Nau Kơp Bunuyh 4:15 - Nau Brah Ndu Ngơi 2023

¹⁵ Lah jêh Y-Arôn jêh ri phung kon bu klâu păng hŏ nkŭm jêh ntŭk kloh ueh jêh ri lĕ ndơ dŏng kloh ueh lôch jêh, jêh ri dôl phung ƀon lan ndrăp jêh hăn du luh, phung kon bu klâu Y-Kôhat văch hom tung lĕ ndơ dŏng, ƀiălah khân păng mâu dơi mpât ôh tât lĕ ndơ kloh ueh, klach lah khân păng mra khĭt. Nây jêng lĕ ndơ dŏng tâm Ngih Bok Nau Tâm Rƀŭn ma phung kon bu klâu Y-Kôhat mra tung hom.

Nau Kơp Bunuyh 4:15 ပူးပေါင်းရင်းမြစ်များ

II Samuel 15:24

Ta nây geh đŏng Y-Sadôk jêh ri lĕ rngôch phung Lêvi tung Hip Nau Tâm Rnglăp Brah Ndu. Khân păng njuyh Hip Nau Tâm Rnglăp Brah Ndu ta neh, jêh nây Y-Abiathar hăn lor panăp kŏ tât nôk lĕ rngôch phung ƀon lan hŏ du luh jêh tă bơh ƀon.

II Samuel 6:13

Tơlah phung bunuyh tung Hip Nau Tâm Rnglăp Brah Ndu hŏ hăn chuat jêh prao nhuat, Y-Đavit nhhơr du mlâm ndrôk jêh ri du mlâm mpô mpa lay ueh ƀư mpa ƀư brah.

I Phung Hađăch 8:3

Tơlah lĕ rngôch bu ranh Israel hăn tât jêh, pôri phung kôranh ƀư brah tung Hip Nau Tâm Rnglăp,

I Nau Rêh Jêng 15:15

Phung Lêvi sŏk mâng tung Hip Nau Tâm Rnglăp Brah Ndu ta săng nglik khân păng, di nâm nau Brah Yêhôva hŏ ntăm nti jêh ma Y-Môis.

I Nau Rêh Jêng 15:2

Nôk nây, Y-Đavit lah: “Mâu geh phung êng ôh, knŏng phung Lêvi dơi tung Hip Nau Tâm Rnglăp Brah Ndu, yorlah Brah Yêhôva săch jêh khân păng ăn tung Hip Nau Tâm Rnglăp Brah Yêhôva, jêh ri pah kan ma Păng n'ho ro.”

I Nau Rêh Jêng 23:26

pôri phung Lêvi mâu mra hôm ôh tung Ngih Bok mâu lah lĕ ndơ dŏng prăp ma kan tâm Ngih Bok.”

Nau Ngluh Êjipt 19:12

Ăn may treh n'har ma phung ƀon lan gŭ jŭm yôk, jêh ri ntĭnh khân păng: ‘Njrăng hom, lơi hao ôh ta klơ yôk, mâu lah n'har yôk. Mbu nơm pah n'har yôk mra khĭt.

Nau Ngluh Êjipt 19:21

Brah Yêhôva lah ma Y-Môis: “Hăn jŭr hom jêh ri buay ma phung ƀon lan lơi ăn khân păng sŏl rlau ntŭk hŏ treh gay uănh Brah Yêhôva; tơlah mâu iăt âk tâm phung khân păng mra khĭt.

Nau Ngluh Êjipt 27:7

jêh nây nsro mâng tung tâm lĕ trôm rval, tơlah gay tung mra nsro mâng ma bar ding nơng ƀư brah.

Kan Lêvi 16:13

Ăn Y-Arôn dơm ndơ ƀâu kah tâm ŭnh tanăp Brah Yêhôva, gay ma ndâr tŭk nhhŭk ndơ ƀâu kah dơi nkŭm ndrŭp nau yô̆ an ta klơ Hip Nau Tâm Rnglăp, yor ri yơh Y-Arôn mâu geh nau khĭt.

Nau Kơp Bunuyh 1:50

ƀiălah ntĭm hom ma phung Lêvi chiă uănh Ngih Bok Nau Tâm Rnglăp, lĕ rngôch ndơ dŏng jêh ri lĕ rngôch ndơ dŏng prăp tâm Ngih Bok nây. Khân păng mra trơn Ngih Bok jêh ri lĕ rngôch ndơ ta nây, tâm ban đŏng mât uănh jêh ri ndâk ngih bok gŭ jŭm Ngih Bok.

