Sôphôni 3:20 - Nau Brah Ndu Ngơi 2023

²⁰ Tâm nôk nây, Gâp mra djôt leo khân may plơ̆ sĭt, Nây jêng nôk Gâp tâm rgum tay khân may; Yorlah Gâp mra ƀư ma khân may lư n'găr Jêh ri geh nau tâm rnê ta nklang lĕ rngôch phung ƀon lan tâm neh ntu, Lah Gâp leo phung tă ƀư bu nă bơh phung khân may plơ̆ sĭt Tanăp măt khân may ro,” Brah Yêhôva lah pônây.

Sôphôni 3:20 ပူးပေါင်းရင်းမြစ်များ

Nau Mprơ Ơm 35:6

Ăn trong khân păng jêng ngo klĕng jêh ri mbĭr prah, Dăn tông mpăr Brah Yêhôva mprơh tĭng khân păng!

Êsai 56:5

Pôri Gâp mra ăn ma khân păng du ntŭk tâm ngih Gâp, Tâm lĕ mpêr ƀon Gâp, Jêh ri ăn ma khân păng du amoh ueh lơn ma amoh phung kon bu klâu jêh ri ma phung kon bu ur; Gâp mra ăn ma khân păng du amoh n'ho ro, Jêng amoh mâu blau roh.

Êsai 56:8

Kôranh Brah jêng Brah Yêhôva, Nơm tâm rƀŭn phung Israel nchah rai pru pra jêh, lah pô aơ: ‘Đơ phung hŏ tâm rƀŭn jêh, Gâp mra tâm rƀŭn phung êng đŏng plơ̆ sĭt ma păng.’”

Êsai 60:15

Ntrok bu hŏ chuêl jêh ri tâm rmot jêh ma may, Kŏ tât mâu geh nơm hăn rgăn ta ntŭk may ôh, Ri mơ Gâp mra ăn may nau yơk mro mrăng, Jêh ri jêng nau răm maak ma âk rô̆.

Êsai 61:9

Lĕ bri dak bu mra gĭt năl phung kon sau khân may, Phung sau se khân păng mra lư n'găr ta nklang phung ndŭl mpôl bunuyh; Lĕ rngôch phung saơ khân păng mra gĭt rbăng Khân păng jêng du phung ƀon lan Brah Yêhôva ăn nau ueh uĭn.

Êsai 62:12

Bu mra rnha khân may jêng “phung ƀon lan kloh ueh”, Jêng “phung ƀon lan Brah Yêhôva tâm chuai jêh”; Bi may bu mra rnha may jêng “ƀon bu mra joi”. Jêng lah “ƀon toyh bu mâu hôm chalơi ôh”.

Êsai 62:7

Mâu lĕ ăn Păng rlu Kŏ tât nôk Păng ndâk njêng tay Yêrusalem, Jêh ri njêng păng jêng nau tâm rnê tâm lam neh ntu!

Êsai 66:22

“Yorlah tâm ban ma trôk mhe jêh ri neh mhe Gâp rhăk njêng jêh, Mra ăt hôm e tanăp Gâp tâm ban kơt nây lĕ, Noi deh jêh ri amoh săk năm deh khân may mra ăt hôm e nâm bu kơt nây lĕ.” Brah Yêhôva lah pônây.

Yêrêmi 23:3

Gâp nơm mra rgum biăp hôm klen luh bơh lĕ rngôch bri dak Gâp hŏ mprơh jêh khân păng tât. Gâp mra njŭn khân păng plơ̆ sĭt ma ndrêch gơ̆ khân păng nơm; khân păng mra bĭk rơ̆ dŭt âk ngăn.

Yêrêmi 29:14

Brah Yêhôva lah: “Gâp mra ăn khân may dơi mâp Gâp jêh ri gâp mra njŭn leo khân may bơh ntŭk ƀư dĭk. Gâp mra rgum tay khân may bơh lĕ rngôch bri dak jêh ri bơh lĕ rngôch ntŭk Gâp hŏ mprơh khân may. Gâp mra njŭn khân may sĭt tă bơh ntŭk Gâp hŏ nhŭp veng leo jêh khân may.”

