Kan Lêvi 7:20 - Nau Brah Ndu Ngơi 2023

²⁰ Mbu nơm gŭ tâm nau ƀơ̆ ƀơch ƀiălah sa puăch ndơ ƀư brah đăp mpăn nhhơr ma Brah Yêhôva, bu mra nsot lơi păng luh bơh phung ƀon lan păng.

Kan Lêvi 7:20 ပူးပေါင်းရင်းမြစ်များ

Nau Ntơm 17:14

Mbu nơm bu klâu mâu geh ôh koh ntâu, jêng mâu dơn siăt ntâu ta chiông ndơ chrach, pôri bu mra ngluh lơi păng bơh phung ƀon lan, yorlah păng chalơi nau Gâp tâm rnglăp.”

Nau Ngluh Êjipt 30:33

Mbu nơm lŭk lai du ntil dak ƀâu kah tâm ban ma nây mâu lah sŏk dak ƀâu kah nây mhĭng ma bunuyh bu năch, ăn bu mra ngluh lơi păng luh bơh phung ƀon lan.’”

Nau Ngluh Êjipt 30:38

Mbu moh lŭk lai ndơ ƀâu kah tâm ban ma nây, gay n'hơp, ăn bu mra ngluh lơi păng luh bơh phung ƀon lan.”

Êsêkiêl 33:25

Yor ri, lah hom ma khân păng pô aơ: ‘Kôranh Brah Yêhôva lah: Khân may sa mham mpô mpa, muh măt n'gơr rlet mpeh ma rup brah khân may jêh ri ƀư nkhŭt mham, khân may mra dơi sŏk dơn bri neh aơ lĕ?

Kan Lêvi 18:29

Mbu nơm ƀư du ntil tâm nau kan dŭt ƀơ̆ ƀơch nây, bu mra mprơh lơi păng luh bơh phung ƀon.

Kan Lêvi 19:8

Bunuyh nây mra anh nau tih păng nơm, yorlah păng hŏ ƀư mhĭk tât ta ndơ kloh ueh Brah Yêhôva jêh ri mprơh lơi păng luh bơh phung ƀon lan.

Kan Lêvi 20:3

Bi Gâp, Gâp mâu mra uănh măt nơm nây đŏng ôh jêh ri nsot lơi păng tă bơh phung ƀon lan păng, yorlah păng hŏ nhhơr jêh du huê tâm phung kon sau păng ma Môlek, ƀư ƀơ̆ jêh ngih brah kloh ueh jêh ri ngơi sưr amoh kloh ueh Gâp.

Kan Lêvi 23:29

Tâm nar nĕ, mbu nơm mâu ât sông sa mra geh nau nsot lơi tă bơh phung ƀon lan;

Kan Lêvi 7:19

Puăch hŏ geh nđĭl jêh ta moh ndơ ƀơ̆ ƀơch, bu mâu dơi sa ôh, ƀiălah ăn bu su păng tâm ŭnh. Bi ma puăch êng, lĕ rngôch mbu geh nau kloh dơi sa da dê.

Kan Lêvi 7:25

Mbu nơm sa ngi mpa ăn ŭnh sa nhhơr ma Brah Yêhôva, bu mra nsot lơi păng luh bơh phung ƀon lan păng.

Kan Lêvi 7:27

Mbu nơm sa mham, bu mra nsot lơi păng luh bơh phung ƀon lan păng.”

Nau Kơp Bunuyh 19:13

Mbu nơm pah bi săk jăn du huê bunuyh lĕ khĭt jêh, jêh ri mâu ƀư kloh ôh păng nơm, mra ƀư ƀơ̆ Ngih Bok Brah Yêhôva jêh ri nơm nây ăn bu mra nsot lơi bơh phung Israel. Yorlah dak jut tho nau ƀơ̆ mâu mâp nsrih ôh ta klơ păng, păng mra jêng ƀơ̆; nau ƀơ̆ păng ăt hôm e gŭ ta păng.’”

I Kôrintô 11:28

Pôri, ăn ăp nơm sek uănh êng păng nơm lor, ri mơ sa piăng let, nhêt kachok nây.

I Samuel 20:26

Nar nây, Y-Sôl mâu ngơi du tong ôh yorlah păng mĭn pô aơ: “Geh nau mâu ueh hŏ tât ma păng jêh! Păng mâu geh kloh ôh, n'hêl nê̆ păng hŏ geh nau ƀơ̆ ƀơch jêh.”