Nau Mprơ Ơm 17:3 - Nau Brah Ndu Ngơi 2023

³ Kôranh Brah hŏ sek uănh jêh nuih n'hâm gâp, khâl gâp dôl măng; May rlong uănh gâp ƀiălah joi mâu saơ geh nau ôh; Gâp ntrâng ton trôm mbung gâp mâu mra ƀư tih.

Nau Mprơ Ơm 17:3 ပူးပေါင်းရင်းမြစ်များ

I Nau Rêh Jêng 28:9

Bi may, Y-Salômôn, kon bu klâu gâp, gĭt năl hom Brah Ndu mbơ̆ may, pah kan hom ma Păng ma lĕ nuih n'hâm jêh ri ma lĕ nau mĭn; yorlah Brah Yêhôva sek uănh lĕ nuih n'hâm, jêh ri păng gĭt vât lĕ rngôch nau ŭch tâm nau mĭn. Tơlah may joi Păng, Păng mra ăn may saơ Păng; ƀiălah tơlah may chalơi Păng, nanê̆ Păng mra chalơi may n'ho ro.

I Nau Rêh Jêng 29:17

Hơi Brah Ndu gâp! Gâp gĭt jêh Kôranh Brah sek uănh nuih n'hâm bunuyh jêh ri maak ma nau di. Mpeh ma gâp, gâp maak nuih n'hâm nhhơr lĕ ndơ nây nđâp ma nuih n'hâm sŏng. Aƀaơ ri, gâp saơ jêh phung ƀon lan May gŭ ta aơ ma nau răm rhơn nhhơr ma May.

Ndrom Samƀŭt bơh Yôp 23:10

Ƀiălah Kôranh Brah gǐt trong gâp hăn, Tơlah Păng rlong uănh jêh gâp, gâp mra jêng nâm bu mah.

Ndrom Samƀŭt bơh Yôp 24:14

Trôk ê hŏ ang, phung nkhĭt bunuyh lĕ kah rngăl bê̆ch, Nkhĭt phung o ach jêh ri phung rêh ni. Lah lĕ măng jêh păng nâm bunuyh ntŭng.

Nau Mprơ Ơm 11:5

Brah Yêhôva sek uănh phung sŏng srăng nđâp ma phung djơh mhĭk, Jêh ri nuih n'hâm Păng tâm rmot ma phung ŭch ƀư nau janh ktang.

Nau Mprơ Ơm 119:106

Gâp hŏ sơm ton jêh ri ton nanê̆ pô aơ, Gâp mra djôt prăp lĕ nau vay May ƀư jêng sŏng srăng.

Nau Mprơ Ơm 139:1

Ơ Brah Yêhôva, May hŏ sek uănh gâp jêh Jêh ri May gĭt rah vah gâp.

Nau Mprơ Ơm 139:23

Ơ Brah Ndu! Dăn sek uănh gâp jêh ri gĭt nuih n'hâm gâp; Rlong uănh gâp gay ma gĭt nau mĭn gâp;

Nau Mprơ Ơm 16:7

Gâp mra tâm rnê ma Brah Yêhôva jêng Nơm nkah an ma gâp; Nuih n'hâm gâp dôl măng ăt nkah gâp.

Nau Mprơ Ơm 26:2

Ơ Brah Yêhôva! dăn sek uănh jêh ri rlong uănh gâp, Mêt uănh nuih n'hâm jêh ri nau mĭn gâp.

Nau Mprơ Ơm 39:1

Gâp lah pô aơ: “Gâp mra prăp lĕ trong gâp, Gay prăp mpiăt gâp mâu ƀư tih: Tơlah dôl phung mhĭk gŭ tanăp gâp, Gâp mra mêm lơi trôm mbung gâp.

Nau Mprơ Ơm 66:10

Yorlah Brah Ndu ah, May rlong uănh jêh hên, May krĕt hên tâm ban ma krĕt prăk.

Nau Mprơ Ơm 7:4

Tơlah gâp mplơ̆ nau mhĭk ma bunuyh gŭ đăp mpăn ndrel đah gâp Jêh ri ntŭng pit phung rlăng gâp mâu geh nau

Nau Hôr 13:3

Mbu nơm blau njrăng bâr mbung dơi mât nau rêh păng nơm, Ƀiălah nơm nđar huy ir mbung n'ho geh nau rai yot.

Yêrêmi 12:3

Ơ Brah Yêhôva, May gĭt jêh gâp! May saơ gâp, May ôp sek nuih n'hâm gâp ndrel ma May. Dăn nkhah khân păng luh nâm bu nkhah biăp gay djôt tât ntŭk sreh nkhĭt Prăp êng khân păng ma nar sreh nkhĭt.

Yêrêmi 50:20

Brah Yêhôva lah: “Tâm nar nây, tâm rnôk nây, bu mra joi nau tih mhĭk tâm phung Israel ƀiălah mâu saơ ôh; bu mra joi nau tih tâm phung Yuđa ƀiălah mâu mra saơ ôh; yorlah Gâp mra yô̆ an nau tih ma phung khân păng hôm e Gâp rong.”

