Gn 18:14 - Chuj San Mateo Bible

¹⁴ ¿Tom ay tas ajaltac d'ayin tze na'a? Yab' icha tic junab', tzin jax junelxo, svac'anxi a paxyal. Ata' ol aljoc jun yune' ix Sara chi', vinac unin, xchi Jehová.

Chuj San Sebastian Bible

¹⁴ ¿Tecn 'ay tas matz tac' wuj am e nani? Yab'n 'ixtc junab', 'oj in jaw jun 'ejm xo wul ach wila'. 'Oj 'aljoc jun swinc 'unn 'ix Sara tic, xchi 'a Abraham cha.

Gn 18:14 ပူးပေါင်းရင်းမြစ်များ

Gn 17:16

Ol vac' in vach'c'olal d'a yib'an̈ ix, ol aljoc junoc uninal yed' ix. Val yel ol vac' in vach'c'olal d'a yib'an̈ ix. Nunab'il ol aj ix d'a tzijtumal nación. Tzijtum eb' vin̈ sreyal chon̈ab' ol elta d'a scal yin̈tilal ix chi', xchi.

Gn 17:21

Palta a in trato ix vac' ed'oc, ol vaq'uelc'och yed' vin̈aj Isaac vin̈ uninal ol aljoc d'a ix Sara d'a junxo ab'il icha tiempo tic, xchi Jehová.

Gn 18:10

Ix yalan junoc eb' icha tic: —Yab' icha tic junab', svac'anxi a paxyal, ata' ol aljoc junoc yune' ix etb'eyum tic, vinac unin, xchi d'a vin̈. Yacb'an a ix Sara chi' van smaclan yab' ix tas syala', ayec' ix d'a sti' smantiado eb' d'a spatic vin̈aj Abraham chi'.

Gn 18:13

Yuj chi' ix yalan Jehová d'a vin̈ icha tic: —¿Tas yuj ton̈ej stzevaj ix etb'eyum chi'? ¿Tzam sna' ix yujto chichimxo ix maxtzac yal yalji junoc yune' ix?

Gn 18:15

Ayic ix yab'an jun chi' ix Sara chi', ix te xiv ix, ix yalan ix icha tic: —Malaj in tzin tzevaji, xchi ix. Axo ix tac'vi Jehová d'a ix icha tic: —Vojtac to ix ach tzevaji, xchi.

Gn 21:1

Icha ix aj yalan Jehová Dios d'a ix Sara to ol aljoc junoc yune' ix, icha chi' ix aj yelc'ochi.

Gn 21:2

Ix scuchoch yune' ix, ix alji ayic te icham vinacxo vin̈aj Abraham chi'. Ix alji jun svinac unin ix, icha val stiempoal alb'ilcan yuj Dios.

A Ch'an̈ Schab'il Libro Yic Yab'ixal Eb' Rey 4:16

Ix yalan vin̈aj Eliseo chi' d'a ix: —Yab' val icha tic junab', chelb'ilxo q'ue junoc une' uuj, xchi vin̈ d'a ix. Ix yalan ix icha tic: —Maay mamin, ach schecab' Dios, man̈ ach b'uchvaj d'ayin, xchi ix.

Job 36:5

A Dios te ay spoder, te ay pax sjelanil, palta malaj junoc mach spatiquejeli.

Job 42:2

Vojtac to masanil syal uuj, a tas tza nib'ej, tza b'on̈ej.

Salmos 90:13

Mamin Jehová, ochan̈n̈ej qued'oc. ¿Jantacto val tiempo ol co tan̈vej yic tzon̈ a colani? Oc'oc val a c'ol d'ayon̈ a on̈ a checab' on̈ tic.

Salmos 93:1

Mamin Jehová, Rey ach toni. Nivan chequel a b'inajnaquil yed' a poder. Tzatz ix utej em c'ojan yolyib'an̈q'uinal tic, yuj chi' max ib'xilaj.

Salmos 95:3

Yujto a Jehová te nivan yelc'ochi. Aton Rey yaj d'a yib'an̈ smasanil eb' dios.

Is 50:2

¿Tas yuj ayic ix in javi, malaj mach ix vila'? ¿Tas yuj ayic ix ex vavtani malaj mach ix in tac'vani? ¿Tom max techaj vuj ex in colan e naani? ¿Tom max yal ex vac'anel d'a libre? Naec val to c'ocb'il junoc b'elan̈ lolonel svala', stupem a' mar, axo b'aj sb'ey a' nivac a', taquin̈ tz'ajcani, axo noc' chay, xcham noc' yuj taquin̈tial, sc'ab'at noc' yuj man̈ a'il.

Jeremías 32:17

Mamin Jehová yed' val a poder a b'onac satchaan̈ yed' lum luum tic. Malaj tas ajaltac sb'o uuj.

Jeremías 32:27

A in Jehová in, sDiosal in smasanil anima. ¿Toc ay tas ajaltac sb'o vuuj?

Dn 6:20

Ayic ix c'och vin̈ d'a slac'anil chi', ix avaj vin̈ d'a vin̈aj Daniel chi'. Cuseltac ix yutej avaj sb'a vin̈, ix yalan vin̈: —Daniel, ach schecab' jun Dios pitzan, aton jun Dios tzac'n̈ej servil ¿ix am yal ach scolanel a Diosal d'a noc' choj chi'? xchi vin̈.

