Kan Lêvi 26:25 - Nau Brah Ndu Ngơi 2023

²⁵ Gâp mra djôt đao gưm tât ma khân may gay mplơ̆ plơng yor khân may ƀư rai nau tâm rnglăp đah Gâp. Dôl khân may tâm rƀŭn tâm ƀon toyh Gâp mra nkhŭt nau ji tưp ta klơ khân may jêh ri khân may mra tŭp tâm ti phung rlăng.

Kan Lêvi 26:25 ပူးပေါင်းရင်းမြစ်များ

II Samuel 24:15

Pôri, Brah Yêhôva ƀư ăn nau ji tưp ƀư mhĭk ngăn tâm phung Israel, ntơm bơh ơm ôi nar nây tât ta mông hŏ nal jêh. Rnoh bunuyh khĭt tâm phung ƀon lan ntơm bơh Dan tât ma Bêr-Sêba jêng pơh rmưn nuyh.

I Phung Hađăch 8:33

Tơlah Israel, phung ƀon lan May, yor ƀư tih đah May, jêh nây phung rlăng lơh rai khân păng, tơlah khân păng plơ̆ sĭt ma May, mbơh amoh May jêh ri mbơh sơm vơl dăn ma May tâm ngih brah aơ,

I Phung Hađăch 8:37

Tơlah tâm n'gor bri geh nau ji ngot, nau ji tưp, mâu lah prăng phang, hon sêt-o, krah ndrach, krah nsăt, mâu lah geh phung rlăng nchueng jŭm lĕ mpông ƀon khân păng gŭ, mâu lah ăp nau mhĭk, nau ji;

II Phung Hađăch 17:3

Hađăch Asiri jêng Y-Salmanêser hăn hao tâm lơh đah Y-Hôsêa, ƀư ăn păng tông bâr jêh ri chê̆ pi ma Y-Salmanêser.

II Nau Rêh Jêng 24:24

Nđâp tơlah, phung tahan Aram văch knŏng djê̆ bunuyh, ƀiălah Brah Yêhôva hŏ jao jêh du phung tahan âk ngăn tâm ti phung Aram, yorlah khân păng hŏ chalơi jêh Yêhôva Brah Ndu phung chô yau khân păng. Pônây, phung Aram tâm rmal Y-Jôas.

Nau Mprơ Ơm 94:1

Ơ Brah Yêhôva jêng Brah Ndu, ma nau plơng bôk jêng ndơ May, Ơ Brah Ndu, nau plơng bôk jêng ndơ May, dăn sol ang nau chrêk rmah May.

Nau Ngluh Êjipt 5:3

Y-Môis jêh ri Y-Arôn ngơi: “Brah Ndu phung Hêbrơ hŏ tâm mpơl jêh đah hên. Hên dăn ma may ăn hên hăn tâm pe nar hăn trong mŭt tâm bri rdah gay nhhơr mpa ƀư brah ma Yêhôva Brah Ndu hên; lah mâu, Brah Ndu mra ƀư nau ji tưp mâu lah ma đao đah hên.”

Êsai 1:20

Ƀiălah tơlah khân may dun jêh ri tâm rdâng, Đao gưm mra ƀư rai khân may; Yor bâr mbung Brah Yêhôva hŏ ngơi jêh.”

Êsai 65:12

Gâp mra tâm nal khân may ma đao, Lĕ rngôch khân may mra chon mon dơn nau bu nkhĭt; Yorlah Gâp hŏ kuăl ƀiălah khân may mâu plơ̆ lah ôh, Gâp ngơi jêh ƀiălah khân may mâu iăt. Khân may ƀư jêh nau mhĭk tâm dâng măt Gâp, Jêh ri hŏ săch jêh nau mâu ƀư maak ma Gâp.”

Yêrêmi 19:7

Ta ntŭk aơ, Gâp mra ƀư rai lơi nau ƀư nchră phung Yuđa jêh ri phung Yêrusalem, Gâp mra ăn ma khân păng cha lôt prah tâm dâng mpiăt đao tanăp phung rlăng, jêh ri tâm dâng ti ma phung joi ŭch ƀư rai nau rêh khân păng. Gâp mra jao săk jăn khĭt khân păng ƀư ndơ sa ăn ma sĭm klơ trôk jêh ri mpô mpa bri.

