Santiago 1:12 - Cofán: Chiga Tevaen'jen

¹² Majan a'i vana'jen'ma, toya egae tsincombe'yi canse'ta ñoa'me tsu avujatssiya. Tsaja tsa'caen ñotsse cansesi Chigaja Tisema in'jamba antteya cuintsu tsangae canseye. Nane a'i gana'sunga otifaccuma afeqquia'caen Chigaja tayoe tsangae canseya'chove antteye su majan Tisema in'jan'chondeccunga.

Santiago 1:12 ပူးပေါင်းရင်းမြစ်များ

Génesis 22:1

Omboe Chigaja Abraham tise've in'jan'chove atesuye in'jamba mandacan. Tsa'caen in'jamba tise inisei'ccu tisema ttu'sesi Abrahamjan su: —Vani gi can'jen.

Nehemías 1:5

“Ñoa'me dyo'tssia Na'su sefacconi canjen'su Chiga, majan que manda'choma pañamba tson'sui'ccu, toya'caen majan queve in'jan'chondeccui'ccu tsangae injancco'su;

Job 2:10

Tsa'ma Jobja su: —Pushesu, ¡sumbia'caen afajama! Ñotssiama Chiga afesi avujatsse isu'ta, ¿jongoesie gi egama'qque isuya? Tsa'caen vana'jen'an'qque Jobja ni aya'fai'ccuyi'qque egae tsincombi.

Salmos 5:11

Tsa'ma poiyi'cco majan queve in'jamba quenga ca'nimba can'jendeccuja avujatssi'faya'cho. Tsangae tsu avujatsse settapoen'jen'faya'cho. Tise'pama piccoqquia'caen coiraja cuintsu que inisema in'jan'chondeccuja quei'ccu avujatssi'faye.

Éxodo 20:6

Tsa'ma ñama in'jamba pañasundeccunga gi mil omba'su dutssiyendeccunga ñotsse tsoña.

Zacarías 13:9

Ña anttesi toya canse'chondeccuma gi si'nge'ye panshaenqquia'caen vanaeña. Tsa'caen tsomba gi tise'pama giyaeña, totoacorima tssutssiamba giyaenqquia'caen. Ñoa'me coriama'caen gi tise'pama si'ngei'ccu giyaeña. Giyaensi tsu ñama iñajan'faya. Iñajan'fasi gi tise'pama pañaña. ‘Tise'paja ña aindeccu tsu’ qquen ña susi ‘Na'suja ingi Chiga tsu’ qquen tsu su'faya. Ña, Na'su Chiga, gi tansintsse conda.”

Mateo 10:22

Que'i ñame in'jamba ña a'i'fasi poiyi'cco a'i tsu que'ima chi'ga'faya. Tsa'ma majan osefaeña'gae ñoa'me ta'etsse ñame in'jan'da ñoa'me tsu ccushaya'cho.

Mateo 25:34

Tsa'caen attufaemba na'su tsu tise tansinfani ccutsu'chondeccuma suya: “Ña Yaya tsu que'inga ñotsse tson. Ji'faja. Jipa Tise que'imbe ñoña'choma isu'faja. Nane andeve agattointene que'i Tise aindeccuve daya'chove in'jamba ñoña'choma jipa isu'faja.

Lucas 6:22

Ñajan Sefaccone Ji'cho A'i. Que'i ñame in'jansi cca'indeccu que'i inisema dañoñe afa'ni'qque ñoa'me qui avujatssi'fa. Aindeccu ñane que'ima chi'ga'fa'ni'qque qui avujatssi'fa. Ñane que'ima se'pipa afase'fa'ni'qque qui avujatssi'fa.

Romanos 5:4

Opatsse ron'da cansepa gi ñotssiave atesucan'faya. Tsa'caen ñotssiave atesucamba gi ti'tsse Chigave in'jamba ronda'je'faya.

