Yêrêmi 25:30 - Nau Brah Ndu Ngơi 2023

³⁰ “Yor nây, ăn may gơnh djôt nau ngơi aơ mbơh lor tâm rdâng đah khân păng: ‘Bơh ntŭk prêh ta klơ, Brah Yêhôva hŏ nter troh, Păng hŏ ngơi, bơh ntŭk kloh ueh Păng nter huy tâm rdâng đah phung biăp Păng, Păng ntơm ngơi kuăl nâm bu phung jot play krăk ƀâu, Tâm rdâng đah lĕ rngôch phung gŭ ta neh ntu.

Yêrêmi 25:30 ပူးပေါင်းရင်းမြစ်များ

II Samuel 15:25

Hađăch lah ma Y-Sadôk: “Djôt leo hom Hip Nau Tâm Rnglăp Brah Ndu plơ̆ sĭt ma ƀon. Tơlah gâp mra geh nau yô̆ tanăp măt Brah Yêhôva, Păng mra njŭn ăn gâp plơ̆ sĭt đŏng, ăn gâp saơ Hip Nau Tâm Rnglăp jêh ri ntŭk Brah Yêhôva gŭ.

I Phung Hađăch 9:3

Brah Yêhôva lah ma păng pô aơ: “Gâp hŏ tăng jêh nau mbơh sơm jêh ri nau may ŭch dăn tanăp măt Gâp. Gâp prăp êng jêh ngih kloh ueh brah may hŏ ndâk, jêh ri dơm amoh Gâp ta nây n'ho ro. Măt jêh ri nuih n'hâm Gâp mra gŭ ta nây mro mrăng.

II Nau Rêh Jêng 30:27

Pônây, phung kôranh ƀư brah jêng noi Lêvi gŭ dâk ăn nau ueh uĭn ma phung ƀon lan; Brah Ndu dơn bâr khân păng, nau mbơh sơm khân păng hao tât ma ntŭk kloh ueh Kôranh Brah ta klơ trôk.

Nau Mprơ Ơm 11:4

Brah Yêhôva gŭ tâm ngih brah kloh ueh Păng; Sưng hađăch Păng gŭ tâm trôk. Măt Păng uănh, Sâng măt Păng sek uănh phung kon bunuyh.

Nau Mprơ Ơm 132:14

Păng lah: “Aơ jêng ntŭk Gâp gŭ rlu ƀaƀơ n'ho ro; Gâp mra gŭ ta nây yorlah Gâp ŭch jêh kơt nĕ.

Nau Mprơ Ơm 46:6

Phung mpôl băl bunuyh drơu drơu, lĕ bri dak n'gơ n'găr; Geh bâr Păng, neh ntu lêk hoch ro.

Nau Mprơ Ơm 58:5

Păng mâu iăt ôh nau nơm phung n'hŭm ngơi Nđâp tơlah bunuyh blau ndơm bêh kđôi lĕ.

Nau Mprơ Ơm 78:65

Aƀaơ aơ, Kôranh Brah nâm bu bunuyh kah rngăl bê̆ch, Nâm bu du huê janh ktang dơi đah nhŭl ndrănh.

Êsai 16:9

Yor nây, ndrel ma nau nhĭm nhhiăng Jaser, Gâp nhĭm ma đang krăk ƀâu Sipma. Ơ Hêsbôn, Êlêaleh, Gâp mra djrah dak măt ta khân may, Yor nau troh nter nơm plên play krăk ƀâu dôl pĕ play tâm yan vai, Jêh ri yan rek khân may mâu hôm geh ôh!

Êsai 33:3

Lah tăng nteh drơu drơu, phung ƀon lan nchuăt du; Lah May dâk, lĕ bri dak nchuăt du lă lêng.

