Hebrewnee 4:12 - Yn Conaant Noa 1810

¹² Son ta goo Yee bioal, as breeoil, as ny s’geyrey na cliwe erbee dy ghaa foyr, roie trooid gys eer rheynn veih‐my‐cheilley yn annym as y spyrryd, as ny juntyn as y smuirr, as ronsaghey magh smooinaghtyn as kiarailyn y chree.

Yn Vible Casherick 1775 1819

¹² Son ta goo Yee bioal, as breeoil, as ny s’gyerey na cliwe erbee dy ghaa foyr, roie trooid gys eer rheynn veih-my-cheilley yn annym as y spyrryd, as ny juntyn as y smuir, as ronsaghey magh smooinaghtyn as kiarailyn y chree.

Hebrewnee 4:12 ပူးပေါင်းရင်းမြစ်များ

Noo Luke 8:11

Nish shoh bun y choraa‐dorraghey: Yn rass goo Yee.

Noo Ean 12:48

Eshyn ta soiaghey beg jeem’s as nagh vel goaill rish my ghoan, ta shen echey ta dy vriwnys eh: eer yn goo ta mish er loayrt, nee shen y vriwnys eh ec y laa jerrinagh.

Noo Ean 6:51

Mish yn arran bio, haink neose veih niau: my ee‐ys dooinney erbee jeh’n arran shoh, bee eh bio son dy bragh: as yn arran neem’s y choyrt, she my eill eh, ver‐yms son bioys y theihll.

Jannoo 2:37

Nish tra cheayll ad shoh, v’ad guint ayns nyn gree, as dooyrt ad rish Peddyr, as rish ny ostyllyn elley, Gheiney as vraaraghyn, cre bailliu shin dy yannoo?

Jannoo 4:31

As erreish daue v’er ghoaill padjer, chrie yn boayl raad va’d er nyn jaglym cooidjagh; as v’ad ooilley lhieent lesh y Spyrryd Noo, as loayr ad goo Yee lesh dunnallys.

Jannoo 5:33

Tra cheayll ad shen v’ad guint gys y chree, as hug ad nyn goyrle dy cheilley dy chur ad dy baase.

Jannoo 7:38

Shoh eh va harrish yn agglish ayns yn aasagh, marish yn ainle loayr rish er cronk Sina, as rish ny ayraghyn ain: eh hooar goan ny bea dy choyrt ad dooinyn.

Romanee 1:16

Son cha vel nearey orrym jeh sushtal Chreest: son te pooar Yee gys saualtys, da dy chooilley unnane ta credjal, da’n Ew hoshiaght, as myrgeddin da’n Greek.

1 Corinthianee 1:24

Agh dauesyn t’er nyn eam, chammah Hewnyn as Greekyn, Creest pooar Yee, as creenaght Yee.

2 Corinthianee 2:17

Son cha vel shin myr ymmodee, ta soiaghey magh goo Yee dy molteyragh: agh myr jeh’n ynrickys agh myr jeh Jee, ayns shilley Yee ta shin loayrt ayns Creest.

2 Corinthianee 4:2

Agh ta shin er choyrt slane obbal da ny cliaghtaghyn follit scammyltagh, cha nee gimmeeaght ayns molteyrys, chamoo shirveish goo Yee dy foalsey, agh liorish soilshaghey magh yn irriney, faagail shin hene gys [briwnys] cooinsheanse dy chooilley ghooinney ayns fenish Yee.

Ephesianee 5:13

Agh dy chooilley nhee rish ta foill er ny gheddyn, te er ny hoilshaghey liorish y soilshey; son shen ny ta coyrt lesh gys soilshey, she soilshey eh.

Ephesianee 5:26

Dy voddagh eh ee y chasherickey as y ghlenney lesh niee dy ushtey, liorish y goo.

Ephesianee 6:17

As gow‐jee yn helmet dy haualtys, as cliwe yn Spyrryd, shoh ta Goo Yee:

1 Thessalonianee 2:13

Er y choontey shoh myrgeddin, ta shin coyrt booise kinjagh gys Jee, er‐yn‐oyr tra ghow shiu rish goo Yee cheayll shiu voïnyn, ghow shiu eh cha nee myr goo deiney, agh (myr te ayns firrinys) goo Yee, ta dy breeoil gobbraghey ayndiuish ta credjal.

1 Thessalonianee 5:23

As dy jean y Jee hene dy hee shiu dy slane y chasherickey: as ta mee guee gys Jee dy bee’n slane spyrryd, as annym, as callin eu er ny reayll gyn loght, gys cheet nyn Jiarn Yeesey Creest.

Hebrewnee 13:7

Cooinee‐jee orroosyn t’er n’ymmyrkey reill harrystiu, t’er loayrt riu goo Yee: geiyrt er y chredjue oc, smooinaghtyn er jerrey nyn ymmyrkey‐bea.

Hebrewnee 6:5

As er vlashtyn goo mie Yee, as pooaraghyn y theihll ta ry‐heet;

Jamys 1:18

Jeh e aigney hene ren eh shinyn y gheddyn, liorish goo ny firrinys, dy voddagh shin ve myr y chied‐vessyn jeh e chretooryn.

1 Peddyr 1:23

Myr ta shiu ruggit reesht, cha nee jeh rass hed naardey, agh jeh rass nagh jed naardey, liorish goo Yee, ta bio as tannaghtyn son dy bragh.

Ashlish 1:16

As va echey ayns e laue yesh shiaght rollageyn: as magh ass e veeal haink cliwe geyre lesh daa foyr: as va e eddin myr y ghrian tra t’eh soilshean ayns e niart.

Ashlish 19:15

As magh ass e veeal ta goll cliwe gyere dy woalley ny ashoonyn lesh: as nee eh reill ad lesh lorg yiarn: as t’eh stampey press‐feeyney jeh dewilys as jymmoose Yee ooilley‐niartal.

Ashlish 19:21

As va’n chooid elley jeu er ny varroo lesh y chliwe haink magh ass y veeal echeysyn va markiagh er y chabbyl; as va ooilley ny eeanlee er nyn lhieeney lesh yn eill oc.

Ashlish 2:16

Gow arrys; er‐nonney hig‐ym hood dy tappee; as nee’m caggey nyn ’oï oc lesh cliwe my veeal.

Ashlish 2:23

As stroie‐ym yn chloan eck lesh baase; as bee fys ec ooilley ny kialteenyn dy nee mish eh ta ronsaghey ny meeaghyn as y cree: as ver‐yms da dagh unnane eu cordail rish nyn obbraghyn.

Ashlish 20:4

As honnick mee stuill‐reeoil, as hoie ad orroo, as va briwnys er ny choyrt daue: as honnick mee ny anmeenyn ocsyn va’n kione goit jeu son gymmyrkey feanish da Yeesey, as er coontey goo Yee, as nagh row er choyrt ooashley da’n veisht ny da e yalloo, chamoo va er ghoaill e chowrey er glaare nyn eddinyn, ny er nyn laueyn; as v’ad bio as reill marish Creest thousane blein.