Yêrêmi 2:20 - Nau Brah Ndu Ngơi 2023

²⁰ “Bơh jŏ Gâp hŏ nkê̆ch pă mâng mbăk, Tôch lơi rse rvăk ma may, Ƀiălah may ngơi: ‘Gâp mâu mra pah kan đŏng ôh.’ N'hêl nanê̆ ngăn, klơ ăp yôk prêh, Tâm dâng ăp pŭm tơm si âk n'ha, May kŭnh bôk nâm bu bu ur văng tĭr.

Yêrêmi 2:20 ပူးပေါင်းရင်းမြစ်များ

I Phung Hađăch 12:32

Hađăch Jêrôbôam njêng tay du nar nau rƀŭn tâm nar jât ma prăm khay pham, nâm bu nau rƀŭn nkra jêh tâm n'gor Yuđa, jêh ri nhhơr lĕ mpa ƀư brah ta klơ nơng ƀư brah. Hađăch ƀư đŏng kơt nây ta Bêthel, nhhơr mpa ƀư brah ma rup ndrôk kon păng hŏ ƀư jêh. Hađăch njêng đŏng ta Bêthel phung kôranh ƀư brah tâm ntŭk yơk mbah ta lĕ ntŭk prêh klơ păng hŏ ndâk jêh.

I Phung Hađăch 14:23

Khân păng ndâk đŏng ăn ma khân păng nơm lĕ ntŭk prêh klơ, n'gâng mbah jêh ri rup brah Asêrah ta klơ lĕ gôl yôk prêh jêh ri tâm dâng lĕ tơm si dŭt pŭm.

Nau Mprơ Ơm 107:14

Păng njŭn leo khân păng bơh ntŭk nau ngo klĕng jêh ri gui nau khĭt, Ƀư tăch rse rvăk kât ma khân păng.

Nau Mprơ Ơm 2:3

Khân păng lah: “Ăn nkê̆ch pă lơi nkông khân păng, Jêh ri mƀăr lơi rse rvăk khân păng ăn ngai đah he.”

Nau Mprơ Ơm 78:58

Khân păng nsônh nuih Kôranh Brah yor lĕ ntŭk prêh, Ƀư ma Păng ji nuih yor lĕ rup trah.

Nau Ngluh Êjipt 19:8

Lĕ rngôch phung ƀon lan nsĭt lah n'grŭp. “Hên mra ƀư lĕ nau Brah Yêhôva hŏ ntĭnh ntăm jêh.” Y-Môis mbơh tay ma Brah Yêhôva nau phung ƀon lan ngơi.

Nau Ngluh Êjipt 24:3

Nôk Y-Môis tât jêh ri nkoch tay ma phung ƀon lan lĕ rngôch nau ngơi jêh ri lĕ nau vay Brah Yêhôva, phung ƀon lan ndrel du bâr plơ̆ lah: “Hên mra ƀư lĕ nau Brah Yêhôva lah jêh.”

Nau Ngluh Êjipt 3:8

Gâp jŭr gay ma tâm rklaih ƀon lan aơ bơh ti phung Êjipt, njŭn leo khân păng luh bơh n'gor nây, njŭn tât tâm du n'gor neh ueh jêh ri huy ngăn, ntŭk bêng ma dak toh jêh ri dak sŭt, jêng ta ntŭk gŭ phung Kanaan, phung Hitit, phung Amôrit, phung Pêrisit, phung Hivit jêh ri phung Jêbusit.

Êsai 1:21

Vư! Ƀon răp jăp Hŏ plơ̆ jêng bu ur văng tĭr! Păng bêng ma nau di, Jêh ri jêng ntŭk nau sŏng srăng gŭ tâm păng. Ƀiălah aƀaơ aơ bêng ma phung nkhĭt bunuyh!

Êsai 10:27

Tâm nar nây, mbăk jâk khân păng mra sŏk lơi tă bơh săng nglik may bu mra sŏk lơi, mâng mbăk khân păng bu mra sŏk lơi tă trô ko; mâng mbăk mra đoh jêh yorlah may jêng lay jêh.”

