Yêrêmi 5:17 - Nau Brah Ndu Ngơi 2023

¹⁷ Khân păng mra sa lĕ ba jêh ri ndơ sông sa may, Sa kon bu klâu, kon bu ur may; Sa lĕ phung biăp phung ndrôk may, Sa tơm krăk ƀâu jêh ri tơm rvi may. Sŏk đao ƀư rai lĕ ƀon nâp may, May vay rnơm nsing!”

Yêrêmi 5:17 ပူးပေါင်းရင်းမြစ်များ

Êsai 62:8

Brah Yêhôva hŏ yơr ti ma Jêh ri ti nau brah Păng sơm ton: “Gâp mâu mra ăn ôh ba may Jêng ndơ sông sa ma phung rlăng đah may; Phung bu năch mâu mra dơi nhêt ndrănh krăk ƀâu mhe May hŏ ƀư jêh tâm nau jâk jêr.

Êsai 62:9

Ƀiălah phung kăch roih mra dơi sa kao play păng, Jêh ri tâm rnê ma Brah Yêhôva; Phung pĕ jêh play krăk ƀâu mra dơi nhêt dak păng, Tâm nkual ngih jrô kloh ueh Gâp.”

Êsai 65:22

Khân păng mâu mra ndâk ngih ăn nơm êng gŭ ôh, Mâu lĕ tăm đang krăk ƀâu ăn nơm êng sa. Yorlah nar phung ƀon lan Gâp gŭ rêh mra jêng tâm ban ma nar tơm si gŭ rêh; Phung Gâp săch mra dơn ndơ tă bơh kan ti khân păng nơm ƀư.

Yêrêmi 1:15

Pôri, Gâp mra kuăl rgum lĕ rngôch băl mpôl bunuyh lĕ bri dak mpeh pa lơ — Brah Yêhôva lah pônây — khân păng mra tât jêh ri lĕ rngôch n'gân da dê sưng hađăch păng ta ntŭk trong lăp lĕ mpông ƀon Yêrusalem, nchueng jŭm pôih nâp păng tâm ban lĕ rngôch ƀon Yuđa.

Yêrêmi 25:37

Đơ ndrêch gơ̆ đăp mpăn hŏ jêng bri hŏng Yor nau ji nuih Brah Yêhôva.

Yêrêmi 4:26

Gâp saơ, ri, neh ueh jêng nkhơng bri rdah, Lĕ rngôch ƀon bu ƀư rai da dê tanăp măt Brah Yêhôva, Tanăp nau ji nuih Păng.

Yêrêmi 4:7

Yau mŭr hŏ luh tă bơh bri krŏng, Nơm ƀư rai lĕ bri dak hŏ hăn jêh, Hŏ du bơh ntŭk păng, Gay ƀư ăn bri dak may jêng rngot njăp; Lĕ rngôch ƀon toyh may rai ƀhiau Mâu hôm du huê bunuyh.

Yêrêmi 5:18

Brah Yêhôva lah: “Nđâp lah pônây, tâm lĕ nar nây, Gâp mâu mra nkhĭt lĕ khân may ôh.

Yêrêmi 50:17

Israel jêng du mlâm biăp nhhơt jêh phung yau mŭr tĭng kăp. Ntơm saơm hađăch Asiri tĭng rvăn păng, jêh ri rlet pakơi aơ jêng Y-Nêbukatnetsar, hađăch Babilôn, gĭnh nting păng.”

Yêrêmi 50:7

Ma mbu moh mâp khân păng ran rvăn khân păng da dê. Phung rlăng khân păng lah: ‘Hên mâu geh tih ôh yorlah khân păng hŏ ƀư tih jêh đah Brah Yêhôva jêng ndrêch gơ̆ ngăn, nâm bu ntĭt Brah Yêhôva, Nau phung chô yau khân păng kâp gân.’

Yêrêmi 8:13

Brah Yêhôva lah: “Gâp ŭch rgum khân păng jêh ri ƀư rai lĕ khân păng, Mâu mra hôm play krăk ƀâu ta klơ tơm krăk ƀâu, Mâu hôm play rvi ta klơ tơm rvi; N'ha mra kro klêu; Moh ndơ Gâp hŏ ăn ma khân păng bu mra sŏk lơi.”

Yêrêmi 8:16

Tă bơh ƀon Dan, bu hŏ tăng nau nter seh; Neh n'găr mpât yorlah nteh krĭ phung seh tâm lơh. Khân păng tât rvăn neh jêh ri play kao neh, Rvăn ƀon jêh ri bunuyh gŭ tâm ƀon.

