San Juan 7:37 - El Nuevo Testamento y Salmos

³⁷ Tɨꞌɨj arí tyeꞌentyipuáꞌrisimaꞌcaj ɨ maj tyíꞌyeꞌestyaa, aꞌájna xɨcáaraꞌ jitze ɨ tɨ jéetzeꞌ juxɨeꞌveꞌ. Aꞌájna xɨcáaraꞌ jitze pu ɨ Jesús huatyéechaxɨj, tɨꞌquij caꞌnyíin jɨn tyuꞌtaxájtacaꞌ aꞌyan tɨjɨn: —Tɨpuaꞌaj aꞌtɨ́j iꞌmuꞌuj, cheꞌ nye jimi yeveꞌréꞌnyej, tɨꞌij huayeꞌen.

San Juan 7:37 ပူးပေါင်းရင်းမြစ်များ

SALMOS 143:6

Muéetzij jimi nu ajméjcaꞌtaxɨꞌɨj, muéetzij jimi nu jaxɨeꞌveꞌ nyaj huayeꞌen, aꞌyájna tɨꞌɨj ɨ chuéj tɨ huáchij.

SALMOS 42:2

Aꞌyaa pu ɨ Dios nye jitze tyúuxɨeꞌveꞌ tɨꞌɨj ɨ jájtyij, aꞌɨ́jna ɨ Dios júuricamej tɨ puéꞌeen. ¿Aꞌnajnyí nyajtáhuaꞌaj huatányesejrataj ɨ Dios jimi?

SALMOS 63:1

¡Nyaj Dios, muáaj paj aꞌɨ́ɨn puéꞌeen ɨ nyaj Dios! Jéehua nu muaxɨeꞌveꞌ nyámuahuoo, jiꞌnye muáaj paj aꞌɨ́ɨn puéꞌeen ɨ jájtyij tɨ nyejitzé juxɨeꞌveꞌ; néijmiꞌi pu ɨ nye tyévij muéetzij muaxɨeꞌveꞌ, aꞌyájna tɨꞌɨj joꞌtɨj joꞌhuáchij, joꞌtɨj jéehua ɨ jájtyij jóoxɨeꞌveꞌ.

San Mateo 11:28

Siataꞌaj nye jimi mujoꞌváꞌjuꞌun néijmiꞌi mu siaj cuaꞌnaj aꞌɨ́jcɨ jɨmeꞌ ɨ siaj jahuoo siaj tyámuaꞌ tyaatáꞌan ɨ Dios, siajta aꞌɨ́jcɨ jɨn tyíꞌtyeseꞌ siaj néijmiꞌi jɨn jaꞌráꞌastijreꞌen, nyáaj nu jamuaatáꞌsij siaj sij huóosoꞌpeꞌen.

San Mateo 3:3

Aꞌɨ́jna ɨ Juan, aꞌɨ́ɨ pu aꞌɨ́ɨn puéꞌeen ɨ Isaías tɨ jaataxájtacaꞌ ɨ Dios jitze maꞌcan, aꞌyan tɨjɨn: Aꞌtɨ́j pu ujaꞌjíihuaj jaꞌmej joꞌtɨj quee jáꞌtyiꞌtɨj aꞌyan tɨjɨn: “Tyámuaꞌ xu huóoꞌuurej mu jutzájtaꞌ, jiꞌnye tavástaraꞌ pu ya uvéꞌnyesij, aꞌɨ́j xu jɨn quee jeꞌej yóꞌnamuajraj, sulu tyámuaꞌ xu eenyeꞌ.”

San Mateo 5:6

’Micheꞌ huatóotyamuaꞌveꞌen ɨ maj aꞌɨ́jna jɨn tajcuj, majta aꞌɨ́jna jɨn iꞌcuj maj aꞌyan huárɨnyij jeꞌej tɨ tyíꞌxaꞌpuɨꞌ ɨ Dios jimi, jiꞌnye aꞌɨ́ɨjma pu jimi tyámuaꞌ tyeꞌmej.

