Canjaen'cho 11:3 - Cofán: Chiga Tevaen'jen

³ Tsa'ma ñambe dos afasundeccuma gi moeña. Tsendeccuja mil dosciento sesenta a'ta tsu ñane afa'faya. Nane pajaen'cho qquen injan'jeñe si'ame ondiccupa tsu afa'faya.

Canjaen'cho 11:3 ပူးပေါင်းရင်းမြစ်များ

Génesis 37:34

Tsa'caen supa Jacobja tisu ondiccu'jema chittapa pasi ñombi'ye'choma canjaenqque'su ondiccu'jema ondiccu. Tsa'caen ondiccupa tsain'bio a'ta tise dutssi'ye pa'chone inambani canse.

2 Reyes 19:1

Judá'su na'su Ezequíasja tsama pañamba iyicca'yepa tisu ondiccu'jema chi'tta. Chi'ttapa faesu tsincco'cco'je'cco'a sarupama ñoña'cho ondiccu'jema ondiccu tisu ñombi'ye'choma canjaeñe. Tsa'caen ondiccupa Na'su Chiga ettini ja.

Nehemías 9:1

Omboe, tsa ccovu'su a'ta veinte y cuatroqui, poi israendeccu ccase bo'fa. Bopa ambe'yi tisupa egae tsincon'chone ñombi'ye'choma canjaeñe in'jamba tsincco'cco'je'cco'a sarupa ondiccu'jema ondiccupa ande ccuttopa'sima tisu tsovenga ganga'fa.

Salmos 69:11

Ña ñombi'ye'choma canjaeñe tsincco'cco'je'cco'a sarupama ondiccusi cca'indeccu co'fepa afase'fa.

Jeremías 1:10

“Ña que aya'fama qquen pporaen'ninda qui ña afa'choma afaya. Ja'ño gi quema ccutsian poi nasundeccuma, poi aindeccuma'qque ti'tsse joccapitssia've cuintsu queja tise'pama joqquitssiamba sefaeñe; cuintsu tise'pama patsupa nepiañe. Toya'caen gi quema in'jaen cuintsu tise'pama mandapa ccase ñoñamba atapoeñe.”

Daniel 12:7

Iñajampañasi tsu lino sarupama ondiccucho'choja poifa'su tivema sefaningae yasapa su: ‘Na'su tsangae canse'cho Chigaja tansintsse conda tres canqque'fa faesu enttinge canqque'fa pasasi tsu tsa'caen nepiya. Nane Chiga in'jan'cho aindeccu patsuyepa quin'su me'choe da'fasi tsu pa'cco va tsoña'choja nepiya.’

Jonás 3:5

Tsa'caen susi Nínive'su a'ija poiyi'cco ambe'yi asettuye ashaemba poiyi'cco coenza, du'shu'qque Chigave in'jamba tsincco'cco'je'cco'a ondiccu'jema ondiccu'fa tisupa ñombi'ye'choma canjaeñe.

Jonás 3:8

Tsa'ma poiyi'cco a'i tsincco'cco'je'cco'a ondiccu'jema ondiccu'faja tisu ñombi'ye'choma canjeñe. Tsomba pa'cco que'i tsain'fai'ccu Chigama iñajan'faja. Toya'caen tsu poiyi'cco tisu ja'ñopan egae tsincon'choma anttepa ñotsse can'jeña'cho.

Números 11:26

Toya'caen dos tsandie, Eldad, Medad'qque tsa setentave ttu'secho'su tsa carpani jambi'ma toe canqqueni can'jen'fa. Tsa'caen can'jen'fa'ni'qque Chiga Qquendya'paja tise'panga'qque ca'nisi canqquene Chiga Aya'fama afaye ashaen'fa.