Nau Kơp Bunuyh 1:51

Ăp tơ̆ ngih bok trơn ntŭk pôri phung Lêvi mra rơih păng jêh ri tơlah tât ntŭk ndâk tay Ngih Bok, khân păng mra ndâk păng. Tơlah bunuyh êng hăn dăch mra nkhĭt.

Nau Kơp Bunuyh 10:21

Rnôk nây phung Kôhat tung lĕ ndơ kloh ueh hăn du luh. Bu ndâk jêh Ngih Bok lor ma khân păng tât.

Nau Kơp Bunuyh 18:3

Khân păng mra kơl kan may jêh ri ƀư lĕ kan di ma Ngih Bok, ƀiălah khân păng mâu dơi hăn dăch ma ndơ dŏng tâm Ntŭk Kloh Ueh mâu lah ma nơng ƀư brah ôh, klach lah khân păng jêh ri may khĭt.

Nau Kơp Bunuyh 3:38

Phung ndâk ngih bok panăp Ngih Bok mpeh luh nar, panăp Ngih Bok Nau Tâm Rƀŭn mpeh luh nar jêh, jêng Y-Môis, Y-Arôn jêh ri phung kon bu klâu păng. Khân păng djôt kan chiă uănh ntŭk kloh ueh ntrok an ma phung ƀon lan Israel. Phung êng hăn dăch nây mra khĭt.

Nau Kơp Bunuyh 4:14

jêh nây khân păng mra dơm ta klơ ndơ nây lĕ rngôch ndơ dŏng ma nơng ƀư brah nâm khăl gŭch ƀâu kah, n'hoi srang, ndroh, khăl nđâp lah lĕ ndơ dŏng tât ma nơng ƀư brah. Khân păng nkŭm đŏng ta klơ nơng ƀư brah du ntâu ka toyh jêh ri nsro mâng tung lăp.

Nau Kơp Bunuyh 4:19

Aơ jêng nau khân may ƀư ma khân păng gay ma khân păng dơi gŭ rêh, mâu geh khĭt ôh tơlah khân păng hăn dăch lĕ ndơ dŭt kloh ueh: Y-Arôn jêh ri phung kon bu klâu păng mra lăp ntŭk kloh ueh, tâm pă nau kan ma ăp nơm jêh ri lĕ ndơ dŏng khân păng tung hom.

Nau Kơp Bunuyh 4:20

Ƀiălah phung Kôhat mâu dơi uănh ôh lĕ ndơ kloh ueh, nđâp lah ƀât lât kđôi lĕ, klach lah khân păng mra khĭt.”

Nau Kơp Bunuyh 7:9

Ƀiălah păng mâu ăn moh ndơ ôh ma phung kon sau Y-Kôhat, yorlah ăn khân păng djôt kan chiă uănh lĕ ndơ kloh ueh khân păng tung ta klơ săng nglik khân păng nơm.

Nau Vay Nkah Tay 31:9

Y-Môis nchih jêh nau vay aơ jêh ri jao ăn ma phung kôranh ƀư brah phung kon sau Lêvi, jêng phung tung Hip Nau Tâm Rnglăp Brah Yêhôva, tâm ban đŏng jao ăn ma lĕ rngôch phung kôranh bu ranh Israel.

Yôsuê 4:10

Lĕ phung kôranh ƀư brah tung Hip Nau Tâm Rnglăp gŭ nsrâng tâm nklang dak krong Yurdan kŏ tât ƀư jêh lĕ kan Brah Yêhôva hŏ lah ma Y-Yôsuê đă ntăm tay ma phung ƀon lan tĭng di nâm nau Y-Môis ntăm jêh ma Y-Yôsuê. Jêh nây phung ƀon lan ndal rgăn dak krong Yurdan.

I Samuel 6:19

Brah Yêhôva rmal phung Bet-Sêmes, yorlah khân păng hŏ uănh jêh tâm trôm Hip Nau Tâm Rnglăp Brah Yêhôva. Păng nkhĭt pơh jât nuyh phung ƀon lan. Phung ƀon lan nhĭm nhhiăng yorlah Brah Yêhôva nkhŭt jêh du nau tât toyh ta klơ khân păng.