Kan Lêvi 4:26 - Nau Brah Ndu Ngơi 2023

²⁶ Păng ăt su lĕ rngôch ngi ta klơ nơng ƀư brah tâm ban ma nau gŭch ngi mpa ƀư brah tâm ndơ ƀư brah đăp mpăn. Tâm ban pônây, kôranh ƀư brah mra ƀư nau rƀŭn chuai nau tih ăn ma kôranh chiă uănh jêh ri nau tih păng mra dơi yô̆ an.

Kan Lêvi 4:26 ပူးပေါင်းရင်းမြစ်များ

II Nau Rêh Jêng 29:24

Phung kôranh ƀư brah nkhĭt khân păng jêh ri dâng sŏk mham nsrih klơ nơng gay ƀư brah chuai nau tih ăn ma lĕ rngôch phung Israel, yorlah hađăch ntĭnh kơt aơ nhhơr ndơ ƀư brah gŭch jêh ri ndơ ƀư brah chuai nau tih ma lĕ rngôch phung Israel.

Êsêkiêl 43:22

Ta nar năng bar, ăn may nhhơr du mlâm be nkuăng mâu geh sôt ƀư ndơ ƀư brah chuai nau tih, jêh ri nơng ƀư brah mra dơi geh nau kloh nâm bu ƀư kloh jêh ma ndrôk nkuăng.

Kan Lêvi 1:4

Bunuyh nhhơr ndơ nhhơr mra dơm ti păng ta klơ bôk mpa ƀư ndơ ƀư brah gŭch jêh ri mpa nây mra dơi dơn nâm bu du mpa ƀư brah gay chuai nau tih ntang an ma bunuyh nây.

Kan Lêvi 12:8

Tơlah bu ur mâu tŏng nau dơi nhhơr du mlâm biăp kon, ăn păng nhhơr du kôp sĭm ntơp mâu lah du kôp plŭk kon, du mlâm prăp ma ndơ ƀư brah gŭch, du mlâm êng prăp ma ndơ ƀư brah chuai nau tih. Kôranh ƀư brah mra ƀư nau rƀŭn ƀư kloh ma păng jêh ri păng mra dơi kloh.’”

Kan Lêvi 14:18

Bi dak ngi hôm e tâm mpang ti, kôranh ƀư brah mra mhĭng ta bôk nơm dơi ƀư kloh. Kôranh ƀư brah mra ƀư nau rƀŭn chuai nau tih ăn ma nơm nĕ tanăp Brah Yêhôva.

Kan Lêvi 15:15

Kôranh ƀư brah mra nhhơr du mlâm jêng ndơ ƀư brah chuai nau tih, du mlâm êng jêng ndơ ƀư brah gŭch. Pônây, kôranh ƀư brah mra ƀư nau rƀŭn chuai nau tih tanăp Brah Yêhôva ma nơm geh nau ji kren.

Kan Lêvi 17:11

Yorlah nau rêh nglay săk gŭ tâm mham, jêh ri Gâp hŏ ăn jêh mham ma khân may mbrih ta klơ nơng ƀư brah gay ƀư nau rƀŭn chuai nau tih ma huêng khân may. Yorlah mham jêng nau rêh rĭ mơ dơi chuai nau tih.

Kan Lêvi 19:22

Kôranh ƀư brah mra nhhơr biăp nkuăng nây jêng ndơ ƀư brah chuai nau ƀư tih ma nơm hŏ ƀư tih tanăp Brah Yêhôva jêh ri nau tih păng ƀư mra dơi yô̆ an.

Kan Lêvi 3:5

Phung kon sau Y-Arôn mra gŭch lĕ ndơ nây ta nơng ƀư brah ndrel ma ndơ ƀư brah gŭch hŏ n'gân ta klơ long dôl hit ŭnh. Nĕ jêng du ntil ndơ ƀư brah ăn ŭnh sa, geh n'hôl ƀâu kah ƀư maak nuih n'hâm Brah Yêhôva.

Kan Lêvi 4:19

Kôranh ƀư brah mra hoal lĕ rngôch ngi djôt gŭch ta klơ nơng ƀư brah.

Kan Lêvi 4:20

Ăn kôranh ƀư brah toyh lơn nhhơr ndrôk nây tâm ban ma nau bu nhhơr ndrôk tâm nau rƀŭn chuai nau tih. Tâm ban pônây, kôranh ƀư brah mra chuai nau tih ăn ma phung tâm rƀŭn jêh ri nau tih khân păng mra dơi yô̆ an.

