Nau Ngluh Êjipt 32:4 - Nau Brah Ndu Ngơi 2023

⁴ Ăn Y-Arôn dơn mah bơh ti khân păng, păng sŏk ndơ dŏng tŏ njêng rup du mlâm ndrôk kon. Phung ƀon lan lah: “Ơ phung Israel! Aơ jêng brah khân may, nơm ngluh jêh khân may bơh n'gor Êjipt.”

Nau Ngluh Êjipt 32:4 ပူးပေါင်းရင်းမြစ်များ

I Phung Hađăch 12:28

Jêh nây nchră mĭn, hađăch ntrŭnh ƀư bar mlâm ndrôk kon ma mah, jêh ri păng lah ma phung ƀon lan: “Khân may hăn hao Yêrusalem jêr ngăn! Hơi Israel! Aơ jêng phung brah khân may, hŏ njŭn leo khân may du luh bơh Êjipt.”

I Phung Hađăch 12:32

Hađăch Jêrôbôam njêng tay du nar nau rƀŭn tâm nar jât ma prăm khay pham, nâm bu nau rƀŭn nkra jêh tâm n'gor Yuđa, jêh ri nhhơr lĕ mpa ƀư brah ta klơ nơng ƀư brah. Hađăch ƀư đŏng kơt nây ta Bêthel, nhhơr mpa ƀư brah ma rup ndrôk kon păng hŏ ƀư jêh. Hađăch njêng đŏng ta Bêthel phung kôranh ƀư brah tâm ntŭk yơk mbah ta lĕ ntŭk prêh klơ păng hŏ ndâk jêh.

II Phung Hađăch 10:20

Y-Jêhu ntĭnh: “Nkra hom du nau tâm rƀŭn ma nau yơk ma brah Baal.” Pôri bu mbơh nau tâm rƀŭn nây.

II Phung Hađăch 10:29

Ƀiălah, Y-Jêhu mâu chalơi ôh nau tih Y-Jêrôbôam, kon bu klâu Y-Nêbat, jêng nau hŏ ƀư ma phung Israel ƀư tih. Y-Jêhu mâu ƀư rai ôh nau yơk mbah rup kon ndrôk mah ta Bêthel jêh ri ta ƀon Dan.

II Nau Rêh Jêng 11:15

Y-Jêrôbôam njêng phung kôranh ƀư brah gay pah kan ma ntŭk prêh, ma lĕ rup be nkuăng jêh ri ndrôk kon păng hŏ ƀư jêh.

II Nau Rêh Jêng 13:8

Pôri aƀaơ, khân may mĭn phung tahan âk râk, geh ndrôk kon mah Y-Jêrôbôam hŏ tŏ jêh jêng brah ma khân may, khân may klăp lah dơi tâm rdâng đah ƀon bri hađăch Brah Yêhôva hŏ ăn jêh ma phung kon sau Y-Đavit lĕ?

Nêhêmi 9:18

Nđâp tơlah khân păng hŏ tŏ jêh du mlâm rup ndrôk nkuăng jêh ri lah: ‘Aơ jêng brah hŏ njŭn khân may luh bơh Êjipt’ Jêh ri ngơi sưr ma Kôranh Brah,

Nau Ngluh Êjipt 20:2

“Gâp jêng Yêhôva Brah Ndu khân may, Nơm hŏ ngluh jêh khân may tă bơh n'gor Êjipt, tă bơh ngih dĭk bu.

Nau Ngluh Êjipt 20:23

Yor ri khân may mâu dơi ƀư du ntil rup brah ta pĭt Gâp; mâu dơi ƀư ôh ma khân may nơm lĕ rup brah ma prăk mâu lah ma mah.’

Nau Ngluh Êjipt 20:4

Kon mâu dơi ƀư ma may nơm du mlâm rup brah tĭng nâm rup lĕ mpa tâm trôk ta klơ, mâu lah ta neh ntu, mâu lah tâm dak tâm dâng neh ntu.

Nau Ngluh Êjipt 28:11

Ăn may chrăk amoh lĕ phung kon bu klâu Israel ta klơ bar găr lŭ khlay nây tĭng nâm nau bunuyh blau chrăk ndơ tâp pŏng, jêh nây nsêr tâm rvang năp ma mah.

Nau Ngluh Êjipt 28:9

May sŏk đŏng bar găr ônik jêh ri chrăk ta nây amoh lĕ phung kon bu klâu Y-Israel:

Nau Ngluh Êjipt 32:1

Lah phung ƀon lan saơ Y-Môis gŭ ta klơ yôk jŏ ngăn ê hŏ trŭnh, khân păng rƀŭn ndrel jŭm Y-Arôn jêh ri ngơi: “Kay lŏng! Ăn may ƀư ma he lĕ phung brah hăn panăp he, yorlah phung hên mâu gĭt ôh moh nau hŏ tât ma Y-Môis, nơm hŏ ngluh jêh he luh bơh n'gor Êjipt.”

Nau Ngluh Êjipt 32:24

Gâp lah ma khân păng, ‘Mbu geh mah, doh lơi hom!’ Khân păng ăn mah nây ma gâp, gâp mƀăr mah nây tâm ŭnh jêh ri bơh nây luh ndrôk kon aơ.”

