Esdras 6:14 - Chuj San Sebastian Bible

¹⁴ Ax eb' tzjucb'tzan jun munljel cha, x'ochx eb' swach' b'oc yatut Dios, masnto xlajw sb'o'i, 'icha wal yaj yaln can eb' schecb' Dios, atn Hageo, yet' Zacarías yunnal Iddo. 'Ixtnta x'aj swach' b'o yatut Dios cha. 'Ix b'o 'icha 'ix yutj yaln sDiosal chon̈b' israel, yet' tas xyal eb' sreyl Persia, atn Ciro, Darío yet' Artajerjes.

Chuj San Mateo Bible

¹⁴ Yuj chi', a eb' israel scuchb'an jun munlajel chi', ix yal smunlaj eb' yic sb'oanxiq'ue templo chi' eb' icha ix aj yalan eb' vin̈ schecab' Dios, aton vin̈aj Hageo yed' vin̈aj Zacarías yuninal vin̈aj Iddo. Ix b'oel templo chi' icha ix aj yalan Jehová sDiosal Israel, icha pax ix aj yalan eb' vin̈ sreyal Persia, aton vin̈aj Ciro, vin̈aj Darío yed' vin̈aj Artajerjes.

Esdras 6:14 ပူးပေါင်းရင်းမြစ်များ

Esdras 3:8

A yic schab'l xo 'uj schan 'och schab'l ab'il sjapx eb' israel, 'ix 'el yich sb'ox yatut Dios jun 'ejm xo 'a Jerusalén. Eb' xb'oni, atn Zorobabel win yunnal Zalatiel, Jesúa win yunnal Josadac, yet' eb' ya'mal 'och sti eb' 'anma 'a Dios yet jun tzo'n̈ xo eb' levita, yet' smasnil eb' paxncta 'a Babilonia. 'Ix ya'ch eb' jun munljel chi 'a yol sc'ab' jun tzo'n̈ eb' levita to 'ec'b'al 'a junc'l ab'il sq'uinal.

Esdras 4:24

'Ixtnta 'ajnc yoch wan sb'o yatut Dios 'a Jerusalén 'a jun tiempoal cha, masnto yic schab'l ab'il yoch win Darío reyl 'a Persia.

Esdras 4:3

Palta 'ix ta'w Zorobabel yet' Jesúa yet' jun tzo'n̈ eb' yajl cha, xyaln eb' 'ixtic: —Ma'oj stac' qui mol b'onec chan̈ yatut qui Diosal tic on̈, cojn on̈ an̈ israel on̈ tic 'oj qui b'o', yujto 'ixta 'ix yutj yaln Ciro sreyl Persia, xchi eb'.

Esdras 5:1

A eb' schecb' Dios 'a jun tiempoal cha, atn Hageo yet' Zacarías, yunnal Iddo, xyaln eb' 'a eb' 'aj Judá yet' 'a eb' 'aj Jerusalén yuj tas 'ix yal sDiosal eb' 'a 'a.

Esdras 5:13

Palta a yic yab'lil yoch Ciro sreyloc Babilonia, xyaln ab'i' to tzb'ox q'ue wan sjel yatut Dios 'a Jerusalén.

Esdras 5:2

Xlajw cha, a Zorobabel yunnal Salatiel, yet' Jesúa yunnal Josadac, 'ix 'ochx eb' 'a munljel, sb'on pax chan̈ eb' yatut Dios 'a Jerusalén, 'ix colwj eb' schecb' Dios chi yet' eb'.

Esdras 6:3

A 'a yic yab'lil yoch Ciro reyal, xyaln winac to tzb'ox sjel yatut Dios 'a Jerusalén. Caw wach' tz'aj yejm can yipnub'al yich sec wach' ata tz'ajx xajmb'al 'a yojol, 27 metro tz'aj ste'il, 27 metro pax tz'aj schiquin.

Esdras 6:8

An rey Darío in, an tzwal 'ayex, to tzex colwj yet' eb' israel tzjucb'tzan eb' tzb'on sjel yatut Dios. A 'a q'uen tumn tz'ajx yac' eb' 'ay 'a sc'axpil 'e't a Éufrates 'a win rey, a 'a q'uen tz'elt stojl eb' tzmunlj cha, matz 'ec' tiempo yajxi, sec wach' matz 'och wan jun munljel cha.

