Kan Lêvi 6:16 - Nau Brah Ndu Ngơi 2023

¹⁶ Y-Arôn jêh ri phung kôranh ƀư brah tâm noi deh Y-Arôn mra sa moh ndơ hôm e, ƀiălah khân păng mra sa piăng let mâu geh ndrui jêh ri sa tâm du ntŭk kloh ueh, jêng ntŭk tâm ndring Ngih Bok Nau Tâm Rƀŭn.

Kan Lêvi 6:16 ပူးပေါင်းရင်းမြစ်များ

II Nau Rêh Jêng 31:14

Y-Kôrê, kon bu klâu Y-Imna bunuyh Lêvi, jêng nơm chiă uănh mpông pêr mpeh luh nar, jêng nơm mât lĕ ndơ nhhơr nđơr êng ma Brah Ndu, gay tâm pă lĕ ndơ bu nhhơr prăp jêh ma Brah Yêhôva jêh ri lĕ ndơ nhhơr dŭt kloh ueh.

Nau Ngluh Êjipt 12:8

Tâm măng nây khân păng mra sa puăch nđông ta ŭnh nđâp piăng let mâu geh ndrui jêh ri trao tăng.

Êsêkiêl 44:29

Khân păng mra siăm khân păng nơm ma ndơ ƀư brah rnih, ndơ ƀư brah geh tih jêh ri ƀư brah chuai nau tih. Lĕ rngôch moh ndơ phung ƀon lan bri Israel, nhhơr mra jêng ndơ khân păng.

Kan Lêvi 2:3

Bi ndơ hôm e bơh ndơ ƀư brah rnih môi jêng ndơ ma Y-Arôn de jêh ri phung kon bu klâu păng. Nĕ jêng ndơ dŭt kloh ueh sŏk bơh ndơ ƀư brah ăn ŭnh sa nhhơr ma Brah Yêhôva.

Kan Lêvi 5:13

Tâm ban pônây, kôranh ƀư brah mra ƀư nau rƀŭn chuai nau tih ăn ma nơm hŏ ƀư tih jêh du ntil nau, tâm lĕ ntil nau klơ aơ, jêh ri nau tih păng mra dơi yô̆ an. Rnih hôm e mra jêng ndơ ma kôranh ƀư brah de tâm ban ma ndơ ƀư brah rnih môi.”

Kan Lêvi 6:23

Ăp ndơ ƀư brah rnih môi bơh kôranh ƀư brah bu mra gŭch lĕ rngôch, mâu dơi ôh sa.”

Kan Lêvi 6:26

Kôranh ƀư brah nhhơr mpa ƀư brah chuai nau tih mra sa ndơ nhhơr nây tâm du ntŭk kloh ueh, jêng tâm ndring Ngih Bok Nau Tâm Rƀŭn.

Nau Kơp Bunuyh 18:8

Brah Yêhôva lah ma Y-Arôn: “Aơ, Gâp ăn jêh ma may mât uănh lĕ ndơ nhhơr Gâp, jêng lĕ rngôch ndơ ƀư brah kloh ueh phung ƀon lan Israel hŏ nhhơr jêh. Gâp ăn jêh lĕ ndơ nhhơr nây ma may jêh ri ma phung kon bu klâu may nâm jêng kô̆ ma nau pah kan ndơ ƀư brah di tĭng vay n'ho ro.

I Kôrintô 5:8

Pôri, ăn he kah gĭt ndray rƀŭn Nau Găn, lơi dŏng ndrui ơm ôh, jêng ndrui nau djơh mhĭk jêh ri ƀai, ƀiălah ma piăng let mâu geh ndrui nau răp jăp jêh ri nau ngăn.