Yêrêmi 24:10

Gâp mra đă đao, nau sât ji ngot, nau ji tưp tât ta nklang khân păng, kŏ tât bu mra ƀư rai lĕ bơh neh Gâp hŏ ăn jêh ma khân păng jêh ri ma phung chô yau khân păng.’”

Yêrêmi 50:28

Iăt hom phung nchuăt du jêh ri phung lĕ rklaih tă bơh bri Babilôn tât tâm ƀon Siôn gay mbơh nau Yêhôva Brah Ndu he har plơng bôk, nau plơng bôk ăn ma ngih brah Păng.

Yêrêmi 51:11

Lanh hom hăr ăn mplônh, Kuăn khêl ăn nâp! Brah Yêhôva hŏ nsônh jêh nuih n'hâm phung hađăch bri Mêdơ, yorlah nau Păng ŭch ƀư jêng nau ƀư rai lơi ƀon Babilôn. Aơ jêng nau Brah Yêhôva plơng bôk, Păng plơng bôk ma ngih brah Păng.

Yêrêmi 9:16

Gâp mra ƀư ăn khân păng nchah rai pru pra ta nklang ndŭl mpôl bunuyh khân păng jêh ri phung chô yau khân păng mâu mâp gĭt; Gâp hôm njuăl tak đao hăn tĭng kŏ tât hŏ ƀư rai khân păng.”

Nau Nhĭm Vơl 2:21

Rŏ trong sâng, phung mom ndăm jêh ri phung bu ranh Lâng bê̆ch mbrach; Phung bu klâu ndăm bu ur druh gâp Cha lôt khĭt da dê yor ma chiông đao. May hŏ nkhĭt lơi jêh khân păng tâm nar ji nuih, Ƀư nkhĭt khân păng mâu geh nau yô̆ ôh.

Êsêkiêl 14:17

Mâu lah tơlah Gâp ăn đao văch tât ta bri nây, jêh ri lah: ‘Đao mra rgăn ta bri nây jêh ri Gâp mra ƀư rai lơi bunuyh jêh ri mpô mpa tâm nây,’

Êsêkiêl 20:37

Gâp mra ƀư ma khân may rgăn tâm dâng mâng jra jêh ri mra leo khân may lăp tâm rse ma nau tâm rnglăp.

Êsêkiêl 29:8

Yor nây, Kôranh Brah Yêhôva lah: ‘Aơ, Gâp mra leo đao tât tâm rdâng đah may jêh ri mra nkhĭt lĕ rngôch bunuyh nđâp ma mpô mpa.

Êsêkiêl 33:2

“Hơi kon bunuyh, lah hom ma phung ƀon lan may mbơh lah pô aơ: ‘Tơlah Gâp ăn đao tât ma du n'gor bri, jêh ri ƀon lan tâm bri nây săch du huê nuyh gay ƀư bunuyh gak njrăng;

Êsêkiêl 5:17

Gâp mra nkhŭt nau sa sât ji ngot tât ma khân may jêh ri njuăl mpô mpa bri sa hêk phung kon khân may. Nau ji tưp jêh ri nau pling mham mra tât ma ta nklang khân may, jêh ri Gâp mra dŏng tak đao tât đŏng ma khân may. Gâp yơh jêng Brah Yêhôva hŏ lah jêh pônây!”

Êsêkiêl 6:3

pô aơ: Hơi phung yôk Israel, iăt hom nau Yêhôva Brah Ndu ngơi! Brah Ndu ngơi ma phung nâm, ma phung gôl yôk, bong dak n'hor jêh ri ma phung rlŭng: Aơ Gâp, Gâp nơm yơh, mra ăn gưm đao tât tâm rmal khân may, ƀư rai ntŭk prêh khân may.