Êsai 14:25

Gâp mra ƀư rai phung tahan Asiri tâm bri Gâp; Gâp mra jot plên păng ta klơ yôk Gâp. Mâng mbăk păng mra dơi sŏk lơi bơh phung ƀon lan Gâp, Mbăk jâk păng mra dơi sŏk lơi bơh săng nglik khân păng.”

Êsai 9:4

Lĕ rngôch ndrom jâng phung tahan soh tâm nôk tâm lơh, Jêh ri kho ao mprănh mham Bu mra prăp ma ndơ ăn ŭnh sa da dê.

Yêrêmi 13:27

Gâp hŏ saơ lĕ nau ƀơ̆ ƀơch bơh may, Nau tih văng tir, nau pâl tâm krĭ văng tĭr phung ka n'hong may, Ta klơ lĕ dor yôk, ta nklang mir. Ơ Yêrusalem, rêh ni ăn ma may! Ndah jŏ may mra mâu ŭch ƀư kloh?”

Yêrêmi 17:2

Gay kon sau khân păng kah gĭt tay ma nơng ƀư brah Jêh ri lĕ n'gâng mbah Asêrim, Êp lĕ pŭm si âk n'ha Ta klơ lĕ dor prêh.

Yêrêmi 2:31

Hơi phung bunuyh tâm rô̆ aơ! Mĭn rvê hom nau Brah Yêhôva: Di lĕ đah phung Israel, Gâp jêng du ntŭk bri rdah, Du ntŭk n'gor neh ngo klĕng vêt vê hĕ? Mâm ƀư phung ƀon lan Gâp lah: ‘Ntŭk phung hên ŭch hăn mra hăn yơh, Phung hên mâu mra tât đah May đŏng ôh’?

Yêrêmi 3:13

‘Knŏng ŭch may dơn saơ nau tih may pô aơ: May hŏ tâm rdâng đah Yêhôva Brah Ndu; May hŏ nsong lam ntŭk tĭng brah phung bu năch tâm dâng ăp pŭm tơm si âk n'ha, Jêh ri mâu rkêng tôr ôh iăt nau Gâp.’” Brah Yêhôva lah pônây.

Yêrêmi 30:8

Brah Yêhôva ma phung tahan lah: ‘Tâm nar nây, Gâp mra nkê̆ch lơi mâng mbăk bơh trô ko may, Tôch lơi rse kât ma may, Phung bu năch mâu mra đă may pah kan đŏng ôh.

Yêrêmi 5:5

Gâp mra tât mâp phung geh nau dơi Jêh ri ngơi đah khân păng, Yorlah khân păng gĭt rah vah trong Brah Yêhôva, Nau Brah Ndu păng lah.” Ƀiălah khân păng nơm hŏ nsum ndrel nsum ndrel nkê̆ch mâng mbăk, Tăch rse!

Êsêkiêl 16:28

Ay hŏ ƀư nau văng tĭr đah phung Asiri yorlah ay mâu hŏ mpay ôh. Pakơi ƀư tih văng tĭr đah khân păng, ay ê hŏ mpay ôh.

Êsêkiêl 16:31

dôl ay ndâk nơng ƀư brah ta ntŭk lĕ rngôch tơm trong, ƀư ntŭk prêh klơ tâm ăp nkual toyh. Knŏng êng ay bu ur văng tĭr tăch săk mâu sŏk prăk ôh.

Êsêkiêl 16:41

Khân păng mra su ngih vâl ay, phat dôih ay tanăp măt âk phung bu ur. Gâp mra ƀư ma ay mâu hôm văng tĭr ôh jêh ri mâu hôm đŏng ăn prăk ma bu năch.

Êsêkiêl 20:28

Dôl Gâp hŏ leo jêh khân păng lăp neh Gâp ton ăn jêh ma khân păng, rnôk nây khân păng saơ jêh lĕ yôk prêh, lĕ rngôch tơm si dŭt pŭm jêh ri nhhơr ndơ ƀư brah ma khân păng nơm ta nây. Khân păng hŏ mpơl ta nây ndơ ƀư brah gay nsônh Gâp ji nuih; khân păng su ndơ n'hôl geh ƀâu kah jêh ri ƀư ndơ nhhơr nhêt ta nây.

