2 Cr 7:3 - Chuj San Sebastian Bible

³ A wal yic 'ix yiln smasnil eb' israel yeml jun c'ac' yet' stzictznil Jehová 'a yib'n̈ jun n̈a cha, 'ix 'em cumn eb', squiln 'ejm eb' snan̈l sat 'a sat lum yaln sb'a, yuj yaln eb' yuj diosal 'a Jehová, tzyaln eb' 'ixtic: Caw wach' snab'en, a schamc'ojlal may b'a'n̈ 'ay slajub', xchi eb'.

Chuj San Mateo Bible

³ Ayic ix yilan jun c'ac' chi' masanil eb' israel yed' stziquiquial Jehová ix emul d'a yib'an̈ jun templo chi', ix em cumnaj eb' masanto ix emc'och snan̈al sat eb' d'a sat luum, ix lesalvi eb', ix yac'an yuj diosal eb' d'a Jehová. Ix yalan eb' icha tic: Yelxo te vach' Dios, yujto tzon̈ xajanej d'a masanil tiempo, xchi eb'.

2 Cr 7:3 ပူးပေါင်းရင်းမြစ်များ

A Ch'an̈ B'ab'el Libro Yic Yab'ixal Eb' Rey 18:39

A yic xyiln eb' 'anma yuj tas 'ix uji, 'ix 'em c'umn eb' 'a sat lu'um, masnto squil 'ejm eb' snan̈l sat 'a sat lu'um. Xyaln eb' 'ixtic: A Jehová yel Dios toni, Dios ton wal b'i'an, xchi eb'.

1 Cr 16:34

Calc yuj diosal 'a 'a, yujto wach' snab'en, may b'a'n̈ tzlajw schamc'ojlal.

1 Cr 16:41

A yet' eb' cha, 'ix can win Hemán, win Jedutún yet' jaywn̈ eb' si'x 'eli. X'ajx can 'och 'a yib'n̈ eb' sb'itn 'ixtic: Alx cab' wach' paxti 'a Jehová, yujto 'ay schamc'ojlal 'a smasnil tiempo, xchi eb' 'a sb'it cha.

1 Cr 29:20

Xlajw cha, 'ix yaln David 'ixtc 'a smasnil eb' 'anma': A ticnec ex wit chon̈ab', alc wach' paxti 'a Jehová qui Diosalec, xchi. Xlajw cha, 'ix yaln smasnil eb' 'anma wach' paxti 'a Dios, atn sDiosal eb' yet' smam yicham. 'Ix 'em cumn eb' 'a yojltac Dios yic 'ayc' eb' 'a yojltac win rey cha.

2 Cr 20:18

Xlajw cha, 'ix 'em n̈ojn Josafat, 'ix squiln 'ejm snan̈l sat 'a sat lu'um, yet' smasnil eb' 'aj Judá yet' eb' 'aj Jerusalén. 'Ix 'em n̈ojn eb' 'a yojltac Jehová, 'ix yaln sb'a eb' 'a 'a.

2 Cr 20:21

A yic 'ix lajw spaxtin yet' eb' chon̈b' cha, 'ix si'n 'el jun tzo'n̈ eb' to tzb'itni. 'Ix ya'n 'och eb' spichl yic yopiso cha, 'ix b'ab'lj eb' yuj eb' soldado cha. Tzyaln eb' wach' paxti yet' sb'it 'ixtic: Ca'c yuj diosal 'a Jehová, yujto a schamc'ojlal, 'ayc' 'a jun 'ejmn̈ej, xchi eb'.

2 Cr 29:28

Ax smasnil eb' chon̈ab', cumn 'ejm eb' yaln sb'a, ya' sb'a wan sb'itn eb' tzb'itn cha, yet' eb' tz'utz'n trompeta, masnto yic xlajw stz'a no xajmb'al cha; 'ixta to b'i'an 'ix 'och wan eb' sb'itn smasnil.

2 Cr 29:29

A yic xlajw jun tzo'n̈ cha, 'ix 'em cumn win rey Ezequías chi yaln sb'a, yet' smasnil eb' 'ayc' yet'oc.

2 Cr 29:30

Xlajw cha, a win rey yet' eb' yajl yaj yet'oc, xyaln eb' 'a eb' levita to tzyal eb' wach' paxti 'a Jehová, yet' jun tzo'n̈ b'it yic David yet' yic Asaf, atn schecb' Dios. Caw 'ix yal eb' wach' paxti 'a tzaljc'ojlal, 'ix 'em cumn eb' yaln sb'a.

2 Cr 5:13

Xlajw cha, junn̈j xyutj eb' yutz'n strompeta cha, junn̈j xyutj eb' sjaj sb'itni, junn̈j xyutj pax eb' yaln wach' paxti', yuj yaln eb' yuj diosal 'a Jehová. 'Ix 'utz'x trompeta, 'ix yucx platillo, yet' jun tzo'n̈ xo yamc'ab', yic tz'och b'it 'a Dios. Ya' sb'a wan sb'itn eb', 'ix yaln eb' 'ixtic: Calc wach' paxti 'a Jehová, yujto yel xo wach' snab'en, yujto 'ay schamc'ojlal 'a jun 'ejmn̈ej, xchi eb' 'a sb'it. A 'a yic jun rato cha, 'ix macchj 'el yol yatut Jehová chi yuj jun 'asun.