Mateo 11:21

—¡Vana'faya qui Corazín canqquesundeccu! ¡Vana'faya qui Betsaida canqquesundeccu! Que'ija ñotsse Chiga tson'choma atte'fa. Chiga tsa'caen Tiro, Sidón canqquenga tsoña'choecan'da ñoa'me tsu junde tseni'su aindeccu tise'pa egae tsincon'choma chi'gapa Chigama iñajan'faye'can. Ñombi'yepa canjaen'cho sarupai'ccu ondiccupa cusepai'ccu tsu onjon'faye'can tisu egae tsincon'choma catiye in'jan'choma canjaeñe.

Mateo 18:16

Tsa'ma quema pañañe in'jambian'da ccase japa faesuma, tsambi'ta faesu dosma, fae'ngae tisenga angaja. Nane tsa'caen dos, tsambi'ta tres tsu tise egae tsincon'choma pañamba atesu'faya.

Lucas 10:13

¡Vana'faya qui Corazín canqquesundeccu! ¡Vana'faya qui Betsaida canqquesundeccu! Que'ija ñotsse Chiga tson'choma atte'fa. Nane Chiga tsa'caen Tiro, Sidón canqquema tsoña'choecan'da tsu junde tseni'su aindeccuja tise'pa egae tsincon'choma chi'gapa Chigama iñajan'faye'can. Ñombi'ye'choma canjaenqque'su sarupama ondiccupa cusepai'ccu tsu onjon'faye'can tise'pa in'jan'choma canjaeñe.

Lucas 24:48

Que'ija pa'cco vama camba cca'indeccunga condase'faya'cho.

Juan 15:27

Que'i'qque qui ñajan ño'a qquen conda'faya, me'ttia'ye ñai'ccu can'jensundeccupa.

Juan 3:27

Qquen susi Juanjan su: —Chiga Quitsa anttembian'da ¿ma'caen tsu a'ija osha'faya?

Tson'fa'cho 1:8

Tsa'ma Chiga Qquendya'pa que'ima in'jaen'nijan que'i'qque qui osha'choma osha'faya. Tsa'caen oshapa qui ñane Jerusalén canqqueni condase'faya. Toya'caen qui Judea andeni, Samaria andeni, ñoa'me poi biani'su andenga'qque ñane condase'faya.

Tson'fa'cho 13:31

Tsa'caen qquendyaensi Jesúsja tsain'bio a'tave attia'ñacca tisei'ccu fae'ngae Galileane Jerusaléni jacansundeccunga. Tsendeccuja attesundeccupa ja'ño tisene aindeccunga conda'fa.

Tson'fa'cho 2:32

Nane Chiga Quitsaja toe Jesúsveyi qquendyaemba pa'cho'ye jangian. Ingija poiyi'cco tsama attepa condasundeccu gi.

Tson'fa'cho 3:15

Tsomba qui Cansian'su Na'suma fi'tti'fa. Tsa'ma Chiga Quitsaja pa'cho'ye tisema ccase qquendyaen. Tsama attepa condasundeccu gi.

1 Corinto'su 12:28

Toya'caen Cristo ai'vove da'fasi Chigaja que'i'su majama ccaningae semañe ttu'se. Jesucristone afasundeccuve ttu'sepa manda. Omboe Chiga Aya'fama afasundeccuve ttu'sepa manda. Tsomba omboe atesiansundeccuve manda atesiañe. Toya'caen Chiga agattoen'choma canjaensundeccu, paji'suma ccushaensundeccu, fuitesundeccu, mandasundeccu, ccaninga aya'fama afasundeccuma'qque ttu'sepa Chigaja manda.

2 Corinto'su 13:1

Dos se que'ini jipa ja'ño ccase gi pasia'su jiya. Chiga Tevaen'jen tsu su: “Egae tsinconsi tres camba afasundeccu tsu afa'faya'cho. Tres jimbi'ta dos tsu afa'faya'cho tise egae tsincon'choma canjaeñe.”

