I Phung Hađăch 8:29 - Nau Brah Ndu Ngơi 2023

²⁹ Dăn măt Kôranh Brah nar jêh ri măng uănh treng ngih aơ, jêng ntŭk Kôranh Brah hŏ lah pô aơ: ‘Amoh Gâp gŭ ta nây,’ gay tăng nau mbơh sơm oh mon May rle mpeh ntŭk aơ.

I Phung Hađăch 8:29 ပူးပေါင်းရင်းမြစ်များ

I Phung Hađăch 11:13

Nđâp tơlah pônây, Gâp mâu mra sŏk ôh lĕ rngôch ƀon bri hađăch tă bơh păng; ƀiălah yor Y-Đavit, oh mon Gâp, jêh ri yor Yêrusalem ntŭk Gâp hŏ săch jêh, Gâp mra ăn tay ma du ndŭl mpôl kon bu klâu may.”

I Phung Hađăch 11:36

Gâp mra prăp du ndŭl mpôl ma kon bu klâu păng, gay ăn ma Y-Đavit, oh mon Gâp, dơi geh bunuyh thoi sưng hađăch n'ho ro tanăp măt Gâp ta Yêrusalem, jêng ƀon Gâp săch jêh gay dơm amoh Gâp ta nây.

I Phung Hađăch 14:21

Y-Rôbôam, kon bu klâu Y-Salômôn, chiă uănh tâm Yuđa. Tơlah gŭ ta sưng hađăch, Y-Rôbôam hŏ geh puăn jât ma nguay năm. Hađăch chiă uănh jât ma pơh năm tâm ƀon Yêrusalem, ƀon Brah Yêhôva hŏ săch tâm phung ndŭl mpôl Israel, gay dơm amoh Păng ta nây. Mê̆ păng amoh jêng H'Naama, bunuyh Ammôn.

I Phung Hađăch 8:16

‘Ntơm bơh nar Gâp hŏ njŭn leo phung ƀon lan Gâp jêng Israel du luh tă bơh Êjipt, Gâp mâu mâp săch ôh du rplay ƀon êng tâm lĕ rngôch ndŭl mpôl Israel gay ndâk du mlâm ngih brah ma amoh Gâp gŭ ta nây. Ƀiălah Gâp hŏ săch Y-Đavit gay păng chiă uănh phung ƀon lan Israel Gâp.’

I Phung Hađăch 8:43

pôri dăn Kôranh Brah ta klơ trôk, jêng ntŭk May gŭ, rkêng tôr iăt jêh ri ƀư ma khân păng lĕ nau khân păng mbơh sơm dăn ma May, gay ma lĕ rngôch phung ƀon lan ta neh ntu dơi gĭt năl amoh Kôranh Brah jêh ri klach yơk ma May nâm bu phung ƀon lan Israel May, jêh ri gay ma bu gĭt năl ngih brah aơ gâp ndâk jêh ma May bu ntơ tâm amoh May.

I Phung Hađăch 8:52

Dăn măt Kôranh Brah uănh treng ma oh mon May jêh ri phung ƀon lan Israel May, rkêng tôr iăt nau mbơh sơm jêh ri nau khân păng vơl tơlah khân păng nter dăn ma May.

I Phung Hađăch 9:3

Brah Yêhôva lah ma păng pô aơ: “Gâp hŏ tăng jêh nau mbơh sơm jêh ri nau may ŭch dăn tanăp măt Gâp. Gâp prăp êng jêh ngih kloh ueh brah may hŏ ndâk, jêh ri dơm amoh Gâp ta nây n'ho ro. Măt jêh ri nuih n'hâm Gâp mra gŭ ta nây mro mrăng.

II Phung Hađăch 19:16

Ơ Brah Yêhôva, dăn ma may rkêng hom tôr jêh ri iăt! Ơ Brah Yêhôva, dăn ma may lin hom măt jêh ri uănh treng! Iăt hom lĕ nau ngơi Y-Sênakêrip njuăl tât gay mưch rmot ma Brah Ndu gŭ rêh mro mrăng.

II Phung Hađăch 21:4

Păng ndâk lĕ nơng ƀư brah tâm ngih Brah Yêhôva, jêng ntŭk Brah Yêhôva lah jêh pô aơ: “Tâm ƀon Yêrusalem, Gâp mra dơm amoh Gâp ta nây.”

