2 Cr 24:20 - Chuj San Sebastian Bible

²⁰ Xlajw cha, 'ix 'och Yespíritu Dios 'a Zacarías, yunnal Joiada. 'Ix q'ue lin̈n 'a yib'n̈ jun lugar chan̈ yaj cha'an̈. Xyaln 'a eb' chon̈b' 'ixtic: A Dios a tzaln 'ixtic: ¿Tas yuj matz eyiclj in checnb'il an Jehová in? ¿Tas yuj tze say cot yailal 'a eyib'an̈? In eyactj can an Jehová in tic, yuj cha, 'oj ex wactc can pax jun xo, xchi Dios, xchi Zacarías 'a eb'.

Chuj San Mateo Bible

²⁰ Yuj chi', ix och Yespíritu Dios d'a vin̈aj Zacarías yuninalcan vin̈aj Joiada chi'. Ix q'ue lin̈an vin̈ d'a jun lugar chaan̈, ix yalan vin̈ d'a masanil anima chi' icha tic: A Jehová Dios tz'alan icha tic: ¿Tas yuj max e c'anab'ajej in checnab'il? ¿Tas yuj tze saycot eyaelal d'a eyib'an̈? Yujto ix in eyactajcani, yuj chi' ol ex vactejpaxcani, xchi Jehová, xchi vin̈.

2 Cr 24:20 ပူးပေါင်းရင်းမြစ်များ

1 Cr 12:18

'Ix 'och Yespíritu Dios 'a Amasai syajlil eb' 30 cha, 'ix yaln 'ixtc: ¡Ach David yunnal Isaí, ec caj on̈, 'oj qui can et'oc! ¡Junc'ojlal cab' aji! ¡Junc'ojlal cab' aj yet' eb' xcolwj et'oc, yujto a qui Diosalec a xcolwjn̈ej pax et'oc! xchi. 'Ix schaj David eb', 'ix ya'n 'och eb' capitan̈il 'a scal eb' syajlil eb' soldado cha.

1 Cr 28:9

Ach xo tic ach wunnal Salomón, 'ojquej 'el wal qui Diosal, 'ac' servil 'a smasnil a pixan, mun cab' wal tz'el 'a a c'ojol, yujto a Jehová yojc smasnil tas 'ay 'a qui pixan, tznachj 'el pax yu'uj tas 'ay 'a qui nab'en. Toto 'oj al a b'a 'a 'a, 'oj ta'wc 'ayach, palta toto 'oj e'cn 'el a b'a 'a 'a, 'oj ach spatquilc can 'el 'a jun 'ejmn̈ej.

2 Cr 12:5

Xlajw cha, 'ix c'och Semaías win schecb' Dios 'a yojltac Roboam, yet' 'a eb' yajl yaj 'a yib'n̈ eb' 'aj Judá, atn eb' syam sb'a 'a Jerusalén, eb' to 'el-lal yaj 'a win Sisac, 'ix yaln 'a eb' 'ixtic: 'Ixtc 'ix yutj Jehová yalni: Yujto xin eyactjcani, yuj cha, ex wactn can pax 'a yol sc'ab' win rey Sisac, xchi Dios, xchi Semaías.

2 Cr 20:14

A yic yamn smasnil eb' chon̈b' cha, 'ix 'och Yespíritu Jehová 'a jun levita yin̈tl Asaf, atn Jahaziel, yunnal Zacarías, yixchicn Benaías win yunnal Jeiel, yixchicn Matanías.

2 Cr 23:11

Xlajw cha, ax Joiada yet' eb' yunnal, 'ix yi'n 'elt eb' win yunnal can win rey cha, 'ix ya'n q'ue eb' jun corona 'a sjolom. 'Ix ya'n eb' jun yun̈al strato Dios 'a 'a. 'Ixta to b'i'an, 'ix secn q'ue eb' aceite 'a sjolm winac. Yajn̈ej 'ix yaln eb' to rey xo winac. 'Ix 'el yaw smasnil eb' 'anma yalni: ¡Viva win rey! xchi eb'.

2 Cr 24:24

Jaywn̈ej eb' soldado sirio 'ix jaw yac' owl yet' eb' 'aj Judá, palta a Jehová 'ix 'a'n 'och eb' soldado to niwn sb'isl chi 'a yol sc'ab' eb', yujto 'ix yactj can eb' Jehová, atn sDiosal eb' yet' smam yicham. 'Ixtnta x'aj Joás yab'n syal yuj tas tu x'el sb'oni.

2 Cr 25:16

Palta a yic xyaln jun schecb' Dios jun tzo'n̈ cha, 'ix ta'w win rey, xyaln win 'a 'ixtic: —¿Tom xwal 'ayach, to ach tzac' in nab'enoc an rey in tic? 'Actj aln jun tzo'n̈ cha. ¿Mto tza nib'j tzach milx chamoc? xchi win 'a 'a. Ax jun schecb' Dios cha, man̈xtoc 'ix tew 'och 'a 'a, palta 'ix yaln can 'a win 'ixtic: —Wojc an tic, nab'ilx yuj Dios to 'oj ach yac' lajwoc, yujto xa b'o jun tic, ma'ix a yiclj tas 'ix wala, xchi 'a 'a.

