Mt 4:10 - Chuj San Mateo Bible

¹⁰ Palta ix yalan Jesús d'a vin̈: —Ach Satanás, elan̈ d'a in tz'ey. Yujto icha tic syal d'a Slolonel Dios Tz'ib'ab'ilcani: A d'ayin tzeyal e b'a, yujto e Yajal in, e Diosal in. A inn̈ej tzin eyac' servil, xchi Dios, xchi Jesús chi'.

Chuj San Sebastian Bible

¹⁰ Xlajw cha, xyaln pax Jesús 'ixtc 'a winac: —Ach Satanás, 'ij 'el a b'a 'a in tz'ey, yujto tzyal 'ixtc 'a Ch'an̈ U'un̈: Cojn 'a Cajlil qui Diosalec tzeyal e b'a, cojn 'a tzeyac' servil, xchi 'a Ch'an̈, xchi Jesús 'a winac.

Mt 4:10 ပူးပေါင်းရင်းမြစ်များ

1 Cr 21:1

A vin̈ Satanás ix och ajc'olal d'a eb' israel, yuj chi' ix yac' vin̈ sc'ulej vin̈aj rey David yic syic'anchaan̈ sb'isul eb' soldado israel vin̈ smasanil.

Job 1:12

Ix tac'vi Jehová d'a vin̈ icha tic: —Ichocab' ta', ol xo ila' tas tza c'ulej yed' masanil tastac ay d'a vin̈ chi', an̈ej to malaj tas tzutej snivanil vin̈, xchi. Ix lajvi chi' ix el vin̈ Satanás chi' d'a yichan̈ Jehová.

Job 1:6

Ay jun c'u ix smolb'ej sb'a eb' ángel tz'ac'an servil Jehová d'a yichan̈ d'a satchaan̈. A d'a scal eb' chi', ix c'ochpax jun ángel ajc'ool, aton vin̈ Satanás.

Job 2:1

Ayic ix c'och sc'ual smolb'anxi sb'a eb' ángel tz'ac'an servil Jehová d'a yichan̈, ix c'och pax vin̈ Satanás d'a scal eb'.

Salmos 109:6

A junoc vin̈ chuc spensar tzac'och juezal d'a yib'an̈ vin̈. Aocab' junoc yajc'ool vin̈ tz'ac'ancanb'at d'a yib'an̈.

Ex 23:25

A inn̈ej Jehová e Diosal in b'aj tzeyaq'uem e b'a. Tato icha chi' tzeyutej e b'a, ol vac' tas tze va'a yed' tas tzeyuq'uej. Najat pax ol viq'uel ilya d'a e cal.

Is 30:22

Ol e patiquejel juntzan̈ yechel nab'a plata yed' e comon dios ayoch oro d'ay, ol eyumancanel icha c'alem yajb'entac yilji.

Mt 16:23

Palta ix och val q'uelan Jesús d'a vin̈, ix yalani: —Elan̈ d'a in stz'ey ach Satanás, yujto a gana tzac' somchajel in pensar. Man̈oclaj juntzan̈ tas yic Dios b'aj tzac'och a pensar. An̈ej juntzan̈ yic anima tza na'a, xchi d'a vin̈.

Mr 1:13

Ata' ix xid'ec' 40 c'ual b'aj ay juntzan̈ noc' noc' ay smay. Ata' ix yac'lej vin̈ Satanás yac'an proval. Ix lajvi chi', axo eb' ángel ix ulec' yac' servil.

Lc 10:18

Ix yalan Jesús d'a eb': —A in tic vilnac tas ajnac scot vin̈ Satanás d'a satchaan̈ yemnac ul vin̈ d'a yolyib'an̈q'uinal tic, icha yec' copnaj leb'lon ayic sc'an̈ c'u.

Lc 11:18

Icha chi' yaj vin̈ Satanás, tato spoj sb'a vin̈ d'a yol yico', ¿tom ol najtilax yopisio vin̈? A jun tic sval d'ayex, yujto a ex tic tzeyala' to sviq'uel eb' enemigo yuj spoder Beelzebú.

Lc 13:16

A jun ix tic, yin̈tilal Abraham ix. Ayxo 18 ab'il yamb'il ix yuj vin̈ Satanás, ichato tzec'b'il ix yuj vin̈. ¿Tom man̈ smojoc scolchaj ix d'a jun syaelal tic yujto sc'ual ic'oj ip? xchi Jesús.

Lc 22:3

Ay jun vin̈ scuch Judas, vin̈ aj Queriot. Yetb'eyum sb'a vin̈ yed' eb' vin̈ uxluchvan̈ sc'ayb'um Jesús, palta a vin̈ Satanás ix och d'a vin̈.

Lc 22:31

Ix yalanpax Jesús: —Ach Simón, ina ix sc'an spermiso vin̈ Satanás d'a Dios, yujto snib'ej vin̈ tzex yac' proval icha tz'aj ixim trigo schayaji.

Lc 4:8

Axo ix yalan Jesús d'a vin̈: —Syal d'a Slolonel Dios Tz'ib'ab'ilcani: An̈ej d'a Dios Cajal tzeyal e b'a. An̈ej pax d'ay tzeyaq'uem e b'a, xchi d'a Slolonel chi', xchi d'a vin̈.