II Phung Hađăch 21:7

Bi ma rup brah Asêrah păng hŏ ƀư, pôri păng ndâk tâm trôm ngih Brah Yêhôva lah jêh ma Y-Đavit jêh ri Y-Salômôn, kon bu klâu păng, pô aơ: “Tâm ngih aơ jêh ri ta ƀon Yêrusalem, ntŭk Gâp lĕ săch jêh tâm lĕ rngôch ndŭl mpôl phung Israel, jêng ntŭk Gâp mra dơm amoh Gâp gŭ n'ho ro.

II Phung Hađăch 23:27

Brah Yêhôva lah: “Gâp mra mprơh du phung Yuđa tă bơh tanăp măt Gâp, nâm bu Gâp mprơh jêh phung Israel. Gâp mra chalơi ƀon Yêrusalem, ƀon Gâp hŏ săch jêh, tâm ban đŏng ngih brah Gâp lah ma păng pô aơ: ‘Amoh Gâp mra gŭ ta nây.’”

II Nau Rêh Jêng 16:9

Yorlah măt Brah Yêhôva uănh treng tâm lam neh ntu gay kơl nau ktang ma phung geh nuih n'hâm ueh đah Păng. Tâm nau aơ, may hŏ gŭ ngao ma nau rluk; yorlah ntơm aƀaơ rlet ô klak, may mra geh nau tâm lơh ƀaƀơ.”

II Nau Rêh Jêng 20:8

Khân păng gŭ jêh ta nây jêh ri ndâk jêh ma amoh May du ngih brah kloh ueh, jêh ri lah pô aơ:

II Nau Rêh Jêng 33:4

Păng ndâk lĕ nơng ƀư brah tâm ngih Brah Yêhôva jêng ntŭk Brah Yêhôva hŏ lah: “Amoh Gâp mra gŭ tâm ƀon Yêrusalem n'ho ro.”

II Nau Rêh Jêng 33:7

Păng ƀư rup brah jêh ri n'gân tâm ngih Brah Ndu, jêng ntŭk Brah Ndu lah jêh ma Y-Đavit jêh ri ma Y-Salômôn, kon bu klâu păng, pô aơ: “Tâm ngih brah aơ jêh ri ta ƀon Yêrusalem, jêng ƀon Gâp hŏ săch jêh tâm lĕ rngôch ndŭl mpôl phung Israel, Gâp mra dơm amoh Gâp gŭ n'ho ro.

II Nau Rêh Jêng 6:20

Dăn măt May uănh ma ngih aơ măng nâm nar, jêng ntŭk May hŏ ton jêh mra dơm amoh May ta nây, jêh ri dăn May rkêng tôr iăt nau oh mon May rle mpeh ntŭk nây gay kuăl mbơh sơm.

II Nau Rêh Jêng 6:40

Ơ Brah Ndu gâp ơi! Aƀaơ ri, dăn ma măt May uănh treng jêh ri rkêng tôr iăt ma nau mbơh sơm tâm ntŭk aơ.

Nêhêmi 1:6

Dăn măt Kôranh Brah treng uănh jêh ri tôr Kôranh Brah iăt nau gâp mbơh sơm gâp jêng oh mon Kôranh Brah, nau gâp mbơh sơm ăp nar nâm măng yor phung ƀon lan Israel, jêng phung oh mon Kôranh Brah gŭ tanăp măt Kôranh Brah jêh ri mbơh lĕ nau tih hên jêng phung ƀon lan Israel, hŏ ƀư tih jêh đah May. N'hêl nanê̆, gâp jêh ri phung chô yau gâp hŏ ƀư tih.

Nêhêmi 1:9

bi tơlah khân may lah plơ̆ sĭt tay ma Gâp jêh ri djôt prăp lĕ nau vay Gâp ntăm, nđâp lah phung khân may lĕ nchah rai pru pra jêh tât bôl dŭt trôk, Gâp mra rgum tay rƀŭn khân păng plơ̆ sĭt jêh ri djôt leo khân may hăn tât ta ntŭk Gâp hŏ săch gay ăn amoh Gâp gŭ ta nây.’

Nau Mprơ Ơm 138:2

Gâp mra yơk mbah mpeh ma ngih brah kloh ueh May, Lah ueh ma amoh May yor nuih n'hâm ueh jêh ri nau răp jăp May. Yorlah Kôranh Brah hŏ ƀư ma nau May ngơi jêh ri amoh May Dơi geh nau yơk lơn đah lĕ rngôch.

