Esdras 8:21 - Chuj San Sebastian Bible

²¹ Xlajw cha, xwaln 'ixtc 'a eb' wit chon̈b' cha: To tzon̈ 'ochc 'a c'ajb'c'ojlal 'a sti a Ahavá, sec wach' tzquijec 'ejm qui b'a 'a yojltac qui Diosalec. Tzqui c'annec 'a 'a, to tzon̈ yijec b'ey 'a wach' yet' eb' cunnalec yet' smasnil tas 'ay 'ayn̈ec.

Chuj San Mateo Bible

²¹ Ix lajvi chi', ix valani to tzon̈ och d'a tzec'ojc'olal d'a sti' a' nivan Ahava chi', yic vach' sco cha co mulej co chucal d'a yichan̈ co Diosal, sco c'ananpax d'ay to tzon̈ yic'b'at d'a vach'il yed' eb' cuninal yed' masanil tas ay d'ayon̈.

Esdras 8:21 ပူးပေါင်းရင်းမြစ်များ

2 Cr 20:3

Xlajw cha, 'ix yecn xiw sb'a Josafat, caw 'emmquil 'ix yutj yaln sb'a 'a Jehová. 'Ix ya'n alxc 'a smasnil eb' 'anma 'a yol yic Judá to tz'och eb' 'a c'ajb'c'ojlal.

2 Cr 20:4

Yuj cha, a smasnil eb' 'anma 'ay 'a smasnil chon̈b' 'a yol yic Judá, 'ix syam sb'a eb' 'a Jerusalén yic tzc'ann eb' scolwal Jehová yet'oc.

Esdras 8:15

An Esdras in tic, 'ix wac' syam sb'a eb' wit chon̈b' tic 'a sti jun a a tzcuch Ahava, 'oxe c'u on̈ 'ec' ta'. A yic x'ec' in saync jun tzo'n̈ xo eb' levita 'a scal eb' 'anma', yet' 'a scal eb' ya'mal 'och sti eb' 'anma 'a Dios, may junc eb' x'ilchj wu'uj.

Esdras 8:31

A yic lajchwe yoch b'ab'l 'uj, on̈ 'el 'a sti a Ahavá, 'a yol yic Babilonia yic on̈ 'at 'a Jerusalén. A qui Diosalec caw 'ix colwj quet' on̈, a on̈ coln 'el 'a yol sc'ab' eb' 'ajc'ojol yet' 'a eb' 'elc'm 'a yol b'e.

Nehemías 9:1

A 'a yic 24 yoch yucl 'uj cha, 'ix syamn sb'a eb' israel yic tz'och eb' 'a c'ajb'c'ojlal, xya'n 'och eb' spichl n̈achtac sat yuj scusc'ojlal, sjopnq'ue eb' lum 'a sjolom.

Ester 4:16

'Ixic, molb'tzej smasnil eb' quit chon̈b' cajn 'a yol chon̈b' Susa tic, 'och cab' eb' 'oxe'oc c'u 'a c'ajb'c'ojlal wuj an tic. May cab' tas tze c'uxu, may pax cab' tas tzeyu'j 'a 'oxe c'u cha, yet' 'oxe'oc 'ac'wal. An̈jtona pax eb' 'ix tzin 'a'n servil an tic, 'oj 'och eb' 'ix 'a c'ajb'c'ojlal wet'oc. 'Oj lajwc cha, ax 'at wilnc win rey cha, wach'xam man̈ 'ixta'oc yaln ley. Toto yuj cha, ax in milx cham jun, chamquin cab'i', xchi Ester.

Salmos 137:1

A 'a sti eb' a niwc a yic Babilonia, ata on̈ 'emc wocn coq'ui, yic xqui nanec cot Jerusalén.

Salmos 5:8

Mamin Jehová, yuj wal eb' 'ajc'ojl yajch 'ayin, yuj cha, quetzn b'ey et' wal 'a stojlal. A wal 'a junc b'e caw wach', ata tzin ej 'ati.

Salmos 5:9

¿Tom 'ay paxti yel tzlaj yal eb'? An̈j tas tu tzna eb'. Yuj tas tzyal eb' cha, yuj chi tz'atcn eb' 'anma 'a chamel. Tzyal eb' wach' paxti 'a chab'satil.

