A Tas Sc'ulejnac Eb' Schecab' Jesús Hechos 13:39 - Chuj San Sebastian Bible

³⁹ A jun ley yic Moisés, caw matz tac' ya'n lajwc qui mulec. Palta tzann̈j mach tzya'ch sc'ojl 'a Jesucristo, c'uxn tz'ajx can lajwc smul eb' yu'uj.

Chuj San Mateo Bible

³⁹ A ley Moisés max yal-laj yac'an lajvoc co mul. Palta a mach tz'ac'anoch Jesucristo d'a sc'ool, slajvican smul smasanil yuuj.

A Tas Sc'ulejnac Eb' Schecab' Jesús Hechos 13:39 ပူးပေါင်းရင်းမြစ်များ

Job 25:4

Toc 'ay junc 'anma may smul 'a sat Dios, toxn may xon mach wach'.

Job 9:20

Q'uinloc cob' tzwala to caw wach' in, palta mun an tzwixtj 'el in b'a yuj tas tzwala. Toto tzwala to caw tojl in nab'en, palta a tas tzwal cha, a 'oj ch'oxnc 'el in paltail.

Salmos 143:2

Man̈ in a b'eyc'ojloc an a checb' in tic, yujto may junc 'anma tojl 'a ojltac.

Is 53:11

A yic tox xlajw 'ec' jun tzo'n̈ yailal chi 'a yib'an̈, ax stzalj pax yiln 'och spac jun syailal cha, to man̈ nab'an̈ejoc. Til wal eb' 'oj 'ojcan el jun schecb' Dios cha, 'oj 'ochcn eb' wach'l yu'uj, yujto a 'oj 'i'nc 'el smul eb' 'a yib'an̈.

Jeremías 31:32

An Jehová in, an tzwala to a wal jun in trato 'oj wac' yet' eb' cha, caw man̈ lajnoc 'icha jun in b'ojnac yet' eb' smam yichm eb', yic wi'n 'elt eb' 'a lum Egipto. A yic cha, 'icha to 'ochnc in quetzn 'a sc'ab' eb' yic wi'n 'elt eb'. Wach'xam lajn in 'icha junc winc yet' yistzil, 'ixta waj 'a eb', palta ma'ix syiclj eb' jun in trato cha.

Habacuc 2:4

Tz'ib'j can paxi, chajtlto a eb' maysch'olnil sb'eyb'al, caw wal tzb'an̈ sb'a eb', palta ax eb' tojl snab'en, pitznn̈ej eb', yujto tzin ya'ch eb' 'a sc'ojol, xchi Dios.

Lc 10:25

Xlajw cha, 'ay jun win cuywjum 'a ley yic Moisés, xq'ue lin̈an. Snib'j win yac' prowal Jesús. Yuj cha, sc'anb'n win 'ixtc 'a 'a: —Mamin, ¿tas yowlal 'oj in b'o', sec 'oj in cha in q'uinl 'a jun 'ejmn̈ej? xchi win 'a 'a.

Lc 10:28

—Wach' ton xotj aln 'ayin. Toto tza yiclj jun tzo'n̈ tic, 'oj a cha a q'uinl 'a jun 'ejmn̈ej, xchi Jesús 'a winac.

Lc 18:14

An tzwal 'ayex, a win tecm 'el tumn cha, yic mantzac pax win 'a yatut, yajn̈j cha, xyaln Dios to wach' win 'a sat. Palta ax win fariseo cha, ma'ix yal Dios to wach' win 'a sat. Yujto a eb' tzyij chan̈ sb'a, man̈x 'a jac yel'ch 'oj 'aj eb'. Ax eb' tzyij 'ejm sb'a, caw niwn yel'ch 'oj 'aj eb', xchi Jesús.

Jn 1:17

A Moisés ya'jnac can sley Dios 'ayn̈ec. Palta a Jesucristo tzch'oxn swach'c'ojlal Dios 'ayn̈ec. Tzya'n pax jun cuynb'il caw yel.