Yêrêmi 30:3

Brah Yêhôva lah: ‘Aơ, nar panăp Gâp mra njŭn leo phung ƀon lan Israel jêh ri Yuđa Gâp plơ̆ sĭt tă bơh ntŭk jêng dĭk, Gâp mra njŭn leo khân păng sĭt tâm bri dak Gâp hŏ ăn jêh ma phung chô yau khân păng, jêh ri khân păng mra sŏk dơn bri dak nây ƀư drăp ndơn.’ Brah Yêhôva lah pônây.”

Yêrêmi 33:9

Ƀon toyh aơ mra njŭn leo tay ăn ma Gâp geh amoh răm maak, nau tâm rnê jêh ri du nau chrêk lơp tanăp măt lĕ rngôch phung mpôl băl bunuyh ta neh ntu. Lah tăng lĕ rngôch nau ueh Gâp ƀư ăn ma khân păng, lĕ ntil mpôl bunuyh mra rklaih da dê jêh ri râm nsâr tanăp lĕ nau ueh jêh ri nau đăp mpăn Gâp mra ăn ma khân păng.’

Êsêkiêl 16:53

Gâp mra njŭn leo phung tă bơh nau jêng bu nă ma ƀon Sôdôm jêh ri ma phung kon bu ur păng plơ̆ sĭt, njŭn leo phung tă bơh nau jêng bu nă ma ƀon Samari jêh ri phung kon bu ur păng plơ̆ sĭt, jêh ri tâm ban lĕ njŭn leo phung tă bơh jêng bu nă ay gŭ ta nklang khân păng plơ̆ sĭt đŏng,

Êsêkiêl 28:25

Kôranh Brah Yêhôva lah: “Tơlah Gâp rgum ngih Israel tă bơh nklang phung ƀon lan khân păng hŏ ƀư nchah rai pru pra jêh, Gâp mra mpơl nau kloh ueh Gâp ta nklang khân păng panăp măt lĕ phung ƀon lan. Nôk nây, khân păng mra gŭ tâm bri Gâp hŏ ăn jêh ma oh mon Gâp jêng Y-Yakôb.

Êsêkiêl 34:16

Gâp mra joi biăp lĕ nhhơt roh, têk mplơ̆ sĭt biăp bu mprơh, biăp geh rmanh put săm ăn bah jêh ri ƀư ma phung lĕ huăr dơi jêng ktang. Ƀiălah Gâp mra ƀư rai lơi phung biăp lay jêh ri ktang. Gâp mra chiă uănh khân păng ma nau sŏng srăng.

Êsêkiêl 37:12

Pôri, mbơh lor hom jêh ri lah ma khân păng pô aơ Kôranh Brah Yêhôva lah: “Hơi phung ƀon lan Gâp, aơ, Gâp mra pơk môch khân may, ƀư ăn khân may luh tă bơh môch, jêh ri Gâp mra njŭn khân may sĭt tâm bri Israel.

Êsêkiêl 37:21

jêh ri lah ma khân păng pô aơ Kôranh Brah Yêhôva lah: ‘Aơ, Gâp mra njŭn leo kon sau phung Israel tă bơh lĕ rngôch bri dak khân păng hŏ hăn tât jêh. Gâp mra rgum tay khân păng tă bơh puăn njônh jêh ri njŭn khân păng sĭt tâm bri êng ma khân păng nơm.

Êsêkiêl 39:13

Lĕ rngôch phung ƀon lan gŭ tâm n'gor mra tâp khân păng. Nây jêng du nar toyh ăn ma phung ƀon lan Israel, nây jêng du nar Gâp mra tâm mpơl nau chrêk rmah, Kôranh Brah Yêhôva lah pônây.

Êsêkiêl 39:28

Khân păng mra gĭt Gâp jêng Yêhôva Brah Ndu khân păng, nđâp lah Gâp hŏ mprơh khân păng jêng bu nă tâm lĕ bri dak êng jêh nây rgum tay khân păng sĭt ta bri dak khân păng nơm, mâu ăn klen du huê bunuyh ôh.

