Dt 4:28 - Chuj San Sebastian Bible

²⁸ Ata 'oj eyac' servil comn dios b'ob'il yuj 'anma', atn jun tzo'n̈ yechl b'ob'il yet' te te', mto yet' q'uen q'ue'en. A jun tzo'n̈ cha, matz yila, matz yab'i, matz wa'i, matz su'lej.

Chuj San Mateo Bible

²⁸ Ata' ol eyaq'uem e b'a d'a juntzan̈ comon dios b'ob'il yuj eb' anima d'a te te' yed' d'a q'uen q'ueen, max yal-laj yilani, max yab'laj, max yal-laj svaan junoc tasi, max yab'paxlaj jab'oc sjab' junoc tas.

Dt 4:28 ပူးပေါင်းရင်းမြစ်များ

A Ch'an̈ Schab'il Libro Yic Yab'ixal Eb' Rey 17:40

Palta a jun tzo'n̈ 'anma cha, ma'ix schaj xon eb' yab'i'; a yic eb' to 'ix wach' 'atcn eb' 'a scal yichm b'eyb'al; wach'xam tzcob' yaln sb'a eb' 'a Jehová yalni, palta an̈ja yaln sb'a eb' 'a jun tzo'n̈ sdiosal cha. 'Ixta pax eb' yin̈tl eb', 'ix sb'eylb'ej eb' 'icha sb'eyb'al eb' smam yichm eb' cha, an̈jan̈ej to sb'eylb'an eb'.

Is 26:14

A eb' cha, chamnc xo eb', man̈x 'oj pitzwc pax eb' jun 'ejm xo; man̈x b'a'n̈ 'oj checljoc chan̈ eb'. Lajn x'aj eb' yec' 'icha wewen, tox 'ix ac' syailal eb', 'ix a'n sat 'ejm snanb'il cot eb'.

Is 44:11

Smasnil eb' tzyac' 'emmquilal 'a jun tzo'n̈ yechl cha, 'oj q'uixwc can 'el eb'. A eb' tzb'on jun tzo'n̈ yechl cha, 'anman̈ej eb'. Toto tzmolb'tzej sb'a eb' smasnil 'a wojltac, yic tzin b'eyc'ojlan eb', caw wal 'oj tzq'uixw can 'el eb', ax xiw chan̈ eb'.

Is 44:12

A ticnec, 'oj quil tas tzyutj munljoc sb'a win tenm q'ue'en. Tzyij cot win cincel, ax yic tox 'ix tz'a q'uen q'uen chi yuj win 'a cal c'ac', tztenn tojlb'oc win q'uen yet' martillo. Tzb'o 'el'ch 'icha wal tznib'ej, yet' wal yip sc'ab' winac tzb'o'i. Palta toto may tas tzc'ux winac, tzcot swejel, tz'och stacn̈ti'al, caw tz'el yip, tzc'unb' pax cha'an̈.

Is 44:9

A eb' tzb'on yechl jun tzo'n̈ comn dios, may jac yel'ch eb', may pax yel'ch jun tzo'n̈ yechl tzchamc'ojlej eb' cha. A eb' tz'och 'emmquilal 'a jun tzo'n̈ cha, 'icha to matz uj yiln eb'. May snab'en eb', yuj cha, caw 'oj can eb' 'a q'uixwc'ojlal yu'uj.

Is 45:20

Tzyaln pax Dios 'ixtic: Jantcn̈ej mach 'atnc can 'eloc, molb'tzejc e b'a, tzex coti. Caw wal may jac e nab'en, yuj cha, a te te tzeya'ch e diosaloc, tzlaj e b'achnb'eyc'oc, tzeyaln e b'a 'a jun dios to matz tac' scolwji.

Is 46:7

Tzya'n q'ue 'a sjolm squelab', tzyi'n 'ati, tzya'n q'ue 'a sat junc mexa, sin̈n̈i tzyutj can 'a yet'ul sec matz 'ib'xi. Wach'xam jantc yawj 'och jun 'ay yic chi 'a 'a, yic tzc'ann scolwal, palta matz ta'w xon jun yechl cha, matz tac' scolx 'el jun chi 'a syailal yu'uj.

Jeremías 10:3

A sb'eyb'al jun tzo'n̈ nacion̈ cha, caw may jac yel'chi. A 'a calcte tz'at stzuc' cot eb' junc te yib' te', ax junc win josmte tzjosn yet' syamc'ab'.

Jeremías 10:5

A jun tzo'n̈ yechl cha, lajn eb' 'icha xib'tnub'al ch'ic 'a scal junc 'awb'en. Matz tac' spaxtini, yowlal to tzcuchx b'eyc'oc, yujto matz tac' sb'eyi. Man̈ ex xiw 'a jun tzo'n̈ cha, yujto matz tac' sb'on tas tu', matz tac' pax sb'on tas wach', xchi Dios.

Jeremías 10:9

A jun tzo'n̈ yechl cha, nab'a plata, ata 'ic'b'il cot 'a Tarsis, ax q'uen oro, ata 'ijxnac cot q'uen 'a Ufaz. A jun tzo'n̈ cha, b'ob'il eb' yuj eb' tenm q'ue'en, ax te q'uic'mucnac nip yet' te chac yilxi, a te 'aych spichloc, smasnil jun tzo'n̈ cha, b'ob'il eb' yuj eb' 'anma jeln snab'en sb'on jun tzo'n̈ tas.

