Ez 23:37 - Chuj San Sebastian Bible

³⁷ Yujto sb'o eb' 'ajmulal 'a yol in c'ab', milm 'anma eb'. 'Ix yac' 'ejm sb'a eb' 'a jun tzo'n̈ yechl comn dios. 'Ix ya'n eb' jun tzo'n̈ yune xajmb'alil, 'ix yac' tz'a eb' 'ix jun tzo'n̈ wunnal chi yet'oc.

Chuj San Mateo Bible

³⁷ A eb' ix chi', ix mulan eb' ix d'a yol in c'ab', chic'tac sc'ab' eb' ix yuj b'aj smilcham yune'. Ix in yactejcan eb' ix, axo d'a comon dios ix och eb' ix ejmelal. Ix sn̈usantz'a yune' eb' ix silab'il d'a juntzan̈ comon dios chi', aton juntzan̈ vuninal ix vil sat yed' eb' ix.

Ez 23:37 ပူးပေါင်းရင်းမြစ်များ

A Ch'an̈ Schab'il Libro Yic Yab'ixal Eb' Rey 17:17

An̈jtona', 'ix ya'n eb' tz'a yunnal yet' yisl xajmb'al-l 'a jun tzo'n̈ comn dios cha, scuyn sb'a eb' snan 'el junc paxti', yet' 'ajchumal, 'ix swach' 'a'j 'at sb'a eb' 'a scal maysch'olnil 'a sat Jehová. 'Ixtnta 'ix yutj eb' stzuntzn cot yowl sc'ojl Dios 'a yib'an̈.

A Ch'an̈ Schab'il Libro Yic Yab'ixal Eb' Rey 21:6

Xya'n win tz'a yunnal xajmb'alil, scuyn sb'a win 'a jun tzo'n̈ xo b'eyb'al tic; atn wayjlil, 'ajchumal, tzc'umn win spixn eb' chamnac. Yel xo caw tu 'ix 'el sb'on 'a sat Jehová, caw 'ix tzuntzj cot yowl sc'ojl Dios chi 'a yib'an̈.

A Ch'an̈ Schab'il Libro Yic Yab'ixal Eb' Rey 23:10

'Ixtnta pax xyutj Josías ya'n juwc 'el jun lugar tzcuch Tofet 'a pan̈n yic Ben-hinom, 'a 'aj tz'ajx tz'a eb' 'unn xajmb'al-l 'a jun yechl tzcuch Moloc. 'Ixta 'ix yutj winac, sec man̈x 'a mach tzb'eylb'an jun b'eyb'al cha.

A Ch'an̈ Schab'il Libro Yic Yab'ixal Eb' Rey 24:4

yet' yuj eb' 'anma may smul 'ix yac' milxoc 'a Jerusalén. Yuj cha, man̈xtoc 'ix yac' Jehová niwnc'ojlal.

Is 1:15

A yic tzcob' ex leslwi, tzlaj cob' e mojchan̈ e c'ab' 'ayin, palta 'oj in c'ub'c 'el in sat 'ayex. Wach'xam cob' niwn tas tzeyal 'a e lesl cha, ma'oj wab'i', yujto milm ex cham 'anma'.

Jeremías 32:35

An̈jtona 'ix sb'o chan̈ eb' yet'l xajmb'al yic Baal 'a span̈nil lum yic Ben-hinom. Ata tzyac' tz'a eb' yunnal yet' yisl xajmb'al-l 'a Moloc. 'Ixta wal x'aj yoch smul eb' 'aj Judá, yic sb'on eb' jun tzo'n̈ tas to man̈oc in xwala, a tas tzb'o eb' cha, may tas x'ec' xon jac 'a in nab'en.

Jeremías 7:31

Ax 'a lum span̈nil lum Ben-hinom, ata sb'o eb' jun yet'l xajmb'al yic Tofet yic tzya'n tz'a eb' yunnal yet' yisl ta'. Palta man̈oc in xwac' sb'o eb', may 'aj 'ix 'ec' 'a in nab'en jab'oc.

Jeremías 7:6

Man̈x eyixtc eb' chuc chon̈b'al, eb' meb'a 'unn chamnc smam yet' eb' 'ix 'ix chamnc yichmil. Man̈x e mil cham eb' 'anma may smul. Man̈x eyac' 'emmquilal 'a jun tzo'n̈ comn dios tzex jun 'eli.

Jeremías 7:9

Tzex 'elc'wi, tzex milw cham 'anma', tze b'on 'ajmulal, tzeya'n cob' e ti 'a tas man̈ yeloc, tzeya'n tz'a incienso 'a jun comn dios tzcuch Baal, tzeya'n 'emmquilal 'a jun tzo'n̈ xo comn dios to may 'aj 'ix colwj 'ayex.

Ez 16:32

Lajn wal tzyutj sb'a Jerusalén 'icha junc 'ix 'ajmul 'ix 'ay yichmil, ax yic may yichmil 'ayq'ui, chucx win tzc'och 'a 'ix.

