I Têsalônik 4:6 - Nau Brah Ndu Ngơi 2023

⁶ Tâm ntil nau aơ, lơi ăn geh bunuyh ƀư tih, mâu lah ndơm oh nâu păng nơm; yorlah Kôranh Brah jêng Nơm phat dôih tâm rmal ma lĕ nau nây, nâm bu hên hŏ lah lor jêh ri mbơh jêh ma khân may.

Bunong Bible Latin Script Cambodian dialect

⁶ Lơi ôh ăn du huê bunuyh jan tih jan djơh ndơ i nây ma oh nô phung nsing a êng, yorlah Kôranh Brah tê̆ dôih ma bu moh i jan tih dâng lĕ ndơ i nây, kơt hên lĕ jêh mbơh, lĕ jêh buay ma khân ay may nơh.

Bunong

⁶ លើយ​អោស​អ៝ន់​ទូ​ហ្វេ​ឞូនុយ្ស​ជាន​តីស​ជាន​អ្យើស​នទើ​អី​នៃ​មា​អ៝ស​នោ​ផូង​ញឆីង​អា​អេង យ៝រ​លាស​កោរាញ​ឞ្រាស​តេៈ​ទោយ្ស​មា​ឞូ​ម៝ស​អី​ជាន​តីស​ទឹង​លែៈ​នទើ​អី​នៃ កើត​ហេន​លែៈ​ជេស​មឞើស លែៈ​ជេស​ឞ្វៃ​មា​ខាន់​អៃ​មៃ​នើស។

I Têsalônik 4:6 ပူးပေါင်းရင်းမြစ်များ

Nau Mprơ Ơm 140:12

Gâp gĭt Brah Yêhôva mra koh dŏng nau di ma phung o ach, Phat dôih nau sŏng ma bunuyh pưt kƀah.

Nau Mprơ Ơm 94:1

Ơ Brah Yêhôva jêng Brah Ndu, ma nau plơng bôk jêng ndơ May, Ơ Brah Ndu, nau plơng bôk jêng ndơ May, dăn sol ang nau chrêk rmah May.

Nau Ngluh Êjipt 20:15

May mâu dơi ntŭng.

Nau Ngluh Êjipt 20:17

May mâu dơi kơnh ngih phung chiau meng may, mâu dơi kơnh ŭch ur, mâu lah oh mon bu klâu, oh mon bu ur, ndrôk, seh bri mâu lah ăp moh ndơ jêng ndơ phung chiau meng may.”

Nau Hôr 11:1

Brah Yêhôva rmot ngăn ma njing tih, Ƀiălah Păng maak ma play njing di.

Nau Hôr 16:11

Mâng njing jêh ri play jâk njing nau di jêng tâm Brah Yêhôva; Ăp play njing tâm dŭng jêng nau kan Păng.

Nau Hôr 20:14

Bunuyh rvăt ndơ n'ho ngơi lah: “Mhĭk, mhĭk!” Jêh nây luh du rnê êng păng nơm.

Nau Hôr 20:23

Bar ntil rplay njing jêng nau ƀơ̆ ƀơch đah Brah Yêhôva da dê, Jêh ri mâng njing mâu di mâu jêng ndơ ueh ôh.

Nau Hôr 28:24

Mbu nơm ntŭng ndơ mbơ̆ mâu lah mê̆ păng nơm, Jêh ri ngơi pô aơ: “Mâu di jêng tih ôh,” Nơm nây jêng băl đah nơm ƀư rai.

Nơm Nti 5:8

Dôl may saơ tâm du n'gor geh phung o ach bu tŭn jot, nau sŏng jêh ri nau di bu jot rchal, lơi ta hih rhâl ôh ma nau nây; yorlah du hê kôranh toyh geh kôranh toyh lơn nking n'gang jêh ri ta klơ khân păng hôm e geh kôranh toyh lơn đŏng.

Êsai 5:7

Đang play Brah Yêhôva ma phung tahan Jêng ngih Israel, Bi ma phung Yuđa Jêng lĕ tơm si Păng răm maak tăm. Păng kâp gân gay saơ nau sŏng, Ƀiălah knŏng saơ nau mhĭk; Păng kâp gân ma nau sŏng srăng, Ƀiălah knŏng geh nau nter nđêng!

