Juan 7:39 - Cofán: Chiga Tevaen'jen

³⁹ Jesúsja Chiga Qquendya'pane tsu tsa'caen afa jai'ngae tise've in'jan'chondeccu isuya'chone. Nane Jesús toya Chiga sefacconi ansundembisi Chiga Qquendya'paja toya a'ima injaen'jembi.

Juan 7:39 ပူးပေါင်းရင်းမြစ်များ

Salmos 68:18

Queja Chiga, tsain'bio piccoye'chondeccuma ccushaemba sefacconi ansundepa tsendeccuma'qque ansundian. A'i patsuyepa afe'choma qui isu. Nane tayoe pañambindeqquia'qque tsu quenga afe'faya, Na'su.

Joel 2:28

Tsa'caen da'fasi gi poi aindeccunga ña Qquendya'pama moeña. Que'i dutssiyendeccu, que'i onquengendeccu'qque tsu ñane afa'faya. Que'i chu'a tsandiendeccuja sefani'su attian'choma tsu atte'faya. Que'i coenzandeccuja ayó'pae tsu ayo'o'faya.

Mateo 16:14

Tise'paja su'fa: —Majandeccu'ta tsu su'fa: “Feti'su Juan.” Cca'ija: “Tayopi'su Elías.” Cca'ija: “Tayopi'su Jeremías.” Tsambi'ta: “Tayopi'su Chiga Aya'fama afa'su,” qquen tsu su'fa.

Mateo 21:11

Cca'indeccuja su'fa: —Vaja Chiga Aya'fama afa'su Jesús tsu. Galilea ande'su Nasaret canqque'su Chiga Aya'fama afa'su tsu.

Lucas 24:49

Ja'ño gi ña Yaya afeya'cho qquen su'choma que'inga afeya. Tsa'ma Jerusaléni ronda'je'faja sefacconi'su Chiga Qquendya'pa que'ima in'jaeña'ngae.

Lucas 3:16

Tsa'ma Juanjan poiyi'cconga conda: —Ñajan tsa'ccui'ccu gi que'ima feti'je. Tsa'ma ñama ti'tsse'tssia tsu jiya. Ñajan utu'ccoa. Nane shaca gi tise sapato uga'choma ccupa'suve ca'niñe. Tise jipa tsu Chiga Qquendya'pai'ccu que'ima fetiya. Tsambi'ta si'ngei'ccu fetiqquia'caen tsu injama'choma somboeña.

Lucas 7:16

Poiyi'cco a'i tsama attepa ñoa'me dyo'fa. Tsa'ma Chigama ñotsse afapa su'fa: —Joccapitssia Chiga Aya'fama afa'su tsu inginga attian. Toya'caen tsu su'fa: —Chigaja Tise aindeccuma in'jamba fuiteye ji.

Juan 1:21

Qquen susi iñajampaña'fa: —Tsambi'ta ¿majan qui queja? ¿Que ti qui Chiga Aya'fama afa'su Elías? Juanjan su: —Tsambi gi. Omboe iñajampaña'fa: —¿Que ti qui ingi ronda'je'cho Chiga Aya'fama afa'su? Ccase tsu Juanjan su: —Me'i.

Juan 1:25

qquen iñajampaña'fa: —Tsa'caen Cristombi'ta ni Elíasmbi'ta ni ingi ronda'je'cho Chiga Aya'fama afa'sumbi'ta, ¿jongoesie qui feti'je?

Juan 12:16

Méttia'ye ingi Jesúsma shondosundeccu vama ñotsse paña'fambi. Tsa'ma Jesús sefacconi ansundesi gi va tisene tevaensi tsa'caen tson'choma in'jan'fa.

Juan 12:23

Jesúsja pañamba su: —Tayo tsu napi Sefaccone Ji'cho A'i ti'tsse'tssia've daya'cho.

Juan 14:13

Toya'caen ñame in'jamba osha'cho jongoesuve qui iñajan'ninda ña gi tsa'caen tsoña. Tsa'caen gi Dutssi'ye tsoña cuintsu poiyi'cco in'jan'faye ña Quitsaja ti'tsse'tssia've.

Juan 14:26

Tsa'ma Chiga Quitsa tsu Tise Qquendya'pama moeña. Ña'caen tsu tsa Fuite'suja que'inga osha'choma atesiaña. Tiseja que'ima in'jaeña cuintsu que'i osha'cho ña que'inga su'choma injan'jeñe.

Juan 16:14

Tise tsu canjaeña ñajan ti'tsse'tssiave. Ñane in'jamba tsu osha'choma que'inga tansintsse condaya.

Juan 16:7

Tsa'ma ñoa'me gi su, que'ine bove ñotssi tsu ña jaye'ja. Nane ña jambian'da tsa Fuite'suja que'inga jipa can'jeñambi. Tsa'ma ña japa gi Tisema moeña que'inga.

