I Phung Hađăch 22:14 - Nau Brah Ndu Ngơi 2023

¹⁴ Ƀiălah Y-Mika plơ̆ lah: “Gâp sŏk amoh Brah Yêhôva gŭ rêh mro mrăng gay sơm ton, gâp mra ngơi moh nau Brah Yêhôva lah ma gâp.”

I Phung Hađăch 22:14 ပူးပေါင်းရင်းမြစ်များ

I Phung Hađăch 17:1

Y-Êli, bunuyh Tisbê, jêng du huê tâm phung gŭ njưh tâm n'gor Gilêat, lah ma Y-Ahap pô aơ: “Gâp dâk panăp Brah Yêhôva jêng Brah Ndu gŭ rêh mro mrăng ma phung Israel gay sơm ton pô aơ: Tâm âk năm jêh aơ, tơlah mâu geh nau gâp ngơi, mâu mra geh dak ngom, mâu đŏng geh tŭp mih.”

I Phung Hađăch 18:10

Gâp ton tâm amoh Yêhôva Brah Ndu may gŭ rêh mro mrăng, kôranh gâp đă lĕ rngôch ƀon lan, lĕ bri dak hăn gay joi may. Jêh ri tơlah bu plơ̆ lah pô aơ: ‘Y-Êli mâu geh ta nây ôh,’ pôri hađăch ăn ƀon bri hađăch nây jêh ri ƀon lan nây ton săk khân păng mâu prot geh tâm mâp ôh đah may.

I Phung Hađăch 18:15

Y-Êli plơ̆ lah: “Gâp sŏk amoh Brah Yêhôva ma phung tahan gŭ rêh mro mrăng, jêng Nơm gâp pah kan, gay sơm ton pô aơ: Nar aơ gâp mra hăn tâm mâp đah Y-Ahap.”

I Phung Hađăch 22:13

Tâm nôk nây, phung mbơh hŏ hăn kuăl Y-Mika lah ma păng pô aơ: “Aơ, lĕ phung nơm mbơh lor ngơi du ai mbơh nau ueh ma hađăch. Dăn ma may ngơi hom nâm bu nau khân păng ngơi jêh ri mbơh nau ueh.”

Yêrêmi 23:28

Moh nơm mbơh lor geh nau mbơi, nkoch hom nau mbơi nây! Mbu nơm hŏ dơn jêh nau Gâp, răp jăp hom mbơh tay nau Gâp! Rhe dơi lĕ tâm rlŭk đah ba ƀlê?” Brah Yêhôva lah pônây.

Yêrêmi 34:6

Nơm mbơh lor Y-Yêrêmi ngơi lĕ nau nây ma Y-Sêdêkia, hađăch Yuđa, tâm ƀon Yêrusalem,

Yêrêmi 42:4

Nơm mbơh lor Y-Yêrêmi lah ma khân păng: “Gâp hŏ tăng jêh! Aơ, gâp mra mbơh sơm ma Yêhôva Brah Ndu khân may tĭng nâm nau khân may dăn. Gâp mra mbơh ma khân may gĭt lĕ ntil nau Brah Yêhôva plơ̆ lah ma khân may, mâu prăp tay du ntil nau ôh.”

Nau Kơp Bunuyh 22:18

Y-Balaam plơ̆ lah ma phung oh mon hađăch Balak pô aơ: “Nđâp tơlah Y-Balak ăn ma gâp ngih toyh bêng ma prăk mah păng kđôi, gâp mâu dơi rlau ôh nau ntăm Yêhôva Brah Ndu gâp gay ƀư du nau kan nđâp lah jê̆ mâu lah toyh.

Nau Kơp Bunuyh 22:38

Y-Balaam ơh nau ma Y-Balak pô aơ: “Aƀaơ, gâp văch jêh ma may, ƀiălah gâp geh lĕ nau dơi ngơi ƀaƀă aƀaơ ri? Gâp knŏng lah nau Brah Ndu dơm tâm trôm mbung gâp.”

Nau Kơp Bunuyh 22:8

Y-Balaam plơ̆ lah: “Bê̆ch hom ta aơ măng aơ jêh ri gâp mra plơ̆ lah ma khân may tĭng nâm Brah Yêhôva ngơi ma gâp.” Pôri phung kôranh chiă uănh n'gor Môap gŭ ndrel ma Y-Balaam.

Nau Kơp Bunuyh 24:13

‘Nđâp tơlah Y-Balak ăn ma gâp ngih toyh geh bêng ma prăk jêh ri mah, gâp mâu dơi ƀư rlau ir ôh ma nau ntăm bơh Brah Yêhôva ngơi jêh, ŭch ƀư nau ueh mâu lah ƀư nau mhĭk tĭng gâp nơm ŭch?’ Gâp knŏng ngơi moh nau Brah Yêhôva ntĭnh jêh!

II Kôrintô 2:17

Yorlah, hên mâu tăch rgâl ma nau ngơi Brah Ndu nâm bu âk bunuyh êng. Ƀiălah jêng bunuyh Brah Ndu njuăl hăn, hên mbơh nkoch ma nuih n'hâm răp jăp tâm Brah Krist, tanăp Brah Ndu.

II Kôrintô 4:2

Hên dun jêh lĕ nau kan ndâp pôn jêh ri khư geh nau bêk prêng; hên mâu sŏk nau ndơm mâu lah nau nchơt nklă nau Brah Ndu ngơi ôh. Ƀiălah, hên rblang rah vah ma nau ngăn, hên ăn ma nuih n'hâm sŏng lĕ rngôch bunuyh tâm nal ma hên tanăp Brah Ndu.

Galati 1:10

Bi aƀaơ aơ, gâp ŭch sŏk nuih n'hâm kon bunuyh mâu lah Brah Ndu? Di lĕ gâp ŭch ƀư maak nuih n'hâm ma bunuyh? Tơlah gâp ăt srôih ƀư maak nuih n'hâm ma kon bunuyh, gâp mâu di jêng oh mon ma Brah Krist ôh.