I Phung Hađăch 9:3 - Nau Brah Ndu Ngơi 2023

³ Brah Yêhôva lah ma păng pô aơ: “Gâp hŏ tăng jêh nau mbơh sơm jêh ri nau may ŭch dăn tanăp măt Gâp. Gâp prăp êng jêh ngih kloh ueh brah may hŏ ndâk, jêh ri dơm amoh Gâp ta nây n'ho ro. Măt jêh ri nuih n'hâm Gâp mra gŭ ta nây mro mrăng.

I Phung Hađăch 9:3 ပူးပေါင်းရင်းမြစ်များ

I Phung Hađăch 8:29

Dăn măt Kôranh Brah nar jêh ri măng uănh treng ngih aơ, jêng ntŭk Kôranh Brah hŏ lah pô aơ: ‘Amoh Gâp gŭ ta nây,’ gay tăng nau mbơh sơm oh mon May rle mpeh ntŭk aơ.

II Phung Hađăch 20:5

“Plơ̆ tay hom lah ma Y-Hêsêkia, kôranh ma phung ƀon lan Gâp, pô aơ Yêhôva Brah Ndu Y-Đavit, chô yau may, lah kơt aơ: ‘Gâp tăng jêh nau may mbơh sơm jêh ri saơ jêh dak măt may hoch. Aơ, Gâp mra ƀư bah may; tât nar rơh pe, may mra hăn hao ma ngih Brah Yêhôva.

II Phung Hađăch 21:7

Bi ma rup brah Asêrah păng hŏ ƀư, pôri păng ndâk tâm trôm ngih Brah Yêhôva lah jêh ma Y-Đavit jêh ri Y-Salômôn, kon bu klâu păng, pô aơ: “Tâm ngih aơ jêh ri ta ƀon Yêrusalem, ntŭk Gâp lĕ săch jêh tâm lĕ rngôch ndŭl mpôl phung Israel, jêng ntŭk Gâp mra dơm amoh Gâp gŭ n'ho ro.

II Nau Rêh Jêng 33:7

Păng ƀư rup brah jêh ri n'gân tâm ngih Brah Ndu, jêng ntŭk Brah Ndu lah jêh ma Y-Đavit jêh ri ma Y-Salômôn, kon bu klâu păng, pô aơ: “Tâm ngih brah aơ jêh ri ta ƀon Yêrusalem, jêng ƀon Gâp hŏ săch jêh tâm lĕ rngôch ndŭl mpôl phung Israel, Gâp mra dơm amoh Gâp gŭ n'ho ro.

II Nau Rêh Jêng 6:40

Ơ Brah Ndu gâp ơi! Aƀaơ ri, dăn ma măt May uănh treng jêh ri rkêng tôr iăt ma nau mbơh sơm tâm ntŭk aơ.

Êsra 6:12

Dăn Brah Ndu, Nơm hŏ ƀư ăn jêh amoh Păng gŭ tâm ngih brah nây, mra ƀư rai lơi mbu moh hađăch, mâu lah mbu phung ƀon lan yơr ti ŭch rgâl lơi nau ntrŭnh aơ gay ƀư rai lơi ngih Brah Ndu ta Yêrusalem. Gâp jêng Darius ăn samƀŭt nau ntrŭnh aơ. Srôih hom ƀư ăn di nau aơ!”

Nau Mprơ Ơm 10:17

Ơ Brah Yêhôva, May hŏ iăt jêh nau ŭch phung dêh rhêt; May ăn khân păng nâp nuih n'hâm, jêh ri rkêng tôr iăt khân păng

Nau Mprơ Ơm 116:1

Gâp rŏng ma Brah Yêhôva Yorlah Păng iăt bâr gâp jêh ri nau gâp vơh vơl.

Nau Mprơ Ơm 34:17

Phung sŏng srăng nter kuăl, Brah Yêhôva iăt, Jêh ri tâm rklaih nơm nây bơh lĕ nau rêh ni.

Nau Mprơ Ơm 65:3

Nđâp tơlah nau djơh mhĭk dơi lơn ma gâp, Ƀiălah May yô̆ an nau tih hên.

Nau Mprơ Ơm 66:19

Ƀiălah nanê̆ Brah Ndu hŏ tăng jêh; Păng rkêng jêh tôr iăt nau gâp mbơh sơm.

Nau Ngluh Êjipt 20:11

Yorlah tâm prao nar Brah Yêhôva hŏ rhăk njêng trôk, neh ntu, dak mƀŭt, jêh ri lĕ rngôch mpa gŭ tâm nây, ƀiălah Păng rlu tâm nar pơh. Yor ri, Brah Yêhôva ăn nau ueh uĭn ma nar rlu jêh ri ƀư kloh ueh nar nây.

Nau Ngluh Êjipt 29:44

Gâp mra ƀư kloh ueh Ngih Bok Nau Tâm Rƀŭn jêh ri nơng ƀư brah tâm ban đŏng ƀư kloh ueh Y-Arôn jêh ri phung kon bu klâu păng gay ma khân păng ƀư nau kan ndơ ƀư brah ma Gâp.

