1 Jn 2:13 - Chuj San Sebastian Bible

¹³ Ax xo 'ichm creyente ex, tzin tz'ib'j 'at pax 'ayex, yujto eyojc xo jun 'ayc' xoni, yictax mantzac b'o yolyib'n̈q'uinl tic. Ax xo te'n exx 'a e creyenteal, tzin tz'ib'n 'at pax 'ayex, yujto xcan win diablo 'a yaln̈ eyu'uj. An̈jtona ex 'ac' creyente, eyojc xo qui Mam Dios. Yuj cha, tzin tz'ib'n 'at 'ayex.

Chuj San Mateo Bible

¹³ Tzin tz'ib'ejb'at d'ayex a ex ayxo eyoch creyenteal, yujto eyojtacxo Dios, jun aytaxon eq'ui atax manto b'o jun yolyib'an̈q'uinal tic. Tzin tz'ib'ejb'at jun tic d'ayex ex creyente ayxo e tec'anil, yujto ix can vin̈ diablo d'a yalan̈ eyuuj ved'oc. Tzin tz'ib'ejxib'at jun tic d'ayex a ex unin creyente exto, yujto eyojtacxo co Mam Dios.

1 Jn 2:13 ပူးပေါင်းရင်းမြစ်များ

Salmos 148:12

eb' winac, eb' 'ix 'ix, eb' 'unin yet' eb' 'ichmtac 'anma'.

Salmos 90:2

Yic mantzac a b'o eb' lum niwc witz, lum lum tic yet' smasnil yolyib'n̈q'uinl tic, masnto 'a slajub', Dios achn̈ej xoni.

Salmos 91:14

Yaljnac can Jehová 'ayn̈ec 'ixtic: An 'oj ex in colcn 'elt 'a yol sc'ab' smasnil tas 'ay smay, yujto tzin e chamc'ojlej, eyojquin pax si'mb'il.

Pr 20:29

A eb' quelem, yuj yip eb' caw tzalj eb'; ax eb' 'ichmtac 'anma sacx xil sjolom, caw niwn yel'ch eb'.

Jl 2:28

A yic 'oj jawc jun slajb' tiempoal, 'oj wa'ch Wespíritu 'a smasnil 'anma'. Ax eb' 'unnab'il yet' eb' 'islab'il 'oj alnc 'el in paxti'. A eb' 'ichmtac 'anma', 'oj in paxtin 'a eb' 'a swayich, ax eb' quelmtac, 'oj in ch'ox jun tzo'n̈ tas 'a eb', 'a 'icha waychil.

Zacarías 9:17

Man̈x jantcoc swach'il, caw wal wach' yilx 'oj 'aj eb' 'aj chon̈b' cha. Yujto 'oj yac' sobra 'ixm trigo yet' yal uva, yuj cha, caw wal wach' 'oj 'aj sq'uib' eb' quelem, yet' eb' cob'es.

Mt 11:27

Xlajw cha, xyaln 'a eb' 'ixtic: —A 'in Mam, ya'jnac smasnil tas 'a yol in c'ab'. An Yunnaln tic, may junc mach 'ojtnacn si'mb'il, cojxn in Mam 'ojtnac in. An̈jtona', may mach tzcomn 'ojcan 'el in Mam. Cojxn in an Yunnaln tic, yet' pax eb' tzin nib'j tzwac' 'ojcanc 'eli.

Mt 13:19

A jun tzo'n̈ 'in̈t stz'itj can 'at 'a yol b'e, tzyal 'el'chi, 'ay eb' 'anma tz'ab'n spaxti Dios, chajtl tz'aj eb' yoch 'a yol sc'ab', palta matz nachj 'el yuj eb'. Ax win diablo tzc'och 'a eb', tzyi'n 'el win spaxti Dios 'a snab'en eb'.

Mt 13:38

Ax jun lum cha, tzyal 'el'chi atn yolyib'n̈q'uinl tic. A jun tzo'n̈ wach' 'in̈t cha, atn eb' 'anma 'ayx 'och 'a yol sc'ab' Dios. Ax jun tzo'n̈ 'ac trigo cha, atn eb' yic win diablo.