Ndrom Samƀŭt bơh Ôsê 7:6

Khân păng kâp rmiăt, nuih n'hâm khân păng bêng nchră ƀư Nâm bu năk ŭnh nđông hit; Phung gŭch nđông ƀănh bê̆ch lĕ măng Ƀiălah tât ang ôi năk ŭnh nđông hôm e hit gring gring.

Mika 2:1

Rêh ni ngăn ma phung nchră ŭch ƀư nau mhĭk Jêh ri mĭn ŭch ƀư nau tih gŭ ta klơ gre bê̆ch păng! Tât ang ôi, khân păng ƀư ro nau ŭch mĭn Yorlah khân păng geh nau dơi ƀư tâm ti!

Sakari 13:9

Gâp mra leo du kô̆ tâm pe nây lăp tâm ŭnh, Gâp mra krĕt khân păng ăn kloh nâm bu krĕt prăk, Rlong uănh khân păng nâm bu rlong uănh mah. Khân păng mra vơh vơl amoh Gâp, Jêh ri Gâp mra plơ̆ lah ma khân păng. Gâp mra lah pô aơ: ‘Khân păng jêng phung ƀon lan Gâp.’ Jêh ri khân păng mra lah: ‘Yêhôva jêng Brah Ndu hên.’”

Malachi 3:2

Ƀiălah mbu nơm dơi dơn nar Păng văch? Mbu nơm dơi dâk lah păng tâm mpơl? Yorlah Păng jêng nâm bu ŭnh bunuyh blau krĕt prăk, nâm bu buh bunuyh blau ƀư kloh bok.

Kôranh Oh Mon 11:23

Tơlah păng tât jêh ta nây jêh ri saơ nau yô̆ Brah Ndu ăn. Păng răm maak jêh ri nsŭk nsôr lĕ rngôch bunuyh nâp nuih n'hâm tĭng Kôranh Brah;

Kôranh Oh Mon 16:9

Dôl măng, Y-Pôl geh nau saơ pô aơ: Geh du huê bunuyh Masêđôn dâk tanăp păng jêh ri dăn lah pô aơ: “Dăn may rgăn ta n'gor Masêđôn kơl hên!”

I Kôrintô 4:4

Yorlah gâp mâu saơ tâm gâp nơm geh du nau tih, ƀiălah mâu di ma nau nây ôh gâp dơi kơp sŏng srăng. Nơm phat dôih gâp jêng Kôranh Brah yơh.

II Kôrintô 1:12

Nau ƀư ma hên geh nau hâk răm, nây jêng nuih n'hâm sŏng hên mbơh nkoch ma hên hŏ sŏk nau răp jăp jêh ri nau nanê̆ ngăn tă bơh Brah Ndu gay ma gŭ ngao tâm neh ntu nây, khlay ngăn ngên đah khân may. Hên mâu nsing nau blau mĭn tâm nglay săk ôh, ƀiălah nsing rnơm nau yô̆ bơh Brah Ndu.

Yakơ 3:2

Lĕ rngôch he tih da dê tâm âk ntil nau. Mbu nơm mâu tih ôh tâm nau ngơi, păng jêng bunuyh rĭng jêh, mra dơi chiă uănh lĕ săk jăn păng nơm.

I Pêtrôs 1:7

gay ma nau chroh khân may lah jêh dơn nau rlong uănh mra khlay rlau lơn ma mah — nđâp tơlah mah bu rlong uănh păng tâm ŭnh kđôi lĕ, ăt blau roh rai — djôt leo tay nau tâm rnê, nau chrêk rmah jêh ri nau yơk nôk Brah Yêsu Krist tât tâm mpơl.

I Samuel 24:10

Y-Đavit lah ma Y-Sôl: “Mâm ƀư hađăch iăt nau bu lah pô aơ: ‘Y-Đavit joi ƀư mhĭk ma may?’

I Samuel 24:12

Pônây, hơi mbơ̆! Uănh hom ntôr ao rjai may tâm ti gâp. Yorlah gâp koh jêh ntôr ao rjai may, ƀiălah mâu nkhĭt may, dăn may gĭt hom jêh ri saơ pô aơ gâp mâu geh nau djơh mhĭk ôh, mâu lah nau ƀlêp ƀlêr ôh. Gâp mâu lĕ geh nau tih yorlah ƀư mhĭk ma may, bi may nkhơng ma ŭch nchron gâp gay ƀư ngroh lơi nau rêh gâp. Dăn Brah Yêhôva phat dôih ta klang gâp đah may.

I Samuel 26:11

Ăn Brah Yêhôva mât mray gâp mâu yơr ti gâp ma nơm Brah Yêhôva lĕ tŏ dak ƀâu kah jêh! May sŏk lơi hom tak ta bôk bê̆ch păng jêh ri dak yăng păng, jêh nây he hăn du.”

I Samuel 26:23

Brah Yêhôva mra nkhôm ăn ăp nơm tĭng nâm nau sŏng srăng jêh ri nuih n'hâm răp jăp păng. Nar aơ, Păng hŏ jao jêh hađăch tâm ti gâp, ƀiălah gâp mâu ŭch yơr ti gâp ƀư ma nơm Brah Yêhôva hŏ tŏ jêh dak ƀâu kah.