Nau Ngluh Êjipt 19:6 - Nau Brah Ndu Ngơi 2023

⁶ Khân may mra dơi jêng du ƀon bri hađăch phung kôranh ƀư brah jêh ri du phung mpôl kloh ueh ma Gâp.’ Nĕ jêng lĕ nau may mra ngơi ma phung ƀon lan Israel.”

Nau Ngluh Êjipt 19:6 ပူးပေါင်းရင်းမြစ်များ

I Phung Hađăch 3:8

Oh mon May gŭ ta nklang phung ƀon lan May hŏ săch jêh, du phung ƀon lan âk râk mâu dơi kơp ôh.

I Phung Hađăch 8:53

Hơi Kôranh Brah jêng Brah Yêhôva! Kôranh Brah hŏ prăp êng phung Israel luh tă bơh lĕ rngôch phung ƀon lan klơ neh ntu, gay ma khân păng jêng drăp ndơn May, tĭng nâm May mbơh jêh ma bâr mbung Y-Môis jêng oh mon May, dôl May ngluh phung chô yau hên du luh bơh Êjipt.”

I Nau Rêh Jêng 17:22

Kôranh Brah hŏ ƀư ăn ma phung ƀon lan Israel rlơ̆ jêng phung ƀon lan ma May nơm kŏ tât ƀaƀơ n'ho ro. Bi May, Hơi Brah Yêhôva, May jêng Brah Ndu khân păng.

Nau Mprơ Ơm 114:2

Yuđa jêng ngih kloh ueh Păng Jêh ri Israel jêng ƀon bri hađăch Păng chiă uănh.

Nau Ngluh Êjipt 15:26

Brah Ndu lah: “Tơlah khân may gŭ iăt nanê̆ bâr Yêhôva Brah Ndu khân may, ƀư nau di tanăp măt Gâp, rkêng tôr iăt lĕ nau vay ntăm jêh ri djôt prăp dĭng lĕ nau vay dăp bơh Gâp, pôri Gâp mâu mra ăn tât ôh ma khân may du ntil nau ji tâm lĕ ntil nau ji Gâp hŏ ƀư jêh ma phung Êjipt. Gâp jêng Brah Yêhôva, Nơm ƀư bah nau ji khân may.”

Nau Ngluh Êjipt 22:31

Phung khân may jêng bunuyh kloh ueh ma Gâp, yor nây mâu dơi sa ôh puăch mpa tă mpô mpa bri sa hêk tâm mir, ăn may mƀăr păng ma so sa.

Nau Ngluh Êjipt 28:36

Ăn may ƀư đŏng du pŏk jê̆ mah chrêk jêh ri chrăk klơ nây, tâm ban ma bu chrăk ndơ tâp pŏng, lĕ rplay samƀŭt: ‘KLOH UEH MA BRAH YÊHÔVA.’

Êsai 43:4

Yorlah Gâp uănh may jêng khlay jêh ri geh nau yơk. Gâp yơh hŏ rŏng ma may, Rĭ dĭng Gâp mra ăn nơm ntrok ma may, Jêh ri ăn lĕ ntil mpôl bunuyh ntrok nau rêh may.

Êsai 61:6

Bi khân may bu mra rnha khân may phung kôranh ƀư brah ma Brah Yêhôva, Bu mra kuăl khân may jêng phung oh mon Brah Ndu he; Khân may mra dơn drăp ndơ bơh lĕ bri dak, Jêh ri sŏk lĕ nau geh jêng khân păng.

Êsai 62:12

Bu mra rnha khân may jêng “phung ƀon lan kloh ueh”, Jêng “phung ƀon lan Brah Yêhôva tâm chuai jêh”; Bi may bu mra rnha may jêng “ƀon bu mra joi”. Jêng lah “ƀon toyh bu mâu hôm chalơi ôh”.

Êsai 66:21

Brah Yêhôva lah: “Gâp ăt mra săch phung ƀaƀă tâm khân păng ăn jêng kôranh ƀư brah jêh ri phung Lêvi.”