Mt 5:37

Palta a yic tzex paxtini, n', xe chin̈ej, mto ma'ay, xe chi. Matz tac' e locn sb'i junc tas, yujto a 'a win diablo tzcot jun tzo'n̈ cha.

Lc 10:22

Xlajw cha, xyaln pax 'ixtc 'a eb' 'anma 'ayc' ta': A 'in Mam, ya'jnac 'och smasnil tas 'a yol in c'ab'. May junc mach 'ojtnacn an Yunnaln tic, cojxn in Mam 'ojtnac in. An̈jtona', may mach tzcomn 'ojcan 'el in Mam, cojxn in an Yunnaln tic wojtac, yet' pax eb' tzin nib'j tzwac' 'ojcanc 'eli, xchi 'a eb'.

Jn 14:7

Octom tzin eyojquej 'eli. To 'ixta', 'oj eyojcoc 'el in Mam. Al ticnec, eyojc xo in Mam cha, yujto tox xeyila, xchi.

Jn 14:9

Yuj cha, 'ix yaln pax Jesús 'a 'ixtic: —Felipe, 'in niwn xo tiempo 'ayn 'ec' eyet'oc. ¿Tom mant in ojcoc, mach in? A eb' tzin 'ilni, tzyal 'el'chi wan yiln eb' qui Mam Dios. Yuj cha, ¿tas yuj tzat al 'ayin: Ch'ox quil a Mam chi 'on̈, xa chi?

Jn 16:3

'Ixta 'oj ex yutc eb', yujto man̈ yojcoc eb' in Mam, man̈ in yojcoc pax eb'.

Jn 16:33

'Ix wal smasnil jun tzo'n̈ tic 'ayex, sec wach' junc'ojlal xoj 'oj 'aj e pixn wu'uj. A 'a yolyib'n̈q'uinl tic, 'oj eyab' ton syail. Palta te'n tzeyutj e b'a, yujto a jun yolyib'n̈q'uinl tic, 'ix can 'a yaln̈ wu'uj, xchi 'a eb'.

Jn 17:21

Tzin c'an 'ayach, sec junxn̈ej 'oj 'aj snab'en eb' smasnil. Mamin, junn̈j in et'oc, junn̈j ach pax wet'oc. Comnoc 'icha caji, 'ixta 'oj 'aj eb', junn̈j tz'aj eb' quet'oc. Toto 'ixta', ax eb' 'anma 'a yolyib'n̈q'uinl tic, 'oj ya'ch eb' 'a sc'ojol, to ach checjnacn coti.

Jn 17:3

Caw yel cojn ach Dios ach, a eb' 'ojtnac ach, an̈jtona yojc in pax eb' an checb'iln cot oj tic, atn eb' chi 'ay sq'uinl 'a jun 'ejmn̈ej.

Jn 8:19

—Palta ¿'ajtil 'ay a Mam chi jun? xchi ewin 'a 'a. Yuj cha, xyaln pax 'ixtc 'a ewinac: —Ax tic, man̈ eyojcoc mach in. Man̈ eyojcoc pax in Mam cha. Octom eyojtac mach in, toto 'ixta', eyojc pax in Mam cha, xchi 'a ewinac.

2 Co 4:6

A Dios yaljnac can 'ixtic: A 'a scal q'uic'q'uinl tic, pitzw cab' sacq'uinal, xchi. Caw a 'a'jnac cot sacq'uinlal 'a qui pixnec, sec yuj jun sacq'uinlal tic, tzcojcanec 'eli, chajtlto caw niwn swach'l Dios. A 'a Jesús, ata tzcheclj 'el swach'l Dios cha.

1 Ti 5:1

Man̈ a tumc eb' 'ichmtac winac. 'Ac' snab'enoc eb' 'a 'emmquilal, 'icha tzotj aln junc tas 'a a mam. Yet' pax 'a eb' quelmtac winac, wach'n̈j tzotj aln 'a eb', 'icha tzotj aln 'a junc caw o'tac.

Tito 2:6

An̈jtona', tzcham aln pax 'a eb' quelmtac winac, to yowlal tzyac' cuenta sb'a eb'.

