I Phung Hađăch 2:4 - Nau Brah Ndu Ngơi 2023

⁴ Nâm bu pônây, Brah Yêhôva mra ƀư tât di ngăn nau Păng ngơi jêh ma gâp pô aơ: ‘Tơlah phung kon sau may njrăng ma trong khân păng nơm, lĕ nuih n'hâm, lĕ huêng hăn tâm nau răp jăp tanăp măt Gâp, may mâu mra pưt ôh du huê nuyh gŭ ta sưng hađăch phung Israel.’

I Phung Hađăch 2:4 ပူးပေါင်းရင်းမြစ်များ

Nau Ntơm 17:1

Rnôk Y-Abram geh sĭn jât msĭn năm, Brah Yêhôva tâm mpơl đah păng jêh ri lah ma păng: “Gâp jêng Brah Ndu Geh Lĕ Nau Brah; ăn may hăn hom tanăp măt Gâp jêh ri gŭ rêh ueh sŏng srăng ngăn.

Nau Ntơm 18:19

Gâp săch jêh păng gay ntĭm nti ma phung kon sau jêh ri noi deh păng nar kăndơ̆ gĭt djôt prăp trong Brah Yêhôva, ƀư nau sŏng srăng jêh ri nau di, gay ăn Brah Yêhôva ƀư n'hêl nê̆ nau Păng hŏ ton jêh đah Y-Abraham.”

II Samuel 7:25

Pônây aƀaơ, hơi Yêhôva Brah Ndu! Dăn ƀư nâp ktang kŏ tât ƀaƀơ n'ho ro lĕ nau May ngơi jêh ma oh mon May jêh ri ma nau chiă uănh păng, jêh ri ƀư di tĭng nâm nau May ngơi jêh.

I Phung Hađăch 1:48

jêh ri mât ton ma Kôranh Brah: ‘Tâm rnê ma Yêhôva Brah Ndu phung Israel, jêng Nơm hŏ ăn ma du huê gŭ ta sưng hađăch gâp nar aơ, măt gâp nơm uănh saơ.’”

I Phung Hađăch 11:36

Gâp mra prăp du ndŭl mpôl ma kon bu klâu păng, gay ăn ma Y-Đavit, oh mon Gâp, dơi geh bunuyh thoi sưng hađăch n'ho ro tanăp măt Gâp ta Yêrusalem, jêng ƀon Gâp săch jêh gay dơm amoh Gâp ta nây.

I Phung Hađăch 3:14

Tơlah may chuat hăn tâm trong Gâp, djôt prăp lĕ nau vay dăp jêh ri lĕ nau vay Gâp ntăm, tâm ban mbơ̆ may jêng Y-Đavit hŏ chuat hăn, Gâp mra ăn ma may dơi rêh jŏ năm.”

I Phung Hađăch 3:3

Y-Salômôn yơk rŏng ma Brah Yêhôva yor ri chuat hăn tĭng nâm lĕ nau vay Y-Đavit dăp, mbơ̆ păng. Ƀiălah păng ăt hôm e nhhơr mpa ƀư brah jêh ri su n'hôl ƀâu kah ta lĕ ntŭk prêh klơ.

I Phung Hađăch 6:12

“Bi ma ngih brah may dôl ƀư aơ, tơlah may tông tĭng nâm lĕ nau vay dăp bơh Gâp, tĭng lĕ nau vay Gâp ƀư, djôt prăp jêh ri chuat hăn tĭng lĕ rngôch nau vay ntăm bơh Gâp, Gâp mra ƀư ma may nau ton Gâp hŏ ngơi jêh ma Y-Đavit, mbơ̆ may.

I Phung Hađăch 8:23

“Hơi Yêhôva, Brah Ndu Israel! Mâu geh brah êng klơ trôk prêh ri mâu lah tâm dâng neh ntu aơ tâm ban May. Kôranh Brah djôt prăp nau tâm rnglăp jêh ri nuih n'hâm ueh ma phung oh mon May, jêng phung lĕ nuih n'hâm chuat hăn tanăp măt May.

