Nau Mprơ Ơm 103:8 - Nau Brah Ndu Ngơi 2023

⁸ Brah Yêhôva bêng ma nau yô̆ nđach, vay ƀư ueh, Mâu gơnh duh nuih jêh ri ndrŏng ma nau ueh.

Nau Mprơ Ơm 103:8 ပူးပေါင်းရင်းမြစ်များ

Nêhêmi 9:17

Khân păng mâu tông bâr ôh jêh ri mâu kah gĭt ma nau mbên khlay ngăn ngên Kôranh Brah hŏ ƀư jêh ta nklang khân păng, Ƀiălah khân păng dăng ko jêh ri tâm nôk tâm rdâng, Khân păng săch du huê kôranh chiă uănh gay leo ma khân păng plơ̆ sĭt tay nau ƀư dĭk. Ƀiălah Kôranh Brah jêng Brah Ndu rơm ndrăp yô̆ an, vay ƀư nau yô̆, jêh ri yô̆ nđach, Mâu gơnh ji nuih jêh ri bêng ma nuih n'hâm ueh. Kôranh Brah mâu chalơi khân păng ôh.

Nau Mprơ Ơm 130:7

Ơ phung Israel, kâp gân hom ma Brah Yêhôva Yorlah Brah Yêhôva bêng ma nuih n'hâm ueh, Jêh ri Păng ăn nau tâm rklaih rmeh ler.

Nau Mprơ Ơm 145:8

Brah Yêhôva ăn nau ueh ƀaƀơ, vay yô̆ nđach Mâu gơnh duh nuih jêh ri bêng nau ueh.

Nau Mprơ Ơm 31:20

May pôn khân păng tâm ntŭk ndâp tanăp măt May Gŭ ngai đah nau kon bunuyh ŭch ƀư; May king n'gang khân păng tâm ngih bok Gŭ ngai đah mbung mpiăt tâm djrel.

Nau Mprơ Ơm 86:15

Ƀiălah ơ Kôranh Brah, May jêng Brah Ndu blau yô̆ nđach jêh ri ƀư ueh, Mâu gơnh nuih, bêng ma nuih n'hâm ueh jêh ri nau nanê̆ ngăn.

Nau Mprơ Ơm 86:5

Ơ Kôranh Brah! May jêng ueh, bêng ma yô̆ an, Ăn bêng nau ueh ma phung kuăl dăn ma May.

Êsai 55:7

Ăn phung ƀai chalơi hom trong păng nơm, Ăn bunuyh kue chalơi hom nau păng mĭn; Plơ̆ sĭt hom ma Brah Yêhôva, Păng mra yô̆ an, Văch hom ma Brah Ndu he, yorlah Păng mra yô̆ an rmeh ler.

Yêrêmi 32:18

May tâm mpơl nau yô̆ tât rbăn rô̆ nuyh, ƀiălah rmal nau tih phung mbơ̆ tât ma phung kon sau. Ơ! May jêng Brah Ndu dŭt toyh jêh ri Nơm geh nau brah, amoh May jêng Brah Yêhôva ma phung tahan.

Yôel 2:13

Hêk hom nuih n'hâm khân may jêh ri lơi hêk ôh ao. Plơ̆ sĭt hom ma Yêhôva, Brah Ndu khân may, Yorlah Păng ueh, yô̆ nđach, mâu gơnh ji nuih jêh ri ndrŏng ma nau rŏng; Rgâl nau mĭn mâu ƀư mhĭk.

Yônais 4:2

Păng mbơh sơm ma Brah Yêhôva pô aơ: “Ơ Brah Yêhôva, mâu di hĕ nau aơ jêng nau gâp hŏ lah jêh ma May dôl gâp hôm gŭ tâm bri gâp hĕ? Yor nây yơh gâp ndal hăn du ma bri Tarsis. Yorlah gâp gĭt May jêng Brah Ndu ueh, yô̆ nđach, mâu gơnh ji nuih ôh, bêng ma nau ueh jêh ri tâm rgâl nau mĭn mâu ƀư tŭp nau mhĭk.

Nahum 1:3

Brah Yêhôva mâu gơnh nuih ôh jêh ri geh nau brah dŭt toyh, Ƀiălah Păng mâu uănh ôh nơm geh nau tih jêng mâu tih. Brah Yêhôva chuat hăn tâm phŭt chuănh jêh ri tâm sial vănh blông, Ndâr tŭk jêng ndruyh neh tâm dâng jâng Păng.

Nau Kơp Bunuyh 14:18

‘Brah Yêhôva mâu gơnh nuih ôh, Jêh ri ndrŏng ma nuih n'hâm yô̆ nđach, Yô̆ an nau tih jêh ri nau tâm rdâng, Ƀiălah mâu kơp nơm geh nau tih ôh jêng mâu geh nau tih, Jêh ri rmal ma phung kon sau kŏ tât pe puăn rô̆ nuyh Yorlah nau tih phung chô yau.’

Nau Vay Nkah Tay 5:10

Ƀiălah Gâp mra ăn nau yô̆ tât rbăn rô̆ ma lĕ phung ma lĕ phung rŏng ma Gâp jêh ri djôt prăp lĕ nau vay ntăm bơh Gâp.

Yakơ 5:11

Aơ, he kuăl phung bunuyh nâp jêh jêng geh ueh lăng ngăn. Khân may tăng jêh nkoch bri ma nau Y-Yôp nâp jêh, jêh ri dơi saơ jêh nau ŭch Kôranh Brah; yorlah Kôranh Brah bêng ma nuih n'hâm yô̆ nđach jêh ri nuih n'hâm ueh.