1 Jn 1:1

Tic tzqui tz'ib'j 'at 'ayx on̈, yuj jun mach spaxti Dios sb'i, atn jun tz'a'n qui q'uinlec 'a jun 'ejmn̈ej. Yic mant 'a yolyib'n̈q'uinl tic, 'ayc' xoni. An̈ tic on̈, caw cab'jnac spaxtin on̈. Quiljnac yet' qui sat on̈. Caw 'ochnc on̈ q'ueln 'a on̈, qui yamjnac pax yet' qui c'ab' on̈.

1 Jn 2:1

Ex chamc'ojlb'il wu'uj, tzin tz'ib'j 'at jun tzo'n̈ tic 'ayex, sec man̈xtzac e b'o maysch'olnil. Palta toto 'ay 'aj tzqui b'oc maysch'olnil, 'ay jun tz'a'n 'och qui tic 'a qui Mam Dios, atn Jesucristo. A jun cha, caw tojl snab'en.

1 Jn 2:12

Ex 'ac' creyente, tzin tz'ib'j 'at jun tzo'n̈ tic 'ayex, yujto a Dios x'a'n can lajwc e mul yuj Jesucristo.

1 Jn 2:14

Ax xo 'ichm creyente ex, tzin tz'ib'j 'at 'ayex, yujto eyojc xo pax jun 'ayc' xoni, yictax mantzac b'o yolyib'n̈q'uinl tic. Ax xo te'n exx 'a e creyenteal, xeya'ch spaxti Dios 'a e c'ojl wet'oc. 'Ix can pax win diablo 'a yaln̈ eyu'uj. Yuj cha, tzin tz'ib'n pax 'at 'ayex.

1 Jn 3:12

Yuj cha, matz tac' lajn tzcutjec qui b'a 'icha yutjnac sb'a win Caín. A win cha, yic win diablo winac. Yuj cha, smiln cham win jun yu'tac. 'Ixta yutjnac sb'a winac, yujto tojl snab'en jun yu'tac cha. Ax winac, man̈ tojloc snab'en.

1 Jn 4:4

Ex chamc'ojlb'il wu'uj, yic on̈c xo Dios ticnec. Tox 'ix can eb' 'a'm 'es chi 'a yaln̈ cujec. Yujto a jun 'aych 'ayn̈ec, 'ec'b'al xo spoder 'a yib'n̈ jun 'aych 'a eb' yic yolyib'n̈q'uinl tic.

1 Jn 5:18

Cojquec, toto yel yunnaln̈ec xo Dios, man̈x 'oj qui b'eylb'oquec maysch'olnil, yujto a Yunnal tzon̈ tan̈wniec. Yuj cha, man̈xtzac stac' on̈ yixtnec win diablo.

1 Jn 5:20

An̈jtona', cojquec paxi, wulnc 'ec' Yunnal Dios 'a yolyib'n̈q'uinl tic. A xjacn qui nab'enec, sec wach' tzcojquejec 'el Dios caw yel. Yuj cha, junn̈j cajc yet' jun caw yel cha, atn Jesucristo Yunnal. A jun cha, caw yel Dios. A tz'a'n qui q'uinlec 'a jun 'ejmn̈ej.

Apoc 12:11

A eb' cha, xyac' ganar eb' ya'n techjoc, yujto chamnc jun tzcuch Calnelu yuj eb', 'elnc can schiq'uil. 'Ix yac' ganar eb', yujto te'n xyutj eb' ya'n testigoal sb'a yu'uj. Ma'ix xiw eb' schami, caw xyaln̈j sc'ojl eb' ya'n cham sb'a yu'uj.

Apoc 2:7

Jantcn̈ej eb' tz'ab'ni, ya' cab' 'och eb' schicn 'a tas tzyal Espíritu 'a junjn iglesia. A eb' 'oj 'a'nc ganar ya'n techjoc, 'oj wac' slo eb' sat jun te te yic q'uinl 'a jun 'ejmn̈ej. A jun te cha, 'ayc' 'a jun paraíso yic Dios, xchi 'ayin.