Êsêkiêl 23:5

H'Ôhôla ƀư nau văng tĭr dôl păng jêng ndơ ma Gâp. Păng hăn tĭng tĭr păng jêng ƀon lan Asiri, phung chiau meng păng.

Ndrom Samƀŭt bơh Ôsê 1:2

Tơlah Brah Yêhôva ntơm lah ma Y-Ôsê, Brah Yêhôva lah ma păng: “Hăn hom nđăp du huê bu ur văng tĭr jêh ri deh phung kon ma nau văng tĭr, yorlah bri dak aơ ƀư tih nau văng tĭr nôk chalơi Brah Yêhôva.”

Ndrom Samƀŭt bơh Ôsê 2:5

Ngăn yơh, mê̆ khân păng văng tĭr, Bunuyh ntreo ma khân păng hŏ ƀư jêh nau prêng. Yorlah păng lah: ‘Gâp mra hăn tĭng phung rŏng gâp; Khân păng mra ăn ƀănh, dak, rsau biăp, brai mhay, Dak ngi jêh ri ndơ nhêt.’

Ndrom Samƀŭt bơh Ôsê 3:3

Jêh nây gâp lah ma păng: “Ăn ay gŭ mpăn ma gâp jŏ nar; lơi ƀư nau ka n'hong ôh, mâu lĕ dơi văng tĭr ma du huê bu klâu êng; gâp mra ƀư đah ay tâm ban pônây lĕ.”

Ndrom Samƀŭt bơh Ôsê 4:13

Khân păng nhhơr ndơ ƀư brah ta klơ n'gơn yôk prêh, Su ndơ ƀâu kah ta klơ lĕ yôk, Tâm dâng tơm si guyh, tơm si pôplar, tơm n'ho, Yorlah gui n'hâm păng ueh ngăn. Yor nây kon bu ur khân may ƀư nau ka n'hong, Ƀăn khân may văng tĭr.

Ndrom Samƀŭt bơh Ôsê 9:1

Hơi Israel, lơi ta răm rhơn ôh! Lơi maak ir ôh nâm bu phung mpôl băl êng. Yorlah may hŏ ƀư jêh nau ka n'hong, chalơi Brah Ndu may. May ŭch jêh ma nau prăk nkhôm du huê bu ur ka n'hong Ta lĕ rngôch ntŭk mprah ba.

Kan Lêvi 26:13

Gâp jêng Yêhôva Brah Ndu khân may, Nơm hŏ ngluh jêh khân may luh bơh Êjipt gay ma khân may mâu hôm đŏng ƀư dĭk. Gâp hŏ nkê̆ch lơi jêh mâng mbăk ma khân may gay ma ăn khân may n'gơr prêh bôk gay hăn sŏng.’

Nahum 1:13

Ƀiălah aƀaơ aơ, Gâp mra nkê̆ch pă mâng mbăk păng tă bơh khân may Jêh ri ăn tăch lơi rse chăp kât khân may.”

Nau Vay Nkah Tay 12:2

Ăn khân may ƀư rai lơi lĕ rngôch ntŭk phung ndŭl mpôl khân may mra mprơh, ntŭk khân păng hŏ pah kan jêh ma phung brah khân păng, mâu lah ta klơ yôk prêh, ta klơ gôl mâu lah tâm dâng ăp tơm si ndrêh.

Nau Vay Nkah Tay 15:15

Kah gĭt hom khân may lĕ tă ƀư dĭk jêh tâm n'gor Êjipt jêh ri Yêhôva Brah Ndu khân may tâm chuai jêh khân may. Yor nây nar aơ gâp ntĭnh ma khân may nau aơ.