Ndrom Samƀŭt bơh Ôsê 11:6

Đao gưm mra ƀư mhĭk ƀaƀơ tâm lĕ ƀon toyh khân păng, Ƀư rai lĕ mâng rnăng mpông jêh ri rvăn lĕ rngôch khân păng Yor lĕ nau khân păng mĭn ŭch ƀư.

Kan Lêvi 26:6

Gâp mra ăn nau đăp mpăn tâm n'gor jêh ri khân may mra bê̆ch, mâu geh nơm nkrit nhhu khân may ôh. Gâp mra mprơh lơi mpa bri janh luh bơh n'gor jêh ri đao gưm mâu mra hăn rgăn ôh tâm n'gor khân may.

Amôt 4:10

“Gâp njêng nau ji tưp tât ma khân may nâm bu tâm n'gor bri Êjipt. Gâp nkhĭt jêh phung bu klâu ndăm khân may ma đao Jêh ri seh khân may lĕ Gâp nhŭp jêh. Gâp hŏ ƀư nau ƀâu ôm tă bơh ntŭk khân may njơh, n'hôl tât ma trôm muh khân may. Ƀiălah khân may mâu lĕ ŭch plơ̆ sĭt ma Gâp.” Brah Yêhôva lah pônây.

Habakuk 3:5

Nau ji tưp hăn panăp Păng, Nau mhĭk tât tĭng êp jâng Păng chuat.

Nau Kơp Bunuyh 14:12

Gâp mra nkhŭt khân păng ma nau ji tưp jêh ri ƀư rai khân păng, ƀiălah Gâp mra ƀư ma may jêng du phung ƀon lan toyh lơn jêh ri ktang lơn ma khân păng.”

Nau Kơp Bunuyh 16:49

Geh jât puăn rbăn pơh rhiăng phung khĭt yorlah nau mhĭk aơ, mâu kơp rnoh bunuyh khĭt tâm nau Y-Kôra.

Nau Kơp Bunuyh 31:3

Pôri Y-Môis ntăm ma phung ƀon lan: “Ăn khân may ndrăp ndơ tâm lơh gay hăn tâm lơh đah phung Madian jêh ri plơng har ma phung ƀon lan nây yorlah Brah Yêhôva.

Luka 21:11

mra geh lĕ nau n'găr neh toyh, nau sât ji ngot ndrel ma nau ji tưp ta âk ntŭk; mra geh lĕ nau dŭt krit kir jêh ri nau tâm mbên toyh ta klơ trôk.

Nau Vay Nkah Tay 28:21

Brah Yêhôva mra ƀư ăn nau ji tưp krêp ta khân may kŏ tât păng ƀư rai lĕ khân may bơh n'gor khân may bơi pit sŏk.

Nau Vay Nkah Tay 32:25

Padih đao mra nkhĭt phung kon, Tâm trôm nau krit kir ngăn Ƀư ma bu klâu ndăm jêh ri bu ur druh, Jêh ri kon se dôl gŭ pu toh nđâp ma bu klâu ranh mra rai lôch da dê.

Nau Vay Nkah Tay 32:35

Gâp mra plơng bôk, Gâp mra tâm rmal, Tâm nôk jâng khân păng mbĭr prah; Yorlah nar rêh ni khân păng hŏ dăch jêh, Nar nau phat dôih khân păng tât gơnh.”

Nau Vay Nkah Tay 32:41

Lah Gâp tôl theng măt đao ăn dŭt chrêk, Jêh ri ti djôt nau phat dôih Gâp mra plơng har ma phung rdâng đah Gâp, Mplơ̆ tay ma phung tâm rmot ma Gâp.

Phung Kôranh Phat Dôih 15:11

Pe rbăn phung Yuđa hăn trŭnh ma trôm lŭ Êtam jêh ri lah ma Y-Samsôn: “May mâu hŏ gĭt ma phung Philistin dôl chiă uănh he? Pônây, moh nau may hŏ ƀư dĭng ƀeng ma hên nây?” Păng plơ̆ lah: “Gâp ƀư ma khân păng nâm bu khân păng ƀư jêh ma gâp.”