San Juan 1:23

Aj puꞌij Juan aꞌyan tyihuoꞌtéꞌexaaj tɨjɨn: —Nyáaj nu aꞌɨ́ɨn puéꞌeen ɨ nyúucarij tɨ aꞌáa jaꞌváꞌnamuajreꞌ joꞌtɨj quee jáꞌtyiꞌtɨj, tɨ aꞌyan tyíꞌxaj tɨjɨn: “Tyámuaꞌ xu huóꞌuurej siaj sij tyámuaꞌ naa tyeetyéjeevej aꞌɨ́jcɨ ɨ tavástaraꞌ” —aꞌyájna tɨꞌɨj tyuꞌtaxájtacaꞌ aꞌɨ́jna ɨ Isaías.

San Juan 14:6

Jesús pu aꞌyan tyaatéꞌexaa tɨjɨn: —Nyáaj nu aꞌɨ́ɨn puéꞌeen ɨ juyéj, nyajta ɨ tɨ tzáahuatyiꞌraꞌaj jɨn tyíꞌxaj, nyajta nu aꞌɨ́ɨn puéꞌeen ɨ júuricamej. Nyéetzij puꞌuj jimi jeꞌej tyíɨꞌrij tɨꞌij aꞌtɨ́j aꞌáa jaꞌráꞌastij ɨ nyavástaraꞌ jimi.

San Juan 4:10

Jesús pu aꞌyan tyuꞌtanyúj tɨjɨn: —Tɨpuaꞌaj páamuaꞌreerej tyiꞌtɨ́j tɨ ɨ Dios tyuꞌtáꞌcaa, pajta jamuaꞌréerej aꞌtɨ́j tɨ puéꞌeen ɨ jájtyij tɨ cɨ́ɨ tyíꞌmuahuaviij, aꞌyaa paj muáaj tyaatahuavíirajcheꞌ, ajta jeꞌen aꞌɨ́ɨn jájtyij muaatáꞌnyijcheꞌ ɨ paj jusén jɨn júurij puáꞌmej.

San Juan 4:11

Ajta aꞌɨ́jna ɨ íitɨꞌ, aꞌyaa pu tyaatéꞌexaa tɨjɨn: —Nyavástaraꞌ, capáj tyiꞌtɨ́j tyíchaꞌɨj ɨ paj jɨn jeꞌtajánɨeꞌ ɨ jájtyij, ajta tyámuaꞌ pu tyoꞌcátyee ɨ tɨ atyácun, ¿joꞌnyij peyaꞌaj jánɨeꞌsij aꞌɨ́jcɨ ɨ jájtyij?

San Juan 4:14

ajta aꞌɨ́jna ɨ tɨ jaayéꞌen aꞌɨ́jcɨ ɨ jájtyij nyáaj nyaj jaatáꞌsij, capu cheꞌ aꞌnáj huataíꞌimuꞌuj. Jiꞌnye aꞌɨ́jna ɨ jájtyij nyáaj nyaj jaatáꞌsij, aꞌyaa pu séeriaꞌaj jaꞌmej jimi tɨꞌɨj joꞌtɨj jaꞌajmuɨ́ꞌyej, aꞌɨ́j pu jɨn jusén jɨmeꞌ júurij jaꞌmej.

San Juan 5:40

siajta muaꞌaj caxu jaxɨeꞌveꞌ siaj nye jimi yeveꞌréꞌnyej siaj jusén jɨn júurij xáꞌraꞌnyij.

San Juan 6:35

Jesús pu aꞌyan tyihuoꞌtéꞌexaaj tɨjɨn: —Nyáaj nu aꞌɨ́ɨn puéꞌeen ɨ páan tɨ júuricamej tyuꞌtáꞌcaa. Aꞌɨ́jna ɨ tɨ nye jimi yeveꞌréꞌnyej, capu aꞌnáj huataíꞌcuataj, ajta ɨ tɨ nyéetzij jimi tyáꞌtzaahuatyeꞌ, capu ajta aꞌnáj huataíꞌimuꞌuj.

