Nau Hôr 24:28 - Nau Brah Ndu Ngơi 2023

²⁸ Lơi ta phong nchroh ma nơm chiau meng may, Mâu lĕ sŏk bâr mbung may ma nau ndơm mƀruh.

Nau Hôr 24:28 ပူးပေါင်းရင်းမြစ်များ

Ndrom Samƀŭt bơh Yôp 2:3

Brah Yêhôva ôp tay Satan: “May mâp treng uănh tât Y-Yôp, oh mon gâp đŏng? Tâm neh ntu aơ mâu geh du huê nâm bu Y-Yôp; du huê bunuyh răp jăp jêh ri sŏng, klach yơk ma Brah Ndu jêh ri der ngai nau mhĭk. Y-Yôp hôm e mât nuih n'hâm răp jăp nđâp lah may hŏ nchâp Gâp ƀư rai Y-Yôp mâu geh ôh nau.”

Nau Mprơ Ơm 35:11

Phung mbơh nau nchơt nây dâk; Ôp lĕ nau gâp mâu mâp gĭt ôh.

Nau Mprơ Ơm 35:7

Yorlah khân păng nthăng nhuăl mâu geh nau gay sân dăk gâp; Jêh ri kuyh ntu mâu geh nau gay ma ƀư mhĭk nau rêh gâp.

Nau Mprơ Ơm 52:1

Hơi bunuyh janh ktang, mâm ƀư may ntưih êng ma nau janh? Nau ueh Brah Ndu hôm mro mrăng.

Nau Ngluh Êjipt 20:16

May mâu dơi ngơi nchơt ƀư mhĭk ma phung chiau meng may nơm.

Nau Ngluh Êjipt 23:1

“Lơi may nkoch bri nklă. May mâu dơi tâm rnglăp đah bunuyh mhĭk gay mbơh mƀruh.

Nau Hôr 14:5

Bunuyh mbơh ngơi ngăn mâu geh ôh ngơi mƀruh. Bi phung bunuyh mbơh mƀruh luh ngơi nau rlăm.

Nau Hôr 19:5

Nơm mbơh mƀruh mâu dơi klaih ôh đah nau tâm rmal, Ma nơm ngơi mƀruh nchơt mâu lĕ mra dơi klaih.

Nau Hôr 19:9

Nơm mbơh kue mâu mra klaih ôh bơh nau tâm rmal, Mbu nơm ngơi mƀruh mra rai yot.

Nau Hôr 21:28

Nơm mbơh mƀruh mra rai roh, Ƀiălah bunuyh blau iăt mra dơi ngơi mro.

Nau Hôr 25:18

Nơm ngơi nchơt tâm rdâng đah phung chiau meng păng Nâm bu du mlâm me nôp, du mlâm đao, chiông hăr mplanh.

Nau Hôr 26:19

Tâm ban phung ndơm bunuyh chiau meng păng nơm, Jêh ri lah: “Gâp pâl dơm ya!”

Kan Lêvi 19:11

Khân may mâu dơi ntŭng ôh, mâu lĕ dơi ngơi nchơt jêh ri mƀruh ndrăng he.

Kan Lêvi 6:2

“Tơlah du huê ƀư tih jêh ri mâu gŭ răp jăp ôh đah Brah Yêhôva yorlah păng hŏ ndơm mƀruh phung chiau meng păng nơm ma ndơ khân păng đă păng sâm mât mray mâu lah chiă uănh an, mâu lah ma nau ntŭng, mâu lah hŏ sŏk lĕ ndơ nơm chiau meng păng,

Kan Lêvi 6:3

mâu lah geh dônh jêh moh ndơ bu hŏ tŭp ƀiălah dun, mâu lah ton mƀruh tâm lĕ ntil nau bunuyh vay geh ƀư tih.

Mathay 27:23

Kôranh toyh chiă uănh ôp: “Moh nau mhĭk bunuyh aơ ƀư jêh?” Ƀiălah khân păng nter ktang lơn: “Pâng păng ma kđĭn ta si tâm rkăng!”

Yôhan 15:25

Pôri yơh, nau bu nchih jêh tâm nau vay khân păng dơi tât di ngăn: ‘Khân păng tâm rmot ma Gâp mâu geh nau.’

Êphêsô 4:25

Pôri yơh, ăp nơm tâm khân may mƀăr lơi hom nau mƀruh nchơt, “Ngơi hom ngăn ma phung chiau meng,” yorlah he jêng kô̆ săk jăn ndrăng he da dê.

Kôlôh 3:9

Lơi ngơi mƀruh ndrăng khân may nơm yorlah mƀăr lơi jêh bunuyh ơm ndrel ma lĕ nau kan păng

Nau Tâm Mpơl 21:8

Bi ma phung ƀlao, phung mâu chroh, phung ƀơ̆, phung nkhĭt bunuyh, phung văng tĭr, phung ƀư nau blau rƀên, phung mbah rup brah, jêh ri lĕ rngôch phung ngơi mƀruh, nau nkhôm khân păng jêng nglao ŭnh mô ŭnh dôl hit. Nau nây jêng nau khĭt rơh bar.”

Nau Tâm Mpơl 22:15

Phung so, phung ƀư nau blau rƀên, phung văng tĭr, phung nkhĭt bunuyh, phung mbah rup brah, jêh ri lĕ rngôch phung rŏng jêh ri ƀư nau mƀruh gŭ padih da dê.