Kan Lêvi 17:15 - Nau Brah Ndu Ngơi 2023

¹⁵ Mbu nơm, nđâp lah jêng phung ƀon tơm mâu lah bunuyh gŭ njưh, sa puăch du mlâm mpa khĭt êng mâu lah khĭt yor mpa bri janh sa hêk, ăn pih lơi kho ao, ŭm tâm dak jêh ri jêng ƀơ̆ ƀơch tât kêng măng jêh nây mra dơi geh nau kloh tay.

Kan Lêvi 17:15 ပူးပေါင်းရင်းမြစ်များ

Nau Ngluh Êjipt 22:30

Ăn khân may ƀư kơt nĕ đŏng ma biăp jêh ri ndrôk khân may. Ăn hom kon dak bôk gŭ ndrel me păng tâm pơh nar, tât ta nar tal pham khân may mra nhhơr păng ma Gâp.

Nau Ngluh Êjipt 22:31

Phung khân may jêng bunuyh kloh ueh ma Gâp, yor nây mâu dơi sa ôh puăch mpa tă mpô mpa bri sa hêk tâm mir, ăn may mƀăr păng ma so sa.

Êsêkiêl 4:14

Gâp lah: “Ơ Yêhôva Brah Ndu! Huêng gâp mâu mâp ƀư ƀơ̆ ôh. Ntơm bơh jê̆ tât aƀaơ ri, gâp mâu mâp sa ôh mpô mpa khĭt măt mâu lah mpô mpa bri hêk sa, jêh ri mâu lĕ geh ndơ ƀơ̆ lăp jêh tâm trôm mbung gâp.”

Êsêkiêl 44:31

Phung kôranh ƀư brah mâu dơi sa ôh puăch du ntil mpô mpa, nđâp lah sĭm och mâu lah mpô mpa khĭt êng mâu lah mpô mpa geh bu kăp hêk.”

Kan Lêvi 11:24

Khân may geh nau ƀơ̆ ƀơch yorlah lĕ nau aơ: mbu nơm pah ta săk jăn khĭt lĕ rngôch mpa ta aơ, khân păng mra ƀơ̆ ƀơch tât kêng măng:

Kan Lêvi 11:25

Mbu nơm djôt săk jăn khĭt khân păng mra pih kho ao păng jêh ri jêng ƀơ̆ ƀơch tât kêng măng.

Kan Lêvi 11:27

Tâm lĕ rngôch mpa hăn đah puăn jâng, tơlah mpô mpa hăn ma mpang jâng, uănh hom jêng mâu kloh ma khân may; mbu nơm pah ta săk jăn khĭt khân păng mra jêng ƀơ̆ ƀơch tât kêng măng,

Kan Lêvi 11:28

jêh ri mbu nơm djôt săk jăn khĭt khân păng mra pih kho ao păng jêh ri mra jêng ƀơ̆ ƀơch tât kêng măng; lĕ rngôch mpa nây jêng mpa mâu kloh ma khân may.

Kan Lêvi 11:31

Tâm lĕ rngôch mpa vơr, nây jêng lĕ mpa mâu kloh ma khân may; mbu nơm pah ta săk jăn khĭt khân păng mra jêng ƀơ̆ ƀơch tât kêng măng.

Kan Lêvi 11:32

Dôl du mpa tâm phung mpa nây khĭt, săk jăn khĭt păng tŭp ta ăp ntil moh ndơ, ndơ nây mra jêng ƀơ̆ ƀơch, nđâp lah nĕ jêng ndơ dŏng ƀư ma si, ma bok, ma ntâu, dŭng, mâu lah geh ta ăp ndơ ƀaƀă; ăn bu trăm lĕ ndơ nây tâm dak, jêh ri lĕ ndơ nây mra jêng ƀơ̆ ƀơch tât kêng măng rĭ mơ khân păng jêng kloh.

Kan Lêvi 11:39

Tơlah du mlâm mpa khân may dơi vay sa puăch, ƀiălah păng khĭt, jêh ri mbu nơm pah săk jăn khĭt păng mra jêng ƀơ̆ ƀơch tât kêng măng.

Kan Lêvi 11:40

Mbu nơm mra sa puăch săk jăn khĭt nây, ăn păng pih kho ao păng nơm jêh ri jêng ƀơ̆ ƀơch tât kêng măng; mbu nơm hôm tung săk khĭt nây ăt păng pih đŏng kho ao păng jêh ri jêng ƀơ̆ ƀơch tât kêng măng.

Kan Lêvi 15:10

Mbu nơm pah du ntil ndơ nơm geh nau ji kren bê̆ch mâu lah gŭ, nơm nây mra jêng ƀơ̆ ƀơch tât kêng măng. Bi ma mbu nơm djôt ndô ndơ nây mra pih lơi kho ao păng, ŭm tâm dak jêh ri mra jêng ƀơ̆ ƀơch tât kêng măng.

Kan Lêvi 15:21

Mbu nơm pah sưng bê̆ch bu ur nây, ăn pih kho ao, ŭm tâm dak jêh ri jêng ƀơ̆ ƀơch tât kêng măng.

Kan Lêvi 15:5

Mbu nơm geh pah ta sưng nơm nĕ bê̆ch, ăn păng pih kho ao, ŭm tâm dak, jêh ri jêng ƀơ̆ ƀơch tât kêng măng.

Kan Lêvi 22:8

Păng mâu dơi ôh sa puăch mpô mpa khĭt mâu lah mpa bri janh hêk sa, gay bah ƀư ƀơ̆ păng nơm. Gâp jêng Brah Yêhôva.

Kan Lêvi 7:24

Ngi mpa khĭt êng mâu lah tă mpa bri janh sa hêk, bu dơi dŏng ma kan êng, ƀiălah khân may mâu dơi sa ôh.

Nau Kơp Bunuyh 19:19

Ta nar tal pe jêh ri nar tal pơh, du huê bunuyh geh nau kloh nsrih hom dak nây ta klơ bunuyh ƀơ̆ jêh ri nar tal pơh bunuyh geh nau kloh mra ƀư kloh ma păng. Bunuyh geh nau kloh mra pih kho ao, ŭm tâm dak jêh ri dăch kêng măng păng mra geh nau kloh.

Nau Kơp Bunuyh 19:21

Aơ mra jêng ma du nau vay dăp n'ho ro ma phung ƀon lan. Mbu nơm nsrih dak ma dak jut tho nau ƀơ̆ mra pih kho ao păng; mbu nơm pah dak jut tho nau ƀơ̆ mra jêng ƀơ̆ ƀơch tât kêng măng.

Nau Kơp Bunuyh 19:8

Nơm gŭch ndrôk me nây mra pih kho ao păng, ŭm tâm dak jêh ri mra jêng ƀơ̆ ƀơch tât kêng măng.

Nau Vay Nkah Tay 14:21

Lơi ta sa ôh puăch du mlâm mpa lĕ khĭt jêh. Khân may dơi djôt păng ma phung bu năch gŭ tâm ƀon toyh khân may, gay ăn khân păng sa, mâu lah khân may dơi tăch păng ma phung bu năch. Yorlah khân may jêng du phung ƀon lan kloh ueh ma Yêhôva Brah Ndu khân may. Lơi ôh gâm puăch be kon tâm dak toh me păng.”

Nau Tâm Mpơl 7:14

Gâp lah ma păng: “Hơi kôranh, may gĭt.” Kôranh bu ranh nây lah ma gâp: “Aơ jêng phung bunuyh luh tă bơh nau rêh ni toyh, hŏ pih jêh ao jêh ri pih tho ăn nglang ao khân păng nơm tâm mham Kon Biăp.