I Phung Hađăch 8:25

Pôri aƀaơ, ơ Yêhôva jêng Brah Ndu phung Israel! Dăn djôt prăp hom nau Kôranh Brah hŏ ton đah oh mon May jêng Y-Đavit, mbơ̆ gâp, pô aơ: ‘Tơlah phung kon sau may njrăng tâm trong khân păng nơm, chuat hăn tanăp Gâp nâm bu may hŏ chuat hăn jêh, pôri tanăp Gâp, may mâu mra pưt ôh du huê bunuyh gŭ ta sưng hađăch phung Israel.’

I Phung Hađăch 9:5

pôri Gâp mra ƀư ma sưng hađăch may dơi nâp ma phung Israel kŏ tât ƀaƀơ n'ho ro, di tĭng nâm Gâp ton jêh ma Y-Đavit, mbơ̆ may, pô aơ: ‘May mâu mra pưt ôh bunuyh chiă uănh thoi ntrok ta sưng hađăch phung Israel.’

II Phung Hađăch 20:3

“Ơ Brah Yêhôva, dăn kah gĭt hom pô aơ gâp hôm chuat hăn tanăp măt May ma nau răp jăp lĕ nuih n'hâm, jêh ri ƀư jêh nau ueh tanăp măt May.” Jêh nây Y-Hêsêkia nhĭm rngot ngăn.

II Phung Hađăch 23:25

Lor panăp Y-Jôsia, mâu mâp geh ôh du huê hađăch tâm ban ma păng, nơm plơ̆ sĭt ma Brah Yêhôva ma lĕ nuih n'hâm, ma lĕ huêng, jêh ri ma lĕ nau ktang păng, tĭng nâm lĕ nau vay Y-Môis tâm ban ma păng; jêh ri pakơi Y-Jôsia mâu đŏng geh nơm ƀư tâm ban kơt nây.

II Phung Hađăch 23:3

Hađăch dâk tâm knưl prêh jêh ri ƀư nau tâm rnglăp tanăp Brah Yêhôva, ton chuat tĭng Brah Yêhôva, jêh ri ma lĕ nuih n'hâm, ma lĕ huêng djôt prăp lĕ nau vay ntăm, nau ntrŭnh, jêh ri nau vay dăp bơh Păng, gay ƀư tĭng nau ngơi ma nau tâm rnglăp hŏ nchih jêh tâm ndrom samƀŭt aơ. Lĕ rngôch phung ƀon lan ton nanê̆ da dê ƀư nau tâm rnglăp nây.

I Nau Rêh Jêng 28:9

Bi may, Y-Salômôn, kon bu klâu gâp, gĭt năl hom Brah Ndu mbơ̆ may, pah kan hom ma Păng ma lĕ nuih n'hâm jêh ri ma lĕ nau mĭn; yorlah Brah Yêhôva sek uănh lĕ nuih n'hâm, jêh ri păng gĭt vât lĕ rngôch nau ŭch tâm nau mĭn. Tơlah may joi Păng, Păng mra ăn may saơ Păng; ƀiălah tơlah may chalơi Păng, nanê̆ Păng mra chalơi may n'ho ro.

II Nau Rêh Jêng 17:3

Brah Yêhôva gŭ ndrel ma Y-Jôsaphat, yorlah păng tĭng ndô̆ trong Y-Đavit hŏ hăn ntơm saơm, chô yau păng, hŏ hăn jêh, mâu joi brah Baal ôh,

II Nau Rêh Jêng 6:16

Ơ Yêhôva Brah Ndu phung Israel! May hŏ ton đah oh mon May jêng Y-Đavit, mbơ̆ gâp, pô aơ: ‘Tơlah phung kon sau may njrăng tâm trong khân păng nơm, djôt prăp nau vay Gâp ntăm tâm ban may hŏ ƀư jêh tanăp Gâp, may mâu mra pưt ôh du huê bunuyh gŭ ta sưng hađăch phung Israel.’ Aƀaơ aơ, dăn May djôt prăp nau May hŏ ton.