Yôel 3:1

“Yor aơ, tâm lĕ nar nây, jêh ri jêng rnôk Gâp mra njŭn phung bu nă bơh Yuđa jêh ri Yêrusalem plơ̆ sĭt,

Amôt 9:14

Gâp mra njŭn leo phung ƀon lan Israel Gâp plơ̆ sĭt bơh bu nă; Khân păng mra ndâk tay lĕ ƀon toyh lĕ rai jêh, jêh ri gŭ ta nây. Khân păng mra tăm đang krăk ƀâu jêh ri nhêt ndrănh păng, Khân păng mra jik mir khân păng jêh ri sa play păng.

Mika 2:12

“Hơi Yakôb! N'hêl nanê̆ Gâp mra tâm rƀŭn lĕ rngôch khân may, Nanê̆ ngăn Gâp mra rgum lĕ phung Israel hôm e, Jêh ri djôt khân păng gŭ nsum tay Nâm bu phung biăp tâm ndrung, Nâm bu du phung biăp gŭ ta nklang tâm ndrêch khân păng; Ta ntŭk nây mra geh bâr bunuyh drơu drơu.

Mika 4:7

Jêh nây Gâp mra sŏk bunuyh kuet ƀư jêng phung ƀon lan hôm e klen Jêh ri phung bu chalơi jêng du bri dak dŭt janh: Brah Yêhôva mra chiă uănh khân păng ta klơ yôk Siôn Ntơm bơh aƀaơ aơ kŏ tât lĕ rngôch rnôk n'ho ro.

Sôphôni 2:7

N'gor nây mra jêng ăn ma phung ngih Yuđa hôm e klen; Khân păng mra chiăp biăp ta nây. Lah ngo, khân păng mra bê̆ch măng Tâm lĕ ngih ƀon Askalôn; Yorlah Yêhôva Brah Ndu khân păng mra chop khâl khân păng, Jêh ri leo phung tă ƀư bu nă ăn khân păng plơ̆ sĭt.

Sôphôni 3:19

Aơ, tâm nôk nây, Gâp mra tâm rdâng đah lĕ rngôch phung tŭn jot may; Gâp mra tâm rklaih ƀư bah phung kuet rvĕn, Kuăl rgum phung tă bu mprơh du, Gâp mra ƀư ma khân păng geh nau tâm rnê jêh ri nau lư n'găr Tâm ăp ntŭk bu hŏ ƀư bêk prêng jêh khân păng.

Sakari 8:13

Hơi ngih Yuđa jêh ri Israel! Mâm jêng nau bu rak rtăp khân may tâm ăp bri dak, pôri Gâp mra tâm rklaih khân may, jêh ri ƀư ma khân may mra jêng du nau ueh uĭn tâm ban lĕ. Lơi klach ôh, ƀiălah ƀư hom ti khân may ăn jêng dăng!”

Sakari 8:8

Gâp djôt leo khân păng sĭt, jêh ri khân păng mra gŭ ta nklang ƀon Yêrusalem. Khân păng mra jêng phung ƀon lan Gâp; bi Gâp mra jêng Brah Ndu khân păng tâm nau răp jăp jêh ri nau sŏng srăng.”

Malachi 3:12

“Lĕ bri dak mra ntơ ma khân may geh nau ueh lăng ngăn, yorlah bri dak khân may jêng du n'gor bri dak dơi răm maak.” Brah Yêhôva ma phung tahan lah pônây.

Nau Vay Nkah Tay 26:18

Nar aơ, Brah Yêhôva mbơh jêh ma khân may jêng du phung ƀon lan prăp ma Păng nơm, tĭng nâm Păng hŏ lah jêh ma khân may, jêh ri khân may mra mât mray lĕ rngôch nau vay Păng ntăm,

Nau Vay Nkah Tay 26:19

Păng ƀư ma khân may dơi geh nau tâm rnê, nau lư n'găr jêh ri nau yơk, rlau lơn lĕ rngôch ntil mpôl băl Păng hŏ rhăk njêng jêh, jêh ri khân may mra jêng du phung ƀon lan kloh ueh prăp ăn ma Yêhôva Brah Ndu khân may, tĭng nâm Păng hŏ lah jêh.”