I Phung Hađăch 9:7 - Nau Brah Ndu Ngơi 2023

⁷ nôk nây Gâp mra mprơh phung Israel du luh bơh neh Gâp hŏ ăn jêh ma khân păng. Bi ngih brah Gâp hŏ prăp êng jêng kloh ueh ma amoh Gâp, Gâp mra mƀăr lơi ngih luh bơh măt Gâp; jêh ri phung Israel mra jêng du bôk nau mprĭng ma lĕ rngôch phung ƀon lan ngơi hôr jêh ri gơm mpray.

I Phung Hađăch 9:7 ပူးပေါင်းရင်းမြစ်များ

I Phung Hađăch 11:10

hŏ ntĭnh jêh ma hađăch lơi ta tĭng phung brah êng ôh, ƀiălah hađăch mâu tông bâr ôh nau ntăm bơh Brah Yêhôva.

I Phung Hađăch 9:3

Brah Yêhôva lah ma păng pô aơ: “Gâp hŏ tăng jêh nau mbơh sơm jêh ri nau may ŭch dăn tanăp măt Gâp. Gâp prăp êng jêh ngih kloh ueh brah may hŏ ndâk, jêh ri dơm amoh Gâp ta nây n'ho ro. Măt jêh ri nuih n'hâm Gâp mra gŭ ta nây mro mrăng.

II Phung Hađăch 25:21

Hađăch Babilôn dong nkhĭt khân păng ta ƀon Ribla tâm n'gor Hamat. Pônây, bu nhŭp veng phung Yuđa tă bơh n'gor bri khân păng nơm.

II Phung Hađăch 25:9

Păng su rai ngih brah Brah Yêhôva, ngih hađăch, jêh ri lĕ rngôch ngih tâm ƀon Yêrusalem; păng su lĕ rngôch ngih phung ndrŏng.

II Nau Rêh Jêng 36:19

Khân păng su ngih Brah Ndu, mbang rlâm mpêr ƀon toyh Yêrusalem, sŏk ŭnh su lĕ ngih hađăch, jêh ri ƀư rai lĕ ƀhiau lĕ ndơ khlay tâm ƀon.

II Nau Rêh Jêng 7:20

nôk nây Gâp mra rôk lơi khân may luh du bơh bri Gâp hŏ ăn jêh ma khân may. Bi ma ngih brah Gâp hŏ ƀư kloh ueh ma amoh Gâp, Gâp mra mƀăr lơi păng bơh Gâp, jêh ri mra ăn păng jêng du bôk nau mprĭng ma lĕ rngôch phung ƀon lan ngơi hôr juar jêh ri gơm mpray.

Nau Mprơ Ơm 44:14

May ƀư ma hên jêng nau ngơi ta nklang lĕ bri dak, Tâm phung mpôl băl bunuyh mbu saơ hên ăt rteh bôk.

Nau Mprơ Ơm 44:15

Ăp nar nau bêk prêng gŭ tanăp gâp, Nau bêk prêng nkŭm muh măt gâp.

Nau Mprơ Ơm 69:11

Gâp sŏk bok ƀau nsoh ƀư ao Pôri gâp jêng nau pâl gơm ma khân păng.

Êsai 65:15

Bu mra prăp amoh săk khân may Gay ma phung Gâp săch jêh ƀư nau rak rtăp; Kôranh Brah Yêhôva mra nkhĭt khân may, Ƀiălah Păng mra rnha phung oh mon Păng ma amoh êng.

Yêrêmi 24:9

Gâp mra njêng ăn khân păng plơ̆ jêng nau nkrit, du nau mhĭk tât ma lĕ rngôch ƀon bri hađăch ta neh ntu; du nau prêng, du nau bu gơm mưch, du nau ngơi mhĭk, du nau bu rak rtăp tâm lĕ rngôch ntŭk Gâp mprơh khân păng tât.

Yêrêmi 25:9

aơ, Gâp mra prơh hăn lĕ rngôch băl mpôl bunuyh tâm bri mpeh pa lơ jêh ri Y-Nêbukatnetsar, hađăch bri Babilôn, oh mon Gâp, tât tâm rdâng đah bri aơ jêh ri ƀon lan gŭ tâm bri păng, ndrel ma lĕ rngôch bri dak gŭ văr jŭm nây. Gâp mra ƀư rai khân păng, ƀư ăn ma khân păng jêng du ntil ndơ ƀơ̆ bơch, du nau bu gơm mưch, du ntŭk jêng rngot njăp n'ho ro.’ Brah Yêhôva lah pônây.

Yêrêmi 26:18

“Y-Mika gŭ tâm ƀon Môrêset, nơm mbơh lor tâm rnôk Y-Hêsêkia, hađăch Yuđa, hŏ ngơi ma lĕ rngôch phung ƀon lan n'gor Yuđa pô aơ: Brah Yêhôva ma phung tahan lah: ‘Siôn bu mra chuar nâm bu lôk mir, Yêrusalem mra jêng du mbŭch rlâm rai nchah rngot njăp, Yôk ngih brah mra jêng yôk bri krŏng.’

Yêrêmi 26:6

pôri Gâp mra phat ma ngih aơ nâm bu hŏ phat jêh ma ƀon Silô, jêh ri ƀư ma ƀon aơ jêng du nau rak rtăp ta nklang lĕ rngôch bri dak ta neh ntu.’”

Yêrêmi 44:8

Mâm ƀư khân may nsônh nuih Gâp ma kan ti khân ay may ƀư? Tâm n'gor bri Êjipt, ntŭk khân may mhe văch gŭ, khân may hŏ nhhơr ndơ ƀâu kah ăn ma phung brah êng kŏ tât dơn êng nau bu ƀư ngroh lơi, jêh ri jêng nau rak rtăp jêh ri bu ntêh rmot ta nklang lĕ rngôch ƀon lan ta neh ntu.