Miqueas 7:18

Ach co Diosal, malaj junoc dios lajan ed'oc, yujto a ach tic, tzac' lajvoc smul eb' a chon̈ab' tzato cani, tzac'anpax nivanc'olal spitalil eb'. Man̈ ayocn̈ejec' yoval a c'ol d'a juneln̈ej, yujto tzach tzalaj a ch'oxan a vach'c'olal d'ayon̈.

Zacarías 8:6

A eb' anima aycan d'a yol in chon̈ab' tic, toxon̈ej ol sat sc'ol eb' yilan jun chi'. Palta a in tic, man̈ ol satlaj in c'ol vilani. A in ton Jehová in sval juntzan̈ tic.

Nm 11:23

Ix tac'vi Jehová chi' d'a vin̈ icha tic: —¿Am a naani to jab'n̈ej in poder? A ticnaic ol ila' tato ol elc'och icha sval tic, mato maay, xchi d'a vin̈.

Mt 14:31

Yed'n̈ej chi', ix b'at yamji sc'ab' vin̈ yuj Jesús, ix yalan d'a vin̈: —A ach tic, te jab'n̈ej tzin ac'och d'a a c'ool. ¿Tas yuj tzac' chab'c'olal? xchi d'a vin̈.

Mt 19:26

Yuj chi', ix och q'uelan Jesús d'a eb', ix yalani: —A jun tic malaj junoc anima syal yuuj. Palta an̈ej Dios syal yuuj. Yujto masanil tas syaln̈ej yuuj, xchi d'a eb'.

Mt 3:9

Man̈ eyal icha tic: Malaj pena, yin̈til on̈ can vin̈aj Abraham. Yuj chi' malaj tas ol javoc d'a quib'an̈, man̈ xe chioc. Yujto a in sval d'ayex, tato sgana Dios, syal yoch juntzan̈ q'uen q'ueen tic yin̈tilaloc vin̈aj Abraham chi' e q'uexuloc.

Mr 10:27

Yuj chi', ix och q'uelan Jesús d'a eb', ix yalani: —A jun tic, malaj junoc anima syal yuuj. Palta a Dios syal yuuj. Yujto masanil tas syaln̈ej yuuj, xchi.

Lc 1:13

Palta ix yalan jun ángel chi' d'a vin̈: —Zacarías, man̈ ach xivoc, yujto ix yab' a lesal Dios. A ix etb'eyum ix Elisabet, ol yuneej jun vinac unin ix. Juan ol ac' sb'iej.

Lc 1:18

Ix sc'anb'an vin̈aj Zacarías chi' d'a jun ángel chi': —¿Tas ol vutoc vojtacaneli tato yel juntzan̈ tzal tic? A in tic icham vinac inxo, chichimxo pax ix vetb'eyum, xchi vin̈.

Lc 1:37

yujto malaj junoc tas ajaltac d'a Dios, xchi jun ángel chi' d'a ix.

Lc 8:50

Ayic ix yab'an jun chi' Jesús, ix yalan d'a vin̈aj Jairo chi': —Man̈ ach xivoc, an̈ej to tzac'och Dios d'a a c'ool, a ix isil chi' ol b'oxoc sc'ool ix, xchi d'a vin̈.

Ro 4:21

Yojtac vin̈ sic'lab'il to ay spoder Dios sb'oan icha yutejnac yac'ancan sti'.

Ef 3:20

A ticnaic, calec vach' lolonel d'a Dios, yujto a tas sco c'an d'ay, ma junoc tas ton̈ej sco na'a, syaln̈ej yuuj, yujto te nivan spoder smunlaj d'ayon̈.

Dt 30:3

ol sq'uex spensar co Diosal chi', ol yac'anxi svach'c'olal d'ayex. Ol oc'pax sc'ol d'ayex, ol ex smolb'anxicot b'aj ix ex saclemcanb'at chi'.

Dt 7:21

Yuj chi', man̈ ex xiv d'a eb' anima chi', yujto a Jehová co Diosal ayec' d'a co cal, te nivan spoder.

A Scarta San Pablo D'a Eb' Aj Filipos 3:21

A ol ac'an q'uexmaj jun co nivanil malaj yelc'och tic, yic vach' lajan ol aj yed' yico', yujto a snivanil chi' te vach' toni. Icha chi' ol on̈ yutej yed' spoder, yujto ay spoder yac'an mandar masanil tasi.

A Scarta San Pablo D'a Eb' Aj Filipos 4:13

Stechajn̈ej masanil tas vuuj, yujto syac' spoder Cristo d'ayin.

A Ch'an̈ Carta D'a Eb' Hebreo 11:19

Icha chi' yutejnac vin̈aj Abraham chi', yujto nachajnac el yuj vin̈ to ay spoder Dios yac'an pitzvocxi eb' chamnac. Yuj chi', syal calani ichato pitzvinacxi vin̈aj Isaac chi', yac'jinacxi vin̈ d'a vin̈aj Abraham chi'.

Jueces 13:3

Ix sch'ox sb'a Yángel Jehová d'a ix, ix yalani: —A ach tic val yel malajtaxon junoc une' ix il sat. Palta a ticnaic, ol a cuchcanoch une', ol aljoc jun a vinac unin.

A Ch'an̈ B'ab'el Libro Samuel 14:6

Ix yalan vin̈aj Jonatán chi' d'a vin̈ ed'jinac syamc'ab' chi': —A ticnaic con̈ em d'a sat q'uen tic yic tzon̈ q'uec'och d'a scampamento eb' ch'oc chon̈ab'il chi'. Tope val ol colvaj Jehová qued'oc. Man̈ ajaltacoclaj scolvaj qued'oc tato syal sc'ool, vach'chom man̈ nivanoc co b'eyi, xchi vin̈.