Esdras 3:11

'Ay mach tzb'itni yuj yaln wach' paxti', 'ay pax mach tzaln 'ixtic: Calc yuj diosal 'a Jehová, yujto caw wach' snab'en, yujto a schamc'ojlal 'ayn̈ec an̈ israel on̈c tic, may b'a'n̈ 'ay slajub', xchi eb'. Ax smasnil eb' chon̈ab', caw wal tzalj eb' yaln wach' paxti 'a Jehová, yujto 'ix 'el yich jun munljel cha.

Salmos 100:5

Yujto a Jehová caw wach' snab'en; a schamc'ojlal may xon slajub'. Tzyac' 'el'chocn̈ej sti ya'jnac can 'ayn̈ec.

Salmos 103:17

Palta a schamc'ojlal Jehová, may slajb' 'a 'ayn̈ to yiclum on̈c 'a 'a. A swach'c'ojlal 'ayc'n̈ej 'a yib'n̈ quin̈tlec b'aq'uin̈;

Salmos 106:1

¡Alx cab' wach' paxti 'a Jehová! Calc yuj diosal 'a 'a, yujto wach' snab'en, may b'a'n̈ tzlajw schamc'ojlal.

Salmos 107:1

Calc wach' paxti 'a Jehová, yujto caw wach' snab'en, a schamc'ojlal may b'a'n̈ 'ay slajub'.

Salmos 118:1

Calc yuj diosal 'a Jehová yujto wach' snab'en, a schamc'ojlal 'ayn̈ec may slajub'.

Salmos 95:6

Cotn̈ec, 'em coyc cuman yic tzon̈ 'ochc 'emmquilal 'a Jehová, 'em coyc cumn 'a 'a, yujto a b'ojnacn̈ec.

Ex 4:31

A yic xyab'n eb' chon̈b' chi tas xyal eb' chawn̈ cha, 'ix ya'n 'och eb' 'anma chi 'a sc'ojol, chajtlto 'ix 'ilx cot eb' yuj Dios, yujto caw 'oltac tz'aj eb' 'a 'aj 'ayc' cha. Yuj cha, 'ix 'em n̈ojn eb', xya'n 'ejm sb'a eb' 'a Dios.

Is 63:7

An tic tzin nib'j wal-l schamc'ojlal Jehová, tzin b'itnan smasnil tas sb'o cujec. Caw wal niwn swach'c'ojlal 'ayn̈ an̈ yin̈tl on̈ec can Israel tic. Til wal tas sb'o cujec, 'ix 'o'ch sc'ojol, caw niwn pax schamc'ojlal 'ayn̈ec.

Jeremías 33:11

Palta ax 'oj 'ajoc, a 'a tic 'oj 'ab'xoc pax yoch b'it yic q'uin̈ yet' yic tzaljc'ojlal jun 'ejm xo, yet' b'it yic eb' quelem yet' eb' 'ix cob'es yic tznupn eb'. 'Oj 'ijxoc cot ofrenda yic alj yuj diosal 'a watut, ax laj yalnc eb' 'ixtic: Alc yuj diosal 'a Jehová tztac' yuj smasnil, yujto caw wach' snab'en, 'ay schamc'ojlal 'a smasnil tiempo, 'oj schic eb'. An Jehová in, an tzwala: Caw 'oj wi'xq'ue'ch jun chon̈b' tic 'icha xon yaj 'a yic yaln̈taxi.

Lv 9:24

'Ix 'elt c'ac' 'a yojltac Jehová, 'ix ya'n tz'a no xajmb'al yet' xepu, 'ix tz'a no smasnil. A yic xyiln smasnil eb' israel jun tic, caw x'el yaw eb' yuj tzaljc'ojlal, x'em n̈ojnjoc eb' masnto squil 'ejm eb' snan̈l sat 'a sat lu'um.

Nm 14:5

Yuj cha, 'ix 'em n̈ojn Moisés yet' Aarón 'a sat lum 'a yojltac eb' chon̈b' cha.

Nm 16:22

A yic xyab'n Moisés yet' Aarón jun paxti cha, 'ix 'em n̈ojn eb' 'a sat lu'um, 'ix yaln eb' 'ixtic: —Mamin, ach ton wal tzac' sq'uinl smasnil 'anma', ¿tom tztac' scot owl 'a yib'n̈ smasnil eb' a chon̈b' tic yuj smul junc win winac? xchi eb'.

Lc 1:50

Smasnil tiempo tz'o'ch sc'ojl 'a jantcn̈ej mach 'ay xiwc'ojlal 'a 'a.