Salmos 8:2

Tza c'anlb'an eb' 'unin yet' eb' tz'ulc 'unin, yic tzyaln eb' wach' paxti 'ayach, sec wach' sictac tz'aj eb' 'ajc'ojol yet' eb' tzchichn 'och 'ayach.

Pr 3:6

Na cot Jehová yet' smasnil tas tzlaj a b'o', sec a 'oj e'n 'at 'a jun wach' b'eyb'al.

Is 30:21

Toto 'oj eyel 'a e b'e, ax e 'atcn 'a stojlal e wach' c'ab' mto 'a e surito, 'oj eyab' yalx jun paxti 'a e patc 'ixtic; man̈ ex 'at ta', yaj b'e 'a tic, a 'a tic tzex 'ati, 'oj xchioc.

Is 35:8

Ata 'oj 'ec' jun b'e, a jun b'e cha 'oj scuch Sb'e Eb' Yicxo Dios. A eb' man̈toc 'ic'b'il 'el smul 'a 'a, ma'oj stac' yec' eb' 'a jun b'e cha. A eb' maysch'olnil snab'en, ma'oj stac' sb'ey pax eb' ta'.

Is 42:16

A eb' matz uj yilni, 'oj wi't eb' 'a jun tzo'n̈ b'e to man̈ yojcoc. A q'uic'q'uinal, sacq'uinl 'oj wutc can 'a yojltac eb', ax wa'n pan̈ljoc eb' lum ch'olctac. Yowlal 'oj wac' 'el'choc jun tzo'n̈ tic 'a eb', ma'oj wactc can eb' schoc'oj.

Is 49:10

Man̈x 'oj yac' eb' wejel, mto tacn̈ti'al. Man̈x 'oj yab' eb' syal yuj sc'a'l yoc c'u, yujto 'ay in chamc'ojlal 'a eb'. 'Oj in jucb'tzoc eb', ax wi'n pax 'at eb' 'a 'aj tzpac' a a'.

Is 58:3

Yuj cha, xyaln eb' 'ixtic: Nab'an̈ej tzon̈ cob' 'och 'a c'ajb'c'ojlal 'aych on̈, toc tzela. Nab'an̈ej tzon̈ cob' 'och 'emmquilal 'aych on̈, toc tzach 'och 'il cuj on̈, xchi eb'. Yuj cha tzwaln 'ixtc 'a eb': Yel toni, a yic tzex 'och 'a c'ajb'c'ojlal cha, cojn tas tze nib'j e b'o', a chi tze b'o'o, tzlaj eyixtn eb' eyit 'anmal tzmunlj 'ayex.

Is 58:5

A jun tzeyal c'ajb'c'ojlal cha, to tzeya'ch e b'a 'a cusc'ojlal, tz'em pacn e jaj 'icha eb' te 'aj, tzlaj ex 'ec' c'otn yet' e n̈achtac pichl 'a yib'n̈ stan̈il c'ac'. Atn jun chi tzeyal cob' c'ajb'c'ojlal, tzeyaln paxi to chab'il ex wuj yet' jun e nab'en cha.

Jeremías 10:23

Mamin Jehová, wojc wal si'mb'il, to an̈ 'anman̈ tic on̈, man̈oc 'a yol qui c'ab' 'aych yuj tas tzon̈ 'aj 'el'ch on̈. May wal jac copiso 'a yib'n̈ tas 'oj jawc 'a cojltac on̈.

Jeremías 42:3

Tewan̈ 'a Jehová cujec, sec a 'oj ch'oxnc 'ayon̈ tas b'el 'aj 'oj qui 'atec, yet' tas 'oj qui b'o'ec, xchi eb' 'ayin.

Dn 9:3

Yuj cha, in leslwi, in tew 'a Jehová Dios. In 'och 'a c'ajb'c'ojlal, xwa'n 'och te pichl n̈achtac sat. In 'em wocn pax 'a scal q'uen stan̈il c'ac'.