Yêrêmi 52:13

Păng ntrŭnh su rai ngih brah Brah Yêhôva, ngih hađăch jêh ri lĕ rngôch ngih tâm ƀon Yêrusalem, jêh ri su lĕ rngôch ngih toyh phung ndrŏng.

Nau Nhĭm Vơl 1:8

Ƀon Yêrusalem ƀư tih jâk jêr, Yor nây, lĕ jêng ƀơ̆ ƀơch jêh; Lĕ rngôch phung tă yơk ma păng aƀaơ ri gơm mưch ma păng, Yorlah khân păng saơ nau rhôk păng. Păng nơm vah vơl êng Jêh ri plơ̆ pôn muh măt.

Nau Nhĭm Vơl 2:17

Brah Yêhôva ƀư ngăn jêh nau Păng ŭch ƀư, Ƀư nau Păng hŏ lah jêh; Nâm bu nau Păng ntĭnh bơh jŏ kăl e, Păng hŏ n'glưh lơi jêh mâu geh nau yô̆ ôh; Păng ƀư ăn ma phung rlăng may maak yor ma may, N'hao prêh nke phung rlăng may.

Êsêkiêl 24:21

‘Lah hom ma ngih Israel pô aơ: Kôranh Brah Yêhôva lah: Aơ Gâp mra ƀư ƀơ̆ ntŭk kloh ueh Gâp, jêng ntŭk khân may ƀư sŏk nau khư ma nau ktang khân may, trôm măt khân may ŭch kơnh, nuih n'hâm khân may rŏng. Kon bu ur, kon bu klâu khân may hŏ chalơi jêh mra cha lôt khĭt yor ma đao.

Êsêkiêl 5:15

Tơlah Gâp hao ji nuih phat dôih may, nkhŭt nau ji nuih nduyh nkra may, pôri may mra jêng bêk prêng jêh ri nau bu mưch rmot, nau mbơh lor jêh ri nau krit toyh ăn ma bri dak gŭ jŭm may. Gâp yơh jêng Brah Yêhôva lah pônây!

Ndrom Samƀŭt bơh Ôsê 9:3

Khân păng mâu mra gŭ tâm bri Brah Yêhôva ôh Ƀiălah Êphraim mra plơ̆ sĭt ma n'gor Êjipt Jêh ri mra sa ndơ sa ƀơ̆ ƀơch tâm bri Asiri.

Yôel 2:17

Phung kôranh ƀư brah jêng phung pah kan ma Brah Yêhôva, Nhhiăng nhĭm hom, nter kuăl ta nklang mpông ngih brah jêh ri ta nơng ƀư brah pô aơ: “Ơ Brah Yêhôva, dăn yô̆ nđach ma ƀon lan May, Lơi ăn drăp ndơn May phung mpôl băl bunuyh ƀư bêk prêng jêh ri mưch gơm. Mâm ăn bu ngơi ta nklang phung mpôl băl bunuyh lah pô aơ: ‘Ta ntŭk gŭ Brah Ndu khân păng?’”

Mika 3:12

Pônây, yor khân may Siôn bu mra chuar nâm bu lôk mir; Yêrusalem mra jêng du mbŭch rlâm rai, Jêh ri yôk ngih brah mra jêng nâm bu yôk bri krŏng!

Mathay 23:38

Aơ, ngih khân may mra jêng rngol!

Mathay 24:2

Păng lah: “Khân may saơ lĕ rngôch ndơ nây di ƀơh? Nanê̆, Gâp lah ma khân may, ntŭk aơ mâu mra hôm geh du mâm lŭ tâm dăp gŭ ta klơ mlâm lŭ êng mâu mra tŭp.”

Luka 21:24

Bu mra nkhĭt khân păng ma đao bu njŭn khân păng jêng bu nă tâm lĕ rngôch mpôl băl, jêh ri phung bu năch mra jot ƀon Yêrusalem tâm dâng jâng khân păng, tât rnôk phung bu năch mra ƀư lĕ.

Nau Vay Nkah Tay 28:37

Jêh ri khân may mra jêng du nau krit kir, du nau bu gơm jêh ri du nau ngơi srơh mbơh bir ta nklang phung ƀon lan Brah Yêhôva mra njŭn khân may tât.

Nau Vay Nkah Tay 4:26

pôri nar aơ gâp kuăl trôk jêh ri neh ntu gay mbơh pô aơ, khân may mra gơnh roh lĕ bơh n'gor khân may bơi dơn jêng drăp ndơn đah ri dak krong Yurdan; khân may mâu mra dơi gŭ jŏ ta nây ôh ƀiălah bu mra nkhĭt khân may lĕ ƀhiau.

Yôsuê 23:16

Tơlah khân may rlau nau tâm rnglăp Yêhôva Brah Ndu khân may ntĭnh ntăm jêh ma khân may, jêh ri hăn pah kan ma phung brah êng jêh ri chon mon mbah panăp khân păng, rnôk nây Brah Yêhôva mra hao ji nuih ma khân may, jêh ri khân may mra rai yot gơnh ngăn bơh bri ueh Păng hŏ ăn jêh ma khân may.”

I Samuel 15:11

“Gâp lĕ nhhuach jêh njêng ăn ma Y-Sôl jêng hađăch, yorlah păng ndôn kơi tă bơh Gâp, mâu ƀư tĭng nâm nau Gâp ntăm.” Y-Samuel rngot ngăn, jêh ri păng vơl dăn ma Brah Yêhôva du măng kŏ ang.