Nau Nhĭm Vơl 2:12

Khân păng kuăl ŭch joi me: “Ta ntŭk ndơ sa? Ta ntŭk ndrănh?” Khân păng khĭt huăr nâm bu bunuyh sôt rmanh Ta lĕ trong sâng tâm ƀon, Jêh nây khân păng tăch n'hâm Ta ntang tơh me păng.

Nau Nhĭm Vơl 2:2

Kôranh Brah rvăn lĕ ntŭk Yakôb gŭ Mâu geh nau yô̆ djê̆ lê̆ ôh; Tâm nau ji nuih, Păng ƀư rlâm lơi lĕ pôih nâp kon druh Yuđa; Ƀư rai jêh ri ƀư nau bêk prêng, Lĕ rngôch ƀon bri hađăch nđâp ma phung kôranh chiă uănh.

Êsêkiêl 36:4

Yor nây, hơi phung yôk Israel, iăt hom nau Kôranh Brah Yêhôva: ‘Kôranh Brah Yêhôva lah ma phung yôk jêh ri gôl yôk, bong dak n'hor jêh ri ntŭk rlŭng, ntŭk rlâm rai jêh ri lĕ ƀon rngol hŏ jao ăn phung ƀon lan hôm klen ma lĕ bri dak jŭm khân may pit in jêh ri suai rak.’

Ndrom Samƀŭt bơh Ôsê 2:12

Gâp mra ƀư rai lĕ tơm krăk ƀâu jêh ri tơm rvi păng, Jêng lĕ tơm si păng tâm mpơl pô aơ: ‘Aơ jêng prăk nkhôm Phung rŏng ăn jêh ma gâp.’ Gâp mra njêng khân păng jêng bri rngol Ăn lĕ mpô mpa bri sa rvăn păng.

Ndrom Samƀŭt bơh Ôsê 8:14

Phung Israel hŏ chuêl jêh Nơm Rhăk Njêng khân păng, Mĭn ndâk âk rplay ngih hađăch; Phung Yuđa hŏ ntop âk ƀon toyh geh mpêr nâp; Ƀiălah Gâp mra su ma ŭnh lĕ ƀon toyh nây Jêh ri ŭnh mra sa pôih nâp păng.

Yôel 2:3

Tanăp măt khân păng, geh ŭnh sa rvăn, Pakơi khân păng, geh chiông ŭnh sa ƀhiau. Êlor panăp khân păng văch, bri neh nâm bu n'gar Êđen; Pakơi khân păng rgăn, knŏng hôm jêng bri rdah rngot njăp. Mâu geh ôh ndơ dơi klaih bơh khân păng.

Kan Lêvi 26:16

Gâp mra ƀư lĕ nau ma khân may: Gâp mra nkhŭt nau krit kir tât ma khân may, nau ji khô hiăn jêh ri nau ji kăt, ƀư vĭr măt khân may jêh ri ƀư rngot nuih n'hâm khân may. Khân may mra huăr srih ntil yorlah phung rlăng đah khân may mra sa lĕ ndơ nây.

Sôphôni 3:6

“Gâp hŏ ƀư rai jêh phung ntil mpôl bunuyh, Ƀư lĕ vâl tŭm gak ta njônh mpêr ƀon jêng rlâm rai. Gâp ƀư ma trong sâng păng jêng bri hŏng, Kŏ tât mâu geh ôh bunuyh hăn rgăn ta nây. Lĕ ƀon khân păng bu hŏ ƀư rai jêh, Mâu hôm geh du huê bunuyh, jêh ri kŏ mâu geh lĕ bunuyh gŭ ta nây.

Malachi 1:4

Tơlah phung Êđôm lah: “Hên lĕ rai jêh, ƀiălah hên mra plơ̆ sĭt đŏng ndâk tay ta ntŭk lĕ rlâm rai jêh,” pôri Brah Yêhôva ma phung tahan lah pô aơ: “Khân păng mra ndâk đŏng ƀiălah Gâp mra ƀư rlâm lơi, bu mra ntơ khân păng jêng N'gor Bri Djơh Mhĭk, jêng phung ƀon lan Brah Yêhôva ji nuih n'ho ro.”

Nau Vay Nkah Tay 28:33

Du phung ndŭl mpôl khân may mâu mâp gĭt năl ôh mra sa lĕ ro play kao bơh n'gor khân may jêh ri bơh lĕ n'hâm suan khân may pah kan; bu mra tŭn jot jêh ri jot nkrâm khân may ƀaƀơ,