II Nau Rêh Jêng 7:18

pôri Gâp mra ƀư ma sưng hađăch may dơi nâp nâm bu nau tâm rnglăp Gâp ƀư jêh đah Y-Đavit, mbơ̆ may pô aơ: ‘May mâu mra pưt ôh bunuyh chiă uănh phung Israel.’

Nau Mprơ Ơm 119:9

Mâm bunuyh mom mra ƀư tâm trong păng nơm gay geh nau kloh? Ăn njrăng ƀư tĭng nau ngơi Kôranh Brah.

Nau Mprơ Ơm 37:22

Yorlah phung Brah Ndu ăn nau ueh uĭn mra dơn neh, Bi ma phung Păng rak rtăp mra rai yot.

Nau Mprơ Ơm 37:9

Yorlah phung mhĭk mra geh nau rai yot, Ƀiălah mbu nơm kâp gân Brah Yêhôva mra geh neh ƀư drăp ndơn.

Nau Mprơ Ơm 39:1

Gâp lah pô aơ: “Gâp mra prăp lĕ trong gâp, Gay prăp mpiăt gâp mâu ƀư tih: Tơlah dôl phung mhĭk gŭ tanăp gâp, Gâp mra mêm lơi trôm mbung gâp.

Yêrêmi 33:17

Brah Yêhôva lah: ‘Y-Đavit mâu mra pưt ôh du huê bunuyh gŭ ta sưng hađăch ngih Israel;

Kan Lêvi 26:3

Tơlah Khân may hăn tĭng nâm nau vay dăp bơh Gâp, mât mray lĕ nau vay ntăm bơh Gâp jêh ri ƀư tĭng kơt,

Sakari 14:2

Gâp mra rgum lĕ rngôch bri dak tâm lơh đah ƀon Yêrusalem. Bu mra sŏk gro ƀon toyh, bu pit in ngih vâl, phung bu ur bu mra nchâp gay bê̆ch ndrel; n'gul ƀon mra hăn ƀư bu nă, ƀiălah phung ƀon lan hôm e bu mâu mprơh ngluh ôh tă bơh ƀon.

Mathay 22:37

Brah Yêsu plơ̆ lah: “‘Ăn may yơk rŏng ma Kôranh Brah jêng Brah Ndu may ma lĕ nuih n'hâm, ma lĕ huêng, jêh ri ma lĕ nau mĭn.’

Luka 1:6

Lĕ bar hê jêng bunuyh sŏng srăng tanăp Brah Ndu, tông djôt prăp lĕ nau vay jêh ri tĭng nau ntĭm Kôranh Brah ntăm nŭm rĭng ngăn.

Nau Vay Nkah Tay 10:12

“Pôri, Hơi phung Israel, aƀaơ aơ moh nau Yêhôva Brah Ndu khân may gay ŭch ăn khân may ƀư, knŏng klach yơk ma Yêhôva Brah Ndu, hăn tâm trong Păng, rŏng ma păng lĕ nuih n'hâm, ma lĕ huêng may jêh ri pah kan ma Yêhôva Brah Ndu,

Nau Vay Nkah Tay 11:13

Pônây tơlah khân may tông ngăn lĕ nau vay ntăm bơh gâp ntĭnh ma khân may nar aơ, rŏng ma Yêhôva Brah Ndu khân may jêh ri pah kan ma Păng ma lĕ nuih n'hâm, ma lĕ huêng khân may,

Nau Vay Nkah Tay 6:5

Ăn khân may yơk rŏng ma Yêhôva Brah Ndu khân may ma lĕ nuih n'hâm, ma lĕ huêng, jêh ri ma lĕ n'hâm suan.

Nau Vay Nkah Tay 7:12

Tơlah khân may hŏ tăng jêh nau vay aơ, djôt prăp jêh ri tĭng kơt, pôri ma đah khân may Yêhôva Brah Ndu mra djôt prăp nau tâm rnglăp jêh ri nau ueh Păng hŏ ton ma phung chô yau khân may.

Yuđas 1:24

Mbơh sơm dăn Nơm geh nau brah djôt prăp khân may bơh nau chêh prah jêh ri ƀư ma khân may dâk tanăp nau chrêk rmah Păng mâu geh têl khap, jêh ri tâm nau răm maak,