Ez 16:36

Caw wal may sq'uixwel, yic sjitn 'el sb'a 'a sat eb' xmuln yet'oc, yet' pax 'a sat jun tzo'n̈ yechl sdiosal caw yajb'entac cha. 'Ix yi'n can pax 'el schic'l eb' yune xyac' xajmb'alil.

Ez 16:38

Ax in b'eyc'ojlan yuj yajmulal yet' yuj smilm 'anma'il, 'oj wac' 'a yol sc'ab' chaml yuj yowl in c'ojl 'a yib'an̈.

Ez 16:45

A Jerusalén tic, 'icha to yune junc 'ix 'ix chacb'il 'el yichmil yu'uj, yet' pax eb' yune'. 'Ixta pax eb' 'ix nuljab'il cha, chacb'il 'el yichmil eb' 'ix yu'uj, yet' pax yune eb' 'ix. A 'ix nunb'il cha, hitita 'ix, ax win mamb'il, amorreo winac.

Ez 20:26

'Ix wa'n yixtc 'el sb'a eb' yet' xajmb'al, to a sb'ab'l 'unnal eb' tzyac' tz'a xajmb'alil. 'Ixta 'ix wutj eb', sec tzxiw chan̈ eb', ax yojcan 'el eb' to an ton Jehová in, to cojn in ton Dios in, xchi Dios, xa chi 'a eb' 'ichmtac winc cha.

Ez 20:31

A yic tzeya'n e xajmb'al, 'ipn eyixtn 'el e b'a, yujto a eb' eyunnal tzeyac' tz'a xajmb'al-l 'a jun tzo'n̈ yechl comn dios. Ax tz'aji, tzex cob' jawc wul e c'anb'c e b'a 'ayin. Wal yel ma'oj in ta'w xon 'ayex.

Ez 23:45

Palta 'oj b'eyc'ojlaxc eb' 'ix yuj ewin winc tojl snab'en. 'Oj b'eyc'ojlaxc eb' 'ix yuj yajmulal, ax sb'eyc'ojlax eb' 'ix yuj smilm 'anma'il, yujto niwn 'anma xcham yuj eb'.

Os 1:2

'Ix schan 'eln̈ej Jehová yich spaxtin 'ayin, xyaln 'ixtic: 'A eb' et israelal tic, 'ix ya'ch eb' smul 'a wojltac, xyi'n 'el sb'a eb' 'ayin, in yactn can eb' 'icha junc 'ix 'ajmul 'ix. Yuj cha, 'ij junc 'ix 'ajmul 'ix estziloc, ax yalj yune 'ix 'a scal yajmulal cha, xchi.

Os 3:1

'Ix yaln pax Jehová 'ixtc 'ayn an Oseas in tic: A ticnec, chamc'ojlej pax 'ix estzil, wach'xam sb'o 'ix 'ajmulal yet' eb' winc sc'umej. Palta to a 'ix tzwa'ch ch'oxnb'ilal 'a eb' et israelal, wach'xam xya'ch eb' israel snab'en 'a jun tzo'n̈ comn dios, xlaj yi'n 'at eb' te tacn̈ sat uva ofrendail 'a jun tzo'n̈ comn dios cha, palta 'oj in chamc'ojloc pax eb', xchi Dios 'ayin.

Os 4:2

Caw tzniwtj eb' laj sjelnc tas tzyala, tzlaj ya'nc eb' 'es. Tzmilw cham 'anma eb', tz'elc'w eb', cojxn̈ej 'ajmulal tzlaj sb'o eb', tzlaj yixtn eb' yit 'anma'il, jab'jb' scal tzlaj milw 'anma eb'.

Lv 18:21

An Jehová in, an tzwala. May cab' mach tzyac' yunnal xajmb'al-l 'a jun comn dios tzcuch Moloc. Toto tzyac' yunnal chi xamb'alil, tz'och smul 'ayin.

Miqueas 3:10

A tas tzeyij 'ec' can 'a eb' 'anma tze mila, yet' tas man̈ tojloc tzeyutj e b'onyaji, a yet' jun tumn chi tze b'o chan̈ Jerusalén, atn chon̈b' yic tzaln Sión.

Lc 13:34

Ax wal tic ex 'aj Jerusalén, caw tzlaj e mil cham eb' schecb' Dios. Ax jun tzo'n̈ xo eb' tzchecx cot yuj Dios 'ayex, ton̈j tzlaj e jul cham eb' yet' q'uen q'ue'en. Til xo wal 'ejm tzex wawtj cot 'ayin, 'icha junc caxtiln̈ tzyawtj cot yune', tzmoyni. 'Ixta tzex wutej, palta toxn matz yal e c'ojol.

Dt 12:31

Man̈ 'ichaoc tzyutj sb'a eb' cha, man̈ 'ixta'oc tzeyutj e b'a 'a Jehová, yujto a jun tzo'n̈ cha, yajb'il 'el eb' yuj Jehová Dios. A jun tzo'n̈ yajb'il 'el yuj cha, atn sb'eylb'ej eb' 'anma cha, yic tzyi'n 'ejm sb'a eb' 'a sdiosal. 'Ay wal eb' yel may snab'en, xyac' eb' tz'a yunnal yet' yisl xajmb'al-l 'a sdiosal cha.