Kan Lêvi 25:17 - Nau Brah Ndu Ngơi 2023

¹⁷ Lơi tâm ndơm ndrăng khân may nơm ôh, ƀiălah ăn khân may klach yơk ma Brah Ndu khân may, yorlah Gâp jêng Yêhôva Brah Ndu khân may.

Kan Lêvi 25:17 ပူးပေါင်းရင်းမြစ်များ

Nau Ntơm 20:11

Y-Abraham ơh: “Gâp ƀư pônây, yor gâp mĭn tâm n'gor aơ mâu mâp geh ôh bunuyh klach yơk ma Brah Ndu. Klăp lah khân păng mra nkhĭt gâp yor ur gâp.

Nau Ntơm 22:12

Tông mpăr lah: “Lơi ƀư nau mhĭk kon se nây jêh ri kŏ mâu đŏng ƀư du ntil nau ma păng. Aƀaơ aơ, Gâp gĭt ngăn may klach yơk ngăn ngên ma Brah Ndu, yorlah may mâu nhhuach ôh kon nguay may ma Gâp, nđâp lah knŏng du huê nây dơm.”

Nau Ntơm 39:9

Tâm ngih aơ, mâu hôm geh ôh bunuyh jêng toyh lơn ma gâp, jêh ri kôranh gâp mâu nhhuach ôh du ntil ndơ ma gâp, knŏng ay, yorlah ay jêng ur păng. Mâm gâp dơi nănh ƀư nau mhĭk toyh kơt nĕ jêh ri ƀư tih đah Brah Ndu?”

Nau Ntơm 42:18

Tât nar tal pe, Y-Yôsep lah ma khân păng: “Yorlah gâp klach yơk ma Brah Ndu, lah khân may ŭch rêh ăn khân may ƀư hom kơt aơ.

II Nau Rêh Jêng 19:7

Pôri aƀaơ ăn khân may geh nau yơk klach ma Brah Yêhôva, njrăng hom moh nau khân may ƀư, yorlah Yêhôva Brah Ndu he, mâu dơn nau mâu di, gŭ mpeh du ding, mâu lah dơn ndơ bu blŏl.”

Nêhêmi 5:15

Ƀiălah phung kôranh chiă uănh hŏ tât lor ma gâp, phung nây hŏ bun kan jâk jêr klơ phung ƀon lan, kêh ăn ndơ sông sa jêh ri ndrănh êng pa meng n'gul kilô prăk. Phung oh mon khân păng tŭn jot ma phung ƀon lan đŏng. Ƀiălah gâp mâu ƀư pônây ôh, yorlah klach yơk ma Brah Ndu.

Nêhêmi 5:9

Gâp lah tay: “Nau khân may ƀư mâu geh ueh ôh. Di lah khân may gŭ tâm nau klach yơk ma Brah Ndu, gay lơi ăn phung rlăng ƀư bêk prêng he?

Nau Mprơ Ơm 19:9

Nau klach yơk ma Brah Yêhôva jêng kloh rsang, Hôm gŭ tât n'ho ro; Lĕ nau vay ƀư Brah Yêhôva jêng nau ngăn. Lĕ rngôch jêng sŏng srăng.

Nau Ngluh Êjipt 20:20

Y-Môis lah ma phung ƀon lan: “Lơi klach ôh, yorlah Brah Ndu jŭr gay rlong uănh nuih n'hâm khân may, gay ma khân may klach yơk ma Păng ƀaƀơ, pônây khân may mâu ƀư tih ôh.”

Nau Hôr 1:7

Nau klach yơk ma Brah Yêhôva jêng tơm ma nau gĭt rbăng, Bi phung rluk tâm rmot ma nau blau mĭn jêh ri nau ntĭm nti.

Nau Hôr 14:31

Phung tŭn jot bunuyh o ach suai rak ma Nơm rhăk njêng păng, Mbu nơm yô̆ an ma bunuyh o ach jêng nau yơk ma Păng.

Nau Hôr 16:6

Ma nau ueh jêh ri ma nau nanê̆ ngăn nau tih dơi yô̆ an, Yor ma nau klach yơk ma Brah Yêhôva bu der bơh nau mhĭk.

Nau Hôr 22:22

Lơi tŭn jot ôh bunuyh o ach yorlah khân păng ndĭt trơi, Mâu lĕ tŭn jot bunuyh rêh ni ta mpông ƀon;

Êsai 3:14

Brah Yêhôva mra phat dôih Phung kôranh bu ranh phung ƀon lan Păng jêh ri phung kôranh chiă uănh khân păng: “Khân may nơm jêng phung sa rvăn đang krăk ƀâu, Drăp ndơ ntŭng bơh phung o ach dôl gŭ tâm ngih khân may!

Yêrêmi 22:16

Păng phat dôih ma nau sŏng ăn ma phung o ach jêh ri phung pưt kƀah, Pôri dơi geh nau ndrŏng ktang. Brah Yêhôva lah: ‘Mâu di hĕ nâm bu pônây jêng nau gĭt năl ma Gâp?