Romanos 8:28

Atesu'fa gi ma'caen Chiga tayo in'jamba majan a'ima ttu'se'choma cuintsu Tise in'jan'chondeccuve da'faye. Tsendeccu Chigama ñotsse in'jansi Chigaja osha'cho ñotssiama tise'panga antte.

1 Corinto'su 2:9

Nane Chiga Tevaen'jen qquen suqquia'caen tsu: Tso'feja atte'fambi ni tsosinajan paña'fambi Chiga ñotsse ñoña'choma. Nane a'ija tise'pa injama'choi'ccu atesu'fambi Chiga Tise've in'jan'chondeccunga ñoñamba afe'choma.

1 Corinto'su 8:3

Tsa'ma majan a'i Chigama in'jansi ccane'qque Chigaja tisema atesupa in'jan.

1 Corinto'su 9:25

Poiyi'cco butto ganasundeccu tisu ai'voma osha'chone ñotsse coiraya'cho cuintsu osha'ta butto ganañe. Gana'sunga afe'cho ccaqueje ugaccuma ganañe in'jamba tsa'caen vana'jen'fa. Tsa ugaccuja pandipa congonqque'su tsu. Tsa'ma ingija congo'masia Chiga afe'choma ganañe gi vana'jen'fa.

Deuteronomio 8:2

Ñotsse injan'jen'faja Na'su, que'i Chiga, cuarenta canqque'fave que'ima a'i menia angacan'choma. Nane atesucañe in'jamba que'ima vanaemba opatssia've tson que'i injama'choma atesuye. Ñoa'me tsu atesuye in'jan que'i tise manda'choma paña'chove tsambi'ta pañambi'choa've.

2 Timoteoga 2:15

Anttembe'yi Chiga Aya'fama ñotsse atesuja Chiganga ccutsupa ansangesa'ne. Atesupa ñotsse tansintsse atesianjan cuintsu Chigaja suye: “Queja ñotssia sema'su qui.”

2 Timoteoga 4:8

Ganañe cofe'su ganasi afeya'cho otifaccuma gi ja'ño isuya. Na'su Jesús jipa tsu ñama otifaenqquia'caen ño'ame tsoña. Nane Na'su Jesúsja poimbe injama'choma ñotsse atesupa in'jan. Tsa'caen in'jamba tsu tsequi a'ta ñai'ccu poiyi'cco tise jiya'chove in'jamba rondasundeccuma'qque tsa'caen ño'ame tsoña.

Hebreo'su 10:32

Tsa'ma ñotsse injan'jen'faja. Tseyi me'ttia'ye Jesucristone pañamba qui Tise've in'jan'fa. Tsa'caen in'jamba vana'je'an'qque qui Cristoma cati'fambi.

Hebreo'su 11:17

Chigaja Abraham Tisema ñoa'me paña qquen atesuye in'jamba Abrahamma manda cuintsu tise dutssi'ye Isaacma fi'ttipa Tisenga afeye. Mingae tson'me'se qquen in'jamba aqquia mandasi Abrahamjan Chigave in'jamba paña. Tsa'caen pañamba Chiganga afeya'chove Isaacma fi'ttiye anga. Nane Chigaja tayoe Isaacne Abrahamnga su: “Isaacyi tsu que dutssi'ye. Tisei'ccu gi que omba'su dutssiyendeccuve atapoeña.” Qquen su'a'qque Chiga ccase afapa Isaacma fi'ttipa Tisenga afeye mandasi Abrahamjan se'pimbe'yi afepa fi'ttiye anga.

Hebreo'su 12:5

¿Aqque'pa'fa ti qui Na'su Chiga que'inga qquen su'chomajan? Que'ija Tise dushundeccusi tsu qquen su: Ña dutssi'ye, quema Na'su nafattiansi Tise su'choma chi'gajama. Que'ima iyu'u'ni'qque ñoquimbi'fajama.

