Apocalipsis 22:18 - Sinia' Jlamtis 1994

¹⁸ Wikie'eyi siunapo ti ipi'ya niwak inamtis ti yi'i siu'nie imp'esinik, ja sipe'yayis ti jayo'ate, Siuti japoye siunie ti janene ape'e 'niwaka, Sinia' insayena'a pet ape'e siuniwa inwet'ia siuniwa yi'i siu'nie imp'esinik ti ajwe'el.

Apocalipsis 22:18 ပူးပေါင်းရင်းမြစ်များ

Mateo 15:13

Jesús isiujlie japo t'eyasajnas ti iyo'ate: —Siojopa inwomki ti je jla'am ni Inia' ka inekiaj'l isia'm, janak jijwetis ja tiniayeje'e ti ja tisiok pijia'm.

Efesios 4:17

Siu'nie jayo'nase, ti jajliu'wase'm, ya'am ti Saka'niona ji'lij iliyi ijiap, wuj ti 'ejie'nase'm ka je akiniejets'i siunie jike' iyoyi napoka ti je tajliyi ni siunie je 'es. Ti ijiate ti iyoyis jlajaye ni jitienkiujnieye, jlam'ne je iniuyeje paka ne'yi pa, kajeyepa ti je 'es,

1 Tesalonicenses 4:6

Wuj ti je 'esk'i naka ka kiak iwone pi jikiecha, naka siunie ajwe'el, siu'neje ni ka ink'emijiete pi jikiecha paka k'iejliyeyi. Saka'niona jla'am ti jawo lajaye niwaka wask'i'nelaja kia'iyo, iyo siunie ti pajk'i ti ajwe'lase'm ka je inkiwaliyeyi'i.

Apocalipsis 1:3

'Esie'etie siunie Sinia' iyone ni i'nio' siunie yamtijie'n siu'niwa inamtis ti tip'esina, 'yina ti nak inka'niye ti tajle ni Sinia'. Kia'iyo siunapo ipi'ya, siu'neje napo iyoyi siu'niwa 'niwa inamtis ti tip'esina, Sinia' 'esie'etie siunie iwijna'm, lapakawo ti je pa tojwa'a siunie jloma ti janeyi.

Apocalipsis 15:1

Sekyi'i a'we'en 'neje siojo iniank'iye siojo japoye ts'ijiye ti ijiat ti sakelit, ti 'lan poliyi. Po' japo ijwienjli sikio' itij'we times tom'niji injlojwajnas poli jlele itiu'un niwa inwet'iaye ti ijwienjlijamk'i, siuniwa tome jlaja, 'yina ti yiyi ni jika jloma ti noj kisie'e ni jiwak ni Sinia'.

Apocalipsis 15:6

Siojopo ijwienjli sikio' itij'we times tom'niji injlojwajnas poli jlele tajlis kiajwe siujlieja Sinia' ji'wuk ti itiunisi'n siuniwa inwet'ia ti ijwienjlijamk'i. 'Yina ji'wuye jawa ijiat ti lemi siu'neje ti intaj jlal je ijwi'yi, siojowa t'ot jip'otis wikinie maja ti 'najli.

Apocalipsis 19:20

Sekyi'i ti tikimaja'a siojo pinitiok tijwanaja'a siojo jijwejlanik jiwo jla'am, ti je ijiat ka Sinia' jijwejlanik jiwoye', ti i'nisat'ni siuniwa ti 'yakelitk'i napo i'nio' ti yine'ni jitieyi'i ti jla'am. Ik'emijiete siuniwa i'nisatk'i siunapo i'nio' ti 'yaka ti isimits'i ilia'm jaka pinitiok, it'imina ti iyo jijwukisa' ti yi'n jitiokiots'i'i ni'ne ti yi'n jikio'yi, siu'neje ti iyunit ni jipe'el ti tewitanajak'i. Sekyi'i titietajayiji ni jwat ti ti'wasankitieje'n ja pinitiok siu'neje ja injwejlanik jiwo ti je tal Siniayi, jwat siunie ti isa ape'e ti iyo'ate ni tewuk iliyi ti yi'i ni azufre ti yat'e.

Apocalipsis 20:10

Jlajmiliet siojo imosik, ti ik'emijietk'i napo i'nio', titietajayija'm ni jwat siunie ti isa ape'e iyo ni i'niat lajlik'i, siu'neje na azufre, siunie ti kia'iyo ti titietaja'm ja pinitiok siuti jiliaye iniuj wita'm ja injwejlanik jiwo, ti je tal Siniayi. Jlomas ajnajas ti janejyi ni jijliak'ali 'yina jajnok'i'ni ti kiak jawo.

Apocalipsis 20:15

'Yina sek titietaja'a wikie'eyi siunapo i'nio' jleyis je yi'i siunie imp'esinik ni jleyis ji'wet napoka ji'wasankiye po' ti t'o'n.

Apocalipsis 22:10

'Yina iyonk'i 'neje 'ate: —Ká ap'o'n ape'e ni siuniwa inamtis yi'i 'nak imp'esinik, ti 'niwak inka'niye ti tajle jla'am ni Sinia'. En kisie'e, 'yina je tojwa'a siunie jika jloma pet janeyi.

Apocalipsis 22:16

“Ya'am ti Jesúsk'i'm, ya'am ti ajlo'wase ni ijliujwanik poli jlele, 'yina ti awojonk'iye ka injwe'lase siu'niwa wask'i'nelaja, sekjane'yi ti jajwelayi pit napo Sinia' jilis. Ya'am ti atajlaja'm siupapo David jilis t'ipi ti tomik'i pijia'm. Ya'am siojona kates jloma jla'yiki ti jlal po'.”

Apocalipsis 22:7

Iyo'ate, “¡Ja ke paja its'ioye! ¡Ikap'ijliuskiye yiyi siunie ti its'iuye ni inka'niye ti yiji siu'nie imp'esinik!”

Apocalipsis 22:9

'Yina je 'esiji jla'am ti iyonak'i 'ate: —¿Yot'iyi'ni ka kiak awonk'i? Kiak awo Sinia' jikawok'i'm pet jiwek iyo'ate jiwo ti a'am, 'ate iyo 'neje siunapo a'lejwas, siu'neje napo Sinia' jijwejlanawos, 'ate iyo 'neje wikie'eyi siunapo its'iuye 'niwak inamtis ti yiji 'nak imp'esinik. Jla'm ijiate ka wunit ni Sinia'.

Apocalipsis 3:14

Jla'm iyojli 'ate: —'Ete'e kiu'ujwe siunie ti jajloyi ni jijliujwanik napo Sinia' jilis yi'i jana isi' Laodicea: “Iyo naka ni siunie ti 'yakajanit ti jlam je iyo ni siunie iyo ni Sinia', siunie Sinia' jikawo ti inka'niyewo ti je tiwonaja, naka 'neje ni siunie ti ijiatk'i, jitis 'neje wikie'eyi siuniwa Sinia' jilisajna'.