San Juan 6:37

Néijmiꞌi aꞌɨ́ɨmaj ɨ tɨ Dios naatátuiireꞌsij, aꞌɨ́ɨ mu nye jimi yeveꞌréꞌnyesij, majta aꞌɨ́ɨmaj ɨ maj nye jimi yeveꞌréꞌnyesij, canu huoꞌréꞌityij.

San Juan 6:55

Jiꞌnye aꞌɨ́jna ɨ nyahueꞌraꞌ aꞌɨ́ɨ pu puéꞌeen ɨ cueꞌráj tɨ jitzán eerámaꞌcan ɨ júuricamej, ajta ɨ nyaxúureꞌ aꞌɨ́ɨ pu aꞌɨ́ɨn puéꞌeen ɨ maj jaayéꞌen tzáahuatyiꞌraꞌaj jɨmeꞌ.

San Juan 7:28

Tɨꞌɨj ɨ Jesús aꞌyan tyáanamuajriꞌ, ajta óocheꞌ tyihuaꞌmuaꞌtyáacaj u tyeyúuj tzajtaꞌ, aꞌyaa puꞌij caꞌnyíin jɨn tyuꞌtaxájtacaꞌ tɨjɨn: —Nyi muaꞌaj sényamuaꞌtyej nyi siajta jamuaꞌree jóꞌnyaj jáꞌmaꞌcan. Ajta canu nyasɨ́ɨj nyanaꞌaj mujoꞌvéꞌmej, sulu aꞌɨ́j nu jitze maꞌcan mujoꞌvéꞌmej ɨ tɨ unyojoꞌtaꞌítyacaꞌ, sɨ́ɨj tɨ ɨꞌríj siaj jimi tyúꞌcaꞌnyej siajta muaꞌaj caxu jamuaꞌtyej.

1 Corintios 10:21

Capu ɨꞌríj siaj yaꞌcaj ɨ váasuj jitze siatɨꞌɨjtá tyéꞌtyojtziꞌreꞌej ɨ tavástaraꞌ, tɨpuaꞌaj siajta siooj aꞌɨ́j jitze yaꞌcaa ɨ váasuj ɨ maj jɨn janaꞌmichej ɨ tyiyáaruꞌ, capu ajta ɨꞌríj siaj japuan tyíꞌcuaꞌcaj ɨ méesaj ɨ maj japuan joꞌtámuaꞌreej ɨ tavástaraꞌ, tɨpuaꞌaj siajta siooj aꞌɨ́jna jitze tyíꞌcuaꞌajcaj ɨ méesaj ɨ maj japuan huáꞌnaꞌmichej ɨ tyiyáaruꞌuj.

1 Corintios 10:4

majta néijmiꞌi aꞌɨ́jcɨ juquéꞌij ɨ jájtyij tɨ ajta ɨ Dios jimi joꞌvéꞌmej. Jiꞌnye aꞌɨ́j mu jitze huaꞌíj ɨ tyetyéj tɨ huaꞌ jamuán huamaꞌcaꞌaj, ajta aꞌɨ́jna ɨ tyetyéj, aꞌɨ́ɨ pu aꞌɨ́ɨn puéꞌeenyeꞌej ɨ Cɨríistuꞌ.

1 Corintios 11:25

Matɨꞌɨj tyuꞌcuáꞌaj, aj puꞌij jaꞌajriáj ɨ váasuj, ajta aꞌyan tyihuoꞌtéꞌexaaj tɨjɨn: “Aꞌíjna ɨ váasuj tzajtaꞌ tuꞌhuájmuaa, aꞌíi pu aꞌɨ́ɨn puéꞌeen ɨ nyúucarij tɨ jájcuaj ɨ tɨ jɨn Dios tyajamuaꞌtáratziiriꞌ aꞌɨ́jcɨ jɨmeꞌ ɨ nyaxúureꞌ nyaj jeꞌráxɨreꞌsij.” Ajta siatɨꞌɨjtá aꞌyan rɨjcaj aꞌíj xu jɨn noꞌtámuaꞌreej.