Jn 5:24

Wal yel tzwal 'ayex, a eb' tz'ab'n in paxti', tzya'n 'och eb' sc'ojl 'a jun checjnacn coti, atn eb' chi 'ay sq'uinl 'a jun 'ejmn̈ej. Man̈x 'oj 'at eb' 'a yailal, yujto tox 'ix 'el eb' 'a yol sc'ab' chamel, 'ix schaj eb' sq'uinal.

A Tas Sc'ulejnac Eb' Schecab' Jesús Hechos 10:43

Yictax pecti', 'aycto, yaln can 'el eb' schecb' Dios yab'xil Jesús. Yaljnac can junjn eb', chajtlto jantcn̈ej mach 'oj ya'ch sc'ojl 'a 'a, 'oj 'ajxoc can lajwc smul eb' yu'uj, xchi Pedro 'a eb'.

Ro 10:10

Tzyal Dios to wach'n̈ec 'a sat, yujn̈ej to tzca'c 'och qui c'ojl 'a Cristo yet' smasnil qui pixan. Tzon̈ colchjec, yujto tzcalc yet' qui ti', to a Jesucristo Cajlilec.

Ro 10:4

A Cristo 'a'jnac lajwc yopiso ley yic Moisés. Yujto tzann̈j mach tzya'ch sc'ojl 'a 'a, wach' eb' 'a sat Dios ticnec.

Ro 3:19

Cojquec, jantcn̈ej tas tz'ib'b'il can 'a ley, a tzaln 'a eb' 'aych 'a yol sc'ab', sec wach' may junc mach 'oj stac' scoln sb'a. Yuj cha, smasnil 'anma 'a yolyib'n̈q'uinl tic, 'oj b'eyc'ojlaxc eb' yuj Dios.

Ro 3:20

May junc mach wach' 'a sat Dios, yujn̈ej tzyiclj tas tzyal jun ley cha. Yujto a jun ley cha, cojn 'ay yopiso sch'oxni to 'ajmul on̈c qui masnil.

Ro 4:15

Yujn̈ej jun ley cha, tz'ajx cot yailal 'a yib'n̈ eb' 'anma'. Q'uinloc may jun ley chi ticnec, toto 'ixta', may am mach tztenn 'ec' jun ley cha.

Ro 4:24

Tz'ib'b'il can pax cujec. Yuj cha, tzyaln Dios to wach'n̈ec pax 'a sat, toto tzca'c 'och qui c'ojl 'a 'a. A 'a'jnac pitzwc pax Cajlil Jesús 'a scal eb' chamnac.

Ro 5:1

A ticnec, tox 'ix yal Dios to wach'n̈ec 'a sat, yujto tzca'c 'och qui c'ojl 'a 'a. Yuj cha, junc'ojlal xoj tzon̈ 'ajc yet'oc, yujn̈ej Cajlil Jesucristo.

Ro 5:20

'Ac'b'il can ley yic Moisés, yic tzwach' checlj 'el tas maysch'olnil. Wach'xam caw 'ix niwtj maysch'olnilal cha, palta ax swach'c'ojlal Dios, yel xo wal caw niwn yel'ch 'a yib'an̈.

Ro 5:9

Al ticnec, wach'n̈ecx 'a sat Dios, yujn̈ej to xcham Cristo qui jeloc. Yuj cha, yu'uj, ax qui wach' colchjec 'el 'a jun niwn yailal tot 'oj jawc yuj yowl sc'ojl Dios.

Ro 8:1

A ticnec, an̈ec junxn̈ej cajc yet' Cristo Jesús, man̈x 'ayc 'och yailal 'a quib'n̈ec.

