Jeremías 38:19 - Chuj San Mateo Bible

¹⁹ Ix tac'vi vin̈ icha tic: —Tzin xiv d'a eb' quetchon̈ab' toxo ix och yed' eb' aj Babilonia chi', talaj tzin ac'chajoch d'a yol sc'ab' eb', ob'iltac am tzin yutej eb', xchi vin̈.

Chuj San Sebastian Bible

¹⁹ —Tzin xiw 'a eb' quit chon̈b' tox 'ix ya'ch sb'a yet' eb' 'aj Babilonia cha, toq'ue tzin 'ajx 'och 'a yol sc'ab' eb', ax am tz'aji, tzin yixtj eb', xchi win rey cha.

Jeremías 38:19 ပူးပေါင်းရင်းမြစ်များ

2 Cr 30:10

Ix b'at eb' checab' chi' d'a masanil yol yic Efraín yed' d'a yol yic Manasés, ix b'atn̈ej eb' d'a junjun chon̈ab', masanto ix c'och eb' d'a yol yic Zabulón. Palta a eb' anima chi', ton̈ej ix tzevaj eb', ix b'uchvaj pax eb' d'a eb' checab' chi'.

Nehemías 4:1

Ayic ix yab'an vin̈aj Sanbalat to van co b'oanxiq'ue muro chi', ix te cot yoval vin̈, ix syamanoch vin̈ sb'uchvaj d'ayon̈.

Job 31:34

yujto tzin xiv d'a eb' anima, talaj chuc tas syal eb' d'ayin. Maj in macoch in b'a d'a yol in pat yujto in xiv yuj tas syal eb' in c'ab' voc.

Pr 29:25

A xivc'olal d'a eb' quetanimail, lajan icha junoc yaal, palta tan̈vab'il on̈ yuj Jehová tato scac'och co pensar d'ay.

Is 57:11

¿Mach juntzan̈ eb' b'aj tzex xivi to nivan yelc'och chi' d'ayex, yuj chi' tzin eyactejcani, tzin b'at satc'olal eyuuj? ¿Tom yujto man̈xa tas svala', yuj chi' man̈xa velc'och d'ayex?

Jeremías 20:7

Mamin Jehová, ton̈ej ix in a montej. Ix in c'anab'ajan tas ix ala'. Yelxo te tec'an ach, yuj chi' ix in ac' ganar. Masanil tiempo tzin tzetzaji, masanil anima tzin b'uchan uuj.

Jeremías 38:22

Masanil eb' ix ix ol can d'a a palacio, yovalil ol ic'joquelta eb' ix, ol ac'chajoch eb' ix d'a yol sc'ab' eb' yajal soldado yic vin̈ sreyal Babilonia chi'. Ol b'uchvaj eb' ix d'ayach icha tic: A eb' amigo, ton̈ej ix ach yac' musansatil eb', yuj chi' ix ach ac'ji ganar. Ix ach actajcan yuj eb' d'a cal soc'om, ix el eb' d'ayach, xcham eb' ix.

Jeremías 38:5

Ix tac'vi vin̈aj rey Sedequías chi' d'a eb' vin̈ icha tic: —Ichocab'ta', syaln̈ej e c'ulan tas e gana d'a vin̈, malaj jab'oc tas syal valan d'ayex, xchi vin̈.

Jeremías 39:9

Axo vin̈aj Nabuzaradán yajal d'a eb' stan̈vumal vin̈ sreyal Babilonia chi', ix yic'b'at masanil eb' aj Judá vin̈ d'a Babilonia chi', aton eb' ixto can d'a yol chon̈ab' chi' yed' eb' ix yac'och sb'a yed' eb' aj Babilonia chi' yed' masanil eb' anima.

Jn 12:42

Vach'chom yalnaccan vin̈ icha chi', palta ay eb' israel ix ac'anoch Jesús d'a sc'ool. Tzijtum pax eb' yajal ix ac'anoch d'a sc'ool. Palta max sch'oxel-laj sb'a eb', yujto xiv eb' d'a eb' vin̈ fariseo, talaj spechjielta eb' d'a yol spatil culto.

Jueces 16:25

Ix te tzalaj eb' anima chi', ix sc'anancot vin̈aj Sansón chi' eb' yic smatz'an vin̈ eb'. Ix yic'anelta vin̈ eb' d'a yol preso, ix yac'anoch vin̈ eb' d'a scal snan̈al yoyal stemplo eb', yic syixtan vin̈ eb'.

Jueces 9:54

Elan̈chamel ix yal vin̈ d'a jun vin̈ scuchumal syamc'ab' yic oval: Ic'cot q'uen espada, milinchamoc, malaj in gana ol alchajoc to a junoc ix ix, ix in milani, xchi vin̈. Yuj chi' ix yic'cot q'uen yespada vin̈ chi', ix stecanoch q'uen vin̈ d'a vin̈aj Abimelec chi', ix cham vin̈.

A Ch'an̈ B'ab'el Libro Samuel 15:24

Ix tac'vi vin̈aj Saúl chi', ix yalan vin̈: —Yel toni, ix och in mul, maj in c'anab'ajej tas ix yal Jehová yed' tas ix al d'ayin, yujto ix in xiv d'a eb' soldado ajun ved'oc, ix in cha vab' tas ix yal eb'.

A Ch'an̈ B'ab'el Libro Samuel 31:4

Ix yalan vin̈ d'a vin̈ ed'jinac syamc'ab': —Ic'q'ueta q'uen espada chi' tzin a tecanchamoc, yic vach' a juntzan̈ ch'oc chon̈ab'il tic, man̈ ol in sb'uch eb' ayic ol in smilancham eb', xchi vin̈aj Saúl chi'. Palta ix te xiv vin̈ ed'jinac syamc'ab' vin̈ chi', maj stac'laj vin̈ stecancham vin̈. Yuj chi' ix syumb'at n̈ojnaj sb'a vin̈ d'a yib'an̈ q'uen yespada, ix cham vin̈.