San Sebastian Bible

¹³ An̈jtona eb' 'aj Grecia, eb' 'aj Tubal yet' eb' 'aj Mesec, tzwulc' eb' manwjoc 'ayach. Ax eb' meb'a 'anma', a jun tzo'n̈ yamc'ab' nab'a bronce, a chi tzya'cn eb' stojloc tas tzman cha.

Chuj San Mateo Bible

¹³ Yed' pax eb' aj Grecia, eb' aj Tubal yed' eb' aj Mesec smanvaj eb' ta'. A tas syac' eb' stojoloc tas sman chi', aton eb' checab' yed' juntzan̈ yamc'ab' nab'a bronce.

Ez 27:13 ပူးပေါင်းရင်းမြစ်များ

Gn 10:2

Atn sb'i eb' yunnal Jafet tic: Gomer, Magog, Madai, Javán, Tubal, Mesec, yet' Tiras.

Gn 10:4

Atn sb'i eb' yunnal Javán tic: Elisa, Tarsis, Quitim, yet' Dodanim.

1 Cr 1:5

Eb' yunnal Jafet: atn Gómer, Magog, Madai, Javán, Tubal, Mesec yet' Tirás.

1 Cr 1:7

Eb' yunnal Javán: atn Elisa, Tarsis, Quitim yet' Rodanim.

Salmos 120:5

An xo tic, caw 'oltaquin, ton̈j 'e'lb'a wec' jaye'oc c'u 'a lum Mésec, in can 'a scal eb' cajn 'ec' 'a lum Cedar.

Is 66:19

'Ay jun senya 'oj in ch'ox yil eb', 'oj wac' 'elcn jaywn̈oc eb' 'a scal owl cha, ax in checn can 'at eb' 'a jun tzo'n̈ nacion̈ tic: 'Ay eb' 'oj c'och 'a Tarsis, 'a Libia, 'a Lidia, atn jun chon̈b' chi 'aj caw jeln eb' 'anma sjulwji. 'Ay pax eb' 'oj c'och 'a Tubal, 'a Grecia yet' 'a jun tzo'n̈ chon̈b' 'ay 'a sti a mar. A eb' 'anma cha, may 'aj tzyab' eb' in b'inaxi, may pax 'aj tzyil eb' in poder. A 'a jun tzo'n̈ nacion̈ xwal tic, ata 'oj wac' yal-l eb' 'anma chi wab'xil.

Ez 27:12

Til wal tas 'ay 'ayach, yuj cha, a eb' 'aj Tarsis tzwulc' eb' manwjoc 'ayach, ax q'uen plata, q'uen hierro, q'uen estaño yet' q'uen plomo, a chi tzya'cn eb' stojloc tas tzmana.

Ez 27:19

An̈jtona eb' 'aj Dan yet' eb' 'aj Javán 'a yol yic Uzal, tzwulc' eb' manwjoc 'ayach. A tas tzya'cn eb' stojloc tas tzman cha, atn q'uen hierro wach' yaj sb'o'i, te yalil mirra yet' te canela.

Ez 32:26

Ata teln 'ec' sniwnal pax win sreyl Mesec yet' win sreyl Tubal, ax eb' soldado eb' chamnc 'a owal, oyn 'och eb' 'a stz'ey eb', yujto ya'jnac 'ejm eb' xiwc'ojlal 'a scal 'anma 'a yolyib'n̈q'uinl tic, a eb' cha, man̈ wico'oc eb'.

Ez 39:1

Ach 'anma', al 'a win Gog to an Jehová in, an tzwal 'ixtic: Ach Gog, yajl cob' aj 'a Mesec yet' 'a Tubal, tzwal ab'i', to 'ajc'ojl xo wajch 'ayach.

Dn 10:20

'Ix yaln 'ayn 'ixtic: ¿Ojc ama tas yuj in jaw wul ach wila'? A ticnec, 'oj wal 'ayach, tas jun tzo'n̈ tz'ib'b'il 'a ch'an̈ libro yic jun tzo'n̈ paxti caw yel: A ticnec, to 'oj in 'atx wac' owl yet' jun ángel syajlil Persia. Ax yic 'oj lajwc wa'n owl yet' cha, ax sjaw pax jun ángel syajlil Grecia. A yic tzwa'n owl yet' eb', may junc mach tzcolwj wet'oc, cojn wal Miguel, jun ángel syajlil chon̈b' Israel, a tzcolwj wet'oc.

Dn 11:2

A ticnec, 'oj wac' ojcoc 'el jun tzo'n̈ tas to caw yel 'oj ujoc. 'Ayt chan̈wn̈ eb' rey 'oj yac' yajlil 'a Persia cha, 'oj 'e'cn 'oxwn̈ eb', ax yoch win schan̈l cha. A jun cha, yel xo 'oj q'ue'choc ricoal 'a yib'n̈ 'oxwn̈ xo eb' cha. Yuj wal sricoal cha, ax yi'n wal yip eb' soldado, ax ya'n owl si'mb'il yet' jun sreyl Grecia cha.

Dn 8:21

Ax pax no chiwo xel cha, atn sreyl chon̈b' Grecia tzch'oxo. A jun sch'ac caw niwquil 'ay 'elt 'a snan̈l yol sat schab'il, atn jun b'ab'l rey tzch'oxo.

Jl 3:3

'Ix ya'n 'och eb' suerte 'a yib'n̈ eb' in chon̈ab', xchon̈x 'el eb' winc 'unn yuj eb' yet' eb' 'ix 'unin. A q'uen tumn schaj eb' stojloc eb' cha, ata slaj eb' q'uen 'a te 'an̈, yet' 'a 'ajmulal.

Jl 3:6

Caw najt xeyij 'at eb' 'anma 'ayc' 'a Judá yet' eb' cajn 'a Jerusalén, xe chon̈n can 'at eb' smosooc eb' griego.

Apoc 18:13

'Ay pax canela, yet' jun tzo'n̈ xo te su'q'ui sjab' tzc'uxxi, yet' jun tzo'n̈ incienso, mirra, perjuma, yal uva, aceite, 'ixm harina caw wach', yet' trigo. 'Ay no calnelu, 'ay pax no 'ictzum noc', 'ay no chej. 'Ay caruaje, 'ay pax eb' moso man̈ yico'oc sb'a.