Efeso'su 4:11

Tise a'inga in'jaen'cho tsu qquen: Majan a'ima tsu in'jaen Jesúsne afasundeccuve da'faye. Cca'indeccuma in'jaen Chiga Aya'fama afasundeccuve da'faye. Toya'caen majanjan ñotsse condase'choma candusiansundeccuve tsu da'fa. Majan a'i Cristove in'jan'chondeccuma coira'suve tsu da'fa. Majan a'i atesiansundeccuve tsu da'fa.

Deuteronomio 19:15

Fae camba afa'suja barembi a'i egae tsinconsi tise egae tsincon'choma condaye. Tsa'ma dos, tsambi'ta tres camba afasundeccu fae'ngatsse afapa tsu tise egae tsincon'choma conda'faya.

Canjaen'cho 1:5

Jesucristo'qque tsu tsa'caen chigambian. Nane Jesucristoja tansintsse tsu Chigama inginga canjaen. Papa aisheve ccase qquendya'su tsu. Poi ande'su na'suma manda'su tsu. Jesucristoja ingima ñotsse in'jamba tise anjampai'ccu ingima onjoemba ingi egae tsincon'choma ccucha.

Canjaen'cho 11:2

Tsa'ma Chiga ettima agatto'ta tsotefa'su atandunduma agattojama. Israembindeqquiangaja tayo afe'cho tsu. Agattombe canjan. Nane cuarenta y dos ccovu tsu israembindeqquiaja Chiga canqquema patsupa tsui jacamba an'bian'faya.

Canjaen'cho 11:6

Tsendeccuja Chiga sefaccoma piccoye osha'fa cuintsu tise'pa Chiga Aya'fama afaite unjin tuimbe'yi cañe. Toya'caen tsu osha'fa pa'cco tsa'ccu sombo'je'ttima anjampaveyi tsoñe. Maqui in'jan'da tsu poi andenga osha'cho paqque'suma moeñe osha'fa.

Canjaen'cho 12:6

Tsonsi pushesuja a'i menia ccuyapa, mil dosiento sesenta a'tave a'tupa can'jen. Chigaja tise can'jeña'chove ñoña cuintsu pushesuja tseni aña'choma an'biamba ñotsse can'jeñe.

Canjaen'cho 13:5

Tsa'caen cocoya na'su anttesi dyo'ccoa cocoyaja na'suve dapa cuarenta y dos ccovuve manda. Na'suve dapa Chigama afasepa quinsepoemba afa.

Canjaen'cho 19:10

Tsonsi gi puntssamba afa'sumbe tsutteccofanga ccarupa dyai tisema ñotsse afaye. Tsa'ma tiseja ñama su: —Tsa'caen tsonjama. Que, que faenga'su Jesúsma pañamba in'jan'chondeccu'qque Chigambe semasundeccu qui. Ña'qque quei'ccu fae'ngae Chigambe sema'su gi. Chiganga ccarupa ñotsse afaja. Nane poiyi'cco majan Jesúsve in'jamba tansintsse condase'ta ñoa'me Chigane afasundeccu tsu.

Canjaen'cho 20:4

Tsomba tse'i tsain'bio na'su dyaipa'choma gi atte. Dyaipa'choma attepa gi tsanga dyaisundeccuma'qque atte. Chiga anttesi tsendeccuja injama'choma somboeñe dyai'fa. Toya'caen Jesúsve in'jansi fi'ttisi pa'chondeccuma'qque atte. Nane tsendeccuja Chiga Aya'fama candusiansi cca'indeccu iyicca'yepa tise'pa tsovema chattupa fi'tti'fa. Tsendeccuja dyo'ccoa cocoyama, ni ñoña'cho cocoyama'qque iñajan'fambi. Toya'caen tsu se'pi'fa cocoya inise tevaen'ttima tise'pa tivenga, tise'pa tsovejunga tevaeñe. Tsendeccuma fi'ttisi ccase qquendyapa mil canqque'fave Cristoi'ccu manda'je'fa.