Yêrêmi 13:11

Brah Yêhôva lah tay: “Yorlah, nâm bu rse rêt nâp mâm ta bŭt bu, pôri yơh Gâp ăt rêt nâp lĕ rngôch ngih Israel jêh ri lĕ rngôch ngih Yuđa đah Gâp kơt nây lĕ, gay ma khân păng ƀư du phung ƀon lan, du amoh, du nau tâm rnê, du nau chrêk rmah ăn ma Gâp; Ƀiălah khân păng mâu ŭch iăt ôh.

Yêrêmi 2:3

Israel jêng phung ƀon lan prăp êng kloh ueh ăn ma Brah Yêhôva, Jêng play dak bôk bơh kan Păng. Ma mbu nơm sa rvăn phung nây mra geh tih, Nau mhĭk mra nkhŭt tât ta klơ khân păng.’ ” Brah Yêhôva lah pônây.

Yêrêmi 7:23

Ƀiălah aơ jêng nau ntăm Gâp hŏ mbơh ăn khân păng: ‘Iăt hom nau Gâp pôri Gâp mra ƀư Brah Ndu khân may jêh ri khân may mra ƀư phung ƀon lan Gâp. Nhuat tĭng hom lĕ trong Gâp nti, ma khân may, gay khân may geh nau ueh maak.’

Kan Lêvi 19:2

“Ntăm hom ma lĕ rngôch phung ƀon lan Israel tâm rƀŭn: ‘Ăn khân may jêng kloh ueh, yorlah Gâp jêng Yêhôva Brah Ndu khân may, jêng kloh ueh.

Kan Lêvi 20:24

Gâp hŏ ntăm jêh ma khân may: “Khân may mra dơn n'gor khân păng, Gâp mra ăn khân may n'gor nây jêng drăp ndơn khân may; nây jêng du n'gor bêng ma dak toh jêh ri dak sŭt.” Gâp jêng Yêhôva Brah Ndu khân may, hŏ tâm nkhah jêh khân may luh bơh phung ƀon lan êng.

Kan Lêvi 20:26

Ăn khân may jêng kloh ueh đah Gâp; yorlah Gâp jêng Brah Yêhôva, jêng kloh ueh; Gâp hŏ tâm nkhah jêh khân may bơh lĕ phung ƀon lan êng gay ma khân may jêng phung Gâp nơm.

Kan Lêvi 21:23

ƀiălah păng mâu dơi hăn dăch bok nching mâu lah hăn dăch nơng ƀư brah ôh, yorlah păng geh ntŭk kuet ji. Kơt nây păng mâu ngơi sưr ôh ta lĕ ntŭk kloh ueh Gâp, yorlah Gâp jêng Brah Yêhôva, Nơm ƀư kloh ueh lĕ ntŭk nây.’”

Amôt 3:2

Gâp knŏng gĭt khân may dơm Tâm lĕ rngôch phung băl mpôl bunuyh ta neh ntu; Yor nây, Gâp mra tâm rmal khân may Yor lĕ nau kue khân may.

Ndrom Samƀŭt bơh Agê 2:5

‘Tĭng nau Gâp hŏ ton jêh tâm nau tâm rnglăp njêng đah khân may dôl khân may du luh tă bơh n'gor bri Êjipt, jêh ri Brah Huêng ueh Gâp hôm gŭ ta nklang khân may, yor nây lơi khân may klach ôh.’

Nau Kơp Bunuyh 16:3

khân păng tâm rƀŭn ndrel tâm rdâng đah Y-Môis jêh ri Y-Arôn. Khân păng phong: “Khân may ƀư jêh rmeh ir! Yorlah lĕ rngôch phung tâm rƀŭn jêng kloh ueh jêh ri Brah Yêhôva dôl gŭ ta nklang khân păng. Pôri, mâm khân may n'hao êng khân may nơm ta klơ lơn phung tâm rƀŭn Brah Yêhôva?”

Samƀŭt Pôl Njuăl Ăn Ma Phung Nsing Ta Ƀon Rôm 12:1

Pôri hơi oh nâu, yor ma nau Brah Ndu yô̆ nđach, gâp vơh dăn ma khân may, nhhơr săk jăn khân may nơm ƀư mpa ƀư brah rêh, kloh ueh jêh ri ueh nuih n'hâm ma Brah Ndu, nau nây jêng nau yơk mbah ngăn khân may.