Nau Ngluh Êjipt 32:3

Lĕ rngôch phung ƀon lan doh thek mah ta klơ tôr khân păng jêh ri ndơ̆ ăn ma Y-Arôn.

Nau Ngluh Êjipt 32:35

Brah Yêhôva ăn tât nau mhĭk ma phung ƀon lan yorlah khân păng ƀư jêh rup ndrôk kon ma mah jêh ri Y-Arôn hŏ tŏ păng.

Nau Ngluh Êjipt 32:5

Lah Y-Arôn saơ nau nây, păng ndâk du mlâm nơng ƀư brah panăp ndrôk kon nây jêh nây păng nter mbơh: “Ôi taơ bu mra geh nar rƀŭn ma Brah Yêhôva!”

Nau Ngluh Êjipt 32:7

Brah Yêhôva lah ma Y-Môis: “Jŭr hom, yorlah phung ƀon lan may ngluh jêh bơh n'gor Êjipt hŏ mhĭk jêh.

Nau Ngluh Êjipt 32:8

Khân păng hŏ chalơi ndal trong Gâp hŏ ntĭm nti jêh, tŏ njêng jêh ma khân păng nơm du mlâm rup ndrôk kon, yơk mbah ma rup nây, nhhơr ndơ ƀư brah ma păng jêh ri lah: ‘Ơ phung Israel! Aơ jêng brah hŏ ngluh jêh khân may luh bơh n'gor Êjipt!’”

Êsai 30:22

Khân may mra ƀư ƀơ̆ ƀơch lĕ rup trah chiăr ma prăk jêh ri rup tŏ ma mah. Khân may mra mƀăr lơi khân păng tâm ban ma ndơ ƀơ̆ jêh ri lah: “Du hom!”

Êsai 46:6

Bu sŏk mah tă bơh dŭng, Jêh ri veh prăk ma njing; Khân păng nkhôm nơm chiăr prăk tŏ du brah, Jêh ri păn yơk mbah.

Êsêkiêl 23:8

Păng mâu lơi ôh nau văng tĭr păng djôt leo ntơm bơh n'gor bri Êjipt jêng ntŭk bu hŏ ƀư bêk păng dôl rnôk hôm druh mom, ƀư ăn roh ndŭl druh păng jêh ri nkhŭt nau văng tĭr ta khân păng.

Ndrom Samƀŭt bơh Ôsê 10:5

Phung gŭ tâm n'gor Samari mra krit klach Ăn lĕ ndrôk kon, Bêt-Aven Phung ƀon lan mra nhĭm nhhiăng ma păng, Phung kôranh ƀư brah ŭch ngăn ma păng ăt nhĭm nhhiăng Yorlah nau chrêk rmah păng hŏ du roh jêh.

Ndrom Samƀŭt bơh Ôsê 13:2

Aƀaơ, khân păng ƀư tih lơ hâu âk lơn; Khân păng ƀư ma khân păng nơm âk ma lĕ rup brah tŏ chiăr, Sŏk ma blau mĭn khân păng nơm tŏ chiăr lĕ rup brah ma prăk; Lĕ rngôch jêng nau kan bơh bunuyh blau rhăk! Bu lah ma phung nhhơr ndơ ƀư brah pô aơ: “Kon bunuyh chŭm nkhơng ndrôk kon!”

Kôranh Oh Mon 17:29

Pônây, jêng ndŭl mpôl Brah Ndu, he lơi mĭn Nơm Brah jêng tâm ban ma rup brah ma mah, prăk, mâu lah lŭ bơh nau blau jan jêh ri nau blau mĭn bơh kon bunuyh ƀư.

Kôranh Oh Mon 7:41

Tâm lĕ nar nây, khân păng tŏ rup du mlâm kon ndrôk, nhhơr ndơ ƀư brah ma rup brah nây jêh ri khân păng răm maak ma nau kan tă bơh ti khân păng ƀư.

I Kôrintô 10:7

Lơi dĭng mbah rup brah nâm bu ƀaƀă tâm phung khân păng, nâm bu nau hŏ nchih jêh: “Phung ƀon lan gŭ sông sa nhêt, Jêh nây dâk pâl ntalơ̆.”

Nau Vay Nkah Tay 9:16

Gâp saơ nanê̆ khân may hŏ ƀư tih jêh đah Yêhôva Brah Ndu, khân may gơnh chalơi trong Brah Yêhôva hŏ ntĭm nti jêh ma khân may, khân may tŏ jêh ma khân may nơm du mlâm rup kon ndrôk.

Phung Kôranh Phat Dôih 8:24

Y-Gidêôn lah ma khân păng: “Ăn gâp dăn ma khân may du nau, jêng ăp nơm tâm khân may jao hom ma gâp lĕ rvang mblo tôr khân may pit in nây.” (Yorlah phung Ismaêl geh nau vay mblo rvang mah ta tôr.)

Phung Kôranh Phat Dôih 8:27

Y-Gidêôn sŏk mah nây ƀư du rup êphôt jêh ri dơm tâm ƀon toyh păng nơm ta Ôphra. Lĕ rngôch phung Israel ƀư nau văng tĭr nôk khân păng nhhơr mbah êphôt nây; păng jêng du mlâm dăk sân ma Y-Gidêôn jêh ri lĕ rngôch vâl păng.