Êsai 42:13

Brah Yêhôva mra hăn panăp tâm ban ma du huê nơm tahan janh ktang, Tâm ban ma du huê bunuyh tahan bêng ma nau duh nđơr; Păng nter, ngơi huy rduh tâm lơh, Jêh ri Păng mra lơh rai lĕ phung rlăng đah Păng nơm.

Yêrêmi 17:12

Ntơm bơh saơm, sưng hađăch chrêk ma lơp gŭ ntŭk prêh klơ, Jêng ntŭk ngih brah kloh ueh ma hên!

Yêrêmi 25:38

Nâm bu yau mŭr luh bơh trôm, Yorlah neh khân păng hŏ jêng nau tâm rmot Tâm dâng mpiăt đao tŭn jot, Jêh ri nau ji nuih hâu ngăn.”

Yêrêmi 48:33

Nau maak răm hâk maak hŏ roh jêh Tă bơh đang mir geh jêng ngăn bri Môap; Gâp hŏ ƀư ăn ma ndrănh suăt kro tă bơh ntŭk kĭn păt; Mâu hôm geh bunuyh troh maak đŏng ôh dôl jot play krăk ƀâu; Nđâp tơlah geh bâr troh nter ăt mâu jêng bâr troh maak ôh.

Ndrom Samƀŭt bơh Ôsê 11:10

Khân păng mra chuat tĭng Brah Yêhôva, Păng ngrông nâm bu yau mŭr; Ngăn yơh, Păng mra ngrông, Phung kon păng văch tă bơh mpeh nhâp nar ma nau râm nsâr ngăn.

Ndrom Samƀŭt bơh Ôsê 5:14

Yorlah gâp mra jêng nâm bu du mlâm yau mŭr ma Êphraim, Nâm bu du mlâm yau mŭr kon ma ngih Yuđa. Gâp nơm yơh mra sa hêk jêh nây hăn du; Gâp mra djôt leo, jêh ri mâu geh ôh nơm dơi sâm rklaih.

Yôel 3:16

Brah Yêhôva mra rđuh bơh Siôn; Păng ƀư ăn nteh huy bâr Păng nơm luh bơh Yêrusalem. Lĕ ndâr trôk jêh ri lĕ rngôch neh ntu mpât n'găr da dê. Ƀiălah Brah Yêhôva jêng ntŭk nde ma phung ƀon lan Păng, Jêng pôih nâp ma phung ƀon lan Israel.

Amôt 1:2

Păng lah: “Tă bơh yôk Siôn, Brah Yêhôva ngrông nter. Tă bơh Yêrusalem, Păng ƀư bâr ngơi huy ngăn. Lĕ ndrêch gơ̆ phung chiăp biăp mra vơl nđor, N'gơn yôk Karmel mra nhop kro.”

Amôt 3:8

Tơlah yau mŭr rđuh ngrông Pôri mbu nơm mâu klach? Tơlah Kôranh Brah Yêhôva ntĭm nti Pôri mbu nơm mâu ngơi nau mbơh lor?

Sakari 2:13

Ăn lĕ rngôch bunuyh gŭ rklăk hom tanăp măt Brah Yêhôva, yorlah Păng hŏ kah rngăl tă bơh ntŭk kloh ueh Păng.

Nau Vay Nkah Tay 26:15

Bơh ntŭk kloh ueh May gŭ, ta ntŭk trôk prêh klơ, dăn Kôranh Brah treng uănh jêh ri ăn nau ueh uĭn ma phung ƀon lan Israel May, ma n'gor bêng ma dak toh jêh ri dak sŭt May ăn jêh ma hên, tâm ban May sơm ton jêh ma phung chô yau hên.’ ”

Nau Tâm Mpơl 19:15

Tă bơh trôm mbung Păng geh du mlâm đao hơr ngăn gay ma dong lĕ bri dak; Păng mra chiă uănh khân păng ma du mlâm mâng jra loih. Păng mra jot mpet thŭng play krăk ƀâu ma nau ji nuih Brah Ndu Geh Lĕ Nau Brah.