I Kôrintô 3:17

Tơlah du huê ƀư rai ngih brah Brah Ndu, Brah Ndu mra ƀư rai păng; yorlah ngih brah ma Brah Ndu jêng kloh ueh, jêh ri ngih brah nây jêng khân may nơm.

Nau Vay Nkah Tay 14:21

Lơi ta sa ôh puăch du mlâm mpa lĕ khĭt jêh. Khân may dơi djôt păng ma phung bu năch gŭ tâm ƀon toyh khân may, gay ăn khân păng sa, mâu lah khân may dơi tăch păng ma phung bu năch. Yorlah khân may jêng du phung ƀon lan kloh ueh ma Yêhôva Brah Ndu khân may. Lơi ôh gâm puăch be kon tâm dak toh me păng.”

Nau Vay Nkah Tay 26:19

Păng ƀư ma khân may dơi geh nau tâm rnê, nau lư n'găr jêh ri nau yơk, rlau lơn lĕ rngôch ntil mpôl băl Păng hŏ rhăk njêng jêh, jêh ri khân may mra jêng du phung ƀon lan kloh ueh prăp ăn ma Yêhôva Brah Ndu khân may, tĭng nâm Păng hŏ lah jêh.”

Nau Vay Nkah Tay 28:9

Tơlah khân may djôt prăp lĕ nau vay Yêhôva Brah Ndu ntăm ma khân may jêh ri hăn tâm trong Păng, ri mơ Brah Yêhôva mra ƀư ăn khân may jêng du phung ƀon lan kloh ueh ma Păng nơm, nâm bu Păng hŏ ton jêh ma khân may.

Nau Vay Nkah Tay 7:6

Yorlah khân may jêng du phung ƀon lan kloh ueh ma Yêhôva Brah Ndu. Tâm lĕ rngôch phung ƀon lan tâm neh ntu aơ, Yêhôva Brah Ndu hŏ săch jêh khân may gay jêng phung ƀon lan Păng, jêng drăp ndơn êng Păng.

I Têsalônik 5:27

Tâm amoh Kôranh Brah, gâp đă khân may rŏ hom samƀŭt aơ ma lĕ rngôch phung oh nâu tăng.

I Pêtrôs 2:5

Ăn Păng dŏng hom khân may nâm bu lŭ rêh gay rdâk du mlâm ngih brah, jêh ri tă bơh Brah Yêsu Krist, khân may kan kôranh ƀư brah kloh ueh, gay nhhơr ndơ ƀư brah, ƀư maak nuih n'hâm Brah Ndu.

I Pêtrôs 2:9

Ƀiălah khân may jêng phung Brah Ndu săch jêh, jêng phung kôranh ƀư brah ta ngih hađăch, jêng phung mpôl kloh ueh, jêng phung ƀon lan sŏk prăp ma Brah Ndu, gay ma khân may mbơh nkoch nau ueh dŭt toyh Nơm kuăl jêh khân may luh bơh ntŭk ngo, njŭn lăp ntŭk ang khlay Păng.

Nau Tâm Mpơl 1:6

jêh ri ƀư ma he plơ̆ jêng ƀon bri hađăch, plơ̆ jêng phung kôranh ƀư brah ma Brah Ndu, Mbơ̆ Păng, khư geh nau tâm rnê jêh ri nau dơi n'ho ro! Amen.

Nau Tâm Mpơl 20:6

Ueh maak ngăn jêh ri kloh ueh ngăn jêng phung geh kô̆ tâm nau dâk rêh tay tal nguay! Nau khĭt rơh bar mâu geh nau dơi đah khân păng ôh, ƀiălah khân păng mra jêng kôranh ƀư brah ma Brah Ndu jêh ri ma Brah Krist; khân păng mra chiă uănh ndrel ma Păng tâm du rbăn năm.

Nau Tâm Mpơl 5:10

Jêh ri ƀư ma khân păng plơ̆ jêng ƀon bri hađăch jêh ri kôranh ƀư brah ma Brah Ndu he, Jêh ri khân păng mra chiă uănh ta neh ntu.”