Nau Vay Nkah Tay 26:17

Nar aơ, khân may dơn jêh Brah Yêhôva jêng Brah Ndu khân may, khân may mra hăn tâm trong Păng, jêh ri mât mray lĕ nau vay Păng dăp, nau vay Păng ntăm jêh ri nau vay Păng ƀư, jêh ri tông bâr Păng.

Nau Vay Nkah Tay 4:20

Bi khân may, Brah Yêhôva hŏ săch jêh ri njŭn leo khân may luh tă bơh ŭnh năk loih ri, jêng n'gor Êjipt, gay khân may jêng du phung ƀon lan êng Păng nơm, jêng drăp ndơn Păng, tâm ban khân may jêng nar aơ.

Nau Vay Nkah Tay 4:34

Mâu lah mâp geh lĕ du huê brah hăn săch ma păng nơm du mpôl băl bunuyh tă bơh nklang du mpôl băl êng ma lĕ nau tâm rlong, mpơl nau mbên jêh ri nau mbên mha, ma nau tâm lơh, ma ti nau dơi yơr huy, ma lĕ nau krit klach toyh, nâm bu lĕ rngôch nau Yêhôva Brah Ndu hŏ ƀư jêh ma khân may tâm n'gor Êjipt tanăp măt khân may?

Nau Vay Nkah Tay 5:27

Pôri, ăn may hăn dăch jêh ri iăt lĕ nau Yêhôva Brah Ndu hên ntĭm nti, jêh nây nkoch tay ma hên lĕ nau Yêhôva Brah Ndu ngơi ma may. Hên mra iăt jêh ri ƀư tĭng nau nây.’

Yôsuê 1:16

Khân păng lah ma Y-Yôsuê: “Hên mra ƀư lĕ nau may ntăm jêh ma hên jêh ri mra hăn moh ntŭk may đă hăn.

Yôsuê 24:24

Phung ƀon lan lah ma Y-Yôsuê: “Hên mra pah kan ma Yêhôva Brah Ndu hên, jêh ri hên mra tông bâr Păng.”

Yôsuê 24:26

Y-Yôsuê nchih lĕ nau vay aơ tâm ndrom samƀŭt nau vay Brah Ndu. Jêh nĕ, păng sŏk du rplay lŭ toyh n'gân ta nây, tâm dâng tơm guyh dăch ntŭk Kloh Ueh Brah Yêhôva.

Nau Tâm Mpơl 17:1

Nôk nây, du huê tâm pơh nuyh tông mpăr djôt pơh mlâm ngan văch tât jêh ri đă ma gâp pô aơ: “Văch hom aơ, gâp mra ntĭm ma may nau phat dôih bu ur văng tĭr toyh gŭ ta klơ lĕ n'hong dak ri.

Phung Kôranh Phat Dôih 10:6

Phung ƀon lan Israel plơ̆ ƀư tay nau djơh tanăp măt Brah Yêhôva. Khân păng pah kan ma brah Baal jêh ri brah Astarôt, nđâp lĕ brah phung ƀon lan Aram, lĕ brah phung ƀon lan Sidôn, lĕ brah phung ƀon lan Môap, lĕ brah phung ƀon lan Ammôn, jêh ri lĕ brah phung ƀon lan Philistin. Khân păng chalơi Brah Yêhôva, mâu hôm ôh pah kan ma Păng.

Phung Kôranh Phat Dôih 2:11

Nôk nây, phung ƀon lan Israel ƀư nau mhĭk tanăp măt Brah Yêhôva, pah kan ma phung rup brah Baal,

Phung Kôranh Phat Dôih 2:13

Khân păng chalơi jêh Brah Yêhôva gay pah kan ma brah Baal jêh ri ma brah Astarôt.

I Samuel 12:10

Rnôk nây, khân păng vơl dăn ma Brah Yêhôva, jêh ri lah: ‘Hên ƀư tih jêh, yorlah hên lĕ chalơi jêh Brah Yêhôva gay pah kan ma phung brah Baal jêh ri ma brah Astarôt. Ƀiălah aƀaơ, tâm rklaih hom hên tă bơh ti phung rlăng hên, hên mra pah kan ma May.’