Esdras 7:1

A yic 'aych win Artajerjes reyl 'a Persia, a yic cha, ata 'ayc' jun win ya'mal 'och sti' eb' israel 'a Dios 'a Babilonia, tzcuch Esdras. Ax eb' smam yichm 'aj cotnc yin̈til, atn eb' tic: Seraía, Azarías, Hilcías, Salum, Sadoc, Ahitob, Amarías, Azarías, Meraiot, Zeraías, Uzi, Buqui, Abisúa, Finees, Eleazar, yet' Aarón, win b'ab'l ya'mal 'och sti eb' 'anma 'a Dios.

Esdras 9:9

Wach'xam mosoal caji, palta ma'on̈ actjcan on̈. Ach qui Diosal on̈, 'ix a ch'ox a chamc'ojlal 'a q'uib'n̈ 'a sat eb' sreyl Persia. 'Ix 'ac' qui tzatzl on̈ yic tzqui b'on pax sjel atut 'aj pojnc 'ejmi, ach on̈ a tan̈wj 'a Judá yet' 'a Jerusalén tic on̈.

Nehemías 6:15

'Ix lajw sb'o muro 'a yic 25 yoch 'uj Elul; 52 c'u 'ix 'och munljel cha.

Is 44:28

An tzwal 'a win Ciro 'ixtic: Ach 'aych 'och yilmalc wu'uj, ach 'oj a b'o smasnil tas tzin nib'ej, xin chi 'a 'a. Tzwaln 'a Jerusalén: Ach tic 'oj a b'ox chan̈ jun 'ejm xo, ax yajx pax 'ejm yich watut jun 'ejm xo, xin chi 'a 'a, xchi Dios.

Hageo 1:1

A 'a yic b'ab'l c'u yoch swacl 'uj yic schab'l ab'il yoch win Darío reyal, ata in schec Jehová an Hageo in tic yic tz'at in paxtinc yet' win gobernador 'a Judá, atn Zorobabel, yunnal can Salatiel, yet' pax Josué win sat ya'mal 'och sti eb' 'anma 'a Dios, win yunnal can Josadac.

Hageo 1:8

'Ixquec 'a lum calcte', tzeyi'n cot te te ta', yic tze b'on pax chan̈ watut jun 'ejm xo. 'Ixta to b'i'an, ax in can cajn ta 'a tzaljc'ojlal, ax eyi'n chan̈ in b'i ta'.

Zacarías 1:1

A yic swajxquil 'uj yic schab'l ab'il xo yoch Darío reyal, ata xyal Jehová jun tzo'n̈ paxti tic 'ayn an Zacarías in tic, yunnal in Berequías, yixchicn in Iddo, schecb' Dios waji. Tzyaln 'ixtic:

Zacarías 1:16

Yuj cha, an Jehová in, an tzwal 'ixtic: A ticnec 'oj in meltzj 'a Jerusalén yuj in ch'oxni to tz'o'x 'och in c'ojl 'a 'a. 'Oj b'ox chan̈ watut ta jun 'ejm xo, ax yechtax chon̈b' Jerusalén yic tzb'ox chan̈ jun 'ejm xo, xchi Dios. Ax ticnec 'at al-l jun tzon̈ tic muc'uc, xchi jun ángel chi 'ayin.

Zacarías 4:9

A Zorobabel a 'ix 'a'n 'ejm yipnub'al yich jun watut tic, a pax 'oj lajnc 'el'chi. 'Ixta to b'i'an, ax snachj 'el yuj eb' in chon̈ab', chajtlto an Jehová in, tztac' wuj smasnil, an ach in chec coti.

Zacarías 8:9

A Jehová tztac' yuj smasnil, a tzaln 'ixtic: Te'n tzeyutj e b'a, ex to wan eyab'n jun tzo'n̈ paxti 'ix yalcn 'el eb' in checb' 'a yictax x'ejm yipnub'al yich watut sb'o'i, an Jehová in tztac' wuj smasnil.