Ro 8:3

Yuj qui tu nab'enalec tic, matz tac' qui yiclniec tas tzyal ley yic Moisés. Yuj cha, may yopiso jun ley chi on̈ scolnec. Palta ax Dios on̈ colnec. A 'a'jnac cot Yunnal, wul ya'nc 'och sb'a 'anma'il. Lajn sniwnal 'icha quic an̈ 'ajmul on̈c tic. A 'ix wul cham yuj qui mulec. A yic 'ix cham yet' sniwnal, 'ix ya'n ganar 'a yib'n̈ maysch'olnil, sec wach' man̈x 'a yaln maysch'olnil chi yic 'ayn̈ec.

Ro 9:31

Palta ax eb' israel, caw tzya'ch eb' snab'en 'a ley yic Moisés, sec toq'ue tz'och eb' wach'l 'a sat Dios yuj snani. Palta matz techj syiclni eb' jun ley cha.

1 Co 6:11

'Ayn̈ec 'ixta cutjnaquec qui b'a 'a yic yalan̈. Al ticnec, 'ic'b'ilx 'el qui mul 'ayn̈ec. 'Ac'b'iln̈ec xo yico'oc Dios. A tzalni, to wach'n̈ec 'a sat ticnec. 'Ixta tzon̈ 'ajc yuj Cajlil Jesucristo ticnec, yet' pax yuj Yespíritu qui Diosalec.

Gl 2:16

Palta cojquec, may junc mach tz'och wach'l 'a sat Dios, yujn̈ej syiclni ley yic Moisés cha. Cojxn eb' tzya'ch sc'ojl 'a Jesucristo, an̈j eb' wach' 'a sat Dios. An̈jtona an̈ tic on̈, tzca'ch pax qui c'ojl 'a Jesucristo eyet' on̈, sec wach'n̈ pax 'a sat Dios on̈. Yujn̈ej ca'n 'och qui c'ojl 'a Cristo on̈, wach'n̈ 'a sat Dios on̈. Man̈ yujoc qui yiclni ley yic Moisés, wach'n̈ on̈. Yujto may junc mach wach' 'a sat Dios, yujn̈ej to tzyiclj tas tzyal jun ley cha.

Gl 2:19

A ticnec, 'icha to chamnc on̈c 'a ley yic Moisés. Yuj wal jun ley cha, 'icha to chamnc on̈ec, sec wach' pitzn on̈c 'a sat Dios.

Gl 3:8

'Aycto, yaln can 'a Ch'an̈ U'un̈, chajtlto ax man̈ ex israeloc, 'ayx 'oj eyoch wach'l 'a sat Dios, yujn̈ej to tzeya'ch e c'ojl 'a 'a. Yictax pecti', alb'il can wach' 'ab'x 'a Abraham, yic yalx 'a 'ixtic: O'oj, ax wa'n yaxilal 'a yib'n̈ smasnil 'anma 'a yolyib'n̈q'uinl tic, xchi Dios.

Gl 5:3

Tzwaln 'at junx tic 'ayex. Tzann̈j mach tzya'ch jun circuncisión chi yipc sc'ojol, yowlal tzyiclj jantcn̈ej tas tzyal ley yic Moisés.

A Ch'an̈ Carta D'a Eb' Hebreo 10:11

Jantcn̈ej eb' ya'mal 'och sti eb' quit chon̈b'ec 'a Dios, 'ayc'n̈ej eb' 'a junjn c'u, yic tzmunlj eb' 'a yopiso. Til wal 'ejm tzyac' eb' jun tzo'n̈ xajmb'al cha. Palta a jun tzo'n̈ cha, matz tac' yi'n 'el jac qui mulec.

A Ch'an̈ Carta D'a Eb' Hebreo 10:4

Yujto a schic'l no mam wacax, yet' schic'l no quelm chiwo, matz tac' yi'n 'el jac qui mulec.

A Ch'an̈ Carta D'a Eb' Hebreo 7:19

May junc tas xb'o 'el'ch yuj jun ley cha. Palta 'ay junx yel xo caw wach', 'ix 'ochx can sjeloc, atn jun 'aych yipc qui c'ojlec. Yuj wal jun cha, tztac' qui nitznec 'och qui b'a 'a stz'ey Dios.