Kan Lêvi 19:13

Mâu dơi tŭn jot nơm chiau meng khân may nơm, mâu đŏng ntŭng ndơ khân păng. Lơi dĭng mâu ăn prăk ma bunuyh kan nkhôm tâm ngih khân may kŏ tât ôi taơ.

Kan Lêvi 19:14

Lơi ta mưch rmot ma bunuyh tê̆k mâu lah ndơm ndơ chêh jâng ma bunuyh chieh măt, ƀiălah ăn khân may klach yơk ma Brah Ndu. Gâp jêng Brah Yêhôva.

Kan Lêvi 19:32

Ăn khân may dâk tanăp măt phung sŏk ndra, yơk ma phung bu ranh, jêh ri ăn khân may klach yơk ma Brah Ndu khân may. Gâp jêng Brah Yêhôva.

Kan Lêvi 25:14

Tơlah khân may tăch mâu lah rvăt moh ndơ tă bơh phung chiau meng khân may, lơi ta ndơm ndrăng nơm ôh.

Kan Lêvi 25:36

Lơi sa kao mâu lah sŏk drăp nkhôm bơh păng ôh, ƀiălah klach yơk hom ma Brah Ndu gay ma oh nâu khân may dơi gŭ rêh dăch khân may.

Kan Lêvi 25:43

Lơi ăn khân may jêng phung chiă uănh khân păng ma nau janh ôh, ƀiălah klach yơk hom ma Brah Ndu.

Malachi 3:5

“Gâp mra văch dăch khân may gay phat dôih, jêh ri Gâp mra ƀư ndal mbơh nau tâm rdâng đah phung n'hŭm, đah phung văng tĭr, phung ton mƀruh, phung sa đĭ nau nkhôm ma phung pah kan, phung tŭn jot bu ur ndrô khĭt sai jêh ri phung kon đơi, phung ƀư djơh đah phung bu năch; yorlah khân păng mâu klach yơk ma Gâp.” Brah Yêhôva ma phung tahan lah pônây.

Luka 12:5

Ƀiălah Gâp ntĭm ma khân may gĭt klach mbu nơm: Klach hom ma Nơm, nôk nkhĭt jêh, hôm geh nau dơi mƀăr jŭr ndrung ŭnh. Di kơt nây, Gâp đă ma khân may, klach hom ma Nơm nây!

Kôranh Oh Mon 10:2

Păng ơm jêng bunuyh ueh, lĕ rnăk vâl geh nau klach yơk ma Brah Ndu; păng vay ăn yô̆ âk ndơ ma phung ƀon lan jêh ri păng mbơh sơm kuăl Brah Ndu ƀaƀơ.

Kôranh Oh Mon 10:35

ƀiălah tâm lĕ ntil mpôl bunuyh, mbu nơm klach yơk ma Kôranh Brah jêh ri ƀư nau sŏng srăng, Păng dơn bunuyh nây.

Kôranh Oh Mon 9:31

Pôri, Phung ngih Brah Ndu tâm n'gor Yuđa, Galilê, jêh ri Samari, geh nau đăp mpăn, văch ma toyh, hăn tâm nau klach yơk ma Kôranh Brah; yorlah Brah Huêng Ueh kơl, phung chroh jêng lơ nar lơ ntop âk.

Samƀŭt Pôl Njuăl Ăn Ma Phung Nsing Ta Ƀon Rôm 11:20

Di ngăn. Bu koh lơi jêh lĕ n'gĭng nây, yorlah nuih n'hâm khân păng mâu chroh, bi may knŏng dâk nâp yor nau chroh. Lơi sưr rlau, ƀiălah klach hom.

Samƀŭt Pôl Njuăl Ăn Ma Phung Nsing Ta Ƀon Rôm 3:18

“Nau klach yơk ma Brah Ndu mâu gŭ tanăp khân păng ôh.”

Nau Vay Nkah Tay 25:18

Yorlah khân păng mâu klach yơk ma Brah Ndu, rĭ dĭng khân păng hăn chuă jêh ri tâm lơh đah phung tĭng groi pakơi khân may ta rŏ trong, dôl khân may lĕ huăr jêh ri rgănh.

I Têsalônik 4:6

Tâm ntil nau aơ, lơi ăn geh bunuyh ƀư tih, mâu lah ndơm oh nâu păng nơm; yorlah Kôranh Brah jêng Nơm phat dôih tâm rmal ma lĕ nau nây, nâm bu hên hŏ lah lor jêh ri mbơh jêh ma khân may.

I Samuel 12:24

Knŏng khân may klach yơk ma Brah Yêhôva, sŏk lĕ nuih n'hâm răp jăp pah kan ma Păng. Uănh hom lĕ nau kan toyh Păng hŏ ƀư jêh ma khân may!