Nau Mprơ Ơm 34:15

Măt Brah Yêhôva treng uănh ma phung sŏng srăng, Tôr Păng iăt bâr khân păng nter kuăl.

Nau Ngluh Êjipt 20:24

Ăn may ndâk ma Gâp nơng ƀư brah ma neh jêh ri ta klơ nây nhhơr ndơ ƀư brah gŭch, ndơ ƀư brah ma nau đăp mpăn, mâu lah biăp mâu lah ndrôk khân may. Ta ăp ntŭk Gâp mpơl amoh Gâp gay kah gĭt, Gâp mra văch jêh ri ăn nau ueh uĭn ma may.

Daniel 6:10

Tơlah Y-Daniel gĭt hađăch nchih amoh jêh tâm samƀŭt pôri păng lăp tâm ngih, hao tâm du jrô prêh, ntŭk geh mpông bloh jê̆ rle ma ƀon Yêrusalem. Ta nây, pe tơ̆ ăp nar păng chon kômâk mbơh sơm jêh ri mprơ tâm rnê ma Brah Ndu nâm bu păng vay ƀư ntơm saơm tât aƀaơ.

Daniel 9:18

Ơ Brah Ndu gâp, rkêng tôr iăt hom, ăn lin măt uănh ma nau hên jêng rngot njăp jêh ri ƀon toyh bu kuăl ma amoh May! Hên mâu vơl dăn ma May nsing yor nau sŏng srăng hên nơm, ƀiălah yor nau yô̆ May mâu blau lôch.

Sakari 12:4

Brah Yêhôva lah: “Tâm nar nây, Gâp mra rmal, ăn lĕ rngôch seh geh nau klach, ăn ma bunuyh ncho seh geh nau brŭt ndrăng. Ƀiălah Gâp mra lin măt uănh klơ ngih Yuđa, nôk Gâp mbang lĕ rngôch seh ndơ tâm lơh bơh phung mpôl băl bunuyh, ƀư ăn khân păng chieh măt.

Nau Vay Nkah Tay 12:11

Nôk nây mra geh du ntŭk Yêhôva Brah Ndu khân may mra săch an gay amoh Păng gŭ ta nây jêh ri jêng ntŭk khân may mra njŭn lĕ rngôch ndơ gâp hŏ ntĭnh ma khân may tâm ban ndơ ƀư brah gŭch, lĕ mpa ƀư brah, tê̆ pi du kô̆ tâm jât, ndơ nhhơr yơr, jêh ri lĕ ndơ nhhơr ƀư nanê̆ nau ton bơh khân may ton nhhơr ma Brah Yêhôva.

Nau Vay Nkah Tay 12:14

ƀiălah ăn khân may nhhơr ndơ ƀư brah gŭch ta ntŭk Brah Yêhôva săch tă bơh tâm du ndŭl mpôl khân may, jêh ri ta nây khân may mra ƀư tĭng kơt lĕ nau gâp ntăm ma khân may.

Nau Vay Nkah Tay 12:5

Ƀiălah ăn khân may joi ntŭk Yêhôva Brah Ndu mra săch tă bơh ta nklang lĕ rngôch ndŭl mpôl khân may gay dơm amoh Păng, jêng ntŭk Păng gŭ jêh ri jêng ntŭk khân may mra hăn tât.

Nau Vay Nkah Tay 16:2

Ăn khân may nhhơr mpa ƀư brah rƀŭn Nau Găn ma Yêhôva Brah Ndu khân may, sŏk bơh tâm mpôl phung biăp, be mâu lah ndrôk ta ntŭk Yêhôva mra săch gay ma dơm amoh Păng ta nây.

Nau Vay Nkah Tay 16:6

ƀiălah knŏng ta ntŭk Yêhôva Brah Ndu khân may mra săch gay ăn amoh Păng gŭ ta nây. Ta nây ăn khân may nhhơr mpa ƀư brah Nau Găn tâm kêng mhaơ, ta nar lĕ nhâp, jêng rnôk khân may luh bơh n'gor Êjipt.

Nau Vay Nkah Tay 26:2

pôri ăn khân may sŏk du kô̆ play dak bôk yan tâm n'gor Yêhôva Brah Ndu ăn jêh ma khân may, nklăch tâm du mlâm bĭ, jêh ri djôt leo tât ta ntŭk Yêhôva Brah Ndu khân may mra săch amoh păng gŭ ta nây.