Yêrêmi 7:6

tơlah khân may mâu tŭn jot ôh phung bu năch, phung kon đơi mâu lah bu ur khĭt sai, jêh ri mâu ƀư pling mham mâu geh nau tih ta ntŭk aơ, mâu lĕ nchuăt tĭng phung brah êng gay vơt nau mhĭk ma khân may nơm,

Yêrêmi 9:4

Ăp nơm mra njrăng ma nơm chiau meng, Lơi ta rnơm ir ôh du huê oh nâu êng; Yorlah oh nâu mra ndơm ndrăng oh nâu, Bi ma phung chiau meng hăn ngơi nchơt.

Êsêkiêl 22:13

Ri, Gâp mpang ti Gâp tâm ndơ mâu di may hŏ ƀư jêh ri ta mham hŏ hoch tâm nklang may.

Kan Lêvi 19:11

Khân may mâu dơi ntŭng ôh, mâu lĕ dơi ngơi nchơt jêh ri mƀruh ndrăng he.

Kan Lêvi 19:13

Mâu dơi tŭn jot nơm chiau meng khân may nơm, mâu đŏng ntŭng ndơ khân păng. Lơi dĭng mâu ăn prăk ma bunuyh kan nkhôm tâm ngih khân may kŏ tât ôi taơ.

Kan Lêvi 25:14

Tơlah khân may tăch mâu lah rvăt moh ndơ tă bơh phung chiau meng khân may, lơi ta ndơm ndrăng nơm ôh.

Kan Lêvi 25:17

Lơi tâm ndơm ndrăng khân may nơm ôh, ƀiălah ăn khân may klach yơk ma Brah Ndu khân may, yorlah Gâp jêng Yêhôva Brah Ndu khân may.

Mika 2:2

Khân păng kơnh neh mir jêh ri pit in lơi, Khân păng kơnh ngih vâl jêh ri sŏk lơi. Khân păng tŭn jot bu jêh ri ngih vâl khân păng Jêng bunuyh jêh ri drăp ndơ khân păng.

Sôphôni 3:1

Rêh ni ngăn ma ƀon tâm rdâng jêh ri ƀơ̆ ƀơch, Jêng ƀon toyh ƀư nau tŭn jot!

Sôphôni 3:5

Brah Yêhôva gŭ ta nklang ƀon, jêng Nơm sŏng srăng, Păng mâu prot ƀư nau mhĭk ôh. Ăp ôi, Păng ƀư nau di tâm dâng nau ang, Mâu mâp roh hêng ôh; Ƀiălah bunuyh kue mâu gĭt prêng ôh.

Malachi 3:5

“Gâp mra văch dăch khân may gay phat dôih, jêh ri Gâp mra ƀư ndal mbơh nau tâm rdâng đah phung n'hŭm, đah phung văng tĭr, phung ton mƀruh, phung sa đĭ nau nkhôm ma phung pah kan, phung tŭn jot bu ur ndrô khĭt sai jêh ri phung kon đơi, phung ƀư djơh đah phung bu năch; yorlah khân păng mâu klach yơk ma Gâp.” Brah Yêhôva ma phung tahan lah pônây.

Markôs 10:19

Nanê̆ may lĕ gĭt jêh nau vay ntăm: ‘Lơi nkhĭt bunuyh; lơi ƀư tih nau văng tĭr; lơi ntŭng; lơi ngơi mƀruh; lơi ndơm; yơk hom ma mê̆ mbơ̆ may.’ ”

Luka 12:5

Ƀiălah Gâp ntĭm ma khân may gĭt klach mbu nơm: Klach hom ma Nơm, nôk nkhĭt jêh, hôm geh nau dơi mƀăr jŭr ndrung ŭnh. Di kơt nây, Gâp đă ma khân may, klach hom ma Nơm nây!

Luka 16:28

yorlah gâp geh prăm nuyh oh, gay ma păng mbơh lor khân păng, gay ăn khân păng mâu hăn jŭr ntŭk nau rêh ni dŭt hâu ngăn aơ.’

Samƀŭt Pôl Njuăl Ăn Ma Phung Nsing Ta Ƀon Rôm 1:18

Nau Brah Ndu ji nuih mpơl jêh tă bơh klơ trôk gay ma tâm rdâng đah lĕ ntil mâu ƀư tĭng nau vay jêh ri ma phung djơh mhĭk dŏng nau djơh mhĭk tŭn jot nau ngăn.

Samƀŭt Pôl Njuăl Ăn Ma Phung Nsing Ta Ƀon Rôm 12:19

Hơi phung oh nâu gâp rŏng ơi, Lơi ta khân may lơi plơng bu, ƀiălah ăn ma nau Brah Ndu ji nuih; yorlah geh nau Kôranh Brah lah jêh: “Nau plơng bôk jêng nau Gâp. Gâp mra plơng bôk.”