1 Corintios 12:13

Aꞌyaa puꞌuj tánaꞌaj, néijmiꞌi ɨ tyaj Israel jitze ajtyámaꞌcan, majta ɨ maj séej chuéj japua jáꞌmaꞌcan, nusu ɨ maj caꞌnyéjrij jɨn tyíꞌmuarɨeꞌ naꞌríij juxáahuaj maj mahuacɨꞌɨj, néijmiꞌi tu huáɨꞌhuacaꞌ tyej tyij séej tyanaꞌaj jitze ajtyámaꞌcantaj aꞌɨ́jna jitze maꞌcan ɨ júuricamaꞌraꞌ ɨ Dios, ajta sɨ́ɨj naꞌaj ɨ júuricamej tajimí huatyátuiihuacaꞌ.

Efesios 5:18

Caxu taꞌruj, jiꞌnye jeꞌej pu puaꞌaj jáꞌmuaꞌuurej, jéetzeꞌ pu naa siaj néijmiꞌi aꞌɨ́j jitze aróocaꞌnyej ɨ júuricamaꞌraꞌ ɨ Dios.

El Apocalipsis 21:6

Aj puꞌij aꞌyan tyinaatéꞌexaaj tɨjɨn: —Puꞌríj tyeꞌentyícɨꞌpiihuacaꞌ. Nyáaj nu aꞌɨ́ɨn puéꞌeen ɨ nyaj anájcaj, nyajta ɨ nyaj uvéꞌtyajtɨj, nyáaj nu jájcuaj ɨmuáj huataséjre, nyajta jusén jɨmeꞌ séeriaꞌaj naꞌmej. Aꞌtɨ́j tɨnaꞌaj tɨ huataíꞌimuꞌun nyáaj nu huáapuaꞌaj jaatáꞌsij aꞌɨ́jcɨ ɨ jájtyij tɨ aꞌáa jáꞌajnyinyii joꞌtɨj jaꞌajréxaj, aꞌɨ́jna ɨ jájtyij ɨ tɨ jɨn júurij jaꞌmej jusén jɨmeꞌ.

El Apocalipsis 22:1

Aꞌɨ́jna ɨ tɨ tajapuá tyíꞌhuɨɨreꞌ pu játyaꞌnaj naataséjraj tɨ naa éenyeꞌej muɨꞌyej, ajta aꞌɨ́jna ɨ jájtyij júuricamej pu tyuꞌtáꞌcaa. Naa pu tyíꞌmeꞌestij ɨ jájtyij tɨꞌɨj ɨ cristal, ajta aꞌáa jeꞌrányajcaa joꞌtɨj joꞌtyéjvee ɨ ɨpuárij tɨ jitzán acájca ɨ Dios, ajta aꞌɨ́jna ɨ cányaꞌaj.

El Apocalipsis 22:17

Ajta ɨ júuricamaꞌraꞌ ɨ Dios, ajta ɨ tɨ oochán huatyéevichej ɨ cányaꞌaj, aꞌyaa mu tyíꞌxaj tɨjɨn: —Mupoꞌvéꞌmeꞌ. Ajta ɨ tɨ iityánamuaj, cheꞌ ajta aꞌyan tyuꞌtaxáj tɨjɨn: —Mupoꞌvéꞌmeꞌ. Ajta ɨ tɨ íꞌmuꞌuj, ajta jaxɨeꞌvaꞌaj tɨ huayeꞌen, cheꞌ mujoꞌvéꞌmeꞌen ajta jeꞌen huáapuaꞌaj jaayéꞌen ɨ jájtyij ɨ tɨ jɨn júurij huatyáꞌɨtzeereꞌej.