Jn 13:27

Ix lajvi schaan jab' ixim pan chi' vin̈, ix vach' och vin̈ Satanás d'a vin̈, ix yalan Jesús d'a vin̈: —A tas nab'il uuj, c'ulej d'a elan̈chamel, xchi d'a vin̈.

A Tas Sc'ulejnac Eb' Schecab' Jesús Hechos 26:18

Tzach in checb'at d'a eb' yic vach' ol javoc spensar eb', yic syactejcan jun sb'eyb'al eb' yic q'uic'alq'uinal, axo yoch eb' d'a jun saquilq'uinal yic Dios. Ol elcan eb' d'a yol sc'ab' vin̈ diablo, axo d'a yol sc'ab' Dios ol ochcan eb'. Ol in yac'och eb' d'a sc'ool yic vach' ol ac'joccan lajvoc smul eb'. Ichato chi' ol och eb' yetb'eyumoc eb' ayxo och yicoc Dios, yujn̈ej in yac'anoch eb' d'a sc'ool, xchi Jesús d'ayin.

A Tas Sc'ulejnac Eb' Schecab' Jesús Hechos 5:3

Axo ix yalan vin̈aj Pedro d'a vin̈: —¿Tas yuj ix yac' a c'ool vin̈ Satanás, yuj chi' tzesej d'a Yespíritu Dios? Ina ix ic'canel nan̈al q'uen ic d'a stojol jun a luum chi'.

1 Co 5:5

Axo jun vin̈ chi', ac'jocab'can och vin̈ d'a yol sc'ab' vin̈ Satanás, yic ol satcanel snivanil vin̈, yic vach' ol colchaj vin̈ ayic ol jax Cajal Jesús.

1 Co 7:5

Yuj chi', yovalil tze c'anab'ajej tas sgana eb' ix e yetb'eyum d'ayex. An̈ej, tato jun tz'aj e pensar tzeyactancan jun chi' jayeoc c'ual, yic vach' tzex lesalvi d'a Dios d'a smasanil e c'ool. Slajvi yec'b'at jaye' c'ual chi', junn̈ej tzex ajxicani, yic vach' max ex juviel yuj vin̈ Satanás. Yujto ay smay, max yal e cachan och vaan e nivanil chi'.

2 Co 11:14

Palta a jun sc'ulej eb' chi', max sat co c'ool yuuj. Yujto icha chi' vin̈ Satanás, stz'ac yac'och sb'a vin̈ yángeloc Dios.

2 Co 12:7

A juntzan̈ tas ch'oxb'il d'ayin d'a satchaan̈ chi', yelxo val nivan yelc'ochi, ay smay vic'anchaan̈ in b'a yuuj. Yuj chi' ay jun in yaelal yac'nac vin̈ Satanás yic tzin ixtani. A jun chi' lajan icha junoc nivan q'uiix tz'isanb'at d'ayin. Icha chi' ajnac in, yic vach' max vic'chaan̈ in b'a.

2 Co 2:11

Icha chi' svutej, yic vach' max on̈ yac' ganar vin̈ Satanás, yujto cojtacxo tas sgana vin̈ d'ayon̈.

Dt 10:20

An̈ejocab' Jehová co Diosal nivan yelc'och d'a yol co sat. An̈ej d'ay tzon̈ och ejmelal, sco c'anab'ajann̈ej. Tato ay b'aj scac' co ti' d'a junoc tasi, an̈ejocab' d'a sb'i Jehová chi' scala'.

Santiago 4:7

Yuj chi', co c'anab'ajejec Dios. Co tec'b'ejec co b'a co chacanel vin̈ diablo, yic ol b'at vin̈ elelal d'ayon̈.

Josué 24:14

—Yuj masanil juntzan̈ tic ayocab' yelc'och Jehová d'a yol e sat, tzeyac'anem e b'a d'ay d'a smasanil e c'ool. Iq'uequel comon dios d'a e cal, icha juntzan̈ b'aj yac'naquem sb'a eb' co mam quicham d'a yichan̈b'at a' Éufrates yed' d'a Egipto, an̈ejocab' d'a Jehová b'aj tzex och ejmelal.

A Sb'ab'el Carta San Pedro 5:9

Te tec'anocab' scutej cac'anoch Dios d'a co c'ool, yic ol yal co colan co b'a d'a vin̈. Yujto cojtac to a eb' quetcreyenteal sacleminac yajb'at d'a yolyib'an̈q'uinal tic, van pax yab'an juntzan̈ yaelal eb' icha on̈ tic.

A Ch'an̈ B'ab'el Libro Samuel 7:3

Yuj chi' ix yal vin̈aj Samuel d'a eb': Tato d'a smasanil e c'ool, tzex meltzaj d'a Jehová, yovalil tzeyiq'uelta juntzan̈ sdiosal eb' ch'oc chon̈ab'il d'a e cal yed' yechel Astarot, tzeyac'anoch e b'a d'a yol sc'ab' Jehová yic an̈ej tzeyac' servil. Tato icha chi', a' ol ex colan d'a yol sc'ab' eb' filisteo.