Samƀŭt Pôl Njuăl Ăn Ma Phung Nsing Ta Ƀon Rôm 13:4

yorlah khân păng jêng oh mon ma Brah Ndu ŭch ƀư ueh ma may. Ƀiălah tơlah may ƀư nau mhĭk, klach hom, yorlah khân păng djôt đao mâu di jêng mâu geh nau; khân păng jêng oh mon ma Brah Ndu gay ma ƀư nau rmal ma mbu nơm ƀư djơh mhĭk.

II Kôrintô 7:11

Pôri, khân may uănh hom, nau rngot rvê tĭng nâm nau Brah Ndu ŭch njêng jêh tâm khân may geh nuih n'hâm duh nđơr! Mâu knŏng kơt nây dơm, ƀiălah lĕ nau srôih ƀư kloh khân may nơm, nau ji nuih, klach kir, kâp gân nau duh nđơr, nau nduyh nkra đŏng! Khân may tâm mpơl jêh tâm lĕ rngôch bunuyh ma khân may mâu geh tih tâm kan nây.

Galati 5:21

keh nach, nhŭl ndrănh, nhêt sa blă blơ, jêh ri lĕ nau êng tâm ban kơt nây. Gâp mbơh lor ma khân may, tâm ban gâp hŏ tă mbơh lor: Mbu nơm ƀư tih pônây mâu mra dơi dơn ƀon bri hađăch Brah Ndu.

Êphêsô 4:17

Pôri, tâm Kôranh Brah, gâp lah jêh ri nkah khân may lơi gŭ rêh nâm bu phung bu năch ôh, yorlah khân păng gŭ rêh tĭng nau mĭn dơm dam khân păng nơm.

Êphêsô 4:28

Nơm vay ntŭng, lơi hôm ntŭng ôh; ƀiălah ueh lơn srôih, sŏk ti păng nơm ƀư nau sŏng srăng, gay sâm kơl ma bunuyh pưt kƀah.

Êphêsô 5:6

Lơi ăn bu ndơm khân may ma nau mâu khlay ôh; yor bơh nau nây yơh nau Brah Ndu ji nuih nkhŭt tŭp ta noi deh mâu tông bâr.

Nau Vay Nkah Tay 24:7

Tơlah bu saơ du huê bunuyh nhŭp ntŭng du huê oh nâu păng tâm phung ƀon lan Israel, jêh ri djôt sĭt ƀư dĭk mâu lah tăch lơi, pôri bunuyh nhŭp ntŭng nây mra khĭt. Pônây khân may mra ƀư rai lơi nau djơh mhĭk bơh khân may.

Nau Vay Nkah Tay 32:35

Gâp mra plơng bôk, Gâp mra tâm rmal, Tâm nôk jâng khân păng mbĭr prah; Yorlah nar rêh ni khân păng hŏ dăch jêh, Nar nau phat dôih khân păng tât gơnh.”

I Têsalônik 2:11

Khân may gĭt đŏng, hên hŏ gŭ ngao ma ăp nơm tâm khân may nâm bu du huê mbơ̆ đah phung kon păng,

II Têsalônik 1:8

Păng mra tâm rmal phung mâu gĭt năl Brah Ndu jêh ri mâu tông bâr ma Nau Mhe Mhan Ueh bơh Kôranh Brah he jêng Brah Yêsu.

ហេឞ្រើ 13:4

Ăn lĕ rngôch bunuyh yơk ma nau tâm gŭ ur sai, lơi ƀư ƀơ̆ ƀơch ma sưng bê̆ch ur sai; yorlah Brah Ndu mra tâm rmal phung tâm lâm jêh ri phung văng tĭr.

ហេឞ្រើ 2:6

Ƀiălah geh du ntŭk tâm Nau Brah Ndu Ngơi mbơh nkoch jêh pô aơ: “Mâm kon bunuyh jêng, kŏ Kôranh Brah kah gĭt ma khân păng? Mâm kon bunuyh jêng, kŏ Kôranh Brah mĭn rvê khân păng?

Yakơ 2:6

Ƀiălah khân may mưch rmot ma phung o ach. Mâu di phung ndrŏng hĕ tŭn jot khân may, têk khân may văch tanăp ntŭk ngih phat dôih?

Yakơ 5:4

Aơ, prăk nkhôm phung rek ba nkhôm tâm lôk mir khân may, khân may ntŭng prăp ma khân may nơm, dôl lŭng nter; jêh ri bâr nteh phung rek nây hao tât ta tôr Kôranh Brah geh lĕ nau brah.