Dn 7:28 - Chuj San Sebastian Bible

²⁸ Atn slajb' jun tzo'n̈ tic xalx can 'ayn an Daniel in tic. Caw in 'ochcn 'a somc'ojlal yu'uj. Caw sacb'el in sat yuj xiwlal, palta may xon junc mach 'aj 'ix wal-l jun tzo'n̈ paxti tic, xchi Daniel.

Chuj San Mateo Bible

²⁸ Aton slajvub'al juntzan̈ tas ix alchajcan d'ayin a in Daniel in tic. Ix te somchaj in c'ool. Ix tup in chiq'uil yuj xivelal, palta malaj junoc mach b'aj ix val juntzan̈ lolonel tic.

Dn 7:28 ပူးပေါင်းရင်းမြစ်များ

Gn 37:10

A wal yic xyaln José jun swaych chi 'a smam, yet' 'a eb' yu'tac cha, 'ix owx smam 'a 'a, xyaln 'a José 'ixtic: —¿Tas tzyal 'el'ch jun a waych chi jun? ¿Tom 'oj wem n̈ojn yet' a nun tic, yet' eco o'tac tic 'aych tzyal cha? xchi Jacob.

Gn 37:11

'Ixta x'aj swach' chichn 'och eb' yu'tac chi 'a 'a, ax win mamb'il cha, niwn sna yuj jun swaych José cha.

Dn 10:16

Ax x'aji, 'ay jun 'icha yilx 'anma', yajn̈ej x'och yamn 'a in ti'. Xlajw cha, xwaln 'a jun mach lin̈n 'ec' 'a wojltac chi 'ixtic: Ach wajlil, yuj wal jun in waych tic, in 'och 'a somc'ojlal, caw x'el wip xwab'i.

Dn 10:8

Yuj cha, in ch'ocjxoj 'ayn 'eq'ui yic 'ix wiln jun cha, caw in sacb'el yuj xiwlal, x'el wip xwab'i.

Dn 11:27

A wal tas 'ayc' 'a snab'en chawn̈ rey cha, cojn sb'on eb' tu 'a jun jun, a chi tzna eb' sb'oni. 'Oj mol 'em wocn eb' swa 'a junc mexa, ax ya'lan eb' 'es 'a 'a, palta may junc 'a eb' chawn̈ chi 'oj 'el'choc tas tznib'ej, yujto mantzac c'och jun sc'ul alb'il can yuj Dios.

Dn 12:13

Ach xo tic Daniel, caw te'nn̈ej tzotj a b'a, masnto 'a slajb' a q'uinal, atta 'oj elji. Ax 'a yic slajb' c'ul cha, atta 'oj a q'uex wa'an, 'oj a cha spac eco', xchi jun winc chi 'ayin, xchi Daniel.

Dn 12:9

'Ix yaln 'ayn 'ixtic: Mant a na yuj jun tzo'n̈ tic Daniel, yujto a smasnil jun tzo'n̈ tic, ton̈j 'oj molxoc cani, masnto 'oj jawc jun slajb' c'ual.

Dn 4:16

Caw 'oj juwc 'el snab'en, lajn 'oj 'ajcn snab'en 'icha no noc'. A jun yailal 'oj 'ec' 'a yib'n̈ cha, uque ab'il 'oj yac'a'.

Dn 4:19

Yuj cha, ax Daniel tzcuch pax Beltsasar, sictac 'ix 'aj snan jun rato, caw somchj snab'en yuj jun cha. Palta 'ix waln 'ixtc 'a 'a: Beltsasar, man̈ ach 'och 'il yuj jun in waych cha, yet' pax yuj tas tzyal 'el'chi, xin chi. 'Ix ta'w Beltsasar chi 'ixtc 'ayin: ¡'Ay, mamin rey, comnoc wal a 'a yib'n̈ eb' 'ajc'ojl yajch 'ayach, comnoc ata 'oj 'em tas tzyal 'el'ch jun a waych cha!

Dn 5:6

caw sacb'el win yuj xiwlal. Yuj wal jun xiwlal x'och 'a win cha, syamn 'och win yib'x sniwnal smasnil, caw x'el yip winac.

Dn 7:15

An Daniel in tic, caw in xiwcha'an̈, yic xwiln jun tzo'n̈ cha, in 'och 'a 'il yu'uj.

Dn 8:1

'Ix yaln pax Daniel 'ixtic: A yic yoxl ab'il xo yoch win Belsasar reyal, 'ix 'och junx in wayich, 'a spatquil xo jun wiljnac 'a b'ab'el.

Dn 8:17

Xlajw cha, xjaw Gabriel chi 'a in tz'ey. Caw in xiw yu'uj, in 'em cumnjoc 'a yojltac. 'Ix yaln 'ixtc 'ayin: Ach winac, 'ojquej 'eli to a tas tzyal 'el'ch jun x'el cha, atn tas 'oj ujc 'a slajb' c'ual, xchi 'ayin.

Dn 8:19

Xyaln 'ayn 'ixtic: 'Oj wal 'ayach tas 'oj ujc 'a yic wan slajw jun tiempoal tic. A jun xel cha, tzch'ox cot yuj slajb' c'ual.

Dn 8:27

An xo an Daniel in tic, caw x'el wip xwab'i, 'ix 'och in yailal jaye c'ual. Xlajw cha, xb'ox in c'ojol, in q'uex wa'an, 'ix in yamn pax 'och wiln wopiso 'ac'b'il yuj win rey. Palta caw wal an̈ja 'ayn 'och 'a somc'ojlal yuj jun tzo'n̈ tas wiljnac 'a in waych cha, yujto caw matz nachj 'el wu'uj, tas wal tzyal 'el'chi, xchi Daniel.

Mr 9:15

Ax smasnil eb' 'ayc' ta', yic xyiln 'at eb' Jesús cha, caw 'ix sat sc'ojl eb', yuj cha, caw carela 'ix 'at eb' scha'.

Lc 2:19

Palta ax 'ix María cha, ton̈j 'ix smol 'ix jun tzo'n̈ chi 'a snab'en, caw tznab'tan̈ej.

Lc 2:51

Xlajw cha, xpax yet' eb' 'a Nazaret. Yiclumn̈ej xyutj sb'a 'a eb', 'icha xon sley. Ax snun cha, smol jun tzo'n̈ chi 'a snab'en, caw tznab'tan̈ej.

Lc 9:44

—Cham wal eyab'n si'mb'il tas 'oj wal 'ayex: Man̈ eyac' sat 'a e c'ojol, yujto wach'xam 'Ochnc in 'Anma'il, palta 'oj wajx 'och 'a yol sc'ab' eb' 'ajc'ojol, xchi 'a eb'.