Nau Kơp Bunuyh 14:8 - Nau Brah Ndu Ngơi 2023

⁸ Tơlah Yêhôva maak đah he, Păng mra njŭn he lăp tâm n'gor nây jêh ri ăn ma he du n'gor bêng ma dak toh jêh ri dak sŭt.

Nau Kơp Bunuyh 14:8 ပူးပေါင်းရင်းမြစ်များ

II Samuel 22:20

Păng njŭn gâp tâm ntŭk huy toyh Jêh ri tâm rklaih gâp, yorlah Păng rŏng ma gâp.

I Phung Hađăch 10:9

Mât ton ma Yêhôva Brah Ndu may, Nơm hŏ maak nuih n'hâm n'gân may gŭ ta sưng hađăch phung Israel! Yorlah Brah Yêhôva rŏng ma phung Israel kŏ tât ƀaƀơ n'ho ro, yor ri Păng hŏ njêng jêh may ƀư hađăch gay ƀư nau di jêh ri nau sŏng.”

II Phung Hađăch 18:32

kŏ tât tơlah gâp văch njŭn leo khân may lăp tâm du n'gor nâm bu n'gor khân may nơm, jêng n'gor geh prăp ba jêh ri ndrănh, piăng let jêh ri đang krăk ƀâu, du n'gor geh dak ngi ôlive jêh ri dak sŭt. Pônây, khân may mra dơi gŭ rêh jêh ri mâu khĭt ôh. Pônây khân may lơi iăt ôh nau Y-Hêsêkia, yorlah păng ndơm mƀruh khân may nôk pô aơ Brah Yêhôva mra tâm rklaih he.

Nau Mprơ Ơm 22:8

“Păng jao păng nơm ma Brah Yêhôva, ăn May tâm rklaih păng; Yorlah May rŏng ma păng, ăn May tâm rklaih păng!”

Nau Ngluh Êjipt 3:8

Gâp jŭr gay ma tâm rklaih ƀon lan aơ bơh ti phung Êjipt, njŭn leo khân păng luh bơh n'gor nây, njŭn tât tâm du n'gor neh ueh jêh ri huy ngăn, ntŭk bêng ma dak toh jêh ri dak sŭt, jêng ta ntŭk gŭ phung Kanaan, phung Hitit, phung Amôrit, phung Pêrisit, phung Hivit jêh ri phung Jêbusit.

Êsai 62:4

Bu mâu hôm mra rnha ôh may jêng “nơm bu chalơi,” Mâu hôm rnha ôh bri may jêng “bri rngol” đŏng; Ƀiălah bu mra rnha may jêng “nơm Gâp Maak”, Jêh ri bu mra rnha neh may jêng “nơm geh sai”; Yorlah Brah Yêhôva maak đah may, Jêh ri neh may mra geh sai.

Yêrêmi 32:41

Gâp mra maak ƀư nau ueh ma khân păng, ma lĕ nuih n'hâm ma lĕ nau ktang tăm khân păng ma nau nâp tâm bri aơ.’

Sôphôni 3:17

Yêhôva Brah Ndu may gŭ ta nklang may, Păng jêng Nơm geh nau brah mra tâm rklaih may; Păng mra rhơn răm ngăn yor ma may, Yor nuih n'hâm rŏng, Păng mra gŭ rklăk, Jêh ri yor ma may, Păng mra mprơ ma nau rhơn răm.”

Nau Kơp Bunuyh 13:27

Khân păng nkoch ăn ma Y-Môis pô aơ: “Hên hăn tât jêh ma n'gor khân may hŏ prơh hên hăn. Nây jêng du n'gor bêng ma dak toh jêh ri dak sŭt; aơ jêng kao play tă bơh n'gor nây.

Nau Kơp Bunuyh 16:14

Rlau lơn ma nĕ, may mâu njŭn hên lăp ôh tâm du n'gor bêng ma dak toh jêh ri dak sŭt, mâu lĕ ŭch ăn ma hên mir mâu lah đang krăk ƀâu jêng drăp ndơn. May ŭch rloch găr măt Phung ƀon lan aơ ƀơh? Hên mâu mra hăn hao ôh!”

Samƀŭt Pôl Njuăl Ăn Ma Phung Nsing Ta Ƀon Rôm 8:31

Pôri, moh nau he mra lah ma lĕ nau nây? Tơlah Brah Ndu gŭ mpeh ma he, mbu mra tâm rdâng đah he?

Nau Vay Nkah Tay 10:15

Ƀiălah Brah Yêhôva mpơl nuih n'hâm rŏng Păng ma phung chô yau khân may jêh ri tâm lĕ rngôch phung ƀon lan Păng hŏ săch khân may jêng phung noi deh khân păng, nâm bu khân may saơ nar aơ.

Yôsuê 14:12

Pônây, ăn hom ma gâp bri klơ dor yôk aơ tĭng nâm nau Brah Yêhôva ngơi jêh tâm nar nĕ, yorlah tâm rnôk nây may tăng jêh ta aơ geh phung Anakim nđâp ma lĕ ƀon toyh jêh ri nâp ngăn. Dăn Brah Yêhôva gŭ ndrel ma gâp gay gâp mprơh khân păng tĭng nâm Brah Yêhôva lah jêh.”