2 Cr 29:8

Yuj wal cha, 'ix cot yowl sc'ojl Jehová 'a quib'n̈ an̈ 'aj Judá on̈c tic, yet' 'a yib'n̈ Jerusalén. Toxn̈ej caw tzsat qui c'ojl quilnec 'och tas on̈ yutjec, b'uchnb'ilal on̈ 'ajc 'och yuj 'a jun tzo'n̈ xo nacion̈, 'icha tas wan quilnec ticnec.

Jeremías 2:19

An Jehová in, tztac' wuj smasnil, an tzwala: Mun wal a e mul 'oj 'a'nc jawc yailal 'a eyib'an̈. Mun wal a e tenmtaquil, a 'oj 'a'nc 'och 'a eyib'an̈. Nachj cab' 'el eyu'uj, chajtlto caw wal man̈ wach'oc, yujto in eyactj can an Jehová e Diosal in tic. Tzwa'ch yailal 'a eyib'an̈, yujto may wel'ch xon jac 'a e sat.

Jeremías 26:2

'Ix yaln 'ixtic: Ata tzach 'aj lin̈n 'a yamq'uil watut, tzlajw cha, tzaln smasnil tas tzwac' al 'a smasnil eb' 'anma tzcot 'a Judá, yic tzwul ya'nc 'ejm sb'a eb' 'a watut an Jehová in. May junc paxti chi matz ala.

Jeremías 4:18

Yuj e b'eyb'al yet' yuj tas xe b'o'o, yuj cha, tzjaw jun tzo'n̈ tic 'a eyib'an̈. Yuj wal e maysch'olnilal, yuj cha, caw tu ex 'aj 'el'chi, caw tzeyab' syal yu'uj, xchi Dios.

Jeremías 5:19

Toto 'ay mach 'oj c'anb'noc 'aych 'ixtic: ¿Tas laj wal yuj tzjaw jun tzo'n̈ yailal tic 'a quib'n̈ec yuj Jehová qui Diosalec? toto xchi eb', tzal 'a eb' 'ixtic: 'Ixta tzex yutej, yujto xeyactj can Jehová Dios, ax jun tzo'n̈ chuc diosal xeyac' servil 'a sat e lu'um. Yuj cha, 'ixta pax 'oj eyutc eya'n servil jun tzo'n̈ chuc 'anmal 'a junc xo chuc lumal, xa chi 'a eb', xchi.

Jeremías 5:25

Palta a e mul tztenn 'och wan jun tzo'n̈ tic, yuj cha, matz eyac' tzaljoc e c'ojl yet' jun tzo'n̈ yaxilal cha, xchi Jehová, xa chi 'a eb'.

Am 5:10

'Oltacx wal ax tic ex yajal, tzex chichn 'och 'a eb' tojl tzyutj sb'eyc'ojlwi. Caw tu tzeyutj e nab'en 'a eb' tzyac' testigoal sb'a 'a tas yel.

Nm 14:41

Palta ax Moisés 'ix yaln 'a eb' 'ixtic: —¿Tas wal yuj tzex 'ec' 'a yib'n̈ 'a tas tzyal Jehová? A jun e nab'en cha, ma'oj 'el'choc 'a wach'.

Mt 23:35

Yuj cha, a 'a eyib'n̈ 'oj jawc schaml smasnil eb' tojl snab'en 'ix milx cham 'a yolyib'n̈q'uinl tic, yictax xcham win Abel, jun tojl snab'en, masnto xc'och stiempoal xcham win Zacarías, win yunnal Berequías. Atn Zacarías chi chamnc yuj eb' e mam eyichm 'a snan̈l yatut Dios yet' jun yet'l xajmb'al.

Lc 11:51

Til wal eb' schecb' Dios milxnac chamoc, yictax smilx cham Abel masnto c'ochnc stiempoal scham Zacarías, atn win milxnac cham 'a snan̈l jun yet'l xajmb'al yet' scajnub' Dios. Palta an tzwal 'ayex, jantcn̈ej eb' milb'il cham cha, 'oj ya'ch Dios 'a eyib'an̈.

Dt 31:17

Yuj wal cha, 'oj cot wowl 'a eb', ax wactn can eb' sch'ocoj. Man̈x 'oj in na cot eb', man̈x yalnb'ilc yailal yet' pax b'ilc'ojlal 'oj jawc 'a yib'n̈ eb', masnto 'oj yal eb' 'ixtic: ¿Tas wal yuj tzcab'c syail, yuj am to man̈x 'ayc 'ec' qui Diosalec quet'oc? 'oj schic eb'.

Jueces 6:34

Ax Yespíritu Jehová, a x'och 'a Gedeón; 'a yic xyutz'n no sch'ac calnelu, 'ix syamn sb'a smasnil eb' yin̈tl Abiezer yet'oc.