Jeremías 16:13

Yuj wal cha, 'oj ex wi'l 'a sat jun lum tic, ax ex wa'n can 'at 'a junx nacion̈ to man̈ eyojcoc, man̈ yojcoc pax eb' e mam eyicham. A wal ta', sc'ual, yac'wlil 'oj eyac' servil jun tzo'n̈ comn dios, caw man̈x 'oj 'o'ch in c'ojl 'ayex, xchi Dios, xa chi 'a eb'.

Ez 20:32

Ma'oj wac' 'el'choc 'icha tas tze na'a, yujto cob' tzeyal 'ixtic: A te te', yet' 'a q'uen q'ue'en, ata 'oj calc qui b'a 'icha jun tzo'n̈ xo eb' nacion̈ 'a yolyib'n̈q'uinl tic, xcob' e chioc.

Ez 20:39

Ex israel, an tzwal 'ayx 'ixtic: Toto caw pit tzeyutj e b'a 'ayin, 'ixquec, 'at alc e b'a 'a jun tzo'n̈ e diosal cha. Palta 'ojquejec 'eli to 'oj c'och stiempoal ax eyaln pax e b'a 'ayin. Man̈x 'oj eyixtc 'el in b'i, yuj eya'n tz'a e xajmb'al 'a jun tzo'n̈ comn dios cha.

A Tas Sc'ulejnac Eb' Schecab' Jesús Hechos 19:26

Palta 'in tzeyila, tzeyab'n paxi, tas wan sb'on win Pablo. Tzyaln winac, chajtlto a jun tzo'n̈ dios b'ob'il yuj 'anma', man̈ diosoc. Til wal 'anma xyac' win sc'ojloc. Man̈ cojnoc 'a Efeso tic, palta quenxn̈ej ma'ix 'ajx sc'ojloc smasnil eb' 'aj Asia yuj winac.

A Tas Sc'ulejnac Eb' Schecab' Jesús Hechos 7:42

Yuj cha, 'ix yi'n 'el sb'a Dios 'a scal eb'. 'Ix 'actx can eb' sch'ocoj, sec tzyac' 'ejm sb'a eb' 'a jun tzo'n̈ c'anal 'ay 'a satcha'an̈. 'Ixta yutjnac jun schecb' Dios stz'ib'n cani, 'a 'aj tzyal 'ixtic: Ex israel, a wal yic yec' eb' e mam eyichm chawinc ab'il 'a lum cusltac lu'um, caw man̈oc 'ayn ya'jnac tz'a eb' xajmb'al yet' yofrenda.

Dt 28:36

A Jehová 'oj eyi'n 'at yet' e reyl sic'b'il 'och eyu'uj, 'a junc nacion̈ to man̈ eyojcoc, man̈ yojcoc pax eb' qui mam quichmec. Ata 'oj eyac' servil jun tzo'n̈ comn dios, b'ob'il 'a te te', mto 'a q'uen q'ue'en.

Dt 28:64

A Jehová 'oj e pechn can 'at 'a jun tzo'n̈ xo nacion̈, 'oj e sactzic can 'at 'a jun tzo'n̈ chon̈b' 'ay 'a smasnil yolyib'n̈q'uinl tic. Ata 'oj eyal e b'a 'a jun tzo'n̈ comn dios tzb'o yet' te te', yet' q'uen q'ue'en, jun tzo'n̈ to man̈ eyojcoc, man̈ yojcoc pax eb' qui mam quichmec.

Dt 29:17

'Ay 'ajtil xlaj quilc jun tzo'n̈ yechl comn dios, jun tzo'n̈ to yajb'il yuj Jehová, atn jun tzo'n̈ b'ob'il yet' te te', yet' q'uen q'ue'en, yet' plata, yet' oro. Atn 'a jun tzo'n̈ chi tzyal sb'a eb' 'anma cajn ta'.

Apoc 9:20

Palta ax eb' 'anma ma'ix cham yuj jun tzo'n̈ yailal cha, caw man̈ jac 'ix sna sb'a eb' yuj smul tzlaj sb'o'. Ma'ix yactj can eb' yaln sb'a 'a ewin demonio. Ma'ix yactj can pax eb' yaln sb'a 'a jun tzo'n̈ yechl tzalx 'och diosal, atn jun tzo'n̈ tzb'o yet' oro, yet' plata, yet' bronce. Tzb'o yet' q'uen q'ue'en, yet' pax te te'. A jun tzo'n̈ cha, matz yila, matz yab'i, matz b'ey paxi.

A Ch'an̈ B'ab'el Libro Samuel 26:19

Tzin tew 'aych ach wajlil, to tza chaj ab' tas 'oj wal an a checb' in tic: Toto a Jehová ach 'a'n 'och 'ajc'ojlal 'ayin, comnoc tz'el 'a sc'ojl schan junc ofrenda; palta toto yicn̈ej 'anma jun tic, ya' cab' Jehová scatb' 'a yib'an̈. Yujto in spechl eb' 'a lum lum to yic Jehová yaji, 'icha to tzin spechcn 'at eb' wac' servil jun tzo'n̈ comn dios.