Juan 17:1

Jesúsja qquen condasepa sefacconima camba qquen su: —Yaya Chiga Quitsa, tayo tsu napi. A'inga canjaenjan ña que Dutssi'yeja ti'tsse'tssia. Tsonsi gi ña que Dutssi'ye'qque canjaeña que'qque ti'tsse'tssia.

Juan 17:5

Tayopi, va ande meinte ñajan quei'ccu fae'ngae jinchopa osha'choma ti'tsse'tssia. Tsa'caeñi ja'ño, Yaya, ccase ñama ti'tsse'tssia've tsonjan ña ccase quei'ccu fae'ngae jinchoye.

Juan 20:22

Tsa'caen supa inginga tise qquendya'pama ufapa su: —Chiga Ñotssia Qquendya'pama isu'faja.

Juan 6:14

Tsonsi a'ija Jesús va canjaen'choma attepa su'fa: —Ñoa'me tsu va a'ija Chiga Aya'fama afa'su jiya'cho qquen su'cho.

Juan 7:12

Aindeccuja tisene afaccopa majanjan su'fa: “Tsaja ño'a a'i tsu.” Tsa'ma cca'ija su'fa: “Me'i, ño'ambi tsu –aqquia a'ima afopoen'su tsu.”

Juan 8:54

Jesúsja su: —Ña tisu patsuye in'jan'choecan'da barembi tsu. Tsa'ma ña Yaya tsu ñama ti'tsse'tssia've tson'su. Tisema qui que'ija “ingi Chiga” qquen su'fa.

Tson'fa'cho 19:2

iñajampaña: —¿Que'ija Jesúsve in'jan'da ti qui Chiga Qquendyapama isu'fa? Tsa'caen iñajampañasi su'fa: —Ñoa'me gi va Chiga Qquendya'pa jinchove ingija pañambipa atesu'fambi.

Tson'fa'cho 2:17

Chigaja su: —Osefaeña'cho a'ta napi'nijan poi aindeccunga gi Ña Qquendya'pama moeña. Que'i dutssiyendeccu, que'i onquengendeccu tsu Ñane afa'faya. Que'i chu'a tsandiendeccuja sefani'su attian'choma tsu atte'faya. Que'i coenzandeccuja ayó'pae tsu ayo'o'faya.

Tson'fa'cho 2:33

Chiga Quitsaja Jesúsma osha'chone ti'tsse'tssia've tson. Tsa'caen tsonsi Jesúsja Chiga tansinfani can'jen. Chiga tayoe tise Qquendya'pama afeye susi Jesúsja tsama isupa a'inga afepa in'jaen. Tsa Chiga Qquendya'pa in'jaen'choma qui ja'ño attepa paña'fa.

Tson'fa'cho 2:38

Tsonsi Pedroja su: —Poiyi'cco Chigave in'jamba que'i egae tsincon'choma antte'faja. Jesús a'ive daye in'jamba fetiye'faja. Tsonsi Chiga tsu que'i egae tsincon'choma joqquitssiaña. Tsa'caen joqquitssiamba tsu que'inga afeya Tise Qquendya'pama.

Tson'fa'cho 2:4

Tsa'caen Chiga Qquendya'pa poiyi'cconga ca'nimba in'jaensi osha'cho ccaninga aya'fangae afaye ashaen'fa. Ma'caen Chiga Qquendya'pa afae'nijan tsa'caen afa'fa.

Tson'fa'cho 3:13

Nane Abraham Chiga –tsa Isaac, Jacobmbe Chiga– ingi coenzandeccumbe Chiga –tsayi tsu Tise Dutssi'ye Jesúsma ñoa'me'qque ti'tsse'tssia've tson. Tsa'ma que'i tsa Jesúsma indipa Pilatonga afe'fa. Pilato Jesúsma ccupaye in'jansi que'ija Jesúsma chi'gapa se'pi'fa.

Tson'fa'cho 4:31

Chigama iñajan nanisi tise'pa bo'je'ttija oya. Tsa'caen oyasi poiyi'cconga Chiga Qquendya'pa ca'ni. Ca'nisi dyombi'tsse Chiga Aya'fama afa'je'fa.

Romanos 8:9

Tsa'ma Chiga Qquendya'pa que'i injama'choni canse'ninda qui que'ija ai'vo in'jan'choma catipa Chiga Qquendya'pa in'jan'choma in'jamba canse'faya. Tsa'ma Cristo Qquendya'pa a'ini can'jembian'da tsendeccuja Cristo a'imbi tsu.

2 Corinto'su 3:8

Chiga Qquendya'pa a'i'ccu cuname injancco'fa'chone in'jaen'choja pasa'masiapa ti'tsse ñotssi tsu.

Efeso'su 4:30

Egae canse'fajama Chiga Qquendya'pa ingine ñombi'yesa'ne. Nane ingija Cristove in'jansi Chiga Qquendya'pa ingima angacan'su tsu. Ingima qqueñambe'yi angacañe tsu in'jan ccushaeña'cho a'ta napiya'ngae.