Kan Lêvi 4:31

Păng ăt hoal lĕ rngôch ngi tâm ban ma nau bu ƀư tâm ndơ ƀư brah đăp mpăn, jêh nây djôt gŭch ta klơ nơng ƀư brah, ƀư ma ndơ ƀư brah geh n'hôl ƀâu kah ƀư maak nuih n'hâm ma Brah Yêhôva. Tâm ban pônây, kôranh ƀư brah mra ƀư nau rƀŭn chuai nau tih ăn ma păng, jêh ri nau tih păng mra dơi yô̆ an.

Kan Lêvi 4:35

Păng ăt hoal lĕ rngôch ngi tâm ban ma nau bu ƀư ma biăp kon nhhơr tâm ndơ ƀư brah đăp mpăn jêh nây djôt gŭch mpa nây ta klơ nơng ƀư brah, nđâp ma lĕ ndơ ƀư brah ăn ŭnh sa nhhơr ma Brah Yêhôva. Tâm ban pônây, kôranh ƀư brah mra ƀư nau rƀŭn chuai nau tih ăn ma păng, jêh ri nau tih păng mra dơi yô̆ an.”

Kan Lêvi 5:10

Bi ma sĭm tal bar, kôranh ƀư brah mra nhhơr jêng ndơ ƀư brah gŭch tĭng nâm nau vay. Kơt nây, kôranh ƀư brah mra ƀư nau rƀŭn chuai nau tih, yor nau tih nơm nây hŏ ƀư jêh jêh ri păng mra dơi yô̆ an.

Kan Lêvi 5:13

Tâm ban pônây, kôranh ƀư brah mra ƀư nau rƀŭn chuai nau tih ăn ma nơm hŏ ƀư tih jêh du ntil nau, tâm lĕ ntil nau klơ aơ, jêh ri nau tih păng mra dơi yô̆ an. Rnih hôm e mra jêng ndơ ma kôranh ƀư brah de tâm ban ma ndơ ƀư brah rnih môi.”

Kan Lêvi 5:16

Ăn păng ntrok tay ndơ kloh ueh jêh ri mra ntop du kô̆ tâm prăm rnoh prăk ma ndơ mpa kloh ueh yor nau tih păng hŏ ƀư jêh, jêh nây jao ndơ nây ma kôranh ƀư brah. Kôranh ƀư brah mra dŏng biăp nkuăng jêng ndơ ƀư brah chuai nau ƀư tih gay chuai nau tih ma păng, jêh ri păng mra dơi yô̆ an.

Kan Lêvi 5:18

Ăn păng têk njŭn ma kôranh ƀư brah du mlâm biăp nkuăng mâu geh têl khap ôh, nhŭp tâm mpôl biăp, kơp tĭng nâm rnoh hŏ dăp jêh ma ndơ ƀư brah chuai nau ƀư tih. Kôranh ƀư brah mra ƀư nau rƀŭn chuai nau ƀư tih ma nơm nây, yor nau tih păng lăn ƀư tih, jêh ri păng mra dơi yô̆ an.

Kan Lêvi 6:7

Kôranh ƀư brah mra ƀư nau rƀŭn chuai nau ƀư tih ma păng tanăp Brah Yêhôva, jêh ri păng mra dơi yô̆ an ma lĕ nau mâu di păng hŏ ƀư jêh.”

Nau Kơp Bunuyh 15:25

Kôranh ƀư brah mra ƀư nau rƀŭn chuai nau tih ma lĕ rngôch phung ƀon lan Israel tâm rƀŭn; khân păng mra geh nau yô̆ an yorlah nĕ jêng nau tih mâu ŭch ƀư jêh ri phung tâm rƀŭn hŏ njŭn leo jêh tât tanăp Brah Yêhôva du ndơ ƀư brah, jêng du ndơ ƀư brah ăn ŭnh sa nhhơr ma Brah Yêhôva, nđâp ma ndơ ƀư brah chuai nau tih khân păng vĭ.

Nau Kơp Bunuyh 15:28

Kôranh ƀư brah mra ƀư nau rƀŭn chuai nau tih ma bunuyh ƀư nau tih vĭ tanăp Brah Yêhôva; tơlah lĕ ƀư nau rƀŭn chuai nau tih ma bunuyh nây, jêh nây păng mra geh nau yô̆ an.