Yêrêmi 18:10 - Nau Brah Ndu Ngơi 2023

¹⁰ ƀiălah tơlah bri dak nây ƀư nau mhĭk tâm dâng măt Gâp, mâu iăt ôh bâr Gâp, pôri Gâp mra tâm rgâl nau mĭn ăn nau ueh uĭn ăn ma khân păng.

Yêrêmi 18:10 ပူးပေါင်းရင်းမြစ်များ

Nau Mprơ Ơm 125:5

Bi ma phung ŭch tĭng ndô̆ nau kue, Brah Yêhôva mra mprơh khân păng ndrel ma phung ƀư mhĭk. Ăn nau đăp mpăn gŭ ta phung Israel!

Êsêkiêl 18:24

Ƀiălah tơlah bunuyh sŏng srăng chalơi nau sŏng srăng păng jêh ri ƀư tih, ƀư nau ƀơ̆ ƀơch nâm bu phung ƀai hŏ ƀư, bunuyh nây dơi geh nau rêh lĕ? Mâu, mâu geh du ntil nau sŏng srăng păng hŏ ƀư dơi kah gĭt tay. Yor nau mâu răp jăp jêh ri nau tih păng hŏ ƀư yor nây păng mra khĭt.’

Êsêkiêl 33:12

Bi ma may, hơi kon bunuyh, lah hom ma phung ƀon lan may pô aơ: Nau sŏng may nau sŏng mâu mra tâm rklaih păng ôh tơlah păng ƀư tih, jêh ri nau mhĭk nơm mhĭk mâu mra ƀư ăn păng rdja tơlah păng hŏ chalơi jêh nau mhĭk nây. Bunuyh sŏng srăng mâu mra yor tă nau sŏng srăng păng ơm geh dơi rêh tâm nar păng ƀư tih.

Êsêkiêl 33:18

Tơlah bunuyh sŏng srăng chalơi nau sŏng srăng păng nơm ƀư nau mhĭk pôri păng mra khĭt tâm nau nây.

Êsêkiêl 45:20

Năng pơh tâm khay nây, ăt may ƀư tâm ban pônây ăn ma phung yor mâu gĭt rbăng mâu lah rluk ƀư tih. Nâm pônây, may mra ƀư brah chuai nau tih ăn ma ngih brah.

Sôphôni 1:6

Nđâp phung lĕ chalơi jêh mâu tĭng Brah Yêhôva, Phung mâu ŭch joi Brah Yêhôva, jêh ri mâu ôp ôh Păng.

Nau Kơp Bunuyh 14:22

lĕ rngôch phung saơ jêh nau chrêk rmah jêh ri nau mbên khlay Gâp hŏ ƀư jêh tâm n'gor Êjipt jêh ri tâm bri rdah, ƀiălah hŏ rlong uănh jêh Gâp jât tơ̆, tâm ban đŏng mâu tông bâr Gâp ôh,

Nau Kơp Bunuyh 14:23

mâu mra du huê bunuyh tâm khân păng mra saơ n'gor Gâp sơm ton jêh gay ăn ma phung chô yau khân păng. Mâu geh du huê ôh mưch ma Gâp mra saơ n'gor nây.

Nau Kơp Bunuyh 14:34

Khân may hăn n'hut uănh ndah âk nar, jêng puăn jât nar, pôri khân may mra anh nau rmal yorlah nau tih khân may nơm dôl puăn jât năm, ăp nar ntrok ma du năm. Dôl nây khân may mra gĭt nau rmal Gâp.

I Samuel 13:13

Y-Samuel lah ma Y-Sôl: “May ƀư nau brŭt moih jêh, mâu djôt prăp ôh lĕ nau vay ntăm bơh Yêhôva Brah Ndu may hŏ ntăm ma may. Nanê̆, Brah Yêhôva hŏ njêng ƀon bri hađăch may nâp n'ho ro ma phung Israel;

I Samuel 15:11

“Gâp lĕ nhhuach jêh njêng ăn ma Y-Sôl jêng hađăch, yorlah păng ndôn kơi tă bơh Gâp, mâu ƀư tĭng nâm nau Gâp ntăm.” Y-Samuel rngot ngăn, jêh ri păng vơl dăn ma Brah Yêhôva du măng kŏ ang.

I Samuel 15:35

Bơh nĕ kŏ tât nar Y-Samuel khĭt, păng mâu hôm tâm mâp đah Y-Sôl. Ƀiălah, Y-Samuel rngot ngăn yor Y-Sôl. Bi Brah Yêhôva nhhuach yorlah hŏ njêng jêh Y-Sôl jêng hađăch ma phung Israel.

I Samuel 2:30

Yor ri, Yêhôva Brah Ndu Israel lah: ‘Gâp hŏ tă lah jêh pô aơ ngih may jêh ri ngih mbơ̆ may mra n'ho ro pah kan tanăp măt Gâp.’ Ƀiălah aƀaơ Brah Yêhôva lah, nau nây mâu hôm geh tâm ban pônây ôh! Yorlah mbu nơm yơk ma Gâp, Gâp mra yơk ma păng, bi mbu tâm rmot ma Gâp, Gâp mra tâm rmot ma păng.