Hebreo'su 6:15

Tsama pañamba Abrahamjan in'jan. Ccashe'yeve da'a'qque toya tsu opatsse ronda'jepa Chiga suqquia'caen tise dutssi'ye Isaacve isu.

Santiago 2:5

Ña in'jan'cho faenga'su Cristove in'jan'chondeccu, vama paña'faja. Chigaja va ande'su mendeqquiama in'jamba antte cuintsu tsendeccu Tise've in'jamba ricove daqquia'caen Tise dutssiyendeccuve da'faye. Tsa'caen tsu Chigaja tayoe ñoa'me su tisema in'jan'chondeccune.

Santiago 5:11

A'ija vana'jemba toya opatsse canse'ta tsu avuja'faya qquen gi asi'ttaen. ¿Paña'fambi ti qui tayopi'su Jobne condase'choma? Nane Jobja vana'jemba anttembe'yi Na'su Chigave in'jamba opatsse canse. Tsa'caen cansesi Na'su Chigaja jai'ngae tisema ñoa'me ñotsse tson. Na'su Chigaja tsa'caen mende'yepa a'ima ñoa'me ñotsse in'jan.

1 Pedro 3:14

Tsa'ma ñotsse tsomba tsane vana'je'an'qque avujatssi'faya qui. Majameñi'qque dyojo'fajama. Ni injama'choni'qque panshaen in'jamba dyojo'fajama.

1 Pedro 4:13

Tsa'ma ma'caen Cristo vana'jenqquia'caen vana'jen'da avujatssi'faja. Jai'ngae Cristo tise osha'cho ti'tsse'tssia'ma attiansi que'i'qque tisema attepa ñoa'me injama'cho tsosipie fae'ngae avujatssi'faya.

1 Pedro 4:14

Que'ija Cristo aindeccusi faesundeccu afase'ni'qque avujatssi'faya'cho. Nane Chiga Joccapitssia Qquendya'pa que'i'ccu can'jensi qui tsa'caen avujatssi'faya.

1 Pedro 5:10

Tsa'ma re'riccone que'i tsa'caen vanaccasi tsu Chigaja Tisu in'janqquia'caen que'ima ñoñaña shaca mechoa've. Nane joqquitssia'masia've tsu Tiseja que'ima ñoñaña. Que'ima quiñaemba tsu ñoa'me an'biaña. Tsayi tsu inginga osha'cho ñotsse tson'su Chiga. Tiseja ingima ttu'se Jesucristoi'ccu fae'ngae Tise ñotssiani tsangae jincho'faye.

1 Pedro 5:4

Tsa'caen tsonsi tsu ti'tsse'tssia coira'su Jesúsja attiamba que'inga tsangae ñotssiama afeya. Tsa afe'choja congo'masia tsu, va andeni jinqquia'cambi.

1 Juan 4:19

Chigaja o'tie ingima ñotsse in'jansi gi Tisema ñotsse in'jan'fa.

Canjaen'cho 2:10

Ti'tsse qui vanaña. Tsa'ma dyojama. Nane Satana majan que aindeccuma picco'je'ttinga piccoye tson'jen que'i poiyi'ccoma qqueñacañe que ñame in'jan'choma cative'se. Nane diez a'taqquia'caen qui osha'chone tsa'caen vanaña. Tsa'ma ñame in'jamba paya'ngae ñame in'janjan. Que tsa'caen in'jan'ninda gi quema otifaeña. Otifaensi qui tsangae na'suve dapa canseya.

Canjaen'cho 3:19

Poiyi'cco majama ña ñotsse in'jan'da tsendeccuma gi iyu'upa candusian. Tsa'cansi ñama ñotsse pañamba que egae tsincon'choma catija.

Canjaen'cho 3:21

Majan patsu'ninda gi tisenga afeya cuintsu ñai'ccu dyaipa fae'ngae mandaye. Nane ña patsupa ña Yayai'ccu dyaipa fae'ngae mandaqquia'caen tsu tsaja ñai'ccu fae'ngae mandaya.