Jl 1:14

'Awtjec cot smasnil eb' 'anma', 'ochn̈ec 'a c'ajb'c'ojlal yet' eb'. Molb'tzejec e b'a 'a yatut Jehová qui Diosal, yet' smasnil eb' yichmtac wincal chon̈ab', yet' smasnil eb' 'anma 'a jun nacion̈ tic yic tzex tew 'a Jehová.

Lv 16:29

A jun tic ley tz'ajcn 'a e cal 'a smasnil tiempo. A 'a yic lajn̈e yoch yucl 'uj, ata tzex 'och 'a c'ajb'c'ojlal ax israel ex tic, yet' eb' chuc chon̈b'al cajn 'a e cal. May junc mach tzmunlj 'a jun c'u cha,

Lv 16:31

A jun c'u cha, sc'ul 'iljelal, yet' pax c'ajb'c'ojlal, ley tz'ajcn 'a e cal 'a smasnil tiempo.

Lv 23:29

A mach matz 'och 'a c'ajb'c'ojlal 'a jun c'u cha, yowlal tzijx 'el 'a e cal.

Jonás 3:5

Ax eb' 'anma cajn 'a jun niwquil chon̈b' cha, eb' 'ichm 'anma' yet' eb' 'unin, 'ix ya'ch eb' sc'ojl 'a Dios. 'Ix 'och eb' 'a c'ajb'c'ojlal, 'ix ya'n 'och eb' te pichl n̈achtac sat, 'ixta xyutj eb' sch'oxn 'el scusc'ojlal yuj smul.

Jonás 3:7

Xlajw cha, xya'n win rey b'o jun ley yet' eb' 'ay yopiso yet'oc, xya'n alxoc 'el 'a smasnil yol chon̈b' Nínive. Xchi jun ley chi 'ixtic: May cab' junc on̈ec tzon̈ wac ticnec, may pax cab' junc on̈ec, tzca'c wa qui wacax, qui calnelu, may no tzca'c yuc' a'.

Nm 14:3

¿Tas laj yuj tzon̈ yijec 'at Jehová 'a jun lum lum cha, sec am ata tzon̈ chamc can ta yuj owal, ax eb' 'ix quistlec, eb' cunnalec, 'oj can eb' 'a yol sc'ab' eb' 'ajc'ojl yajch 'ayn̈ec cha? Yel xom wach' tzon̈ meltzjec pax 'a Egipto, xchi eb'.

Nm 14:31

Palta ax eb' eyunnal xeyal to tzcan 'a yol sc'ab' eb' 'ajc'ojl cha, 'oj wi'ch eb' 'a sat lum lum chi tze patquilj can 'el cha, sec ax eb' 'oj yac' tzaljoc sc'ojl 'a sat lu'um.

A Tas Sc'ulejnac Eb' Schecab' Jesús Hechos 2:39

Yujto 'ixta yutjnac ya'n can sti 'ayx quet' on̈, yet' 'a eyunnal, yet' pax 'a smasnil mach 'ay 'a najat. Yujto a Cajlil qui Diosalec, tzyac' Yespíritu 'a jantcn̈ej mach tzyawtj 'och yico'oc, xchi Pedro 'a eb'.

Jueces 20:26

Xlajw cha, ax eb' soldado israel smasnil, yet' smasnil eb' chon̈ab', 'ix 'atx eb' 'a scajnub' Dios 'a Bet-el. 'Ix 'oc' eb' 'a yojltac Jehová 'a smasnil c'u masnto xq'uic'b'i. May jac tas sc'ux eb', 'ix ya'n eb' xajmb'al tz'a'i, yet' xajmb'al yic junc'ojlal.

A Ch'an̈ B'ab'el Libro Samuel 7:6

Ax yic 'ix syamn sb'a eb' 'a Mizpa cha, 'ix yi'n q'uet eb' a a', xlaj secnc 'ejm eb' 'a yojltac Jehová. 'Ix ya'n 'och sb'a eb' 'a c'ajb'c'ojlal 'a jun c'u cha. Xyaln eb' 'ixtic: 'Ix 'och wal qui mul 'a Jehová, xchi eb'. Ax Samuel, 'ix jucb'tzan eb' yit chon̈b' 'a Mizpa.