Nau Ngluh Êjipt 3:19 - Nau Brah Ndu Ngơi 2023

¹⁹ Ƀiălah, Gâp gĭt hađăch Êjipt mâu mra ăn khân may hăn ôh, tơlah mâu geh mpang ti nau brah dơi kơl an.

Nau Ngluh Êjipt 3:19 ပူးပေါင်းရင်းမြစ်များ

Nau Ngluh Êjipt 10:20

Ƀiălah Brah Yêhôva ƀư dăng nuih Pharaôn; hađăch nây mâu ăn phung ƀon lan Israel hăn ôh.

Nau Ngluh Êjipt 11:10

Y-Môis jêh ri Y-Arôn ƀư lĕ rngôch nau mbên khlay aơ tanăp Pharaôn; ƀiălah Brah Yêhôva ƀư dăng nuih n'hâm Pharaôn, yor ri Pharaôn mâu ăn ôh phung ƀon lan Israel du luh tă bơh n'gor păng.

Nau Ngluh Êjipt 11:9

Brah Yêhôva lah ma Y-Môis: “Pharaôn mâu iăt ôh nau may, gay ma Gâp n'hao âk nau mbên khlay tâm n'gor Êjipt.”

Nau Ngluh Êjipt 13:15

Nôk Pharaôn dăng nuih n'hâm mâu ăn ôh hên hăn du luh, Brah Yêhôva hŏ nkhĭt lĕ rngôch kon dak bôk tâm n'gor Êjipt, ntơm bơh kon bu klâu bôk rah bunuyh kŏ tât kon dak bôk mpô mpa rong. Yor nây dĭng gâp nhhơr ma Brah Yêhôva dĭng lĕ rngôch kon nkuăng dak bôk jêng ndơ ƀư brah, jêh ri tâm chuai kon bu klâu bôk rah tâm phung kon bu klâu gâp.’

Nau Ngluh Êjipt 4:21

Brah Yêhôva lah ma Y-Môis: “Lah may plơ̆ sĭt ta n'gor Êjipt, ăn may ƀư lĕ rngôch nau mbên khlay Gâp hŏ jao jêh tâm ti may gay ƀư tanăp Pharaôn. Ƀiălah Gâp mra ƀư ăn hađăch Êjipt dăng nuih n'hâm, mâu ăn ôh phung ƀon lan hăn.

Nau Ngluh Êjipt 5:2

Ƀiălah Pharaôn lah: “Brah Yêhôva mbu jêng, dĭng gâp ma tông bâr gay ma ăn phung ƀon lan Israel hăn? Gâp mâu gĭt năl ôh Brah Yêhôva jêh ri gâp mâu đŏng ăn Phung ƀon lan Israel hăn.”

Nau Ngluh Êjipt 6:1

Brah Yêhôva lah ma Y-Môis: “Aƀaơ may mra saơ lĕ nau Gâp mra ƀư ma Pharaôn. Nanê̆, yor tă bơh mpang ti nau brah Gâp, hađăch nây mra ăn phung Israel hăn luh; yor tă bơh mpang ti nau brah Gâp, hađăch nây mra mprơh khân păng luh bơh n'gor păng.”

Nau Ngluh Êjipt 8:28

Pharaôn lah: “Gâp mra ăn khân may hăn gay nhhơr mpa ƀư brah ma Yêhôva Brah Ndu khân may tâm bri rdah, ƀiălah mâu dơi hăn ngai ir. Aƀaơ mbơh sơm hom ma gâp.”

Nau Ngluh Êjipt 9:35

Nuih n'hâm Pharaôn jêng dăng tay, mâu ăn ôh phung ƀon lan Israel hăn, di tĭng nâm Brah Yêhôva hŏ lah jêh ma Y-Môis.

Nau Ngluh Êjipt 9:7

Pharaôn đă bu hăn uănh n'hêl nanê̆ ngăn, mpô mpa phung Israel mâu geh khĭt ôh. Ƀiălah nuih n'hâm Pharaôn ăt hôm dăng, mâu ăn phung ƀon lan hăn.