Yêrêmi 15:1

Brah Yêhôva lah ma gâp; “Nđâp lah Y-Môis jêh ri Y-Samuel dâk panăp măt Gâp, nuih n'hâm Gâp mâu hôm n'gĭl uănh ma phung ƀon lan aơ ôh. Mprơh hom khân păng bơh Gâp, jêh ri đă khân păng hăn du!

Yêrêmi 7:10

Mâm khân may hăn lăp ngih aơ, jêng ntŭk bu ntơ ma amoh Gâp, dâk tanăp Gâp jêh ri lah: “Hên hŏ dơi rklaih jêh!” Khân may ƀư pônây gay ƀư tih tay đŏng lĕ ntil nau tâm rmot nây.

Daniel 9:23

Tơlah may ntơm mbơh sơm pôri nau luh jêh, jêh ri gâp văch mbơh nau nây ma may, yorlah may jêng nơm bu rŏng ngăn. Pônây mĭn hom nau nây jêh ri gĭt rbăng nau tâm saơ.

Nau Kơp Bunuyh 16:38

Bi lĕ khăl gŭch ƀâu kah phung bunuyh ƀư tih jêh ri kŏ tât roh nau rêh khân păng; pôri ăn bu chiăr jêng lĕ pŏk n'hơ gay nkŭm nơng ƀư brah, yorlah lĕ khăl gŭch ƀâu kah nây hŏ nhhơr panăp Brah Yêhôva jêh ri jêng kloh ueh jêh. Pôri khân păng jêng du ndơ tâm mbên ma phung ƀon lan Israel.”

Mathay 6:9

Pôri, ăn khân may mbơh sơm pô aơ: ‘Ơ Mbơ̆ hên gŭ tâm trôk ơi; Ăn amoh May bu yơk ma nau kloh ueh.

Yôhan 11:42

Gâp gĭt lĕ Mbơ̆ dơn nau Gâp ƀaƀơ, ƀiălah Gâp lah nau aơ yorlah geh âk ngăn bunuyh gŭ jŭm ta aơ, gay ma khân păng chroh ma Mbơ̆ hŏ njuăl Gâp văch.”

Kôranh Oh Mon 10:31

jêh ri lah: ‘Hơi Kôrnei, Brah Ndu tăng jêh nau may mbơh sơm jêh ri Păng kah gĭt ma nau may ăn yô̆ ma bu.

Nau Vay Nkah Tay 11:12

jêng n'gor Yêhôva Brah Ndu khân may mât mray. Măt Yêhôva Brah Ndu khân may uănh treng ƀaƀơ n'gor nây bơh bôk năm tât lôch năm.

Nau Vay Nkah Tay 12:11

Nôk nây mra geh du ntŭk Yêhôva Brah Ndu khân may mra săch an gay amoh Păng gŭ ta nây jêh ri jêng ntŭk khân may mra njŭn lĕ rngôch ndơ gâp hŏ ntĭnh ma khân may tâm ban ndơ ƀư brah gŭch, lĕ mpa ƀư brah, tê̆ pi du kô̆ tâm jât, ndơ nhhơr yơr, jêh ri lĕ ndơ nhhơr ƀư nanê̆ nau ton bơh khân may ton nhhơr ma Brah Yêhôva.

Nau Vay Nkah Tay 12:21

Tơlah ntŭk Yêhôva Brah Ndu săch gay dơm amoh Păng ngai ir đah ntŭk khân may, pôri khân may dơi nkhĭt ndrôk mâu lah biăp, ndơ Yêhôva Brah Ndu ăn jêh ma khân may tĭng nâm gâp hŏ ntĭnh jêh, jêh nây sa tâm ăp ƀon toyh khân may nơm ndah dŭm khân may ŭch.

Nau Vay Nkah Tay 12:5

Ƀiălah ăn khân may joi ntŭk Yêhôva Brah Ndu mra săch tă bơh ta nklang lĕ rngôch ndŭl mpôl khân may gay dơm amoh Păng, jêng ntŭk Păng gŭ jêh ri jêng ntŭk khân may mra hăn tât.

Nau Vay Nkah Tay 16:11

Ăn khân may nđâp ma phung kon bu klâu, kon bu ur, nơm kơl kan bu klâu jêh ri bu ur khân may, phung Lêvi gŭ tâm ƀon khân may, bu năch, kon đơi, jêh ri bu ur ndrô gŭ ta nklang khân may, răm maak hom văch rƀŭn ta ntŭk Yêhôva Brah Ndu mra săch gay ăn amoh Păng gŭ ta nây.

I Yôhan 5:14

Aơ jêng nau nuih n'hâm nâp phung he geh tanăp Brah Ndu: Nây jêng tơlah he mbơh sơm dăn moh ndơ tĭng nâm Păng ŭch, Păng iăt nau he.